Tingting i kam long Spirit
Pasin bilong poro wantaim Holi Gos em i wanpela bikpela tru presen bilong spirit ol Seint bilong Las-de i amamas long gat.
Tok I Go Pas
I no long taim, olgeta ai bilong spot i fokas long 2023 Wimens Wol Kap Australia na New Zealand i hostim. Ol Wol-klas atlit representim moa long 200 nesenel tims long olgeta hap bilong wol i soim strong na save taim ol i pilai long dispela bikpela ona long soka.
Yumi mangalim ol lain i pilai long ol kainkain spot na ol narapela samting husat i kisim namba long ol dispela samting. Yumi toktok long ol save God i givim ol. Em wantaim ol lain i gat save long dens, jimnastiks, musik, atis, drama, metimetiks, sains na moa. Wanwan man i soim save God i givim we em i wok hat long mekim na kamap gut wantaim hat wok, stadi na prektis. Ol presen God-i givim i mekim ol man i gat save.
Eksasaisim ol Presen bilong Spirit
Lukluk long ai bilong gospel, God i givim ol pikinini bilong Em planti ol presen bilong spirit, na mekim ol i kamap ol lain i gat ol presen long spirit. Ol memba i kipim ol kavanen bai kisim ol presen bilong spirit, i gat presen bilong testimoni long Jisas Krais olsem Sevia bilong yumi, presen bilong Holi Gos, presen bilong feit long oraitim na kamap orait, presen bilong lukim gutpela na nogut, presen bilong kisim ol mirakel, na presen bilng kisim wisdom na save.1 Bikpela i invaitim yumi long panim gut tru ol gutpela presen, moa yet ol presen bilong spirit. Em i givim ol presen long spirit long blesim yumi na long blesim ol narapela.2
Yumi go bek long lukluk long ol lain i gat save long kain kain pilai o samting, em i impoten long tingim olsen preseen tasol ino no save wok em yet. Maski dispela save istap, ol lain bilong pilai i mas mekim hat wok long prektis bai ol i kamap moa gut na save bilong ol bai kisim ol bikpela win. Moa yet ol save yu kisim i kam wantaim sampela toktok yu bai no inap laikim “sampela bung i mas kamap.”
Long wankain wei, mi lukim pasin bilong lainim i save kam wantaim ol presen bilong spirit. Long mekim ol presen bilong spirit i wok i mas gat spiritual eksasais. “Long gat gaidens bilong Holi Gos long laip bilong yu i nidim wok bilong spirit. Dispela wok kam wantaim pasin bilong pre wantaim laik na stadim ol skripsa. Em wantaim tu pasin bilong kipim ol kavanen bilong yu na ol lo bilong God. Em wantam pasin bilong stap woti na kisim sakramen long wanwan wik.”3
Wanem em prut bilong eksasaisim ol presen bilong spirit? Ol tingting i kam long Spirit i helpim yumi pesim ol kainkain nid na sindaun long olgeta de, save bilong mekim na tok wanem, na wisdom long hau yu bai givim save. Taim yumi harim na bihainim ol dispela tingting i kam long spirit, Holi Gos bai mekim bikpela save bilong yumi long winim wanem yumi ken mekim yumi yet. Ol gutpela presen bilong spirit bai helpim yumi long laip bilong yumi.4
Pasin bilong poro wantaim Holi Gos em i wanpela bikpela tru presen bilong spirit ol Seint bilong Las-de i amamas long gat.
Hau dispela presen i impoten? Presiden Russell M. Nelson i bekim na i tok “long ol dei i kam, em bai hat tru long stap strong long spirit taim yu nogat dispela gaidens, daireksen, kamfot na sapot bilong Holi Gos.”5
Hau long invaitim na luksave long tingting i kam long Spirit.
Long ministri bilong mi, Mi painim wanpela laik bilong olgeta long olgeta hap em long save hau long invaitim na luksave long tingting i kam long Holi Gos. Ol tingting i kam long Spirit em bilong wanwan na i save kam long ol narakain wei. Tasol, yumi gat blesing long gat ol toktok bilong ol profet, bilong bipo na bilong nau, givim yumi ol gutpela lukluk long hau long kisim daireksen i kam long Spirit.
Larim mi ofarim fopela gaiding prinsipel bai helpim yu long invaitim na luksave long tingting i kam long Spirit.
Sanap long ol Holi Ples
Wan em long sanap long ol holi ples.6 Ino long taim mi tek pat long Tokyo Japan Temple open haus. Bekim bilong ol fomol invitesen ol i save salim i go long midia na ol VIP gest i go antap tru. Planti handred ol lain i kam tuarim temple. Ol gest i mangalim tumas naispela lukluk bilong temple, wantaim ol peten na dekoresen bilong Japan yet. Ol gest i pilim sore wantaim bikpela reverens na rispekt taim ol i harim toktok bilong ol odinens bilong ol tumbuna long ol rum we ol bai kamap. Tasol bel i pulap taim ol i pilim Spirit strong tru.
Mi tingim yet liklik taim wantaim wanpela gavman ofisel. Bihain long taim bilong stap isi na pre long selesel rum, bel bilong em i pulap wantaim tingting, em i tok isi long iau bilong mi, “Win mi pulim long hia tu em i pil narakain.” Mi luksave em i wok long toktok long presens bilong Holi Spirit, we, trutru, i stap long ol sekret hap. Sapos yu hop long pilim Spirit, stap long ples we Spirit bai isi long stap.
Ol temple na ol hom bilong yumi em ol sekret hap tru long ol dispela dediketed hap. Insait long hia yumi ken isis long pilim Spirit. Ol narapela holi ples em ol rum na spes insait long ol mitinghaus, seminari bilding na institut, na Sios histori sait na ol visita senta. Sanap long ol holi ples.
Sanap wantaim ol Holi Pipol.
Tu, sanap wantaim ol holi pipol. Bai mi toktok long namba tu gaiding principel wantaim narapela memori.
Mi noken lus tingting long devosinel mi tek pat long em long wanpela spots hap. Dispela hap save pulap long ol sapota i mekim nois taim ol i sapotim ol tim bilong ol na bagarapim ol narapela sait. Tasol long dispela nait, ples i bin stap isi na narakain. Dispela hap bin pulap long tausen ol yangpela pipol long harim na makim laip bilong Profet Joseph Smith. Reverens bilong ol, tok isi, pilim tenkyu na bel i pulap long prea i pulumapim dispela hap wantaim presens bilong Holi Spirit. Mi lukim stret long pes bilong ol. Em bin presen bilong Holi Gos i wok, strongim ol testimoni ol i givim long Joseph Smith na Restoresen.
Yu no inap long stopim Spirit long kamap long bung bilong ol holi lain pipol. Sapos yu hop long pilim Spirit, stap wantaim ol lain pipol we Spirit bai isi long stap. Seivia i tok olsem: “Long wanem we tupela o tripela i bung long nem bilong mi, long hap mi stap namel long ol.”7 Ol yangpela, tingim ol bung bilong ol holi lain pipol, ol kwarum na ol klas, FSY na seminari, wod na stek ektiviti—na wod kwaia. Sus long stap wantaim ol pipol na go long ol ples yu bai painim stretpela pasin. Painim ol strong long ol namba. Painim ol gutpela poro. Kamap gutpela poro. Sapotim wanpela narapela wanem hap yu stap. Sanap wantaim ol holi pipol.
Testifai long ol Holi Toktru
Tri, testifai long ol holi toktru olgeta taim yu ken. Kamfota bai serim nek bilong Em taim yumi testifai wantaim nek bilong yumi. Spirit bai berim witnes long man i toktok na long man i harim.
Mi tingim wanpela taim mi kisim 45-minit teksi i go long New York Siti. Mi bin gat gutpela stori toktok wantaim draiva long dispela taim igo long eapot, mi peim em na redi long goaut long teksi. Mi tingim mi no givim testimoni bilong wanem mi serim. Mi stop, serim sotpela testimoni, invaitim Spirit, na aiwara kam long ai bilong mitupela wantaim.
Taim yu painim na kisim ol opotuniti long serim testimoni wantaim ol narapela, yu bai kamapim ol taim long luksave long Spirit yu yet.
Harim long Holi Spirit.
Laspela prinsipel em long harim gut Holi Spirit. Em i ken kamap poroman bilong yumi tasol i save toktok long ol liklik, isi wei. Profet Elijah i painim olsem nek bilong Bikpela i no stap long win, guria, o paia—tasol long “wanpela liklik nek.”8 Em i “no nek bilong tanda,” tasol “wanpela liklik nek bilong stretpela isi pasin, i olsem tok isi,” tasol em i ken “sutim bel na sol.”9
Presiden Boyd K. Packer i tok: “Spirit i no save kisim atensen bilong yumi wantaim bikpela singaut o sekim yumi wantaim han i hevi. Tasol em i save tok isi. Em i save holim yumi isi tru na sapos yumi bisi, yumi bai no inap pilim.”10 Mi lukim olsem sampela taim nek bilong Em i liklik tru, o mi bisi tumas, olsem narapela bai kisim bilong mi. Planti taim tingting i kam long Holi Gos i kam thru long meri bilong mi, Lesa. Ol papamama o lida i stap long stretpela pasin bai kisim gaidens bilong yu.
Nois, planti toktok, na kros pait i stap long wol bai winim ol liklik isi tingting i kam long Holi Spirit. Painim hap i stap isi, holi spes we yu ken painim long kisim daireksen long Spirit.
Sampela ol Tok Lukaut
Taim yu skelim ol dispela prinsipel long invatim na luksave long Spirit, tingim ol dispela tok lukaut bilong gaidens.11
Strongim tingting i kam long spirit Ol tingting i kam long Spirit bai lain wantaim ol skripsa na ol tising bilong ol profet i stap laip.
Klia gut olsem ol piling yu kisim i stap stret wantaim wok bilong yu. Inap yu gat koling wantaim rait atoriti, ol tingting i kam long Spirit i no bilong yu long kaunselim ol skulim ol narapela.
Ol samting bilong Spirit i no inap long fos. Yu ken redim na stretim environmen i invaitim Spirit, na yu ken redim yu yet, tasol yu no inap long tokim hau o taim gutpela tingting bai kam. Wet isi na trastim olsem yu bai kisim wanem yu nidim long rait taim.
Yusim jasmen bilong yu. Sampela taim yumi laik bai Spirit i go pas long yumi long olgeta samting. Tasol, sampela taim Bikpela laikim yumi long yusim save God i givim long yumi na ekt long wei i go wantaim gutpela klia tingting. Presiden Dallin H. Oaks i tis:
“Dispela laik long Bikpela i go pas i strong, tasol em i nidim dispela save na klia tinging olsem Papa long Heven bai lusim planti disisen long sois yumi bai mekim. … Ol lain husat i lusim olgeta disisen long Bikpela na plid long kisim revelesen long olgeta sois bai painim ol sindaun we ol bai pre long kisim gaidens tasol bai no nap long kisim. …
“Yumi mas stadim ol samting ol tingting bilong yumi. … Bihain yumi pre long gaidens na ekt long em. … Sapos yumi no kisim gaidens, yumi mas ekt long bes jasmen bilong yumi.”12
Pinisim wantaim Invitesen
Long pinisim, Ol Seint bilong Las-de i gat ol presen na i ol i pipol bilong holim-kavanen. Tasol, yumi mas wanwan painim na eksasaisim ol presen bilong spirit long yumi na invaitim na lainim long luksave long tingting i kam long Spirit. Fopela gaiding prinsipel long helpim yumi long dispela taim em hia:
-
Sanap long ol holi ples.
-
Sanap wantaim ol holi pipol.
-
Testifai long ol holi toktru.
-
Harim gut Holi Spirit.
Save bilong yu long invaitim na luksave long ol tingting i kam long Spirit bai gro isi isi. “Long tunim yu yet i go long tokples bilong Spirit i olsem yu bai lainim narapela tokples. Em bai kamap isi isi na bai nidim yu long stap gut na isi.”13
Yumi go bek long hap yumi stat, plis tingtim olsem ol Seint bilong Las-de, yupela i gat presen. Tingim dispela piksa long wanpela fas Sande, i no long taim mi kisim. Wanpela yangpela pikinini, sanap antap long stul sia, i no nap long lukim em long pulpit. Papa bilong em i sanap klostu long em givim em sapot na toktok isi long iau bilong em taim em i amamas na serim “Mi em pikinini bilong God.”
Narapela testimoni i kam bihain em long yang singel adalt husat i stat wantaim liklik skin guria olsem. “Mi wis i gat wanpela i tok isi long iau bilong mi olsem.” Bihain em i kisim gutpela tingting na testifai, “Mi gat wanpela husat i tok isi long mi olsem—em Holi Gos!”
Mi pasim wantaim invitesen long yupela wanwan, tasol moa yet ol yut! Planti long yupela i save statim de bilong yupela taim yupela sanap fran long mira. Tumora, dispela wik, dispela yia, olgeta taim, stop taim yu lukluk long yu yet long mira. Tingting long yu yet, o tok bikpela sapos yu laik,: “Wow, lukim me! Mi em gutpela tru! Mi pikinini bilong God! Em i save long mi! Em i lavim mi! Mi gat presen—bilong Holi Gos olsem oltaim poro bilong mi!”
Mi putim testimoni bilong mi go long yupela, ol Seint bilong Las-de i gat ol presen, long God Papa, Jisas Krais, na Holi Gos, husat i berim testimoni long ol. Long nem bilong Jisas Krais, amen.