Karong Adlawa
Ang atong buhi nga propeta naghimo sa iyang bahin aron ipakatap sa yuta ang Basahon ni Mormon. Kita kinahanglang mosunod kaniya.
Akong minahal nga mga kaigsoonan, diha sa Basahon ni Mormon ang mga pulong nga “karong adlawa”1 balik-balik nga gigamit aron paghatag og pagtagad sa tambag, mga saad, ug mga pagtulon-an. Si Hari Benjamin, sa iyang kataposang pakigpulong, miawhag sa mga tawo, nga “[Paminawa] ang akong mga pulong diin ako namulong nganha kaninyo karong adlawa; … [ablihi] ang inyong mga dunggan nga kamo unta makadungog, ug [ang] inyong mga kasingkasing nga kamo unta makasabot, ug [ang] inyong mga hunahuna nga ang mga misteryo sa Dios unta mabuksan sa inyong panan-aw.”2 Ang kinatibuk-ang komperensiya usa ka susama niana nga kahimtang. Kita mianhi aron maminaw sa tambag “karong adlawa,” nga kita unta “matinud-anon sa tanan nga panahon”3 ngadto sa Ginoo ug sa Iyang ebanghelyo. Ang gibati gayod nako “karong adlawa” mao ang kaimportante sa pagbag-o sa atong pasalig ngadto sa Basahon ni Mormon, nga gitawag ni Joseph Smith nga “ang labing tukma sa bisan hain nga basahon dinhi sa yuta.”4
Ako nagkupot og kopya sa Basahon ni Mormon. Kini ang akong 1970 nga karaang edisyon, ug bililhon kini nako. Sa panagway niini karaan kini ug guba na, apan walay laing basahon nga ingon kaimportante sa akong kinabuhi ug sa akong pagpamatuod sama niini. Sa pagbasa niini, ako nakabaton og pagsaksi pinaagi sa Espiritu nga si Jesukristo mao ang Anak sa Dios,5 nga Siya mao ang akong Manluluwas,6 nga kini nga mga kasulatan mga pulong sa Dios,7 ug nga ang ebanghelyo gipahiuli.8 Kadto nga mga kamatuoran kabahin na sa akong kinabuhi. Sama sa giingon ni propeta Nephi, “Ang akong kalag nalipay sa mga butang sa Ginoo.”9
Sa wala ngadto sa tuo: Elder Ronald A. Rasband, batan-ong misyonaryo; si Presidente Harold Wilkinson, presidente sa Eastern States Mission; ug si Elder Marion D. Hanks, General Authority Seventy.
Ania ang akong istorya kaniadto. Isip usa ka batan-ong misyonaryo, akong gituman ang tambag ni Elder Marion D. Hanks, kinsa mibisita namo sa Eastern States Mission. Siya ang kanhi presidente sa British Mission, ug duha sa iyang mga misyonaryo ania sa atubangan karon: ang akong minahal nga Kaigsoonan nga si Elder Jeffrey R. Holland ug si Elder Quentin L. Cook.10 Sama sa iyang mga misyonaryo sa England, siya mihagit namo sa pagbasa og wala markahi nga kopya sa Basahon ni Mormon labing minos duha ka higayon. Akong gihimo ang buluhaton. Sa unang pagbasa kinahanglan nakong markahan o linyahan ang tanan nga nagpunting o nagpamatuod ni Jesukristo. Ako migamit og pula nga lapis, ug akong gilinyahan ang daghang tudling. Sa ikaduhang higayon, si Elder Hanks miingon nga koloran ang mga baroganan ug doktrina sa ebanghelyo, ug niining higayona migamit ko og asul [blue] sa pagmarka sa mga kasulatan. Ako nakabasa sa Basahon ni Mormon og kaduha, sama sa gisugyot, ug dayon laing duha pa ka higayon, gamit ang dalag [yellow] ug itom sa pagmarka sa mga tudling nga nakapatandog nako.11 Sama sa inyong makita, naghimo ko og daghang mugbo nga mga sulat.
Adunay mas mahinungdanon pa sa akong pagbasa kaysa pagmarka lang sa mga kasulatan. Sa matag pagbasa sa Basahon Mormon, sa sinugdanan hangtod sa kataposan, ako napuno sa tiunay nga gugma alang sa Ginoo. Mibati ko og lig-ong pagsaksi sa kamatuoran sa Iyang mga pagtulon-an ug kon sa unsang paagi nga kini magamit “karong adlawa.” Kini nga basahon nahaom sa ulohan niini, “Lain nga Tugon ni Jesukristo.”12 Pinaagi niana nga pagtuon ug sa espirituhanong pagsaksi nga nadawat, ako nahimong misyonaryo nga ganahan sa Basahon ni Mormon ug usa ka disipulo ni Jesukristo.13
“Karong adlawa,” usa sa labing maayo nga mga misyonaryo nga ganahan sa Basahon ni Mormon mao si Presidente Russell M. Nelson. Sa dihang bag-o pa siya nga natawag sa pagka-Apostol, mihatag siya og lektyur didto sa Accra, Ghana.14 Ang nanambong mao ang halangdon nga mga tawo, lakip na ang hari sa tribo sa Africa, diin siya misulti pinaagi sa tighubad. Ang hari usa ka seryoso nga estudyante sa Biblia ug nahigugma sa Ginoo. Human sa pamahayag ni Presidente Nelson, giduol siya niana nga hari, nga nangutana sa perpekto nga Iningles, “Kinsa man diay ka?” Si Presidente Nelson mipasabot nga siya usa ka giordinahan nga Apostol ni Jesukristo.15 Ang sunod nga pangutana sa hari mao “Unsay imong ikatudlo nako bahin ni Jesukristo?”16
Si Presidente Nelson mikuha sa Basahon ni Mormon ug mipakli niini ngadto sa 3 Nephi 11. Si Presidente Nelson ug ang hari nagdungan og basa sa giwali sa Manluluwas ngadto sa mga Nephite: “Tan-awa, Ako mao si Jesukristo, kinsa gipamatud-an sa mga propeta nga moanhi sa kalibotan. … Ako ang kahayag ug ang kinabuhi sa kalibotan.”17
Si Presidente Nelson mihatag sa hari nianang kopya sa Basahon ni Mormon, ug ang hari mitubag, “Mahimo ko nimong mahatagan og mga diyamante o mga ruby, apan walay labaw ka bililhon kaysa niining dugang nga kahibalo bahin ni Ginoong Jesukristo.”18
Dili ra kana ang ehemplo kon sa unsang paagi nga ang atong minahal nga propeta mipaambit sa Basahon ni Mormon. Siya mihatag og mga kopya sa Basahon Mormon ngadto sa gatosan ka mga tawo, sa kanunay nagpamatuod sa iyang pagsaksi ni Jesukristo. Sa dihang si Presidente Nelson nakighimamat sa mga bisita, mga presidente, mga hari, mga pangulo sa estado, ug mga lider sa patigayon ug sa mga organisasyon ug sa lainlaing mga tinuohan, anaa man sa punoang buhatan sa Simbahan o sa ilang kaugalingong mga dapit, siya uban sa balaang pagtahod mopresentar niini nga basahon sa gipadayag nga kasulatan. Siya mahimong mohatag nila og daghang butang nga pinutos nga mga regalo nga ibutang ibabaw sa mga lamesa o mga lingkoranan o sa mga kabinet isip handomanan sa iyang pagbisita. Apan, siya mihatag kon unsay labing bililhon kaniya, labaw pa sa mga ruby ug mga diyamante, sama sa gihulagway sa hari.
“Ang mga kamatuoran sa Basahon ni Mormon,” si Presidente Nelson miingon, “adunay gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.”19 Ako nagtan-aw samtang kining mga kopya sa Basahon ni Mormon gikuptan sa mga kamot niadtong midawat niini gikan sa atong propeta sa Dios. Walay laing mas labaw pa nga gasa.
Bag-ohay lang nakighimamat siya sa asawa sa presidente sa The Gambia didto sa iyang opisina ug mapaubsanong mihatag niya og Basahon ni Mormon. Dili ra siya kutob diha. Siya mipakli sa mga pahina niini aron basahon uban niya, aron motudlo ug mopamatuod ni Jesukristo, sa Iyang Pag-ula, ug sa Iyang gugma alang sa tanan Niya nga mga anak—bisan asa.
Ang atong buhi nga propeta naghimo sa iyang bahin aron ipakatap sa yuta ang Basahon ni Mormon.20 Apan dili siya makahimo niini nga siya ra. Kita kinahanglang mosunod kaniya.
Nadasig sa iyang ehemplo, ako naningkamot sa mapaubsanon ug mas madasigong paagi nga mopaambit sa Basahon ni Mormon.
Bag-ohay lang aduna koy buluhaton didto sa Mozambique. Ang mga lumulupyo niining matahom nga nasod nanglimbasog sa kakabos, pagkadili himsog, walay trabaho, mga bagyo, ug kagubot sa politika. Akong mapasidungganon nga nahimamat ang presidente sa nasod, si Filipe Nyusi. Sa iyang hangyo, ako nag-ampo alang niya ug sa iyang nasod; ako miingon niya nga magtukod kami og templo ni Jesukristo21 sa iyang nasod. Sa kataposan sa among pagbisita, ako mihatag niya og kopya sa Basahon ni Mormon sa Portuguese, iyang lumad nga pinulongan. Samtang mapasalamaton siya nga midawat sa basahon, ako mipamatuod bahin sa paglaom ug sa saad alang sa iyang katawhan, nga makita diha sa mga pulong sa Ginoo nga anaa sa mga pahina niini.22
Sa laing higayon, ang akong asawa, si Melanie, ug ako nakighimamat ni Hari Letsie III sa Lesotho ug sa iyang asawa didto sa ilang panimalay.23 Alang namo, ang labing importante sa among pagbisita mao ang paghatag nila og kopya sa Basahon ni Mormon ug dayon ang pagpaambit sa akong pagpamatuod. Kon akong tan-awon og balik kana nga kasinatian ug ang uban pa, usa ka bersikulo sa ulahing mga adlaw nga kasulatan ang misantop sa akong hunahuna: “Ang kahingpitan sa akong ebanghelyo mahimo tingali nga ikapahayag pinaagi sa mahuyang ug yano ngadto sa mga lumulupyo sa kalibotan, ug sa atubangan sa mga hari ug mga magmamando.”24
Ako mipakigbahin sa Basahon ni Mormon sa Ambassador sa India ngadto sa United Nations sa Geneva, si Indra Mani Pandey25; uban ni Talahorong Patriarch Bartholomew26 sa Eastern Orthodox Church; ug uban sa daghan pa. Akong gibati ang Espiritu sa Ginoo nga nag-uban namo samtang personal nakong gihatag nila kining “sukaranan sa atong tinuohan”27 ug mihatag sa akong pagsaksi ni Jesukristo, ang bato sa pamag-ang sa atong hugot nga pagtuo.28
Karon, mga kaigsoonan, kamo dili kinahanglan nga moadto sa Mozambique o sa India o makighimamat sa mga hari ug mga magmamando aron mohatag sa usa ka tawo niini nga basahon sa sagradong mga pagtulon-an ug mga saad. Ako modapit ninyo, karong adlawa, nga mohatag og Basahon ni Mormon ngadto sa inyong mga higala ug pamilya, mga kauban sa trabaho, sa inyong coach sa soccer, o sa tindero diha sa inyong merkado. Sila nagkinahanglan sa mga pulong sa Ginoo nga makita dinhi sa basahon. Sila nagkinahanglan og mga tubag sa mga pangutana sa inadlaw nga kinabuhi ug sa kinabuhing dayon nga moabot. Sila nagkinahanglan nga masayod bahin sa dalan sa pakigsaad nga giandam alang nila ug sa gugma sa Ginoo alang nila. Anaa kining tanan dinhi sa Basahon ni Mormon.
Kon kamo mohatag nila og Basahon ni Mormon, kamo nag-abli sa ilang mga hunahuna ug mga kasingkasing ngadto sa pulong sa Dios. Kamo dili kinahanglan nga magbitbit og inimprinta nga mga kopya. Kamo mas sayon nga makapaambit niini gikan sa inyong mobile phone gikan sa seksiyon sa mga kasulatan sa Gospel Library nga app.29
Hunahunaa ang tanan niadtong kinsa mahimong mapanalanginan sa ebanghelyo diha sa ilang mga kinabuhi, ug dayon padad-i sila og kopya sa Basahon ni Mormon gikan sa inyong phone. Hinumdomi ang paglakip sa inyong pagpamatuod ug sa unsang paagi nga kini nga basahon nakapanalangin sa inyong kinabuhi.
Akong minahal nga mga higala, isip usa ka Apostol sa Ginoo, gidapit ko kamo sa pagsunod sa atong minahal nga propeta, si Presidente Nelson, sa pagpakatap sa yuta sa Basahon ni Mormon. Ang panginahanglan dako kaayo; kita kinahanglang molihok karon dayon. Ako mosaad nga kamo maapil sa “labing dako nga buhat sa yuta,” ang pagpundok sa Israel,30 samtang kamo madasigon sa pagtabang niadtong kinsa “natago gikan sa kamatuoran tungod kay sila wala masayod asa kini pangitaa.”31 Sila nagkinahanglan sa inyong pagpamatuod ug pagsaksi kon sa unsang paagi nga kini nga basahon nakapausab sa inyong kinabuhi ug nakapaduol ninyo sa Dios, sa Iyang kalinaw,32 ug sa Iyang “mga balita sa dako nga hingpit nga kalipay.”33
Ako mopamatuod nga pinaagi sa balaanong plano ang Basahon ni Mormon giandam sa karaang Amerika nga moabot aron sa pagpahayag sa pulong sa Dios, sa pagdala sa mga kalag ngadto ni Jesukristo ug sa Iyang gipahiuli nga ebanghelyo “karong adlawa.” Sa ngalan ni Jesukristo, amen.