ʻI he Vahaʻataimi ʻo e Ngaahi Taʻu Siʻi Pē
Kapau ʻoku ʻikai ke tau faivelenga mo talangofua, te tau lava ʻo liliu ʻa e tāpuaki ʻo e tuʻumālie kuo foaki ʻe he ʻOtuá ki ha hīkisia fakamalaʻia ʻokú ne ofeʻi mo fakaheeʻi kitautolu.
Siʻoku kāinga ʻofeina, ʻi heʻeku tangutu ʻi muʻa heni ʻi he ʻaho ní, kuó u mamata ki he fonu tuʻo tolu ʻa e Senitā Konifelenisi ko ʻení, ko ha fuofua taimi ia talu mei he KŌVITÍ. Ko ha kau ākonga mateaki kimoutolu ʻa Sīsū Kalaisi ʻoku mou vēkeveke ke ako. ʻOku ou fakamālō atu ʻi hoʻomou faitōnungá. Pea ʻoku ou ʻofa atu.
Naʻe ngāue ʻa ʻEselā Tafu Penisoni ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei Nōvema 1985 ʻo ngata ki Mē 1994. Naʻá ku taʻu 33 ʻi he taimi naʻe hoko ai ʻa Palesiteni Penisoni ko e Palesiteni ʻo e Siasí peá u taʻu 42 ʻi he taimi naʻá ne pekia aí. Pea naʻe tākiekina au ʻe heʻene ngaahi akonakí mo e fakamoʻoní ʻi ha ngaahi founga mālohi pea mo ongo moʻoni.
Ko e taha ʻo e ngaahi meʻa naʻe makehe ʻi he ngāue ʻa Palesiteni Penisoní ko e tukutaha ʻene tokangá ʻi he taumuʻa mo e mahuʻinga ʻo e Tohi ʻa Molomoná. Naʻá ne toutou fakamamafaʻi “ko e Tohi ʻa Molomoná ko e maka-tuʻu-loto ia ʻo ʻetau tui fakalotú—ko e maka-tuʻu-loto ia ʻo ʻetau fakamoʻoní, ko e maka-tuʻu-loto ʻo ʻetau tokāteliné, mo e maka-tuʻu-loto ʻo ʻetau fakamoʻoni ki hotau ʻEikí mo e Fakamoʻuí.” Naʻá ne faʻa fakamamafaʻi foki ʻa e ngaahi akonaki mo e ngaahi fakatokanga fekauʻaki mo e angahala ʻo e hīkisiá ʻi he Tohi ʻa Molomoná.
Naʻe mātuʻaki ongo kiate au ha akonaki makehe ʻa Palesiteni Penisoni pea ʻokú ne kei tākiekina ʻeku ako ʻa e Tohi ʻa Molomoná. Naʻá ne pehē:
“[Ko e] Tohi ʻa Molomoná … naʻe hiki ia maʻa hotau kuongá. Naʻe teʻeki ai maʻu ʻe he kau Nīfaí ia ʻa e tohí; pea pehē ki he kau Leimana ʻo e kuonga muʻá. Naʻe fakataumuʻa mai ia kiate kitautolu. Naʻe hiki ia ʻe Molomona ʻi he fakaofi ke ngata ʻa e moʻui ʻa e kau Nīfaí. Naʻe fakahinohinoʻi ia ʻe he ʻOtuá, he ʻokú Ne ʻafioʻi ʻa e ngaahi meʻa kotoa pē mei he kamataʻangá, pea [naʻe] fakanounouʻi ai [ʻe Molomona] ʻa e ngaahi lekooti kuo laui senituli ʻo ne filifili mai pē ʻa e ngaahi talanoa mo e ngaahi malanga mo e ngaahi meʻa naʻe hoko, ʻe ʻaonga lahi taha kiate kitautolú.”
Naʻe hoko atu ʻa Palesiteni Penisoni ʻo pehē: “Naʻe fakamoʻoniʻi foki ʻe he kau tangata tohi ʻiloa taha ʻi he Tohi ʻa Molomoná, ko ʻenau tohí koeʻuhi ko e ngaahi toʻu tangata ʻi he kahaʻú. … Kapau naʻa nau vakai mai ki hotau ʻahó ni, pea nau fili ʻa e ngaahi meʻa ko ia ʻe mahuʻinga taha kiate kitautolú, ʻoku ʻikai ʻapē ko e founga totonu ia ke tau ako ai ki he Tohi ʻa Molomoná? ʻOku totonu ke tau toutou fehuʻi hifo kiate kitautolu, ‘Ko e hā nai ʻa e ʻuhinga naʻe ueʻi ai ʻe he ʻEikí ʻa Molomona … ke ne fakakau [ʻa e fakamatalá ni] ʻi heʻene lekōtí? Ko e hā ha lēsoni te u lava ke ako mei he [ekinaki ko ʻení], ke ne tokoniʻi au ke u moʻui ʻi he ʻaho mo e kuonga ko ʻení?’”
ʻOku tokoni ʻa e ngaahi fakamatala ʻa Palesiteni Penisoní ke mahino kiate kitautolu, ko e Tohi ʻa Molomoná ʻoku ʻikai ko ha lekooti fakahisitōlia pē ia ʻokú ne fakamatalaʻi ʻa e ngaahi meʻa ʻi he kuohilí. Ka ʻoku fakamatalaʻi ʻe he folofola ko ʻení ʻa e ngaahi meʻa ʻi he kahaʻú pea ʻoku ʻi ai ha ngaahi tefitoʻi moʻoni mahuʻinga, ngaahi fakatokanga, mo ha ngaahi lēsoni ʻoku fakataumuʻa ki he ngaahi tūkunga mo e ngaahi pole ʻo hotau kuongá. Ko ia ai, ko e Tohi ʻa Molomoná ko ha tohi ia fekauʻaki mo hotau kahaʻú pea mo e ngaahi taimi ʻoku tau lolotonga moʻui aí mo ia te tau moʻui ai ʻi he kahaʻú.
ʻOku ou lotua ʻa e tokoni ʻa e Laumālie Māʻoniʻoní ʻi heʻetau fakakaukau ʻi he taimí ni ki he ngaahi lēsoni ʻoku ʻaonga maʻatautolu ʻi he ʻaho ní mei he tohi ʻa Hilamaní, ʻi he Tohi ʻa Molomoná.
Ko e Kau Nīfaí mo e Kau Leimaná
ʻOku fakamatalaʻi ʻe he lekooti ʻa Hilamani mo hono ongo fohá, ha kakai naʻa nau fakatuʻamelie ki hono ʻaloʻi ʻo Sīsū Kalaisí. ʻOku fakamahino ʻe he vaeuaʻi senituli naʻe talanoa ki ai ʻi he lekooti fakafolofolá, ʻa e ului mo e māʻoniʻoni ʻa e kau Leimaná pea mo e faiangahala, hē mei he moʻoní, mo e ngaahi malaʻia ʻa e kau Nīfaí.
Ko ha fakahinohino mahuʻinga ia kiate kitautolu ʻo e ʻaho ní ʻa e ngaahi faitatau mo e faikehekehe ʻi he vahaʻa ʻo e kau Nīfaí mo e kau Leimaná mei he lekooti fakakuonga muʻa ko ʻení.
“Kuo hoko ʻa e kau Leimaná, ʻa e tokolahi ange ʻo kinautolu, ko ha kakai māʻoniʻoni, ʻo aʻu ki he lahi ange ʻenau māʻoniʻoní ʻi he kau Nīfaí, koeʻuhi ko ʻenau fai mālohí mo ʻenau tuʻu maʻu ʻi he tuí.
“[Pea] naʻe ʻi ai ʻa e tokolahi ʻo e kau Nīfaí kuo fakafefeka honau lotó pea ʻikai fie fakatomala, pea fuʻu fai angahala lahi ʻaupito, ʻo aʻu ki heʻenau liʻaki ʻa e folofola ʻa e ʻOtuá mo e ngaahi malanga mo e ngaahi kikite kotoa pē ʻa ia naʻe fai kiate kinautolú.”
“Pea ko ia ʻoku tau vakai naʻe kamata ke fakaʻauʻau hifo ʻa e kau Nīfaí ʻi he taʻetui, ʻo nau tupulaki ʻi he fai angahalá mo e ngaahi anga-fakalieliá, ka naʻe kamata ke tupulaki lahi ʻaupito ʻa e kau Leimaná ʻi he ʻiloʻi ʻo honau ʻOtuá; ʻio, naʻa nau kamata ke tauhi ʻene ngaahi tuʻutuʻuní mo ʻene ngaahi fekaú, ʻo ʻaʻeva ʻi he moʻoni mo e angatonu ʻi hono ʻaó.
“Pea ko ia ʻoku [tau] vakai naʻe kamata ke mahuʻi atu ʻa e Laumālie ʻo e ʻEikí mei he kau Nīfaí, koeʻuhi ko e angahala mo e fefeka ʻo honau lotó.
“Pea ko ia ʻoku tau vakai naʻe kamata ke lilingi hifo ʻe he ʻEikí ʻa hono Laumālié ki he kau Leimaná, koeʻuhi ko ʻenau loto-fakatōkilaló mo ʻenau fie tui ki heʻene ngaahi folofolá.”
Mahalo ko e fakaʻohovale mo e fakamātoato taha ʻo e hōloa ʻa e kau Nīfaí ʻo hē mei he moʻoní, ko e foʻi moʻoni ko ia, “naʻe hoko mai kiate kinautolu ʻa e ngaahi angahalá ni ʻi he vahaʻataimi ʻo e ngaahi taʻu siʻi pē.”
Naʻe Tafoki ʻa e Kau Nīfaí mei he ʻOtuá
Naʻe anga fēfē nai ʻa e hoko ʻa ha kakai naʻe māʻoniʻoni kimuʻa, ʻo fakafefeka mo faiangahala ʻi ha kiʻi vahaʻataimi nounou? Naʻe anga fēfē ʻa e vave hono fakangaloʻi ʻe he kakaí ʻa e ʻOtua naʻá Ne tāpuekina lahi kinautolú?
ʻI ha founga mālohi mo loloto, ʻoku tau ako ai ʻi he ʻahó ni mei he sīpinga faihala ʻa e kau Nīfaí.
“Naʻe kamata ke hū mai … ʻa e loto-hīkisiá … ki he loto ʻo e kakai ʻa ia naʻa nau pehē ʻoku nau kau ki he siasi ʻo e ʻOtuá … tupu ia mei heʻenau ngaahi fuʻu koloa lahi ʻaupitó mo ʻenau tuʻumālie ʻi he fonuá.”
“Kuo [nau] loto ʻaki ʻa e ngaahi koloa mo e ngaahi meʻa vaʻinga ʻo e māmani ko ʻení” “koeʻuhi ko e hīkisia ʻa ia kuo [nau] … tuku ke hū ki [honau] lotó, ʻa ia kuo hiki hake ʻa [kinautolu] ʻo māʻolunga ʻi he meʻa ʻoku leleí ko e tupu mei [heʻenau] ngaahi fuʻu koloa lahi ʻaupitó!”
ʻOku tangi mai ʻa e ngaahi leʻo fakakuongamuʻa mei he efú ke tau ako ʻi he ʻahó ni ʻa e lēsoni taʻengata ko ʻení: ʻoku fakatahatahaʻi ʻa e tuʻumālié, koloá, mo e moʻui fiemālié ʻo maʻu ai ha mālohi te ne ala tataki atu, naʻa mo e kau māʻoniʻoní, ke inu ʻa e kona fakalaumālie ʻo e hīkisiá.
ʻI heʻetau fakaʻatā ʻa e loto-hīkisiá ke hū ki hotau lotó, ʻe lava ke ne ʻai ke tau manukiʻi ʻa ia ʻoku toputapú; taʻetui ki he laumālie ʻo e kikité mo e fakahaá; molomoloki hifo ʻi hotau lalo vaʻé ʻa e ngaahi fekau ʻa e ʻOtuá; fakaʻikaiʻi ʻa e folofola ʻa e ʻOtuá; kapusi ki tuʻa, manukiʻi, mo lauʻikoviʻi ʻa e kau palōfitá; mo fakangaloʻi ʻa e ʻEiki ko hotau ʻOtuá pea “ʻikai te [tau] loto ke hanga ʻe he ʻEiki ko [hotau] ʻOtua, ʻa ia kuó ne fakatupu ʻa [kitautolú], ʻo angi mo puleʻi ʻa [kitautolu].”
Ko ia ai, kapau ʻoku ʻikai ke tau faivelenga mo talangofua, te tau lava ʻo liliu ʻa e tāpuaki ʻo e tuʻumālie kuo foaki ʻe he ʻOtuá ki ha hīkisia fakamalaʻia ʻokú ne ofeʻi mo fakaheeʻi kitautolu mei he ngaahi moʻoni taʻengatá mo e ngaahi meʻa fakalaumālie mahuʻinga ʻoku totonu ke fakamuʻomuʻá. Kuo pau ke tau tokanga maʻu pē telia ʻa e ongo ʻokú ne fakatupu ʻa e loto-hīkisiá mo hono fakamahuʻingaʻi pē kita ʻo fuʻu tōtuʻá, ko hano sivisiviʻi hala ʻo ʻetau tuʻunga falala pē kiate kitautolú, mo e fakatōliʻa pē ʻetau ngaahi holí kae ʻikai tokoniʻi ʻa e niʻihi kehé.
ʻI heʻetau loto-hīkisia ʻo tokanga taha pē kiate kitautolú, ʻoku fakafaingataʻaʻiaʻi kitautolu ʻe he kui fakalaumālié, pea tau tō ai ʻi he konga lahi, lahi taha, pe naʻa mo e kotoa ʻo ʻetau ngaahi aʻusia fakatāutahá kae pehē ki heʻetau ngaahi aʻusia mo e niʻihi kehé. He ʻikai ke tau lava ʻo fekumi mo tukutaha ʻetau tokangá ʻia Sīsū Kalaisi ko e “meʻa ʻoku mahuinga tahá” kapau ʻoku tau sio pē kiate kitautolu.
ʻE lava foki ʻe he kui fakalaumālie peheé ʻo ʻai ke tau afe mei he hala ʻo e māʻoniʻoní, tō atu ki ha ngaahi hala tapu, pea iku ʻo hē ai. ʻI heʻetau “afe [kui] ki [hotau] ngaahi hala [ʻotautolu] pē” mo muimui ki ha ngaahi hala ʻoku fakatau ki he ʻauhá, ʻoku tau fakahehema ai ke falala ki heʻetau ʻilo pē ʻatautolú, fielahi ʻi hotau mālohi pē ʻotautolú, mo fakafalala ki hotau poto pē ʻotautolú.
Naʻe fakanounouʻi mahino ʻe Samuela ko e tangata Leimaná ʻa e tafoki ʻa e Kau Nīfaí mei he ʻOtuá ʻo pehē: “Kuo mou feinga ʻi he ngaahi ʻaho kotoa pē ʻo hoʻomou moʻuí ke maʻu ʻa ia ʻoku ʻikai te mou faʻa maʻú; pea kuo mou feinga ke maʻu ʻa e fiefia ʻi he fai angahalá, ʻa ia ko ha meʻa ʻoku taʻehoa mo e anga ʻo e māʻoniʻoni ʻa ia ʻoku ʻi hotau Pule Taʻengata lahí.”
Naʻe pehē ʻe he palōfita ko Molomoná, “Naʻe nofo ʻa e konga lahi ʻo e kakaí ʻi heʻenau loto-hīkisiá mo e fai angahalá, pea ko honau tokosiʻi pē naʻe ʻaʻeva fakaʻehiʻehi ʻo lahi hake ʻi he ʻao ʻo e ʻOtuá.”
Naʻe Tafoki ʻa e Kau Leimaná ki he ʻOtuá
ʻI he Tohi ʻa Hilamaní, naʻe mātuʻaki kehekehe moʻoni ʻa e tupulaki ʻo e māʻoniʻoní ʻi he kau Leimaná mo e hōloa fakalaumālie vave ʻa e kau Nīfaí.
Naʻe tafoki ʻa e kau Leimaná ki he ʻOtuá pea naʻe ʻomi kinautolu ke ʻilo ʻa e moʻoní ʻaki ʻenau tui ki he ngaahi akonaki ʻi he ngaahi folofola māʻoniʻoní mo e kau palōfitá, fakaʻaongaʻi ʻa e tui ki he ʻEiki ko Sīsū Kalaisí, fakatomala mei heʻenau ngaahi angahalá, pea aʻusia ha liliu lahi ʻo e lotó.
“Ko ia, ʻilonga ʻa kinautolu kuo nau aʻusia ʻa e meʻa ní, ʻoku mou ʻiloʻi ʻe kimoutolu ʻoku nau tuʻu maʻu mo tuʻu ʻaliʻaliaki ʻi he tuí, pea ʻi he meʻa kuo fakatauʻatāina ʻaki ʻa kinautolú.”
“Ke mou vakai ko e tokolahi ange ʻo [e kau Leimaná] ʻoku nau ʻaʻeva ʻi he hala ʻo honau fatongiá, pea ʻoku nau ʻaʻeva fakaʻehiʻehi ʻi he ʻao ʻo e ʻOtuá, pea ʻoku nau tokanga ke tauhi ʻene ngaahi fekaú mo ʻene ngaahi tuʻutuʻuní mo ʻene ngaahi fakamāú. …
“… ʻOku nau ngāue tūkuingata taʻetuku ke nau fakatafoki hono toe ʻo honau kāingá ki he ʻiloʻi ʻo e moʻoní.”
Ko hono olá, naʻe “lahi ange [ʻa e] māʻoniʻoni [ʻa e kau Leimaná] ʻi he kau Nīfaí, koeʻuhi ko ʻenau fai mālohí mo ʻenau tuʻu maʻu ʻi he tuí.”
Ko ha Fakatokanga mo ha Palōmesi
Naʻe fakamatala ʻe Molonai: “Vakai, kuo fakahā mai ʻe he ʻEikí kiate au ʻa e ngaahi meʻa maʻongoʻonga mo fakaofo ʻo kau ki he meʻa kuo pau ke vavé ni ʻene hokó, ʻi he ʻaho ko ia ʻe hoko mai ai ʻa e ngaahi meʻá ni ʻiate kimoutolú.
“Vakai, ʻoku ou lea kiate kimoutolu ʻo hangē ʻoku mou ʻi hení, ka ʻoku ʻikai. Kae vakai, kuo fakahā ʻa kimoutolu kiate au ʻe Sīsū Kalaisi, pea ʻoku ou ʻiloʻi hoʻomou ngaahi ngāué.”
Kātaki ʻo manatuʻi ʻoku fakamatalaʻi ʻe he Tohi ʻa Molomoná ʻa e ngaahi meʻa ʻi he kahaʻú pea ʻoku ʻi ai ha ngaahi tefitoʻi moʻoni mahuʻinga, ngaahi fakatokanga, mo ha ngaahi lēsoni naʻe fakataumuʻa maʻau mo au ʻi he ngaahi tūkunga mo e ngaahi pole ʻo hotau kuongá.
ʻOku lava ke hoko ʻa e hē mei he moʻoní ʻi ha tuʻunga tefito ʻe ua—fakakautaha mo e fakafoʻituitui. ʻI he tuʻunga fakakautahá, he ʻikai mole ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha hē mei he moʻoní pe ko hono ʻave mei he māmaní.
Naʻe talaki ʻe he Palōfita ko Siosefa Sāmitá ʻo pehē: “Kuo ʻosi fokotuʻu ʻa e Fuka ʻo e Moʻoní; pea he ʻikai lava ʻe ha nima taʻemāʻoniʻoni ke taʻofi ʻa e ngāué mei heʻene laka ki muʻá; … he ʻikai ufi e laka atu ki muʻa e moʻoni ʻa e ʻOtuá, ʻi he anga fakaʻeiʻeiki mo tauʻatāina, kae ʻoua kuo hū atu ki he konitinēniti kotoa pē, aʻu ki he potu kotoa pē, ʻuʻufi ʻa e fonua kotoa pē, mo fakaongo ʻi he telinga kotoa pē, kae ʻoua kuo fakahoko ʻa e ngaahi taumuʻa ʻa e ʻOtuá, pea folofola ʻa Sihova Maʻongoʻonga kuo lava ʻa e ngāué.”
ʻI he tuʻunga fakafoʻituituí, kuo pau ke tau takitaha “vakai telia ʻa e loto-hīkisiá, telia naʻa [tau] hoko ʻo tatau mo e kau Nīfai ʻo e kuonga muʻá.”
Tuku muʻa ke u fokotuʻu atu, kapau te ke tui pe te u tui ʻoku tau mālohi mo loto-toʻa feʻunga ke fakaʻehiʻehi mei he polepole ʻo e loto-hīkisiá, ta ʻoku mahalo ʻoku tau lolotonga fokoutua ʻi he mahaki fakaʻauha fakalaumālie ko ʻení. Ko hono ʻai mahino angé, kapau ʻoku ʻikai ke ta tui ʻe lava ke uesia kitaua ʻe he loto-hīkisá, ta ʻokú ta tuʻu laveangofua leva mo ʻi ha tuʻunga fakatuʻutāmaki fakalaumālie. ʻI he vahaʻataimi ʻo ha ngaahi ʻaho, uike, māhina, pe taʻu siʻi pē, te ta ala tukuange hota tāpuaki fakalaumālie kuo talaʻofa maí ʻo fakafetongi ʻaki ha meʻa ʻoku siʻisiʻi fau hono mahuʻingá.
Ka ʻo kapau leva ʻokú ta tui ʻe ala uesia kitaua ʻe he loto-hīkisiá, te ta feinga leva ke toutou fakahoko ʻa e fanga kiʻi meʻa iiki mo faingofuá ʻa ia te ne maluʻi mo tokoniʻi kitaua ke ta hoko ko ha “tamasiʻi siʻi, angavaivai, angamalū, loto-fakatōkilalo, faʻa kātaki, fonu ʻi he ʻofa, pea loto-fiemālie ke fakavaivai ʻi he meʻa kotoa pē ʻoku ʻafioʻi ʻe he ʻEikí ʻoku lelei ke [ta] faí.” “Monūʻia ʻa kinautolu ʻoku nau fakavaivaiʻi ʻa kinautolu taʻe-fakamālohiʻi ke nau loto-fakatōkilaló.”
ʻI heʻetau muimui ki he faleʻi ʻa Palesiteni Penisoní mo fehuʻi kiate kitautolu, ko e hā ʻa e ʻuhinga naʻe ueʻi fakalaumālie ai ʻe he ʻEikí ʻa Molomona ke ne fakakau ʻi heʻene fakamatala fakanounou ʻo e Tohi ʻa Hilamaní ʻa e ngaahi talanoa, ekinaki, mo e ngaahi fakatokanga naʻá ne fakahokó, ʻoku ou palōmesi atu, te tau maʻu ʻa e mahino ki he founga ke fakaʻaongaʻi ai ʻa e ngaahi akonaki ko ʻení ki he ngaahi tūkunga pau ʻo ʻetau moʻui fakafoʻituituí mo hotau ngaahi fāmilí ʻi he ʻahó ni. ʻI heʻetau ako mo fakalaulauloto ki he lekooti ko ʻeni kuo ueʻi fakalaumālié, ʻe faitāpuekina kitautolu ʻaki ʻa e mata ke mamata, telinga ke fanongo, ʻatamai ke ne mākupusi, mo ha loto ke ne maʻu ʻa e mahino ki he ngaahi lēsoni ʻoku totonu ke tau ako “telia ʻa e loto-hīkisiá, telia [naʻa tau] tō ki he ʻahiʻahí.”
ʻOku ou fakamoʻoni fiefia ko e ʻOtua ko e Tamai Taʻengatá ʻa ʻetau Tamaí. Ko Sīsū Kalaisi ʻa Hono ʻAlo Tofu Pē ʻe Taha naʻe Fakatupú mo e ʻAlo ʻOfaʻangá. Ko Ia hotau Fakamoʻuí. Pea ʻoku ou fakamoʻoni, ʻi heʻetau ʻaʻeva ʻi he angamalū ʻo e Laumālie ʻo e ʻEikí, te tau fakaʻehiʻehi mo ikunaʻi ʻa e loto-hīkisiá pea tau maʻu ʻa e melinó ʻiate Ia. Ko ʻeku fakamoʻoní ia ʻi he huafa toputapu ʻo Sīsū Kalaisí, ʻēmeni.