Tali e Meʻaʻofa ʻa e ʻEikí ʻo e Fakatomalá
ʻOua muʻa te ta tali pē ke toki hoko e faingataʻá peá ta toki tafoki ki he ʻOtuá. ʻOua muʻa te ta tatali ki he ngataʻanga ʻo ʻeta moʻui fakamatelié ka ta toki fakatomala moʻoní.
ʻOku ou fakamoʻoni ʻoku ʻi ai ha Tamai Hēvani ʻofa. Hili ha ngaahi momeniti siʻi mei hono fokotuʻu au ki hoku fatongia foʻou ko ha Fitungofulu Taki Māʻolunga ʻi he konifelenisi lahi ʻo ʻEpeleli 2019, naʻe hiva ʻe he kuaeá ʻa e “ʻOku Fakaofó,” ʻa ia naʻe ongo moʻoni ki hoku lotó mo e laumālié.
Ne u ofo moʻoni ʻi heʻeku fanongo ki he ngaahi lea ko iá. Ne u ongoʻi neongo ʻeku ngaahi taʻefeʻungá mo e tōnounoú, ka naʻe tāpuekina au ʻe he ʻEikí ke u ʻilo “te u lava ke fai ʻa e meʻa kotoa pē ʻi hono māfimafí.”
Ko e ongo angamaheni ko ia ʻo e taʻefeʻungá, vaivaí pea naʻa mo e taʻetāú, ko ha meʻa ia ʻoku fefaʻuhi mo ha tokolahi ʻo kitautolu he taimi ʻe niʻihi. ʻOku ou kei fefaʻuhi pē mo ia; ne u ongoʻi ia ʻi he ʻaho ne uiuiʻi ai aú. Kuó u ongoʻi ia ʻi ha ngaahi taimi lahi pea ‘oku ou kei ongoʻi pē ia ʻi heʻeku lea atu ko ʻeni kiate kimoutolú. Ka neongo iá, kuó u ʻiloʻi ʻoku ʻikai ko au toko taha pē ʻoku ou ongoʻi peheé. Ko hono moʻoní, ʻoku lahi ha ngaahi talanoa ʻi he folofolá kiate kinautolu ne hangē ne nau maʻu e ongo tatau. Hangē ko ʻení, ʻoku tau manatuʻi ʻa Nīfai ko ha tamaioʻeiki angatonu mo loto-toʻa ʻa e ʻEikí. ʻI he taimi ʻe niʻihi, naʻá ne fefaʻuhi mo e ngaahi ongo ʻo e taʻetāú, vaivaí, mo e taʻefeʻungá.
Naʻá ne pehē, “Neongo ʻa e fuʻu angalelei lahi ʻa e ʻEikí, ʻi he fakahā mai kiate au ʻa ʻene ngaahi ngāue maʻongoʻonga mo fakaofó, ka ʻoku kaila ʻa hoku lotó: ʻOiauē ko e tangata loto-mamahi ko au! ʻIo, ʻoku mamahi ʻa hoku lotó koeʻuhi ko hoku kakanó; ʻoku mamahi ʻa hoku laumālié koeʻuhi ko ʻeku ngaahi angahalá.”
Naʻe lea ʻa e Palōfita ko Siosefa Sāmitá ki heʻene faʻa ongoʻi “halaia,” ʻi heʻene kei talavoú, “koeʻuhi ko [hono] vaivaí mo e ngaahi melé.” Ka naʻe hoko e ngaahi ongoʻi taʻefeʻunga mo e hohaʻa ʻa Siosefá ko ha konga ia ʻo hono tataki ia ke fakalaulauloto, ako, mo lotú. Mahalo te mou manatuʻi, naʻá ne ʻalu ke lotu ʻi he vaoʻakau ofi ki hono ʻapí ke maʻu e moʻoní, melinó, mo e fakamolemolé. Naʻá ne ongoʻi e folofola ʻa e ʻEikí: “Siosefa ko hoku foha, kuo fakamolemoleʻi hoʻo ngaahi angahalá. ʻAlu ʻi ho halá, ʻaʻeva ʻi heʻeku ngaahi fonó, pea tauhi ʻeku ngaahi fekaú. Vakai, ko au ko e ʻEiki Nāunauʻiá. Naʻe tutuki au maʻá e māmaní ke lava ʻe kinautolu kotoa ʻe tui ki hoku hingoá ʻo maʻu ʻa e moʻui taʻengatá.”
Naʻe hanga ʻe he holi fakamātoato ʻa Siosefa ke fakatomalá mo fekumi ke fakamoʻui hono laumālié, ʻo tokoniʻi ia ke haʻu kia Sīsū Kalaisi pea maʻu ha fakamolemole ʻo ʻene ngaahi angahalá. Naʻe fakaava ʻe he ngāue hokohokó ni ʻa e matapā ke hokohoko atu hono Fakafoki Mai ʻo e ongoongolelei ʻo Sīsū Kalaisí.
ʻOku fakatātaaʻi ʻe he aʻusia fakaofo ko ʻeni ʻa e Palōfita ko Siosefa Sāmitá, ʻa e founga ʻe lava ke tokoniʻi ai kitautolu ʻe he ngaahi ongoʻi vaivaí mo e taʻefeʻungá, ke tau fakatokangaʻi hotau tuʻunga hingá. Kapau te tau loto-fakatōkilalo, ʻe tokoni ʻeni ke tau fakatokangaʻi ʻetau fakafalala kia Sīsū Kalaisí, pea ueʻi ʻi hotau lotó ha holi moʻoni ke tafoki ki he Fakamoʻuí pea fakatomala mei heʻetau ngaahi angahalá.
Siʻoku ngaahi kaungāmeʻa, ʻoku fakafiefia ʻa e fakatomalá! Ko e fiemālie ʻo e fakatomalá ko ha konga ia ʻo e ngāue fakaʻaho ʻa ia ʻoku akoʻi ai kitautolu ʻe he ʻEikí ʻi he “ʻotu lea ki he ʻotu lea, akonaki ki he akonaki,” ke fakatefito ʻetau moʻuí ʻi Heʻene ngaahi akonakí. Hangē ko Siosefa mo Nīfaí, te tau lava ʻo “tangi [ki he ʻOtuá] ke maʻu ʻa e ʻaloʻofá; he ʻoku māfimafi ia ke fakamoʻui.” Te Ne lava ʻo fakakakato ha faʻahinga holi māʻoniʻoni pē pe fakaʻānaua pea fakamoʻui ha faʻahinga kafo pē ʻi heʻetau moʻuí.
ʻI he Tohi ʻa Molomoná: Ko ha Fakamoʻoni ʻe Taha ʻo Sīsū Kalaisí, ʻoku tau lava ʻo maʻu ai ha fakamatala taʻefaʻalaua ki ha niʻihi fakafoʻituitui ne nau ako ke haʻu kia Kalaisi ʻo fakafou ʻi he fakatomala fakamātoató.
ʻOku ou fie vahevahe atu ha sīpinga ʻo e ngaahi ʻaloʻofa ongongofua ʻa e ʻEikí ʻo fakafou ʻi ha aʻusia naʻe hoko ʻi hoku motu tupuʻanga ko Pueto Likó.
ʻI hoku kolo tupuʻanga ko Ponisé, naʻe fakakaukau ai ha fefine ʻi he Siasí ko Sīlia Kulusa ʻAiala, ke ne foaki ha Tohi Molomona ki hano kaungāmeʻa. Naʻá ne kofukofuʻi ia pea fononga atu ke foaki e meʻaʻofá ni ʻa ia naʻá ne pehē ne mahulu hake hono mahuʻinga kiate iá, ʻi he taiamoní pe maka koloá. ʻI heʻene fonongá, ne fakaofi atu ha taha kaihaʻa, ʻo hamusi ʻene pēsí ʻo hola mo ia, fakataha mo e meʻaʻofa makehe ʻi lotó.
ʻI heʻene fai e talanoá ni ʻi he lotú, naʻe pehē ange hono kaungāmeʻá, “Ko hai ʻokú ne ʻilo? Na ko ho faingamālie ʻeni ke vahevahe ai e ongoongoleleí!”
Hili ha ngaahi ʻaho siʻi mei ai, ʻoku mou ʻiloʻi e meʻa naʻe hokó? Ne maʻu ʻe Sīlia ha tohi. ʻOku ou pukepuke e tohi ko iá ʻi hoku nimá ʻi he ʻahó ni, ʻa ia naʻe vahevahe mai ʻe Sīliá. ʻOku pehē ai:
“Mīsisi Kulusa:
“Fakamolemoleʻi au, fakamolemoleʻi au. He ʻikai te ke teitei ʻilo ʻeku ongoʻi fakatomala ʻi heʻeku ʻohofi koé. Ka koeʻuhí ko ia, kuo liliu ʻeku moʻuí pea ʻe hokohoko atu ʻene liliú.
“Kuo tokoniʻi ʻe he tohi ko iá [ʻa e Tohi ʻa Molomoná] ʻeku moʻuí. Kuo ueʻi lahi au ʻe he misi ʻa e tangata ko ia ʻo e ʻOtuá. … ʻOku ou fakafoki atu hoʻo [paʻanga] ʻe nimá, he ʻikai ke u lava ʻo fakaʻaongaʻi ia. ʻOku ou fiemaʻu ke ke ʻilo naʻe hangē ne malama ha meʻa meiate koé. Naʻe hanga ʻe he maama ko iá ʻo taʻofi au [mei hono fakalaveaʻi koé, ko ia] naʻá ku hola leva.
“ʻOku ou loto ke ke ʻiloʻi te ta toe fetaulaki pē, ka he ʻikai te ke ʻiloʻi au, he te u hoko ko ho tuongaʻane. … ʻI he feituʻu ko ʻeni ʻoku ou nofo aí, kuo pau ke u kumi ki he ʻEikí pea ʻalu ki he siasi ʻokú ke kau ki aí.
“Naʻe tō hoku loʻimatá ʻi he pōpoaki naʻá ke hiki ʻi he tohí. Talu mei he pō Pulelulú mo e ʻikai lava ʻo taʻofi ʻeku lau iá. Kuó u lotu mo kole ki he ʻOtuá ke fakamolemoleʻi au [pea] ʻoku ou kole atu ke ke fakamolemoleʻi muʻa au. … Naʻá ku fakakaukau te u lava ʻo fakatau atu hoʻo meʻaʻofa naʻe kofukofuʻí. [Ka,] kuó ne ʻai ke u fie liliu ʻeku moʻuí. … ʻOku ou kole atu, kātaki fakamolemoleʻi muʻa au.
ʻE kāinga, ʻe lava ke aʻutaki mai e maama ʻa e Fakamoʻuí kiate kitautolu kotoa, neongo pe ko e hā hotau ngaahi tūkungá. Naʻe pehē ʻe Palesiteni Sefilī R. Hōlani, “He ʻikai malava ke taʻe aʻu atu kiate koe e maama taʻengata ʻo e Fakalelei ʻa Kalaisí.”
Ko e tokotaha ko ia ne ʻikai taumuʻa ki ai e meʻaʻofa ʻa Sīliá, ʻa e Tohi ʻa Molomoná, naʻá ne mātā tonu e ʻaloʻofa lahi ange ʻa e ʻEikí. Neongo ne kiʻi fuofuoloa pea toki fakamolemoleʻi pē ʻe he tokouá ni iá, ka naʻá ne maʻu ʻa e fiefia ʻi he fakatomalá. Ko ha mana moʻoni ia! Naʻe fakaiku ha fefine faivelenga ʻe taha, Tohi ʻa Molomona ʻe taha, fakatomala fakamātoato, pea mo e mālohi ʻo e Fakamoʻuí ki he fiefia ʻi he ngaahi tāpuaki kakato ʻo e ongoongoleleí mo e ngaahi fuakava toputapu ʻi he fale ʻo e ʻEikí. Naʻe muimui ki ai ha kau mēmipa kehe ʻo e fāmilí mo tali ʻa e ngaahi fatongia toputapu ʻi he ngoue vaine ʻa e ʻEikí, kau ai e ngāue fakafaifekaú.
ʻI heʻetau haʻu kia Sīsū Kalaisí, ʻe faifai pē pea tataki kitautolu ʻe hotau hala ʻo e fakatomala moʻoní, ki he temipale māʻoniʻoni ʻa e Fakamoʻuí.
Ko ha ʻuhinga angatonu moʻoni ia ke fāifeinga ai ke maʻa—ke taau mo e kakato ʻo e ngaahi tāpuaki kuo tuku mai ʻe heʻetau Tamai Hēvaní mo Hono ʻAló ʻo fakafou ʻi he ngaahi fuakava toputapu ʻo e temipalé! ʻI heʻetau ngāue maʻu pē ʻi he fale ʻo e ʻEikí mo feinga ke tauhi e ngaahi fuakava toputapu ʻoku tau fakahoko aí, ʻe tupulaki fakatouʻosi ʻetau holí mo ʻetau malava ke aʻusia ha liliu ʻo e lotó, iví, ʻatamaí, mo e laumālié ʻa ia ʻoku fiemaʻu ka tau hoko ʻo hangē ko hotau Fakamoʻuí. Kuo fakamoʻoni ʻa Palesiteni Lāsolo M. Nalesoni, “He ʻikai ha meʻa te ne fakaava lahi ange ʻa e ngaahi langí [ʻo laka ange ʻi he moihū he temipalé]. He ʻikai pē ha meʻa!”
Siʻoku ngaahi kaungāmeʻa, ʻokú ke ongoʻi taʻefeʻunga nai? ʻOkú ke ongoʻi taʻetaau? ʻOkú ke veiveiua nai pe ʻoku tonu hoʻo filí pe meʻa ʻoku faí? Mahalo te ke hohaʻa pea fehuʻi: ʻOku ou lelei feʻunga nai? ʻOku fuʻu tōmui nai ia kiate au? Ko e hā ʻoku ou toutou tō ai hili ʻeku feinga ʻaki hoku lelei tahá?
Kāinga, ʻe pau pē ke tau fakahoko ha ngaahi fehalaaki ʻi heʻetau moʻuí lolotonga ʻetau fonongá. Ka ke kātaki ʻo manatuʻi hangē ko ia ne akoʻi ʻe ʻEletā Kēliti W. Kongó: “ʻOku taʻe-fakangatangata mo taʻengata e Fakalelei ʻa [hotau Fakamoʻuí]. ʻOku tau hē kotoa pē pea ʻikai maaʻusia. ʻE malava ke tau hē ʻi ha taimi. ʻOku fakapapauʻi angaʻofa mai ʻe he ʻOtuá, [ʻe] tatau aipē pe ʻoku tau ʻi fē pe ko e hā kuo tau faí, ʻoku ʻikai teitei ai ha feituʻu te ke taʻelava ʻo foki mei ai. ʻOkú Ne tatali mai ke fekita mo kitautolu.”
Hangē foki ko ia kuo akoʻi mai ʻe hoku uaifi ko Keli Luú kiate aú, ʻoku fiemaʻu ke tau fakatomala kotoa, fakafoki, pea toe liliu ʻa e taimí ke “kamata foʻou” ʻi he ʻaho kotoa pē.
ʻE hoko ʻa e ngaahi fakafeʻātungiá. ʻOua muʻa te ta tali pē ke toki hoko e faingataʻá peá ta toki tafoki ki he ʻOtuá. ʻOua muʻa te ta tatali ki he ngataʻanga ʻo ʻeta moʻui fakamatelié ka ta toki fakatomala moʻoní. Kae tukutaha muʻa ʻetau tokangá he taimí ni ki he mālohi huhuʻi ʻo Sīsū Kalaisí pea mo e finangalo ʻo e Tamai Hēvaní ke tau foki hake kiate Iá, ʻo tatau ai pē pe ko e fē tafaʻaki ʻo e hala ʻo e fuakavá ʻoku tau ʻi aí.
ʻOku ueʻi kitautolu ʻe he fale ʻo e ʻEikí, ko ʻEne ngaahi folofola māʻoniʻoní, ko ʻEne kau palōfita mo e kau ʻaposetolo māʻoniʻoní, ke tau fāifeinga ki he māʻoniʻoni fakatāutahá ʻo fakafou ʻi he tokāteline ʻo Kalaisí.
Pea naʻe pehē ʻe Nīfai: “Pea ko ʻeni, vakai, ʻe hoku kāinga ʻofeina, ko e halá ʻeni; pea ʻoku ʻikai ha hala pe ha hingoa kuo tuku mai ʻi he lalo langí ʻa ia ʻe lava ʻo fakamoʻui ai ʻa e tangatá [mo e fefiné] ʻi he puleʻanga ʻo e ʻOtuá. Pea ko ʻeni, vakai, ko e tokāteline ʻeni ʻa Kalaisí, pea ko e tokāteline moʻoni pē ʻe taha ia ʻa e Tamaí, pea mo e ʻAló, pea mo e Laumālie Māʻoniʻoní.”
Mahalo ʻe ngali faingataʻa ʻetau feinga ke “hoko-ʻo-taha” mo e ʻOtuá. Ka te ta lava ʻo kiʻi tatali, fakalongolongo, sio ki he Fakamoʻuí, mo fekumi ke maʻu pea fakahoko e meʻa ʻokú Ne finangalo ke tau liliú. Kapau te tau fakahoko ia ʻi he loto-moʻoni, te tau fakamoʻoniʻi ʻEne faifakamoʻuí. Pea fakakaukau ki he founga ʻe tāpuekina ai hotau hakó ʻi heʻetau tali e meʻaʻofa ʻa e ʻEikí ʻo e fakatomalá!
Naʻe akoʻi mai ʻe heʻeku tamaí, ʻe hanga ʻe he ʻEiki Tufunga ʻUmeá ʻo oʻi mo fakaleleiʻi kitautolu, ʻa ia ʻe lava ke faingataʻa. Ka neongo ia, ʻe fakamaʻa mo fakamoʻui foki kitautolu ʻe he ʻEiki Faifakamoʻuí. Kuó u aʻusia pea hokohoko atu ʻeku aʻusia ʻa e mālohi faifakamoʻui ko iá. ʻOku ou fakamoʻoni ʻoku maʻu ia mei he tui kia Sīsū Kalaisí mo e fakatomala fakaʻahó.
ʻOku ou fakamoʻoni ki he ʻofa ʻa e ʻOtuá pea mo e mālohi taʻe-fakangatangata ʻo e Fakalelei ʻa Hono ʻAló. Te tau lava ʻo ongoʻi mālohi ia ʻi heʻetau fakatomala moʻoni mo kakató.
Siʻoku ngaahi kaungāmeʻa, ʻoku ou fakamoʻoni ki he Fakafoki nāunauʻia Mai ʻo e ongoongoleleí ʻo fakafou ʻi he Palōfita ko Siosefa Sāmitá, pea mo e fakahinohino fakalangi ʻa e Fakamoʻuí ki Heʻene palōfita mo e tangata lea ko Palesiteni Lāsolo M. Nalesoní. ʻOku ou ʻilo ʻoku moʻui ʻa Sīsū Kalaisi pea ko Ia ʻa e ʻEiki Faifakamoʻui ʻo hotau laumālié. ʻOku ou ʻiloʻi mo fakamoʻoni ʻoku moʻoni ʻa e ngaahi meʻá ni, ʻi he huafa māʻoniʻoni ʻo Sīsū Kalaisí, ʻēmeni.