Pagtabang sa mga Kabos ug sa mga Nagkalisod
Ang Simbahan ni Jesukristo mapasaligon alang sa pagserbisyo niadtong nanginahanglan, ug kini mapasaligon usab nga mokooperar sa uban niana nga paningkamot.
Mga kaigsoonan, ang atong pinalangga nga si Presidente Russell M. Nelson mamulong kanato sa dili madugay niini nga sesyon. Iya kong gihangyo nga ako ang mouna sa pagpamulong.
Ang akong hisgotan karon mao ang kon unsay ikahatag ug mabuhat sa Ang Simbahan ni Jesukristo sa mga Santos sa Ulahing mga Adlaw ug sa mga miyembro niini alang sa mga kabos ug sa mga nagkalisod. Ako usab mamulong bahin sa susamang pagpanghatag nga gihimo sa ubang buotan nga mga tawo. Ang pagpanghatag ngadto sa nanginahanglan usa ka baroganan sa tanang sama sa kang Abraham nga relihiyon ug sa uban usab.
Pipila ka bulan ang milabay, Ang Simbahan ni Jesukristo sa mga Santos sa Ulahing mga Adlaw mireport sa labing unang higayon sa kadak-on sa atong makitawhanon nga buhat sa tibuok kalibotan.1 Ang atong 2021 nga mga gasto alang sa mga nanginahanglan sa 188 ka nasod sa tibuok kalibotan misumada og $906 ka milyon—hapit usa ka bilyon ka dolyar. Agig dugang, ang atong mga miyembro miboluntaryo og kapin sa 6 ka milyon ka oras sa paghago sa mao gihapon nga katuyoan.
Kadto nga mga kantidad siyempre, dili kompletong report sa atong pagpanghatag ug pagtabang. Kini wala maglakip sa personal nga mga serbisyo nga gihatag sa atong mga miyembro sa indibidwal nga paagi samtang sila nangalagad sa usag usa diha sa tinawag nga mga katungdanan ug boluntaryong mga pagserbisyo sa isig ka miyembro. Ug ang atong 2021 nga report wala maghisgot kon unsay gihimo sa atong mga miyembro sa indibidwal nga paagi pinaagi sa dili maihap nga manggihatagon nga mga organisasyon nga dili pormal nga konektado sa atong Simbahan. Akong sugdan sa ingon niini.
Niadtong 1831, wala pa kaabot og duha ka tuig human sa pag-organisar sa gipahiuli nga Simbahan, ang Ginoo mihatag niini nga pagpadayag aron magiyahan ang mga miyembro niini ug, ako nagtuo, ngadto sa Iyang tanan nga anak, sa tibuok kalibotan:
“Tan-awa, kini dili maayo nga ako magsugo diha sa tanan nga mga butang; kay siya nga gipugos diha sa tanan nga mga butang, ang mao usa ka tapulan ug dili maalamon nga sulugoon. …
“Sa pagkatinuod ako moingon, ang mga tawo kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa ilang kaugalingon nga gawasnon nga kabubut-on, ug magpahinabo sa daghan nga pagkamatarong;
“Kay ang gahom anaa kanila, diin sila mga tinugyanan ngadto sa ilang mga kaugalingon. Ug tungod kay ang mga tawo nagbuhat sa maayo sila dili mawad-an sa ilang ganti.”2
Sa kapin sa 38 ka tuig isip Apostol, ug sa kapin 30 ka tuig sa propesyonal nga panarbaho, akong nakita ang daghan nga manggihatagong paningkamot nga gihimo sa mga organisasyon ug sa mga tawo niini nga matang sa pagpadayag nga gihulagway isip “maayo nga katuyoan” ug “pagpahinabo sa daghan nga pagkamatarong.” Adunay wala maihap nga mga ehemplo sa ingon niana nga makitawhanong pagserbisyo sa tibuok kalibotan, lapas sa kaugalingon natong mga utlanan ug lapas sa atong komon nga kahibalo. Sa pagpamalandong niini, ako naghunahuna sa Basahon ni Mormon nga propeta-Hari Benjamin, kansang wali naglakip niining mahangtoron nga kamatuoran: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”3
Daghan nga kaayohan ug makitawhanon nga pag-alagad sa atong isigkatawo gitudlo ug gihimo sa Ang Simbahan ni Jesukristo sa mga Santos sa Ulahing mga Adlaw ug kanato nga mga miyembro niini. Sama pananglit, kita magpuasa sa unang Dominggo matag bulan ug motampo bisan lang sa katugbang sa wala magasto alang sa pagkaon aron itabang niadtong nanginahanglan diha sa atong kaugalingon nga mga kongregasyon. Ang Simbahan usab naghimo og dagko nga mga kontribusyon alang sa makitawhanon ug ubang mga serbisyo sa tibuok kalibotan.
Bisan pa sa tanang gibuhat sa atong Simbahan sa direktang paagi, kadaghanan sa makitawhanon nga serbisyo ngadto sa mga anak sa Dios sa tibuok kalibotan gihimo sa mga tawo ug sa mga organisasyon nga walay pormal nga koneksiyon sa atong Simbahan. Sama sa naobserbahan sa usa sa atong mga Apostol; “ang Dios naggamit og sobra sa usa ka tawo para sa katumanan sa iyang mahinungdanon ug kahibulongan nga buhat. … Kini dako kaayo, lisod kaayo, para sa usa ka tawo.”4 Isip mga miyembro sa gipahiuli nga Simbahan, kita kinahanglan nga mas makahibalo ug mas mapasalamaton sa serbisyo sa uban.
Ang Simbahan ni Jesukristo mapasaligon alang sa pagserbisyo niadtong nanginahanglan, ug kini mapasaligon usab nga mokooperar sa uban niana nga paningkamot. Kita bag-o lang mihimo og dako nga gasa ngadto sa United Nations World Food Programme [Programa sa Pagkaon sa Kalibotan sa Hiniusang Kanasoran]. Sulod sa daghang dekada sa atong makitawhanon nga buhat, duha ka mahinungdanong organisasyon ang atong gikatambayayong: mga proyekto sa Red Cross ug mga ahensiya sa Red Crescent sa daghang nasod nga nagsangkap sa mga anak sa Dios sa mahinungdanong tabang atol sa kinaiyanhong mga katalagman ug mga kasungian. Ug sa samang paagi, kita dunay taas nga rekord sa tabang kauban sa Catholic Relief Services. Kini nga mga organisasyon nagtudlo kanato og daghan mahitungod sa paghatag og tabang sa katawhan sa tibuok kalibotan.
Kita usab dunay mabungahon nga pakigtambayayong sa ubang mga organisasyon, lakip ang Muslim Aid, Water for People, ug IsraAID, sa pagngalan og pipila. Samtang ang matag makitawhanon nga organisasyon adunay kaugalingon nila nga espesyalisasyon, kita parehas og tumong sa paghupay sa nag-antos nga mga anak sa Dios. Tanan kini usa ka bahin sa buhat sa Dios alang sa Iyang mga anak.
Ang modernong pagpadayag nagtudlo nga ang atong Manluluwas, si Jesukristo, mao “ang tinuod nga kahayag nga nagdan-ag sa matag tawo nga moanhi sa kalibotan.”5 Mao nga, ang tanan nga anak sa Dios nadan-agan aron sa pagserbisyo Kaniya ug sa usag usa sa labing maayo nga ilang nahibaloan ug abilidad.
Ang Basahon ni Mormon nagtudlo nga “ang matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios.”6
Nagpadayon:
“Kay tan-awa, ang Espiritu ni Kristo gihatag ngadto sa matag tawo, [aron] siya masayod sa maayo gikan sa daotan; busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahom ug gasa ni Kristo. …
“Ug karon, akong kaigsoonan, … kamo nasayod sa kahayag diin kamo mahimong mohukom, kansang kahayag mao ang kahayag ni Kristo.”7
Aniay pipila ka ehemplo sa mga anak sa Dios nga nagtabang sa ubang mga anak sa Dios diha sa mahinungdanong panginahanglan sa pagkaon, medikal nga pag-atiman, ug pagtudlo:
Napulo ka tuig ang milabay, ang mga Kandhari, nga taga-Sikh nga bana ug asawa sa United Arab Emirates, personal gayod nga misugod og usa ka maanindot nga programa sa pagpakaon sa mga gigutom. Pinaagi sa templo sa Guru Nanak Darbar Sikh, sila sa kasamtangan nakahatag og kapin sa 30,000 ka utanon nga mga pagkaon matag tapos sa semana ngadto sa tanan kinsa mosulod sa mga pultahan niini, bisan unsay relihiyon o kaliwat. Si Dr. Kandhari mipasabot, “Kami nagtuo nga ang tanan usa ra, kita mga anak sa usa ka Dios, ug kami nia dinhi aron moserbisyo sa katawhan.”8
Ang pagsangkap og medikal ug dental nga pag-atiman ngadto sa nanginahanglan lahi usab nga ehemplo. Sa Chicago, akong nahimamat ang Syrian-American nga doktor nga tig-atiman og delikadong masakiton, si Dr. Zaher Sahloul. Siya ang usa sa mga nagtukod sa MedGlobal, nga nag-organisar sa medikal nga mga propesyonal aron mobulontaryo sa ilang panahon, kahanas, kahibalo, ug pagpangulo aron motabang sa uban nga nagkalisod, sama sa gubat sa Syria, diin si Dr. Sahloul mirisgo sa iyang kinabuhi sa paghatag og medikal nga pag-atiman sa mga sibilyan. Ang MedGlobal ug ang susamang mga organisasyon (lakip ang daghan nga Ulahing mga Adlaw nga mga propesyonal) nagpakita nga ang Dios nagdasig og mga propesyonal sa hugot nga pagtuo sa pagdala ngadto sa mga kabos sa gikinahanglan nga tabang sa tibuok kalibotan.9
Daghan nga dili hakog nga mga anak sa Dios ang nanginlabot sa mga paningkamot sa pagtudlo, usab sa tibuok kalibotan. Usa ka maayong ehemplo, nga atong nailhan pinaagi sa atong makitawhanong mga paningkamot, mao ang kalihokan sa usa ka tawo nga nailhan nga si Mr. Gabriel, kinsa usa ka bakwit tungod sa managlahing mga kasungian sa daghan nga okasyon. Siya bag-o lang nakaobserbar nga gatosan sa liboan ka mga bakwit nga mga bata sa Sidlakang Africa nagkinahanglan og tabang aron magpadayong buhi ang ilang mga paglaom ug maaktibo ang ilang mga hunahuna. Siya miorganisar sa ubang mga magtutudlo sa pundok sa mga bakwit ngadto sa unsay gitawag nila og “tree schools [kahoy nga mga eskwelahan],” diin ang mga bata magpundok alang sa mga leksiyon ubos sa landong sa kahoy. Siya wala na maghulat sa uban nga moorganisar o motudlo apan personal nga nangulo sa mga paningkamot nga nakahatag og mga oportunidad sa pagkat-on alang sa liboan ka mga bata sa primarya nga eskwelahan atol sa makaluya nga mga katuigan sa pagkabakwit.
Siyempre, kining tulo ka ehemplo wala magpasabot nga ang tanang gisulti o gihimo sa mga organisasyon o mga indibidwal ingon niana gyod kamaayo ang nahimo. Kini nga mga ehemplo nagpakita nga ang Dios nagdasig sa daghang organisasyon ug mga indibidwal aron mohimo og daghang kaayohan. Kini usab nagpakita nga daghan pa kanato ang kinahanglan nga mopasidungog sa mga maayo nga gihimo sa uban ug sa pagsuporta niini kon may panahon kita ug may pamaagi sa paghimo sa ingon.
Aniay pipila ka ehemplo sa serbisyo nga gisuportahan sa Simbahan ug diin ang atong mga miyembro ug ubang maayo nga mga tawo ug mga organisasyon misuporta usab pinaagi sa indibidwal nga mga donasyon sa oras ug kwarta:
Akong sugdan sa relihiyosong kagawasan. Sa pagsuporta niana, kita nangalagad sa atong kaugalingon nga kaayohan, apan usab sa kaayohan sa ubang mga relihiyon. Sama sa gitudlo sa atong una nga Presidente, si Joseph Smith, nga, “[Kita] nag-angkon sa kahigayonan sa pagsimba sa Dios nga Makagagahom sumala sa pagmando sa [atong] kaugalingon nga tanlag, ug nagtugot sa tanan nga mga tawo sa sama nga kahigayonan, sa pagpasimba kanila sa bisan unsa nga paagi, asa, o unsa ang ilang buot simbahon.”10
Ang uban pang ehemplo sa makitawhanon ug ubang mga tabang sa gipahiuli nga Simbahan nga gisuportahan usab sa boluntaryong paagi sa atong mga miyembro mao ang nailhan kaayo nato nga mga eskwelahan, mga kolehiyo, ug mga unibersidad ug ang atong mga wala kaayo mailhi apan karon nagmantala og dagko nga mga donasyon alang sa kahupayan niadtong nag-antos gikan sa mga pagkaguba ug pagkawala nay kapuy-an tungod sa kinaiyanhong mga katalagman sama sa mga alimpulos ug mga linog.
Ang uban pang mga manggihatagon nga mga kalihokan nga gisuportahan sa atong mga miyembro pinaagi sa ilang boluntaryong mga donasyon ug mga paningkamot nga daghan kaayo kon ilista, apan ang paghisgot bisan lang niining pipila maghatag og ideya sa ilang panaglahi ug kaimportante: sa pagbatok sa rasismo ug ubang mga pagkamahukmanon, sa pagsiksik unsaon sa paglikay ug pagtambal ang mga sakit, sa pagtabang sa mga may kakulian, sa pagsuporta sa mga organisasyon sa musika ug museyo, ug pagpalambo sa moral ug pisikal nga palibot alang sa tanan.
Ang tanan nga makitawhanong paningkamot sa Ang Simbahan ni Jesukristo sa mga Santos sa Ulahing Adlaw nagtinguha nga masunod ang ehemplo sa usa ka matarong nga katawhan nga gihulagway diha sa Basahon ni Mormon: “Ug sa ingon, diha sa ilang mauswagon nga pagkabutang, sila wala mosalikway ni bisan kinsa nga mga hubo, o niana nga mga gutom, o niana nga mga uhaw, o niana nga mga masakiton, … ug sila … manggihatagon ngadto sa tanan, sa tigulang ug sa batan-on, sa ulipon ug sa gawasnon, sa lalaki ug sa babaye, bisan gawas sa simbahan o sulod sa simbahan.”11
Ako nagpamatuod kang Jesukristo, kansang kahayag ug Espiritu migiya kanatong tanan sa pagtabang sa mga kabos ug nagkalisod sa tibuok kalibotan. Sa ngalan ni Jesukristo, amen.