ʻE Toʻu Tupu Tofiʻa Fakaʻeiʻeiki
ʻOku falala atu ʻa e ʻOtuá kiate koe, ko e fānau ʻo e fuakavá, ke tokoni ʻi Heʻene ngāue ʻo hono ʻomi kotoa ʻEne fānaú ke malu ʻi ʻapi mo Iá.
ʻEletā Sitīvenisoni, ko ha konifelenisi ʻeni he ʻikai toe ngalo.
Kuo fiefia maʻu pē homau fāmilí ʻi he kiʻi tohi ʻoku ui ko e Children’s Letters to God (Ngaahi Tohi ʻa e Fānaú ki he ʻOtuá). Ko ha ngaahi meʻa ʻeni ʻe niʻihi:
“ʻAlā siʻi ʻOtua, ko e hā ʻoku ʻikai tuku pē ai ʻa e kakai ʻoku lolotonga moʻui ʻi he taimi ní, kae ʻoua ʻe tuku ke nau mate pea toe faʻu ha kakai foʻoú?”
“Ko e hā ʻoku hongofulu ai pē hoʻo ngaahi fekaú kae lau miliona ʻa e tuʻutuʻuni ia ʻemau akó?”
“Ko e hā naʻá ke ʻomi ai ʻa e tonisilá kapau te ke toe toʻo pē ʻe koe?”
ʻOku ʻikai ha taimi feʻunga ʻi he ʻahó ni ke tali kotoa ʻa e ngaahi fehuʻi ko ʻení, ka ʻoku ʻi ai ha toe fehuʻi ʻoku ou faʻa fanongo ai ʻi he toʻu tupú ʻoku ou fie lea ki ai. Mei ʻUlanipatā, Mongokōlia, ki Tōmasi, ʻAitahō, ʻoku tatau pē ʻa e fehuʻí: “Ko e hā ʻa e ʻuhingá? Ko e hā ʻoku pau ai ke kehe ʻa e moʻui ʻa e Kāingalotú mei he niʻihi kehé?”
ʻOku ou ʻilo ʻoku faingataʻa ke te kehe—tautautefito ki heʻete kei siʻí peá te fuʻu fiemaʻu ke saiʻia ʻa e kakai kehé ʻiate kitá. ʻOku fiemaʻu ʻe he taha kotoa ke talitali lelei ia, pea ʻoku toe fakalahi ʻa e holi ko iá ki ha tuʻunga kovi ange ʻi he māmani fakaʻilekitulōnika ʻo e ʻaho ní, ʻa ia ʻoku fonu ʻi he mītia fakasōsialé mo e houtamaki ʻi he ʻinitanetí.
Ko ia, ʻi he mālohi ʻo e teke ko iá, ko e hā ʻoku mātuʻaki kehe ai ʻa e moʻui ʻa e Kāingalotu? ʻOku lahi ha ngaahi tali lelei: Koeʻuhí he ko ha fānau koe ʻa e ʻOtuá. Koeʻuhí he kuo tuku fakatatali koe ki he ngaahi ʻaho fakaʻosí. Koeʻuhí he ko ha ākonga koe ʻa Sīsū Kalaisi.
Ka ʻoku ʻikai faʻa fakafaikehekeheʻi koe ʻe he ngaahi tali ko iá mei he niʻihi kehé. Ko e tokotaha kotoa pē ko ha fānau ia ʻa e ʻOtuá. Ko e tokotaha kotoa pē ʻi māmani ʻi he taimí ni, naʻe ʻomi ia ki heni ʻi he ngaahi ʻaho kimui ní. Ka ʻoku ʻikai moʻui ʻaki ʻe he taha kotoa ʻa e Lea ʻo e Potó pe fono ʻo e angamaʻá ʻi he founga ʻokú te tūlifua ki aí. ʻOku tokolahi ha kau ākonga loto-toʻa ʻa Kalaisi ʻoku ʻikai ko ha mēmipa kinautolu ʻo e Siasí ni. Ka ʻoku ʻikai ke nau ngāue fakafaifekau mo fakahoko ha ngaahi ouau ʻi he fale ʻo e ʻEikí maʻa ʻenau ngaahi kuí ʻo hangē ko koé. ʻOku pau pē ke lahi ange ʻa e ngaahi talí ʻi heni—pea ʻoku ʻi ai.
ʻOku ou fie tukutaha ʻeku tokangá ʻi he ʻahó ni ki ha toe meʻa ʻe taha kuo ʻuhingamālie ki heʻeku moʻuí. ʻI he 1988, naʻe fakahoko ai ʻe ha ʻAposetolo kei talavou ko Lāsolo M. Nalesoni ha lea ʻi he ʻUnivēsiti Pilikihami ʻIongí naʻe ui ko e “Thanks for the Covenant (Fakafetaʻi ko e Fuakavá).” Naʻe fakamatalaʻi ai ʻe ʻEletā Nalesoni, ko e taimi ʻoku tau fakaʻaongaʻi ai ʻetau tauʻatāina ke filí ke fakahoko mo tauhi ʻa e ngaahi fuakava mo e ʻOtuá, ʻoku tau hoko ai ko e kau ʻea-hoko ki he fuakava taʻengata kuo fakahoko ʻe he ʻOtuá mo ʻetau ngaahi kuí ʻi he kuonga fakakōsipeli kotoa pē. Ko hono toe ʻai ʻe tahá, ʻoku tau hoko ko e “fānau ʻo e fuakavá.” Ko e meʻa ia ʻokú ne ʻai ke tau makehé. Ko e meʻa ia ʻokú ne ʻai ke tau maʻu ʻa e ngaahi tāpuaki tatau mo ia naʻe maʻu ʻe heʻetau ngaahi kuí, ʻo kau ai hotau tofiʻa tukufakaholó.
Tofiʻa tukufakaholó! Mahalo kuó ke fanongo ʻi he kupuʻi lea ko iá. ʻOku tau hiva ha ngaahi himi fekauʻaki mo ia: “[ʻE toʻu tupu tofiʻa fakaʻeiʻeiki, hokohoko atu, hokohoko atu, hokohoko atu!]” Ko ha kupuʻi lea fakamāfana ia. Ka ʻoku ʻuhinga ia ki he hā?
ʻI he kuonga ʻo e Fuakava Motuʻá, kapau ʻe mālōlō ha tamai, naʻe fatongia ʻaki ʻe hono foha maʻu tofiʻá ʻa hono tokangaʻi ʻene faʻeé mo e tuofāfiné. Naʻe maʻu ʻe hono ngaahi tokouá honau tofiʻá pea nau mavahe ke ngāueʻi ʻenau moʻuí, ka naʻe ʻikai mavahe ʻa e foha maʻu tofiʻá ki ha feituʻu. ʻE lava ʻo mali mo maʻu hano fāmili, ka te ne nofo pē ʻo aʻu ki he ngataʻanga ʻo ʻene moʻuí ke puleʻi ʻa e ngaahi ngāue fekauʻaki mo e tofiʻa ʻo ʻene tamaí. Koeʻuhí ko e fatongia tānaki atu ko ʻení, naʻe toe tānaki ange foki ha fakalahi ki hono tofiʻá. Naʻe ngali fuʻu lahi nai ʻa e fatongia ki hono tataki mo tokangaʻi ʻa e niʻihi kehé? ʻIkai, kapau te ke fakakaukau ki he fakalahi naʻe tānaki atu ki hono tofiʻá.
ʻI he ʻaho ní, ʻoku ʻikai ke tau talanoa fekauʻaki mo e hokohoko tukufakaholo ʻi homou ngaahi fāmili ʻi he māmaní pe ngaahi fatongia tuʻunga fakaetangata pe fefine ʻi he Fuakava Motuʻá. ʻOku tau talanoa fekauʻaki mo e tofiʻa ʻokú ke maʻu ʻi hoʻo hoko ko e kaungā ʻea-hoko mo Kalaisí koeʻuhi ko e vā fakafuakava kuó ke fili ke fakahoko mo Ia pea mo hoʻo Tamai ʻi Hēvaní. ʻOku fuʻu lahi nai ʻa e ʻamanaki mai ʻa e ʻOtuá ke kehe hoʻo moʻuí mei Heʻene fānau kehé ka ke lava ʻo tataki mo tokoniʻi lelei ange kinautolu? ʻIkai, kapau te ke fakakaukau ki he ngaahi tāpuakí—fakamatelie mo fakalaumālie fakatouʻosi—ʻa ia kuo foaki atu maʻaú.
ʻOku ʻuhinga nai ho tofiʻa tukufakaholó ʻokú ke lelei ange koe ʻi he niʻihi kehé? ʻIkai, ka ʻoku ʻuhinga ia ʻoku fiemaʻu ke ke tokoniʻi ʻa e niʻihi kehé ke nau lelei ange. ʻOku ʻuhinga nai ho tofiʻa tukufakaholó kuo fili koe? ʻIo, ka ʻoku ʻikai fili koé ke ke puleʻi ʻa e niʻihi kehé; ʻoku fili koé ke ke tokoniʻi kinautolu. ʻOku hoko nai ho tofiʻa tukufakaholó ko ha fakamoʻoni ʻo e ʻofa ʻa e ʻOtuá? ʻIo, kae mahulu haké, ko ha fakamoʻoni ia ʻo ʻEne falalá.
Ko e meʻa kehe hano ʻofeina kita, ka ʻoku makehe ange ke falalaʻanga kita. ʻI he tohi fakahinohino Ki Hono Fakamālohia ʻo e Toʻu Tupú, ʻoku tau lau ai: “ʻOku falala atu hoʻomou Tamai Hēvaní kiate kimoutolu. Kuó Ne foaki atu ha ngaahi tāpuaki maʻongoʻonga, kau ai e kakato ʻo e ongoongoleleí mo e ngaahi ouau mo e ngaahi fuakava toputapu ʻoku nau haʻi kimoutolu kiate Ia mo ʻomi Hono mālohí ki hoʻomou moʻuí. ʻOku haʻu fakataha ʻa e ngaahi tāpuaki ko iá mo ha fatongia makehe. ʻOkú Ne ʻafioʻi te mou lava ʻo fai ha liliu ʻi he māmaní, pea ʻoku fiemaʻu ia, ʻi ha ngaahi meʻa lahi, ʻa ia ko e hoko ʻo kehe mei he māmaní.”
ʻE lava ke fakahoa ʻetau aʻusia fakamatelié ki ha vaka folau ʻeveʻeva ʻa ia kuo tuku ki ai ʻe he ʻOtuá ʻa e kotoa ʻEne fānaú ʻi heʻenau fononga ki he ngaahi kauvaí. Ko e folaú ʻoku mohu faingamālie ke ako, tupulaki, fiefia, mo fakalakalaka, ka ʻoku lahi fau foki mo e ngaahi fakatuʻutāmakí. ʻOku ʻofa ʻa e ʻOtuá ʻi he kotoa ʻo ʻEne fānaú pea tokanga ki heʻenau tuʻunga leleí. ʻOku ʻikai ke Ne finangalo ke mole ha taha ʻo kinautolu, ko ia ʻokú Ne fakaafeʻi ai ʻa e niʻihi ʻoku loto-fiemālie ke nau hoko ko ʻEne kau kauvaka—ʻa ia ko koe ia. Koeʻuhi ko hoʻo fili ke fakahoko mo tauhi ʻa e ngaahi fuakavá, ʻokú Ne tuku atu ʻEne falalá. ʻOkú Ne falala te ke kehe, makehe, pea tuʻu ʻaliʻaliaki koeʻuhí ko e ngāue mahuʻinga ʻokú Ne falala atu ke ke fakahokó.
Fakakaukau ki ai! ʻOku falala atu ʻa e ʻOtuá kiate koe—ʻi he kotoa ʻo e kakai ʻo e māmaní, ko e fānau ʻo e fuakavá—ʻa ʻEne kau kauvaká—ke ke tokoni ki Heʻene ngāue ke ʻomi kotoa ʻEne fānaú ke malu ʻi ʻapi mo Iá. ʻOku ʻikai fai ha ofo ʻi he pehē ʻe Palesiteni Pilikihami ʻIongi ʻe taha, “ʻOku vakai mai ʻa e kau ʻāngelo ʻo e langí ki he kiʻi kakai toko siʻi ko ʻení.”
ʻI hoʻo vakavakai holo ʻi he vaka folau ʻeveʻeva ko ʻeni ʻoku ui ko e māmaní, mahalo te ke fakatokangaʻi ha kakai ʻoku nau nofo fiemālie ʻi he ʻū sea mālōlōʻangá ʻo inu, pele paʻanga ʻi he kasinó, teunga taʻetaau, mo pae taʻefakangatangata pē ʻenau telefoni toʻotoʻó, pea fakamoleki honau taimi lahi ʻi he ngaahi keimi fakaʻilekitulōniká. ʻOua naʻá ke fifili ʻo pehē, “Ko e hā ʻoku ʻikai lava ai ke u fai iá?,” ka ke manatuʻi, ko ha pāsese makehe koe. Ko ha taha koe ʻo e kau kauvaká. ʻOku ʻi ai ho ngaahi fatongia ʻoku ʻikai maʻu ia ʻe he kau pāsesé. Hangē ko e lea ʻe taha ʻa Sisitā ʻĀteti Keepi, “He ʻikai ke ke lava ʻo hoko ko ha tokotaha [fakahaofi] moʻui kapau ʻokú ke fotu tatau pē koe mo e kau kaukau tahi kehe ʻi he matātahí.”
Pea ki muʻa peá ke ongoʻi loto-foʻi ʻi he ngaahi fatongia makehe ʻoku tānaki atú, kātaki ʻo manatuʻi ʻoku maʻu ʻe he kau kauvaká ha meʻa ʻoku ʻikai maʻu ʻe he kau pāsese kehé: ko ha totongi. Kuo pehē ʻe ʻEletā Niila L. ʻEnitaseni, “ʻOku ʻi ai ha mālohi fakalaumālie ke totongi huhuʻi maʻá e māʻoniʻoní,” ʻo kau ai ʻa e “ongoʻi fakapapauʻi lahi angé, ongoʻi fakamahino angé pea mo ha loto-falala ange.” Hangē ko ʻĒpalahame ʻo e kuonga muʻá, ʻokú ke maʻu ha fiefia mo e melino lahi ange, māʻoniʻoni lahi ange, mo ha ʻilo lahi ange. Ko hoʻo totongí ʻoku ʻikai ko ha nofoʻanga pē ʻi he langí mo ha ngaahi hala ngaohi ʻaki ʻa e koulá. ʻE faingofua pē ki he Tamai Hēvaní ke foaki atu ʻa e meʻa kotoa pē ʻokú Ne maʻú. Ko Hono finangaló ke tokoniʻi koe ke ke hoko kakato ʻo hangē ko Iá. Ko ia ai, ʻe lahi ha ngaahi fiemaʻu fakatukupā meiate koe he ko e founga ia ʻa e ʻOtuá ke ke aʻusia kakato hoʻo tuʻunga malavá.
Ko ha “meʻa lahi ia ke kole mei ha taha, ka ʻoku ʻikai ko ha faʻahinga taha pē koe”! Ko ha toʻu tupu tofiʻa fakaʻeiʻeiki koe. Ko hoʻo vā fakafuakava mo e ʻOtuá mo Sīsū Kalaisí ko ha vā ia ʻo e ʻofa mo e fefalalaʻaki, ʻa ia ʻokú ke maʻu ai ha konga lahi ange ʻo ʻEna ʻaloʻofá—ko ʻEna tokoni fakalangí, fakakoloa ʻo e mālohí, mo ha mālohi fakaivia. Ko e mālohi ko iá, ʻoku ʻikai ko ha fakaʻānaua pē, pe ko ha meʻa kumi monū, pe ko hano fakahoko ʻo ha fakaʻamu. Ko ha meʻa moʻoni ia.
ʻOku ʻikai ke ke teitei tuenoa ʻi hoʻo fakakakato ho ngaahi fatongia ki hoʻo tofiʻa tukufakaholó. ʻOkú ke ngāue fakataha mo e ʻEiki ʻo e ngoue vainé. ʻOkú ke ngāue fetakinima mo Sīsū Kalaisi. Hili hono fakahoko ʻo e fuakava foʻou takitaha—pea ʻi he fakaʻau ke fakaloloto ange ho vā mo Iá—ʻokú mo fepikitaiʻaki vāofi ange kae ʻoua kuo fakamaʻu fakataha kimoua. ʻI he fakataipe toputapu ko ia ʻo ʻEne ʻaloʻofá, te ke maʻu ai ʻa e holi pea mo e mālohi ke moʻui ʻo hangē tofu pē ko e moʻui ʻa e Fakamoʻuí—ʻo kehe mei he māmaní. Te ke lavaʻi ia he ʻoku poupouʻi hake koe ʻe Sīsū Kalaisi!
ʻOku tau lau ʻi he 2 Nīfai 2:6, “Ko ia, ʻoku fou mai ʻa e huhuʻí ʻo tuʻunga ʻi he Mīsaia Māʻoniʻoní; he ʻoku fonu ia ʻi he ʻaloʻofa mo e moʻoni.” Koeʻuhí ko ʻEne fonu ʻi he moʻoní, ʻokú Ne ʻafioʻi koe ʻi ho tuʻunga totonú—ho ngaahi melé, vaivaiʻangá, ngaahi fakaʻiseʻisá, mo e meʻa kotoa ko iá. Koeʻuhí ko ʻEne fonu ʻi he ʻaloʻofá, ʻokú Ne ʻafioʻi ʻa e meʻa totonu te ke malavá. ʻOku mahino kiate Ia peá Ne tali ho tuʻunga lolotongá mo tokoniʻi koe ke ke fakatomala mo fakalakalaka, ikuna mo aʻusia ʻa e meʻa ʻokú ke malavá.
“[ʻE toʻu tupu tofiʻa fakaʻeiʻeiki, hokohoko atu, hokohoko atu, hokohoko atu]!” ʻOku ou fakamoʻoni ʻoku ʻofaʻi koe—pea ʻokú ke falalaʻanga—ʻi he ʻahó ni, ʻi ha taʻu ʻe 20, pea taʻengata. ʻOua naʻá ke fakatau atu ho tāpuaki tukufakaholó ki ha kihiʻi meʻa siʻi hifo. ʻOua naʻa fakafetongi ʻa e meʻa ʻoku mahuʻingá ki ha meʻa muna. ʻOua naʻa tuku ke liliu koe ʻe he māmaní lolotonga ia hono fanauʻi koe ke ke liliu ʻa e māmaní. ʻI he huafa ʻo Sīsū Kalaisí, ʻēmeni.