Ol Brata na Susa long Krais
Bai yumi amamas olsem yumi kamap long wanpela spirit i stap namel long yumi na holim pas ol narakain pasin na presen yumi i gat.
Ol dia prens bilong mi, yumi gat ol gutpela konferens sesin tede. Yumi pilim Spirit bilong Bikpela na lav bilong Em long ol gutpela toktok ol lida bilong yumi i serim. Mi amamas long adresim yupela olsem laspela man bilong toktok long dispela sesin. Mi pre bai Spirit bilong Bikpela stap yet wantaim yumi taim yumi amamas wantaim olsem ol trupela brata susa long Krais.
Dia profet bilong yumi, Russell M. Nelson, i tokaut: “Mi singaut long olgeta memba long olgeta hap long kam aut long pasin bilong lusim na no laikim narapela. Mi plid wantaim yupela long promotim rispekt bilong olgeta pikinini bilong God.”1 Olsem wanpela global sios i gro, bihainim dispela invitesen i kam long profet em i namba wan samting long bildim kingdom bilong Sevia long olgeta nesen long wol.
Gospel bilong Jisas Krais i tisim olsem yumi olgeta pikinini bilong ol papamama bilong yumi long heven husat i lavim yumi2 na yumi bin stap olsem famili long ai bilong God pastaim long yumi bon long ples graun. Gospel i tisim yumi tu olsem yumi kamap long piksa bilong God.3 Yumi wankain long ai bilong Em,4 Em “i mekim long wanpela blut olgeta nesen bilong ol man [na meri].”5 Olsem na, yumi olgeta i olsem God, ol heritij, na potensel, long wanem i gat “wan God na Papa bilong olgeta, i antap olgeta , stap long yumi, na insait long [yumi] olgeta.”6
Olsem ol disaipel bilong Krais, yumi gat invitesen long growim feit long na lav bilong, ol spirit brata- na sista taim yumi pas wantaim ol long yuniti na lav, maski yumi narakain, na mekim bikpela strong bilong yumi long promotim rispekt bilong digniti bilong ol pikinini man na meri bilong God.7
Dispela i no bin wankain stap ol lain bilong Nifai i ekspiriensim insait long 200 yias bihain long Krais i minista long ol?
“Na tru tumas bai i nogat wanpela lain pipol i amamas namel long ol pipol God i mekim long han bilong em yet.
Na i no bin gat ol Lemenaits, nogat eni kain ol ites, tasol ol i bin wan, ol pikinini bilong Krais, na ol i gat rait long kisim kingdom bilong God.
“Na ol i bin kisim bikpela blesing tru!”8
Presiden Nelson i tok strong long spredim digniti na rispekt bilong ol wan lain bilong yumi taim em i tok: “Man i kamapim yumi singautim yumi olgeta long lusim ol pasin bilong heit namel long olgeta grup i pikinini bilong God. Yumi husat i gat heit long ol narapela skin kala i mas tanim bel! … Em i wok bilong yumi wanwan long wanem hap yumi stap long lukautim dispela digniti na rispekt wanwan pikinini bilong God i mas gat.”9 Trutru, digniti bilong man em i antap moa long rispekt bilong ol narakain pasin bilong yumi.10
Dispela sekret koneksen i pasim yumi wantaim God olsem ol pikinini bilong Em, dispela daireksen profet i givim em i namba wan step yumi mas kisim long kamap klia gut long ol narapela na maski long sanapim ol banis namel long yumi.11 Tasol, olsem Pol i tok lukaut long ol Efisiens, yumi mas luksave olsem long kamap long dispela mak, em bai nidim wanwan na yumi olgeta long ekt wantaim daun pasin, pasin bilong givim yu yet, na isi pasin long wanpela narapela.12
I gat stori long wanpela tisa bilong ol Jiu husat i amamas long san i kam antap wantaim tupela poro bilong em. Em i askim ol, “Hau yu save nait i pinis, na nupela de i stat?”
Wanpela i bekim, “Taim yu lukluk long is na yu ken lukim klia sipsip long got.”
Narapela i bekim, “Taim yu ken lukluk go longwe antap long hap solwara na graun i bung na lukim klia oliv diwai long fig diwai.”
Bihain ol i tanim long dispela wais tisa na askim em wankain askim. Bihain long em i tingting, em i tok, “Taim yu ken lukluk long is na lukim pes bilong meri o pes bilong man na tok,, ‘em i sista bilong mi, em i brata bilong mi.’”13
Ol dia prens, Mi ken tokim yupela olsem dispela lait bilong nupela de i sain moa brait long laip bilong yumi wantaim rispekt na digniti na olsem ol trupela brata na sista long Krais.
Taim em i minista long ples graun, Jisas i soim dispela lo bikos em i “go nabaut na mekim gutpela pasin”.14 long ol pipol, invaitim ol long kam long Em, na kisim gutpela bilong Em, maski long wanem hap, o klas, o kalsa bilong ol. Em i minista, hilim, na olgeta taim lukautim nid bilong ol lain, moa yet ol lain husat i narakain, i karim hevi na ol man i daunim o rausim ol. Em i no tok nogat long wanpela tasol mekim gutpela pasin long ol wantaim lav, long wanem Em i lukim ol olsem ol brata susa bilong Em, ol pikinini bilong wanpela Papa tasol.15
Wanpela taim dispelai bin kamap em long taim Sevia i wokabaut i go long Galili, na i wokabaut i go olsem long Samaria.16 Bihain Jisas i sindaun long wel wara bilong Jekob long malolo. Long hap, wanpela meri Samaria i kam long pulumapim wara. Bikos em i save long olgeta samting, Jisas i tok long em, “Givim mi wara long dring.”17
Dispela meri i kirap nogut olsem wanpela Jiu i askim wanpela Samaritan meri long halivim na em i tok, “Olsem wanem na yu, wanpela Jiu, askim wara long mi, wanpela meri Samaria? long wanem ol Jiu i nogat wok wantaim ol Samaritan.”18
Tasol Jisas, i lus ting long dispela pasin kros pait namel long ol Samaritan na ol Jiu, i mekim gutpela pasin long dispela meri na halivim em long save gut long Em i husat—olsem, Mesaia, husat bai tokim em olgeta samting na husat kam bilong em em i wetim.19 Dispela pasin i mekim na meri ya i ron igo bek long siti na tokaut long ol pipol long samting i kamap, em i tok, “Nogut em i dispela Krais?”20
Mi gat bikpela sore pasin long ol lain husat i stap long pasin bilong birua, ol man i daunim ol o heitm ol bikos long laip bilong mi, mi lukim pen ol gutpela pipol i karim taim ol i jasim ol o rausim ol bikos ol i luk o toktok narakain. Mi pilim tru bel hevi long ol dispela lain tingting bilong ol i stap yet long tudak, na tingting bilong ol i sot, na bel bilong ol i had olsem ston wantaim bilip olsem ol bai stap antap long ol narapela husat bai stap daunbilo. Ol sotpela tingting na lukluk bilong ol i pasim ol long lukim ol yet olsem ol pikinini bilong God.
Ol profet i tokaut, yumi stap long ol taim na de klostu long Namba tu Kam Bek bilong Sevia.21 Dispela wol i lukluk igo long wanpela rot tasol bikos long ol hevi bilong narapela skin kala, politiks, na moni. Ol dispela kain pasin i senisim tingting bilong ol man long lukluk bilong ol long narapela man. Bikos long dispela, yu bai lukim olsem ol man bai mekim toktok long wei bilong tingting, toktok na tu ol kalsa na kain pasin olsem long daunim ol narapela, mekim tok pilai long ol na kirapim bel hevi na i nogat rispekt na heit long ol narapela. Ol kain pasin i kamap long praid, bikhet, mangal, na jelesi, na ol pasin bilong bagarapim narapela,22 we i no olsem pasin bilong Krais. Dispela pasin i no gutpela long ol lain husat i wok hat long kamap trupela disaipel bilong Em.23 Ol dia brata susa, i nogat spes bilong ol dispela kain pasin bilong heit insait long komuniti bilong ol Seint.
Olsem ol pikinini man na meri bilong kavanen, yumi ken halivim long rausim ol dispela kain pasin taim yumi lukluk long ol dispela narakain pasin i stap namel long yumi wantaim ai bilong Sevia24 na yumi i gat wankain samting—yumi pikinini bilong God. Moa yet, yumi ken wok hat long lukim yumi yet long ol driman, hop, sore na pen bilong ol neiba bilong yumi. Yumi olgeta i wokabaut olsem ol pikinini bilong God. yumi wankain long stap bilong yumi ino stret na long strong bilong yumi long gro. Yumi bai wokabaut wantaim, bel isi i stap, bel bilong yumi i pulap long lav long God na long olgeta man—o, olsem Abraham Lincoln i raitim, “wantaim pasin nogut long nogat man na siariti long olgeta.”25
Yu save tingting long lo bilong rispekt long digniti bilong man na pasin bilong ikwaliti i mas soim long ol we yumi dres ap long haus bilong Bikpela? Yumi olgeta yunait na kam long temple wantaim wanpela as na pulap long laik long kamap piua na holi long ai bilong Em. Yumi dres ap long wait, Bikpela i kisim yumi olsem ol bilaved pikinini bilong Em, man na meri bilong God,yumi kamap long Krais.26 Mipela i amamas long mekim ol wankain odinens, mekim ol wankain kavanen, komitim yumi yet long stap bihainim laip istap antap na i holi, na kisim ol wankain promis bilong oltaim. Yumi yunait long wanpela as, yumi lukim wanpela narapela long nupela ai, na insait long dispela wan yumi stap, yumi amamasim narakain pasin bilong yumi olsem ol pikinini bilong God.
Ino long taim mi halivim ol dignitari na ol gavman ofisel long open haus bilong Brasilia Brazil Temple. Mi wet liklik long eria bilong senis wantaim vais presiden bilong Brazil, na mitupela i toktok long waitpela kolos yumi olgeta save werim insait long temple. Mi tok klia long em olsem dispela wankain kolos i wait mipela i werim i soim olsem yumi olgeta wankain long God na insait long temple lukluk bilong yumi ino vais presiden bilong kantri o sios lida tasol pikinini oltaim bilong Papa i laikim yumi tumas.
Iguaçú Wara i ron long Sauten Brazil na kapsait i go long wanpela hap ol i kolim olsem Iguazu Falls—wanpela naispela hap long ples graun God i mekim, ol i kolim olsem wanpela hap bilong ol sevenpela wanda bilong dispela wol. Planti wara i ron i go kamap wanpela wara na bihain i bruk na kamap planti ol handret watafol. Long tok piksa, dispela watafol i olsem famili bilong God long ples graun, long wanem yumi serim wankain spirit i kam long sem hap, i kam long God. Tasol, yumi wanwan i ron i kam long ol narakain kalsa, tokples, kantri, tingting, ekspiriens na piling. Tasol, yumi muv fowod olsem ol pikinini bilong God na ol brata susa long Krais, noken lusim koneksen bilong yumi wantaim Em, we i mekim yumi narakain na komuniti i gat lav.27
Ol brata susa, yumi lainim ol bel na tingting bilong yumi na wantaim save na testimoni olsem yumi olgeta i wankain na ikwal long ai bilong God, yumi olgeta i kisim endaumen i gat wankain mak. Bai yumi amamas moa long koneksen bilong yumi olsem ol wanlain long spirit namel long yumi na ol pasin na presen yumi gat. Sapos yumi mekim olsem, mi promisim yupela bai yumi ron long wei bilong yumi, olsem wara long Iguaçú Watafol, na noken lusim koneksen i go long God i mekim yumi olsem ol narakain lain, “ol pikinini bilong Krais, na yumi gat rait long kisim kingdom bilong God.”28
Mi testifai long yupela olsem taim yumi go het long ron olsem long laip bilong yumi hia long grain, nupela dei bai stat wantaim nupela lait bai mekim brait laip bilong yumi na laitim ol opotuniti bai kam na yumi kem kisim ol blesing i kam long God namel long ol pikinini bilong Em.29 Yumi bai trutru kamap ol instramen long han bilong Em long promotim rispekt na digniti namel long olgeta pikinini bilong Em. God i stap. Jisas em i Sevia bilong dispela wol. Presiden Nelson em i profet bilong God long taim bilong yumi. Mi berim witnes long ol dispela tok tru long sekret nem bilong Jisas Krais, amen.