Magpaduol ngadto sa Manluluwas

Ni Elder Neil L. Andersen

Sa Korum sa Napulog Duha ka Apostoles

Nagtinguha nga makaila ug mohigugma sa Manluluwas, atong gilahi ang atong kaugalingon gikan sa kalibotan pinaagi sa mga pakigsaad uban sa Dios, pinaagi sa pagkalahi, pagkadili komon, ug pagka-espesyal, nga dili mopalayo sa atong kaugalingon gikan sa uban nga lahi og gituohan.

Minahal kong kaigsoonan, niining gabhiona ako mamulong ngadto sa mapaubsanon ug maunongon nga mga sumusunod ni Jesukristo. Samtang nagtan-aw ko sa kaayo sa inyong mga kinabuhi ug sa inyong hugot nga pagtuo diha sa atong Manluluwas dinhi niini nga nasod ug sa kanasoran sa tibuok kalibotan, ako mas nahigugma kaninyo.

Sa hapit na mahuman ang Iyang pangalagad, ang mga disipulo ni Jesus mihangyo Kaniya nga sultihan sila sa “mahitabo nga magpaila sa panahon sa [Iyang Ikaduhang Pag-anhi], ug sa kataposan sa kalibotan.”¹

Si Jesus misulti nila bahin sa mga kahimtang nga mag-una sa Iyang pagbalik ug mitapos pinaagi sa pagpahayag, “Busa inigkakita usab ninyo niining tanan, hisayran ninyo nga duol na ang panahon ug hapit na gayod moabot.”²

Sa milabay nga kinatibuk-ang komperensiya, naminaw ko og maayo sa mga pulong ni Presidente Henry B. Eyring: “Matag usa kanato,” siya miingon, “bisan asa man kita, nakahibalo nga kita nagpuyo sa nagkaanam og kalisod nga mga panahon. … Si bisan kinsa nga adunay mga mata sa pagtan-aw sa mga timaan niining mga panahona ug mga dalunggan sa pagpamati sa mga pulong sa mga propeta nakahibalo nga kini tinuod.”³

Ang Manluluwas midayeg sa Iyang maisogon nga mga disipulo: “Bulahan gayod ang inyong mga mata kay makakita man kini: ug ang inyong mga dalunggan kay makabati man kini.”⁴ Hinaot nga kini nga panalangin maangkon nato samtang maminaw kita og maayo sa mga pulong sa Ginoo pinaagi sa Iyang mga propeta ug sa uban niining komperensiya.

Mga Trigo ug mga Bunglayon

Ang Ginoo mipasabot nga niining kataposang panahon sa dili pa ang Iyang pagbalik, ang “mga trigo,” nga Iyang gihulagway isip “ang mga anak sa gingharian,”⁵ magdungan og tubo sa “mga bunglayon,” o niadtong wala mahigugma sa Dios ug wala magsunod sa Iyang mga sugo. Sila “magdungag tubo.”⁶

Mao kini ang kahimtang sa atong kalibotan hangtod mobalik ang Manluluwas, nga adunay daghang maayo ug daghang daotan sa tanang dapit.⁷

Tingali usahay dili kamo mobati nga sama ka lig-on, guwang na nga uhay sa trigo. Pagmapailobon sa inyong kaugalingon! Ang Ginoo miingon nga ang trigo maglakip sa linghod nga mga udlot nga migitib.⁸ Kitang tanan mao ang Iyang mga Santos sa Ulahing mga Adlaw, ug bisan kon wala pa kita mamahimo sa unsay gusto nato nga kitang tanan mamahimo, kita matinud-anon sa atong tinguha nga mahimong Iyang tinuod nga mga disipulo.

Mopalig-on sa Atong Hugot nga Pagtuo diha ni Jesukristo

Atong naamgohan nga samtang nagkagrabe ang kadaotan sa kalibotan, ang atong espirituhanong pagsugakod, ug ang espirituhanong pagsugakod niadtong atong gimahal, magkinahanglan nga mas hingpit natong amumahan, depensahan, ug palig-onon ang mga gamot sa atong hugot nga pagtuo diha ni Jesukristo. Si Apostol Pablo mitambag nato nga makagamot,⁹ magmalig-on, ug dili matarog¹⁰ diha sa atong gugma alang sa Manluluwas ug sa atong determinasyon sa pagsunod Kaniya. Karon ug sa mga adlaw nga moabot nagkinahanglan og dugang nga pagpunting ug gipahinungod nga paningkamot, manalipod batok sa mga makabalda ug walay pagpakabana.¹¹

Apan bisan sa nagkadaghang kalibotanon nga mga impluwensiya sa atong palibot, kita dili angayng mahadlok. Ang Ginoo dili mosalikway sa Iyang katawhan sa pakigsaad. Adunay makatimbang nga gahom sa pagpadayag ug espirituhanong mga gasa nga ihatag ngadto sa mga matarong.¹² Kining gidugang nga panalangin sa espirituhanong gahom, hinoon, dili ihatag nato tungod lamang kay kita kabahin niini nga henerasyon. Kini moabot samtang kita nagpalig-on sa atong hugot nga pagtuo ni Ginoong Jesukristo ug nagsunod sa Iyang mga sugo, samtang kita makaila Kaniya ug nahigugma Kaniya. “Ang kinabuhing dayon mao kini,” si Jesus nag-ampo, “ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala.”¹³

Sama sa ato na gayong nahibaloan, ang pagbaton og hugot nga pagtuo diha ni Jesukristo ug ang pagkahimong tinuod nga disipulo dili lang usa ka higayon nga desisyon—dili lang usa ka higayon nga panghitabo. Usa kini ka sagrado, nagpadayon nga proseso nga motubo ug molambo sa tibuok panahon sa atong kinabuhi, mopadayon hangtod nga kita moluhod sa Iyang tiilan.

Uban sa mga trigo nga motubo taliwala sa mga bunglayon dinhi sa kalibotan, sa unsang paagi nga atong mapalawman ug mapalig-on ang atong pasalig ngadto sa Manluluwas sa mga adlaw nga moabot?

Ania ang tulo ka hunahuna:

Isubsob ang Atong Kaugalingon diha sa Kinabuhi ni Jesus

Una, atong isubsob ang atong kaugalingon sa mas hingpit nga paagi diha sa kinabuhi ni Jesus, sa Iyang mga pagtulon-an, Iyang kaharianon, Iyang gahom, ug Iyang sakripisyo sa pag-ula. Ang Manluluwas miingon, “Paghunahuna ngari kanako sa matag hunahuna.”¹⁴ Si Apostol Juan mipahinumdom nato, “Kita nagahigugma kaniya, tungod kay siya mao man ang unang nahigugma kanato.”¹⁵ Kon kita mas makasinati sa Iyang gugma, kita mas mahigugma pa Kaniya ug, natural lang, mas mosunod sa Iyang ehemplo sa paghigugma ug pag-atiman niadtong anaa sa atong palibot. Sa matag matarong nga lihok paingon Kaniya, kita mas klarong makakita Kaniya.¹⁶ Kita mosimba Kaniya, ug kita maningkamot sa atong ginagmay nga mga paagi sa pagsundog Kaniya.¹⁷

Mohimo og mga Pakigsaad uban sa Ginoo

Sunod, kon kita mas makaila ug mohigugma sa Manluluwas, kita mas magtinguha pa nga mosaad Kaniya sa atong pagdapig ug pagsalig. Kita naghimo og mga pakigsaad uban Kaniya. Kita nagsugod sa atong mga saad atol sa bunyag, ug kita nagmatuod niini nga mga saad ug uban pa kon kita maghinulsol matag adlaw, mangayo og pasaylo, ug mahinamong magpaabot sa pagdawat sa sakramento matag semana. Kita nagsaad nga “sa kanunay mohinumdom Kaniya ug maghupot sa Iyang mga sugo.”¹⁸

Kon kita andam na, kita mohangop sa mga ordinansa ug mga pakigsaad sa templo. Mibati sa impluwensya sa kahangtoran diha sa atong sagrado, hilom nga mga gutlo sa balay sa Ginoo, kita malipayong mohimo og mga pakigsaad uban sa Dios ug molig-on sa atong determinasyon sa pagtuman niini.

Ang paghimo ug pagtuman sa mga pakigsaad nagtugot sa gugma sa Manluluwas nga mas motuhop sa atong kasingkasing. Sa Liahona karong bulana, si Presidente Nelson miingon: “[Ang atong] [mga] pakigsaad modala kanato nga mas mapaduol pa gayod ngadto Kaniya. … Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya.”¹⁹ Ug sama sa nindot kaayo nga gisulti ni Presidente Nelson ganihang buntag, “Uban sa pagpahinungod sa matag bag-o nga templo, dugang diosnon nga gahom ang moabot sa kalibotan aron sa pagpalig-on kanato ug pagpakigbatok sa nagkagrabe nga mga paninguha sa kaaway.”²⁰

Nakita ba nato kon ngano nga ang Ginoo nagmando sa Iyang propeta nga ang mga balay sa Ginoo ipaduol ngari kanato ug nagtugot kanato nga maanaa sa Iyang balay kanunay?

Sa atong pagsulod sa templo, kita gawasnon sa kalibotanong mga kabalaka nga makapaluya kanato samtang kita nagkat-on sa atong katuyoan sa kinabuhi ug sa mahangtoron nga mga gasa nga gitanyag kanato pinaagi sa atong Manluluwas, si Jesukristo.

Mopanalipod sa Gasa sa Espiritu Santo

Sa kataposan, ang akong ikatulong hunahuna: niining sagrado nga paningkamot, kita mohatag og bili, moprotekta, modepensa, ug mopanalipod sa gasa sa Espritu Santo. Sila si Presidente M. Russell Ballard sa sayong bahin ug si Elder Kevin W. Pearson bag-o lang naghisgot bahin sa propetikanhong pasidaan ni Presidente Nelson nga akong balikon: “Dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo.”²¹ Usa kini ka bililhon kaayo nga gasa. Kita mobuhat sa atong labing maayo sa pagpanalipod sa atong inadlaw nga mga kasinatian aron ang impluwensya sa Espiritu Santo magpabilin kanato. Kita mao ang kahayag sa kalibotan, ug kon kinahanglanon, kita andam nga mopili nga mahimong lahi kay sa uban. Si Presidente Dallin H. Oaks bag-ohay lang nangutana sa mga young adult: “Mabuhat ba ninyo nga mahimong lahi? … [Labing] importante … mao ang mga pagpili nga inyong himoon sa inyong personal nga kinabuhi. … Mopadayon ba kamo batok sa oposisyon sa kalibotan?”²²

Mopili nga Mahimong Lahi kaysa Kalibotan

Diha sa usa ka bag-ong gi-post sa social media, mihangyo ko sa isigka-disipulo sa pagpaambit sa mga pagpili nga ilang gihimo nga nagkinahanglan nila nga mahimong lahi kay sa kalibotan. Ako nakadawat og gatosan ka mga tubag.²³ Ania ang pipila lang niini:

Amanda: Ako usa ka nurse nga nagtrabaho sa lokal nga bilanggoan. Ako naningkamot sa pag-atiman sa mga piniriso sama sa buhaton ni Kristo.

Rachel: Ako usa ka opera singer, ug sa kanunay gituohan nga mosul-ob sa bisan unsa nga costume nga ihatag kanako, dili igsapayan kon tarong ba kini. [Tungod kay na-endow na ko,] giingnan nako [ang mga producer] nga ang costume kinahanglan nga [tarong]. Wala sila malipay … apan nagpanuko nga mihimo og mga kausaban. Dili nako ibaylo ang kalinaw nga nagagikan sa pagbarog isip usa ka saksi ni Kristo sa tanang panahon.

Chriss: Ako usa ka palahubog (nagpaayo), takos sa templo, nga miyembro sa Simbahan. Wala ko magpakahilom mahitungod sa akong mga kasinatian sa pagkaadik ug nakabaton og pagpamatuod sa Pag-ula [ni Jesukristo].

Lauren: Nagsulat ko og usa ka drama-drama uban sa akong mga klasmeyt sa high school. Ganahan sila nga ang akong hilomon, pinahimutang nga karakter mokalit lang sa pagpamalikas. Nagsige sila og pugos nako, apan mibalibad ko ug mihupot sa akong gibarogan.

Adam: Daghang tawo ang wala motuo nako sa dihang miingon ko nga ako nagsunod sa balaod sa kaputli ug mipili sa paglikay sa pornograpiya. Sila wala makasabot sa kaayohan sa kalipay ug kalinaw nga nahatag niini kanako.

Ella: Ang akong amahan usa ka sakop sa komunidad sa LGBTQ. Kanunay ko nga maningkamot sa pagkonsiderar sa mga pagbati sa ubang tawo samtang nagbarog isip usa ka saksi ni Kristo ug magmatinuoron sa unsay akong gituohan.

Andrade: Ako nakadesisyon nga mopadayon sa pagsimba sa dihang ang akong pamilya nakadesisyon nga dili na mosimba.

Ug sa kataposan, gikan ni Sherry: Mitambong kami sa usa ka kalihokan didto sa mansyon sa gobernador. Sila misugod sa pagpanghatag og champagne alang sa usa ka “toast.” Miinsister ko nga tubig lang, bisan kon ang kawani miingon nga makapasilo kini. Kami nakig-toast sa gobernador, ug akong giisa ang akong baso sa tubig! Ang gobernador wala masilo.

Si Presidente Nelson miingon, “Oo, nagpuyo kamo sa kalibotan, apan lahi kaayo kamo og mga sumbanan sa kalibotan sa pagtabang ninyo nga makalikay sa negatibong mga epekto sa kalibotan.”²⁴

Si Anastasia, usa ka batan-ong inahan didto sa Ukraine, anaa sa ospital kay bag-o lang nanganak og usa ka batang lalaki samtang ang mga pagpamomba nagsugod didto sa Kyiv sa miaging Pebrero. Usa ka nurse miabli sa lawak sa ospital ug miingon sa dinalian nga tingog, “Bitbita ang imong anak, pusta og habol, ug adto sa pasilyo—karon dayon!”

Sa kaulahian, si Anastasia mikomentaryo:

“Wala gayod ako magdahom nga ang unang mga adlaw sa akong pagkainahan lisod kaayo, … apan … nagpunting ko … sa mga panalangin ug sa mga milagro nga akong nakita. …

“Sa pagkakaron, … morag imposible kaayo ang pagpasaylo niadtong nakahimo og hilabihan nga kaguba ug kadaot … , apan isip usa ka disipulo ni Kristo, ako adunay hugot nga pagtuo nga ako makahimo ra sa [pagpasaylo]. …

“Ako wala masayod sa tanan nga mahitabo sa umaabot … apan ako nasayod nga ang pagsunod sa atong mga pakigsaad motugot sa Espiritu nga mag-uban kanato kanunay, … nagtugot kanato nga mobati og kalipay ug paglaom, … bisan atol sa lisod nga mga panahon.”²⁵

Ang Saad nga Kinabuhing Dayon ug Celestial nga Himaya

Mga kaigsoonan, ako napanalanginan nga makadawat og abunda sa gugma sa atong Manluluwas, si Jesukristo. Nasayod ko nga Siya buhi ug mogiya sa Iyang balaan nga buhat. Ako walay hingpit nga mga pulong nga makapahayag sa akong gugma alang Kaniya.

Kitang tanan “mga anak sa pakigsaad” nga nagkatap sa yuta diha sa kanasoran ug mga kultura sa matag kontinente, minilyon ang gidaghanon, samtang naghulat kita sa mahimayaong pagbalik sa atong Ginoo ug Manluluwas. Nagdan-ag isip usa ka kahayag niadtong naglibot kanato, kita mahunahunaon gayod nga nag-umol sa atong mga tinguha, mga hunahuna, mga pagpili, ug mga binuhatan. Nagtinguha sa tibuok natong kasingkasing nga makaila ug mohigugma sa Manluluwas, atong gilahi ang atong kaugalingon gikan sa kalibotan pinaagi sa mga pakigsaad uban sa Dios, pinaagi sa pagkalahi, pagkadili komon, ug pagka-espesyal, samtang kita nagtahod Kaniya ug sa Iyang mga pagtulon-an nga dili mopalayo sa atong kaugalingon gikan sa uban nga lahi og gituohan.

Kini usa ka maanindot nga panaw nga mahimong trigo taliwala sa mga bunglayon, usahay puno sa kasakit apan kanunay nga gihupay pinaagi sa naglambo ug makapadasig natong hugot nga pagtuo. Samtang inyong tugotan nga ang inyong gugma alang sa Manluluwas ug ang Iyang gugma alang ninyo motuhop sa inyong kasingkasing, ako mosaad nga kamo makabaton og dugang nga pagsalig, kalinaw, ug hingpit nga kalipay sa pagtubag sa mga hagit sa inyong kinabuhi. Ug ang Manluluwas misaad kanato: “Ako mopundok sa akong mga katawhan, sumala sa sambingay sa trigo ug mga [bunglayon], nga ang trigo mapanalipdan diha sa balay tipiganan aron makabaton og kinabuhi nga dayon, ug makoronahan uban sa celestial nga himaya.”²⁶ Sa ngalan ni Jesukristo, amen.