Tokanga Taha kia Sīsū Kalaisi mo ʻEne Ongoongoleleí
ʻI he ʻikai ke tau tokanga ki he ngaahi takihala ʻa e māmaní pea tokanga taha kia Sīsū Kalaisi mo ʻEne ongoongoleleí, ʻoku fakapapauʻi ai ʻetau lavameʻá.
ʻI he 1996, naʻe ikuna ʻe he timi soka tangata ʻa Naisīliá ʻa e koula ʻi he Sipoti ʻOlimipiki naʻe fakahoko ʻi ʻAtalanitā ʻi he ʻIunaiteti Siteití. ʻI he ʻosi ʻa e tau lahí, naʻe ʻaukolo mai ha ngaahi haʻofanga kakai fiefia ki he loto hala ʻo e kolo lahi mo e kolo iiki kotoa ʻi Naisīlia; ko e fonuá ni ʻo ha kakai ʻe toko 200 milioná naʻe liliu ia ʻi he taimi pē ko iá ki ha fakafiefia lahi ʻi he uá hengihengi! Naʻe ongona ʻa e fiefia, nēkeneka, mo e mavava ʻi he fakahoko ʻa e kai, hiva, mo e tauʻolunga ʻa e kakaí. ʻI he momeniti ko iá, naʻe taha ʻa Naisīlia, pea naʻe laukau ʻaki ʻe he Naisīlia kotoa honau tangataʻi fonuá.
Kimuʻa ʻi he ʻOlimipikí, naʻe fepaki ʻa e timi ko ʻení mo ha ngaahi pole taʻefaʻalaua. ʻI he kamata ʻa e feaʻuhí, naʻe ʻosi ʻenau tokoni fakapaʻangá. Naʻe vaʻinga ʻa e timí ʻo ʻikai ha naunau vaʻinga lelei, feituʻu ako vaʻinga, meʻakai, pe tokoni ki he foó.
Ngaahi tā mei he Jerome Prevost/Getty Images
ʻI he taimi ʻe taha, naʻe lau miniti pē pea nau tō mei he feʻauhí, ka naʻe ikuna ʻa e timi Naisīliá neongo ʻa e ngaahi faingataʻá. Naʻe liliu ʻe he momeniti mahuʻingá ni ʻa e anga ʻenau fakakaukau kiate kinautolú. ʻI he loto-falala foʻoú ni, mo e ngāue mālohi fakafoʻituitui mo fakataha ʻa e timí, mo ʻenau loto-fakapapau taʻetūkuá, naʻa nau faaitaha ʻo ʻikai tokanga ki he ngaahi fakafepakí kae tokanga taha ki he ikuná. Naʻa nau ikuna ai ha ngaahi mētali koula, pea naʻe ui kinautolu ʻe he kau Naisīliá ko e “Timi Maná.” ʻOku kei talanoaʻi pē ʻi he sipoti ʻi Naisīliá ʻa e Timi Mana ʻi he ʻOlimipiki ʻi he 1996.
Ngaahi tā mei he David Cannon/Allsport/Getty Images
ʻI he taimi pē naʻe ako ai ʻa e timi soká ke ʻoua ʻe tokanga ki he ngaahi fakafepaki naʻa nau fehangahangai mo iá kae tokanga taha ki heʻenau taumuʻá, naʻa nau lavameʻa ʻo fakalaka atu ʻi he meʻa naʻa nau fakakaukau ʻe malavá pea aʻusia ha fiefia lahi. (Hangē pē ko e toenga ʻo kimautolu ʻi Naisīliá!)
ʻI he founga tatau, ʻi he ʻikai ke tau tokanga ki he ngaahi fakafepaki ʻa e māmaní pea tokanga taha kia Kalaisi mo ʻEne ongoongoleleí, ʻoku fakapapauʻi mai ai te tau lavameʻa ʻo fakalaka atu ʻi he meʻa ʻoku tau mafakakaukauá pea ongoʻi ha fiefia lahi. Naʻe akoʻi mai ʻe Palesiteni Lāsolo M. Nalesoni: “ʻI hono tukutaha ʻetau tokangá … [ʻia] Sīsū Kalaisi mo ʻEne ongoongoleleí … te tau lava ʻo ongoʻi fiefia ʻo tatau ai pē pe ko e hā e meʻa ʻoku hoko—pe ʻikai ke hoko—ʻi heʻetau moʻuí.”
ʻOku ou lotua ʻe tokoniʻi kitautolu takitaha ʻe he Laumālie Māʻoniʻoní ke talangofua ki he fakaafe ʻa Palesiteni Nalesoní ke tokanga taha ʻetau moʻuí kia “Sīsū Kalaisi mo ʻEne ongoongoleleí” kae lava ke tau fiefia ʻia Kalaisi “ʻo tatau ai pē pe ko e hā e meʻa ʻoku hoko—pe ʻikai ke hoko—ʻi heʻetau moʻuí.”
ʻOku lahi ha ngaahi fakamatala ʻi he Tohi ʻa Molomoná kiate kinautolu naʻe tafoki ʻenau moʻuí ʻi heʻenau tokanga taha kia Sīsū Kalaisi mo ʻEne ongoongoleleí.
Fakakaukau kia ʻAlamā ko e Siʻí. Naʻá ne angatuʻu mo fakafepaki ki he Siasí. Naʻe lotu mo ʻaukai ʻa ʻene tamai ko ʻAlamaá. Naʻe hā mai ha ʻāngelo ʻo ui ʻa ʻAlamā ko e Siʻí ke fakatomala. ʻI he momeniti ko iá, naʻe kamata ke mamahi ʻa ʻAlamā ʻi he “ngaahi mamahi ʻo ha laumālie kuo fakamalaʻiaʻi.” ʻI he ngaahi houa fakapoʻulí, naʻá ne manatuʻi ʻa e akonaki ʻa ʻene tamaí ʻe hāʻele mai ʻa Kalaisi ke fakalelei maʻá e ngaahi angahala ʻo e māmaní. ʻI heʻene manatuʻi ʻa e fakakaukau ko ʻení, naʻá ne tautapa ki ha ʻaloʻofa mei he ʻOtuá. Naʻe fakafiefia ʻa e olá, ko ha fiefia naʻá ne fakamatalaʻi naʻe fakaʻofoʻofa! Naʻe hoko ʻa e ʻaloʻofa mo e fiefia kia ʻAlamā koeʻuhí naʻá ne tokanga taha mo ʻene tamaí ki he Fakamoʻuí.
Ki he mātuʻa ʻoku ʻi ai ʻenau fānau kuo hē atú, ʻoua ʻe tuʻatamaki! ʻOua ʻe fifili ki he ʻuhinga ʻoku ʻikai haʻu ai ha ʻāngelo ke tokoniʻi hoʻo fānaú ke fakatomalá, kae ʻiloʻi kuo tuku ʻe he ʻEikí ha ʻāngelo fakamatelie ʻi hono hala fonongá: ko e pīsopé, ko ha taki ʻo e Siasí, pe ko ha tangata pe fefine ngāue fakaetauhi. Kapau ʻe hoko atu hoʻo ʻaukaí mo e lotú, kapau he ʻikai ke ke fokotuʻu ha taimi-tēpile pe ʻaho pau ki he ʻOtuá, pea kapau te ke falala ʻokú Ne mafao mai Hono toʻukupú ke tokoni, ʻe—vavé ni pe tuai ange—hoʻo ʻilo hono ueʻi ʻe he ʻOtuá ʻa e loto ʻo hoʻo fānaú ʻi heʻene fili ke fanongó. ʻOku tuʻunga ʻeni koeʻuhí ko Kalaisi ʻa e fiefiá—ko Kalaisi ʻa e ʻamanaki leleí; ko Ia ʻa e talaʻofa ʻo e “ngaahi meʻa lelei ʻe hokó.” Ko ia, falala kia Sīsū Kalaisi ʻi ho fohá pe ʻofefiné, he ko Ia ʻa e mālohinga ʻo e mātuʻa mo e fānau kotoa pē.
ʻI he aʻusia pē ʻe ʻAlamā ko e Siʻí ʻa e fiefia ʻia Kalaisí, naʻá ne moʻui ʻaki ʻa e fiefia ko iá. Ka naʻá ne pukepuke fēfē nai ʻa e fiefia pehē neongo ʻa e faingataʻá mo e ʻahiʻahí? ʻOkú ne pehē:
“Talu mei he taimi ko iá ʻo aʻu mai ki he taimí ni, mo ʻeku ngāue taʻetuku, [ke] fakatafoki mai ha kakai ki he fakatomalá; ke u ʻomi ʻa kinautolu ke nau ʻahiʻahiʻi ʻa e fuʻu fiefia lahi ʻa ia naʻá ku ʻahiʻahiʻi ʻe aú. …
“… Pea … ʻoku foaki kiate au ʻe he ʻEikí ʻa e fiefia lahi ʻaupito ʻi he fua ʻo ʻeku ngaahi ngāué. …
“Pea kuo tokoniʻi au ʻi he ngaahi ʻahiʻahi mo e ngaahi tuʻutāmaki ʻi he faʻahinga kotoa pē.”
Naʻe kamata ʻa e fiefia ʻa ʻAlamā ʻia Kalaisí ʻi heʻene fakaʻaongaʻi ʻa e tui kiate Iá pea tangi ki ha ʻaloʻofá. Naʻe fakaʻaongaʻi leva ʻe ʻAlamā ʻa e tui kia Kalaisí ʻaki ʻene ngāue ke tokoniʻi ʻa e niʻihi kehé ke nau ʻahiʻahiʻi ʻa e fiefia tatau. Naʻe hanga ʻe he ngāue taʻetuku ko ʻení ʻo fakatupu ha fuʻu fiefia lahi ʻia ʻAlamā, neongo ʻa e faingataʻa mo e ngaahi ʻahiʻahi kotoa pē. Mou vakai, “ʻoku hōifua ʻa e ʻEikí ki he feingá,” pea ʻoku ʻomi ha ngaahi tāpuaki ʻe he feinga ʻoku nofotaha ʻiate Iá. Naʻa mo e ngaahi faingataʻa fakamamahi tahá ʻe lava ʻo “mole atu ia ʻi he fiefia ʻa Kalaisí.”
Ko e kulupu ʻe taha ʻi he Tohi ʻa Molomoná naʻe tukutaha ʻenau moʻuí kia Sīsū Kalaisi mo ʻEne ongoongoleleí pea maʻu ʻa e fiefiá ko kinautolu ko ia naʻa nau langa ʻa e kolo ko Heilamí—ko ha feituʻu naʻa nau lava ʻo ohi hake ai ʻenau fānaú mo fiefia ʻi he tauʻatāina ʻenau lotú. Naʻe fakapōpulaʻi ʻa e kakai māʻoniʻoni ko ʻeni naʻe lelei ʻenau moʻuí ʻe ha kulupu fakamālohi pea toʻo ʻenau tauʻatāina mahuʻinga ke lotú. ʻOku hoko ʻi he taimi ʻe niʻihi ha ngaahi meʻa ʻoku kovi ki he kakai leleí:
“Naʻe ʻafioʻi ʻe he ʻEikí ʻoku taau ke valokiʻi ʻa hono kakaí; ʻio, ʻokú ne siviʻi ʻenau kātakí mo ʻenau tuí.
Ka neongo iá—ko ia ia ʻoku falala kiate iá, ʻe hiki hake ia ʻi he ʻaho fakaʻosí. ʻIo, pea naʻe hoko pehē ki he kakaí ni.”
Naʻe kātakiʻi fēfē ʻe he kakaí ni ʻa ʻenau ngaahi faingataʻá mo e mamahí? ʻI he tokanga taha kia Kalaisi mo ʻEne ongoongoleleí. Naʻe ʻikai ʻiloʻi ʻaki kinautolu honau ngaahi mamahí; ka naʻa nau tafoki ki he ʻOtuá, ngalingali naʻa nau lau ko ha fānau kinautolu ʻa e ʻOtuá, ko ha fānau ʻo e fuakavá, mo ha ākonga ʻa Sīsū Kalaisi. ʻI heʻenau manatuʻi ko hai kinautolú pea ui ki he ʻOtuá, naʻa nau maʻu ha nonga, mālohi, pea iku ki ha fiefia ʻia Kalaisi:
“Ko ʻAlamā mo hono kakaí … naʻa nau fakahā hake honau lotó [ki he ʻOtuá]; pea naʻá ne ʻafioʻi ʻa e ngaahi fakakaukau ʻa honau lotó.
“Pea naʻe hoko ʻo pehē naʻe ongo mai ʻa e leʻo ʻo e ʻEikí kiate kinautolu ʻi heʻenau ngaahi faingataʻaʻiá, ʻo folofola: Hanga hake homou ʻulú pea fiemālie, he ʻoku ou ʻiloʻi ʻa e fuakava kuo mou fai kiate aú; pea te u fuakava mo hoku kakaí pea fakahaofi ʻa kinautolu mei he nofo pōpulá.”
ʻI he tali ki aí, naʻe hanga ʻe he ʻEikí ʻo “fakamaʻamaʻa … ʻa e ngaahi kavenga [ʻi honau] ngaahi umá. … ʻIo, naʻe fakamālohi ʻa kinautolu ʻe he ʻEikí koeʻuhi ke nau lava ʻo fua faingofua ʻa ʻenau ngaahi kavengá, pea nau fakaongoongo ʻi he fiefia mo e faʻa kātaki ki he finangalo kotoa pē ʻo e ʻEikí.” Fakatokangaʻi ange naʻe tuku ʻe he Kāingalotu ko ʻení ʻenau mamahí, faingataʻaʻiá, mo e ngaahi ʻahiʻahí ke folo hifo ʻi he fiefia ʻa Kalaisí! Pea ʻi he hokosia ʻa e taimi totonú, naʻá Ne fakahā kia ʻAlamā ʻa e hala ke nau hola aí, pea naʻe hanga ʻe ʻAlamā—ko ha palōfita ʻo e ʻOtuá—ʻo tataki kinautolu ke nau malu.
ʻI heʻetau tokanga taha kia Kalaisi mo muimui ki Heʻene palōfitá, ʻe tataki foki mo kitautolu kia Kalaisi pea mo e fiefia ʻo ʻEne ongoongoleleí. Kuo akonaki ʻa Palesiteni Nalesoni: “ʻOku mālohi e fiefiá, pea te tau maʻu e mālohi ʻo e ʻOtuá heʻetau moʻuí ʻi hono tukutaha ʻetau tokangá ʻi he fiefiá. Hangē ko ia ʻi he meʻa kotoa pē, ko Sīsū Kalaisi ʻa hotau faʻifaʻitakiʻanga lelei tahá, ʻʻa ia ne ne kātaki ʻa e pekia ʻi he ʻakaú … ko e meʻa ʻi he fiefia naʻe tuku ʻi hono ʻaó’ [Hepelū 12:2.”
Naʻe toki mālōlō kimuí ni siʻeku fineʻeikí; naʻe fakaʻohovale ia. ʻOku ou ʻofa ʻi heʻeku fineʻeikí pea naʻe ʻikai te u ʻamanaki te ne mālōlō kei talavou. Ka ʻi heʻene mālōloó, kuó u aʻusia ai mo hoku fāmilí ʻa e loto-mamahi mo e fiefia. ʻOku ou ʻiloʻi koeʻuhí ko Ia, ʻoku ʻikai ke ne pekia—ʻokú ne moʻui! Pea ʻoku ou ʻiloʻi koeʻuhí ko Kalaisi mo e ngaahi kī ʻo e lakanga fakataulaʻeikí naʻe fakafoki mai ʻo fakafou ʻi he Palōfita ko Siosefa Sāmitá, te u toe feʻiloaki mo ia ʻi ha ʻaho. Kuo folo hifo ʻa e mamahi ʻo e mole siʻeku fineʻeikí, ʻi he fiefia ʻa Kalaisí! ʻOku ou ako ʻo ʻilo ko e “fakakaukau fakasilesitialé” mo e “tuku ke lāngilangiʻia ʻa e ʻOtuá” ʻoku kau ai ʻa e tokanga taha ki he fiefia ʻoku maʻu ʻia Kalaisí.
ʻOkú Ne fakaafe mai ʻi he ʻofa: “Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.” ʻI he huafa ʻo Sīsū Kalaisí, ʻēmeni.