Ko e Ikuna ʻo e ʻAmanaki Leleí
Ko e ʻamanaki leleí ko ha meʻafoaki moʻui ia, ko ha meʻafoaki ʻoku tupulaki ʻi heʻetau fakatupulaki ʻetau tui kia Sīsū Kalaisí.
Siʻoku kāinga ʻofeina ʻi he funga ʻo e māmaní, ʻi heʻetau kamata ʻa e taimi makehe ko ʻeni ʻo e konifelenisi lahí, moʻoni ʻe nofotaha ʻa e fofonga ʻo e langí ʻiate kitautolu. Te tau fanongoa ʻa e leʻo ʻo [e ʻEikí] ʻo fakafou ʻi Heʻene kau tamaioʻeikí; te tau ongoʻi ʻa e ivi “tataki, fakahinohino mo e fakafiemālie” ʻo e Laumālie Māʻoniʻoní, pea ʻe fakamālohia ʻetau tuí.
ʻI he taʻu ʻe tolu kuohilí, naʻe kamata ai ʻe Palesiteni Lāsolo M. Nalesoni ʻa e konifelenisi lahí ʻaki ʻa e ngaahi lea ko ʻení: “Ko e fakahā haohaoa ki he ngaahi fehuʻi ʻoku ʻi homou lotó, te ne ʻai e konifelenisí ni ke ʻaonga mo fakangalongataʻa. Kapau kuo teʻeki ke mou feinga ke faitokonia kimoutolu ʻe he tokoni ʻa e Laumālie Māʻoniʻoní, ke mou ongoʻi e meʻa ʻoku finangalo e ʻEikí ke mou ongoʻi ʻi he lolotonga ʻo e ʻaho ʻe ua ko ʻení, ʻoku ou fakaafeʻi kimoutolu ke mou fakahoko ia he taimí ni. Kātaki ʻo ʻai ke hoko e konifelenisí ni ko ha taimi ia ʻo e keinanga ʻi he ngaahi pōpoaki mei he ʻEikí ʻoku fakafou mai ʻi Heʻene kau tamaioʻeikí.”
ʻOku fakafehokotaki mālohi ʻe he folofolá ʻa e ngaahi kupuʻi lea ʻe tolu ko e: tuí, ʻamanaki leleí mo e ʻofa faka-Kalaisí. Ko e meʻafoaki ʻo e ʻamanaki leleí ko ha fakakoloa mahuʻinga lahi ia mei he ʻOtuá.
ʻOku fakaʻaongaʻi ʻa e foʻi lea ʻamanaki leleí ki he ngaahi meʻa lahi ʻoku tau fiemaʻu ke hokó. Hangē ko ʻení, “ʻOku ou ʻamanaki lelei pē he ʻikai ke ʻuha,” pe “ʻOku ou ʻamanaki lelei pē ʻe mālohi ʻetau timí.” Ko ʻeku taumuʻá ke lea ʻo kau ki heʻetau ngaahi ʻamanaki lelei toputapu mo taʻengata ʻoku fakatefito ʻia Sīsū Kalaisi mo e ongoongolelei kuo fakafoki maí pea mo ʻetau “ʻamanaki [ʻi he loto-falala] ki he ngaahi tāpuaki kuo talaʻofa mai ki he māʻoniʻoní.”
Ko ʻEtau ʻAmanaki Lelei ki he Moʻui Taʻengatá
ʻOku fakapapauʻi ʻetau ʻamanaki lelei ki he moʻui taʻengatá ʻi he ʻaloʻofa ʻa Kalaisí pea mo ʻetau ngaahi filí, ʻo fakaʻatā ai ʻa e tāpuaki fakaʻofoʻofa ʻo e foki ki hotau ʻapi fakalangí pea nofo fakataha ʻi he nonga mo e fiefia mo ʻetau Tamai Hēvaní, Hono ʻAlo ʻOfaʻangá, ko hotau fāmili faivelengá mo e kaungāmeʻa mamaé, pea mo e kau tangata mo fafine angatonu mei he konitinēniti mo e senituli kotoa pē.
ʻOku tau aʻusia ʻi he māmaní ʻa e fiefiá mo e mamahí ʻi hotau siviʻi pea tau ikuná. ʻOku tau ikuna ʻo fakafou ʻi he tui kia Sīsū Kalaisí ʻi heʻetau ikunaʻi ʻetau ngaahi angahalá, faingataʻaʻiá, ʻahiʻahí, fakamaau taʻe-totonú, mo e ngaahi faingataʻa ʻo e māmani fakamatelié.
ʻI heʻetau fakamālohia ʻetau tui kia Sīsū Kalaisí, ʻoku ope atu ʻetau vakaí mei hotau ngaahi faingataʻaʻiá ki he ngaahi tāpuaki mo e talaʻofa ʻo e taʻengatá. Hangē ko ha maama ʻoku tupulaki ʻene ulo ngingilá, ʻoku fakamaama ʻe he ʻamanaki leleí ʻa e māmani kuo fakapoʻulí, pea tau vakai ki hotau kahaʻu nāunauʻiá.
ʻOku Maʻu ʻa e ʻAmanaki Leleí mei he ʻOtuá
Talu mei he kamataʻangá, mo e vēkeveke ʻetau Tamai Hēvaní mo Hono ʻAlo ʻOfaʻangá ke tāpuakiʻi ʻa e māʻoniʻoní ʻaki ʻa e meʻafoaki mahuʻinga ʻo e ʻamanaki leleí.
Hili ʻa e mavahe ʻa ʻĀtama mo ʻIvi mei he ngoué, naʻe akoʻi kinaua ʻe ha ʻāngelo ki he talaʻofa ʻo Sīsū Kalaisí. Naʻe fakamaama ʻena moʻuí ʻe he meʻafoaki ʻo e ʻamanaki leleí. Naʻe pehē ʻe ʻĀtama, “Kuo fakaʻā ai ʻa hoku matá, pea te u maʻu ʻa e fiefiá.” Naʻe lea ʻa ʻIvi ʻo kau ki he “fiefia ʻo [hona] huhuʻí, pea mo e moʻui taʻengata ʻa ia ʻoku foaki ʻe he ʻOtuá kiate kinautolu kotoa pē ʻoku talangofuá.”
Hangē ko hono ʻomi ʻe he Laumālie Māʻoniʻoní ʻa e ʻamanaki leleí kia ʻĀtamá, ʻoku fakamaama ʻe he mālohi ʻo e Laumālie ʻo e ʻEikí ʻa e kau faivelengá ʻi he ʻahó ni, ʻo fakahaaʻi tonu mai ai ʻa e moʻoni ʻo e moʻui taʻengatá.
Naʻe tuku mai ʻe he Fakamoʻuí ha Fakafiemālie, ʻa e Laumālie Māʻoniʻoní, ko ha takaua ke ʻomi ʻa e tuí, ʻamanaki leleí, mo e melino “ʻoku ʻikai hangē ko e foaki ʻa māmaní.”
Naʻe folofola ʻa e Fakamoʻuí, “Te mou maʻu ʻa e mamahí ʻi māmani; ka mou loto-toʻa [tauhi e maama ʻo e ʻamanaki leleí]; kuó u ikuʻi ʻa māmani.”
ʻI he taimi ʻo e faingataʻá, ʻoku tau fili ke falala ki he ʻEikí ʻi he tui. ʻOku tau lotu fakalongolongo ʻo pehē, “ʻOua naʻa fai hoku lotó, ka ko e fingangalo ʻoʻoú.” ʻOku tau ongoʻi ʻa e hōifua ʻa e ʻEikí ki heʻetau fakatōkilalo loto-fiemālié, pea ʻoku tau tatali ki he melino kuo talaʻofa mai ʻe he ʻEikí ʻi Heʻene taimi kuo filí.
Naʻe akoʻi ʻe he ʻAposetolo ko Paulá, “[ʻE] fakafonu ʻa kimoutolu ʻe he ʻOtuá … ʻaki ʻa e fiefia mo e melino … , koeʻuhí ke mou mohu ʻamanaki lelei,” “fiefia ʻi he ʻamanaki lelei; pea faʻa kātaki ʻi he mamahi;” “ʻi he mālohi ʻo e Laumālie Māʻoniʻoní.”
Ko ha Lēsoni ʻo e ʻAmanaki Leleí
Naʻe ʻiloʻi tonu ʻe he palōfita ko Molonaí ʻa hono maʻu ʻo e ʻamanaki lelei ʻia Kalaisí lolotonga ʻa e ʻahiʻahí. Naʻá ne fakamatalaʻi ʻa e tuʻunga fakatuʻutāmaki naʻá ne ʻi aí ʻo pehē:
“He ʻoku ou toko taha pē. … ʻOku ʻikai … [ha] potu ke u ʻalu ki ai.”
“ʻOku ʻikai te u fakahā au … telia naʻa nau fakaʻauha au.”
Ko e fakaofó, ʻi he taimi fakamamahi mo tuenoa ko ʻení, naʻe lekooti ʻe Molonai ʻa e ngaahi lea ʻa ʻene tamaí ki he ʻamanaki leleí:
“Kapau ʻoku maʻu ʻe ha tangata ʻa e tuí kuo pau ke ne maʻu mo e ʻamanaki leleí; he kapau ʻoku ʻikai ke ʻi ai ha ʻamanaki ʻe ʻikai lava ke ʻi ai ha tui.”
“Ko e hā ʻa e meʻa ke mou ʻamanaki lelei ki aí? … Te mou maʻu ʻa e ʻamanaki leleí ʻi he fakalelei ʻa Kalaisí pea mo e mālohi ʻo ʻene toetuʻú, ke fokotuʻu hake ki he moʻui taʻengatá.”
Siʻoku ngaahi tokoua mo e tuofāfine, ko e ʻamanaki leleí ko ha meʻafoaki moʻui ia, ko ha meʻafoaki ʻoku tupulaki ʻi heʻetau fakalahi ʻetau tui kia Sīsū Kalaisí. “Ko e tuí ko e tuʻunga ia ʻo e ngaahi meʻa ʻoku ʻamanaki lelei ki aí.” ʻOku tau langa ʻa e tuʻunga ko ʻení—ʻa e ngaahi kongokonga fakamoʻoni ʻo ʻetau tuí—ʻi he lotú, ngaahi fuakava ʻo e temipalé, tauhi ʻo e ngaahi fekaú, keinanga maʻu pē mei he folofolá pea mo e ngaahi lea ʻa e kau palōfita ʻi onopōní, maʻu ʻo e sākalamēnití, pea mo e lotu fakauike mo hotau Kāingalotú.
Ko ha Fale ʻo e ʻAmanaki Leleí
Ke fakamālohia ʻetau ʻamanaki leleí ʻi he kuonga ʻoku fakautuutu ai ʻa e koví, kuo tataki ʻe he ʻEikí ʻene palōfitá ke langa Hono ngaahi temipalé ʻi he māmaní.
ʻI heʻetau hū ki he fale ʻo e ʻEikí, ʻoku tau ongoʻi ʻa e Laumālie ʻo e ʻOtuá, ʻo fakamoʻoniʻi ai ʻetau ʻamanaki leleí.
ʻOku fakamoʻoni ʻa e temipalé ki he fonualoto naʻe ʻikai ʻi ai ha tahá pea ʻoku hokohoko atu ʻa e moʻui ʻo fakalaka atu ʻi he veilí maʻá e taha kotoa.
Kiate kinautolu kuo teʻeki maʻu ha hoa taʻengatá, ʻoku fakapapauʻi mālohi ʻe he ngaahi ouaú ʻe maʻu ʻe he tokotaha angatonu kotoa ʻa e tāpuaki kotoa pē kuo talaʻofa maí.
ʻOku ʻi ai ha ʻamanaki lelei fiefia ʻi he tūʻulutui fehangahangai ha ongomeʻa kei talavou ʻi he ʻōlitá ke silaʻi, ʻo ʻikai ngata pē ʻi taimi ka ki he ʻitānití foki.
ʻOku ʻi ai ha ʻamanaki lelei lahi fau maʻatautolu ʻi he ngaahi talaʻofa kuo fai ki hotau hakó, neongo pe ko e hā honau tūkunga lolotongá.
ʻOku ʻikai ha mamahi, mahaki, fakamaau taʻetotonu, faingataʻaʻia, ʻikai ha meʻa ke ne fakafeʻātungia ʻetau ʻamanaki leleí ʻi heʻetau tui mo puke maʻu ʻetau ngaahi fuakava mo e ʻOtuá ʻi he fale ʻo e ʻEikí. Ko ha fale ia ʻo e maama, ko ha fale ʻo e ʻamanaki lelei.
ʻI he Taimi ʻOku Mole ai ʻa e ʻAmanaki Leleí
ʻOku tau tangi mamahi ʻi heʻetau vakai ki he mamahi mo e mole ʻa e ʻamanakí ʻiate kinautolu ʻoku ʻikai ha ʻamanaki lelei ʻia Kalaisí.
Naʻá ku toki fakatokangaʻi kimuí ni ha ongomeʻa mali naʻá na tui kia Kalaisi, ka naʻá na fili ke siʻaki ʻena tuí. Naʻá na lavameʻa ʻi he māmaní, pea naʻá na maʻu ʻa e fiefia ʻi heʻena potó mo hono siʻaki ʻo ʻena tuí.
Naʻe ngali lelei ʻa e meʻa kotoa, kae fakaʻohovale ʻa e puke ʻa e husepānití ʻo mālōlō, naʻe kei talavou mo longomoʻui. Hangē ko e fakapuliki ʻe he māhiná ʻa e huelo ʻo e laʻaá, naʻá na siʻaki ʻa e maama ʻo e ʻAló, pea ko e ikuʻangá ko ha mole ʻa e ʻamanaki leleí. ʻI he ʻikai loto ʻa e uaifí ke tui ki he meʻa naʻe hokó, naʻá ne ongoʻi puputuʻu, mamahi ʻi he ʻikai mateuteú, ʻo ʻikai lava ke fakafiemālieʻi ʻene fānaú. Naʻá ne fakakaukau naʻe ʻi ha tuʻunga haohaoa ʻene moʻuí kae ʻoua kuo fakaʻohovale ʻa e ʻikai ke ne vakai ki ha ʻapongipongí. Naʻe ʻomi ʻe he siva ʻo ʻene ʻamanakí ha fakapoʻuli mo ha puputuʻu.
ʻAmanaki Lelei ʻi he Faingataʻa Fakamamahí
Tuku muʻa ke u fakafehoanaki ʻene mamahi ʻi he siva ʻo e ʻamanakí mo ha fāmili ʻe taha naʻe fakatefito ʻenau ʻamanaki leleí ʻia Kalaisi lolotonga ha taimi fakamamahi.
ʻI he taʻu ʻe uofulu-mā-taha kuohilí, naʻe ʻave vakapuna ai ʻa e foha valevale ʻo hoku fakafotu, ko Peni ʻEnitasení, mo hono uaifi, ko Lopí, mei honau kiʻi kolo ʻi ʻAitahoó ki Sōleki Siti. Naʻá ku aʻu atu ki he falemahakí, pea fakamatalaʻi mai ʻe Peni ʻa e tuʻunga fakatuʻutāmaki ʻoku ʻi ai ʻa e mafu ʻo ʻena pēpeé. Naʻá ma hilifaki homa nimá ʻi he kiʻi ʻulu ʻo Tuleí. Naʻe tāpuakiʻi ia ʻe he ʻEikí ʻaki ha moʻui fuoloa ange.
Naʻe tafa ʻa e mafu ʻo Tuleí ʻi he fuofua uike ʻo ʻene moʻuí mo ha ngaahi tafa lahi ange kimui ai. Hili ha ngaahi taʻu, naʻe hā mahino ange ʻe fiemaʻu ke fetongi ʻa e mafu ʻo Tuleí. Neongo naʻe fakangatangata ʻa e ngaahi ʻekitivitī naʻá ne lava ke fakahokó, ka naʻe tupulaki ʻa ʻene tuí. Naʻá ne tohi ʻo pehē, “Kuo teʻeki ke u ongoʻi fakaʻofaʻia ʻiate au pē koeʻuhí kuó u ʻilo maʻu pē ʻa e mahuʻinga ʻo hono maʻu ʻa e tui kia Sīsū Kalaisí mo ha fakamoʻoni ki he palani ʻo e fakamoʻuí.”
Naʻe tauhi ʻe Tulei ʻi heʻene telefoní ʻa e lea ʻiloa ko ʻeni ʻa Palesiteni Nalesoní: “ʻOku siʻi ha kaunga e fiefia ʻoku tau maʻú, ki he tūkunga ʻetau moʻuí [kae kaunga lahi ange ki he] meʻa ʻoku tukutaha ai ʻetau tokangá.”
Naʻe tohi ʻe Tulei ʻo pehē: “Kuó u hanganaki maʻu pē ke ngāue fakafaifekau taimi kakato, ka … he ʻikai fakaʻatā ʻe heʻeku kau toketaá ke u ngāue fakafaifekau kae ʻoua kuo ʻosi ha taʻu ʻe taha pe lahi ange mei hoku tafa fetongi mafú. … Kuó u tekaki ʻeku tuí kia Sīsū Kalaisi.”
Naʻe fiefia ʻa Tulei ʻi hono tali ia ki he malaʻe ʻo e tauhi tohí ʻi BYU ʻi he kamataʻanga ʻo e semesitā ko ʻení, ka naʻe toe fakafiefia ange ʻi he konga kimui ʻo Siulaí ʻi heʻene maʻu ʻa e telefoni naʻe ʻikai ke faʻa tatali ki aí, ke haʻu ki he falemahakí ke fakahoko hono tafa fetongi mafú.
Naʻe pehē ʻe Tulei, “Hili ha taʻu ʻe taha mei ai, te u ngāue fakafaifekau leva.”
Naʻe ʻi ai ha ngaahi ʻamanaki lelei lahi ʻi heʻene hū atu ki he loki tafá. Neongo iá, ʻi he lolotonga ʻo e tafá naʻe ʻi ai ha ngaahi faingataʻa fakamamahi, pea naʻe ʻikai ke toe ake ʻa Tulei.
Naʻe pehē ʻe heʻene faʻē ko Lopí: “Kuo hoko ʻa e ʻaho Falaité ko e ʻaho fakamamahi taha kiate aú … ʻi he feinga ko ia ke u tali ʻa e meʻa naʻe hokó. … Naʻá ku ʻā fuoloa ʻi he poʻulí ʻi heʻeku feinga ke mahino kiate au ʻa e meʻa kotoa pē. … Ka ʻi he ʻaho Tokonakí, naʻá ku ʻā hake mo ha ongoʻi fiefia moʻoni. Naʻe ʻikai ko ha nonga pē; naʻe ʻikai ko ha fakaʻikaiʻi ʻa e meʻa naʻe hokó. Naʻá ku ongoʻi fiefia maʻa hoku fohá, pea naʻá ku ongoʻi fiefia ʻi he hoko ko ʻene faʻeé. … Naʻe pongipongia ange ʻa e ʻā ʻa Pení ʻiate au, pea ʻi he faifai peá ma maʻu ha faingamālie ke talanoá, naʻe ʻā hake ʻa Peni mo ha ongo tatau.”
Naʻe pehē ʻe Peni: “Kuó u maʻu ha mahino ʻi hoku laumālié ʻi hono akoʻi au ʻe he ʻOtuá ʻo fakafou ʻi Hono Laumālie Māʻoniʻoní. Naʻá ku ʻā hake ʻi he 4:00 a.m. pea naʻe fakafonu ʻaki au ha nonga mo ha fiefia naʻe ʻikai lava ke fakamatalaʻi. ʻOku malava fēfē ʻeni? … Ko ha meʻa fakamamahi lahi ʻa e siʻi mālōlō ʻa Tuleí, pea ʻoku ou mate ʻi he ʻofa kiate iá. Ka ʻoku ʻikai tuku ʻe he ʻEikí ke tau mamahi pē. … ʻOku ou hanganaki atu ki ha toe feʻiloaki fiefia.”
Ko e Talaʻofa ʻo e ʻAmanaki Leleí
Kuo hiki ʻe Tulei ʻi heʻene tohinoá ʻa e ngaahi leá ni mei he lea konifelenisi lahi ʻa Palesiteni Nalesoni naʻe pehē: “Hangē ʻe faingataʻa ke ke ongoʻi fiefia ʻi he puke haʻo fānau ʻi ha mahaki he ʻikai lava ke faitoʻo pe mole hoʻo ngāué pe taimi ʻoku lavakiʻi ai koe ho malí. Ka ko e fiefia tofu pē ia ʻoku ʻomi ʻe he Fakamoʻuí. Ko ʻEne fiefiá ʻoku pau, mo fakapapauʻi mai kiate kitautolu ʻʻe kiʻi fuofuoloa siʻi pē ʻa hoʻo faingataʻaʻiáʼ [Tokāteline mo e Ngaahi Fuakava 121:7] pea fakatapui ko hotau tāpuaki.”
Siʻi kāinga, mahalo he ʻikai vave ʻa hoʻo maʻu ʻa e fiemālie ʻokú ke fiemaʻú, ka ʻoku ou palōmesi atu, ʻi hoʻo falala ki he ʻEikí, te ke maʻu ʻEne fiemālié.
ʻOfa ke tau tanumaki ʻetau tui mahuʻingá, pea vilitaki atu ʻi ha ʻamanaki ʻoku mālohi haohaoa. ʻOku ou fakamoʻoni ko ʻetau ʻamanaki leleí ʻa hotau Fakamoʻui ko Sīsū Kalaisí. ʻE hoko ʻo moʻoni ʻa ʻetau ngaahi fakaʻānaua māʻoniʻoni kotoa pē ʻo fakafou ʻiate Ia. Ko Ia ʻa e ʻOtua ʻo e ʻamanaki leleí—ko e ikuna ʻo e ʻamanaki leleí. ʻOkú Ne moʻui mo ʻofa ʻiate koe. ʻI he huafa ʻo Sīsū Kalaisí, ʻēmeni.