ʻOfeina ʻe he ʻOtuá
ʻI hono fakafonu ʻaki kitautolu ʻa e ʻofa ʻa e ʻOtuá, ʻoku maluʻi ai kitautolu mei he ngaahi matangi ʻo e moʻuí mo ʻai foki ʻa e ngaahi taimi fakafiefiá ke fakafiefia ange.
Kimuʻa peá u kamatá, ʻoku totonu ke u fakahoko atu kuo pongia ha toko ua ʻo ʻeku fānaú lolotonga ʻena lea ʻi ha tuʻunga malanga, pea kuo teʻeki ai ke u maʻu ha ongo hangē ko kinauá ʻi ha toe taimi ange ka ko e momeniti ko ʻení. ʻOku ou fakakaukau ki ha matapā faimana ki he holá mo ha ngaahi meʻa kehe pē.
ʻOku toko ono ʻa e fānau homau fāmilí, pea ʻoku nau faʻa fefakakataʻaki pe ko hai ʻoku ʻofeina tahá. ʻOku nau takitaha pē ʻi he ʻuhinga ki hono ʻofeina taha kinautolú. Ko ʻema ʻofa ki heʻema fānaú takitaha ʻoku haohaoa, fakafiefia mo kakato. He ʻikai lava ke ma ʻofa ʻi ha taha ʻo lahi ange ʻi he toengá—ʻi he fanauʻi ʻo e kiʻi leka takitaha naʻe hoko ai ʻa e fakalahi fakaʻofoʻofa taha ʻo ʻema ʻofá. ʻOku mālohi taha ʻeku fehokotaki ki he ʻofa ʻa ʻeku Tamai Hēvaní maʻakú ʻo fakafou ʻi he ʻofa ʻoku ou ongoʻi ki heʻeku fānaú.
ʻI heʻenau takitaha lea ʻaki ʻa e ʻuhinga ʻoku nau hoko ai ko e tokotaha ʻoku ʻofeina lahi tahá, mahalo ʻokú ke fakakaukau kuo teʻeki ʻi ai ha loki mohe moveuveu ʻi homau fāmilí. ʻOku holoki ʻa hono fakatokangaʻi ʻa e ngaahi tōnounou ʻi he vā fetuʻutaki ʻo e mātuʻá mo e fānaú ʻaki ʻa e tokanga taha ki he ʻofá.
ʻI ha ngaahi taimi, mahalo koeʻuhí ʻoku ou ʻiloʻi te mau iku ki ha fekeʻikeʻi fakafāmilí, te u pehē leva, “Sai, ʻoku ou helaʻia, ka he ʻikai ke u tala atu ko hai; ka ʻoku mou ʻosi ʻiloʻi pē ko hai ʻoku ou ʻofa taha aí.” Ko ʻeku taumuʻá ke ongoʻi ʻe he tokotaha takitaha ʻo e toko onó kuo nau ikuna pea ʻikai fai ha kē—kae ʻoua kuo toe hokosia ʻa e taimi hokó!
ʻI he Kosipeli ʻa Sioné, ʻokú ne fakamatalaʻi ai ko ia ʻa e “ākonga ʻe toko taha, naʻe ʻofa ai ʻa Sīsuú,” ʻo hangē ia naʻe makehe ʻa e vā fetuʻutaki ko iá. ʻOku ou tui koeʻuhí he naʻe ongoʻi ʻe Sione ʻoku ʻofa kānokato ʻa Sīsū ʻiate ia. ʻOku ou ongoʻi ʻa e meʻa tatau ʻi he tohi ʻe Nīfai ʻo pehē, “ʻOku ou vīkiviki ʻi hoku Sīsuú.” Ko hono moʻoní ʻoku ʻikai ʻofa ʻa e Fakamoʻuí ʻia Nīfai ʻo lahi ange ʻia Sione, ka ʻi he taimi tatau ko e natula fakataautaha ʻo e vā fetuʻutaki ʻa Nīfai mo “hono” Sīsuú, naʻá ne fai ai ʻa e fakamatala fakaʻofoʻofa ko iá.
ʻOku ʻikai koā ke fakaʻofoʻofa ʻa e ʻi ai ʻa e ngaahi taimi ʻoku tau lava ai ʻo ongoʻi ʻoku fakatokangaʻi mo ʻofaʻi kakato mo fakataautaha kitautolú? ʻOku lava ʻa Nīfai ʻo ui Ia ko “hono” Sīsū, pea te tau lava foki mo kitautolu. ʻOku hoko ʻa e ʻofa hotau Fakamoʻuí ko e “faʻahinga ʻofa māʻolunga, fakaʻeiʻeiki mo mālohi tahá,” pea ʻokú Ne foaki mai ia kae ʻoua kuo tau “[fonu].” He ʻikai teitei ʻosi ʻa e ʻofa fakalangí, pea ʻoku tau hoko takitaha ko e tokotaha ʻoku ʻofeina lahi tahá. ʻOku hangē ʻa e ʻofa ʻa e ʻOtuá ko ha ngaahi siakale ʻi ha Veni taiakalamí (Venn diagram), ʻoku tau fehulunaki kotoa pē. Ko e hā pē hotau ngaahi faikehekehé, ko ʻEne ʻofá ʻa e meʻa ʻokú ne fakatahaʻi kitautolú.
ʻOku ngali fakaʻohovale nai ʻa e hoko ʻa e ongo fekau māʻolunga tahá ke ʻofa ki he ʻOtuá pea ke ʻofa kiate kinautolu ʻoku tau feohí? ʻI heʻeku vakai ki he kakaí ʻoku nau fefakahāʻaki ʻa e ʻofa faka-Kalaisí, ʻoku ou ongoʻi hangē ko e ʻofa ko iá ʻoku lahi ange ʻi heʻenau ʻofá pē; ko ha ʻofa ia ʻoku fakalangi foki. ʻI heʻetau feʻofaʻaki ʻi he founga ko ʻení, ʻi he kakato mo e fakakātoa te tau ala lavá, ʻoku kau mai ai mo langi foki.
Kapau ʻoku ʻi ai ha taha ʻoku tau ʻofa ai ʻoku ngali mamaʻo mei he ongoʻi ʻo e ʻofa fakalangí, te tau lava ʻo muimui ʻi he sīpinga ko ʻení—ʻaki hono fakahoko ʻa e ngaahi meʻa te ne ʻai ke tau ofi ange ai ki he ʻOtuá pea mo e ngaahi meʻa te ne ʻai ke tau ofi ange ai kiate kinautolú—ko ha fakaafe ʻaki hoʻo sīpingá ke haʻu kia Kalaisi.
ʻOku ou fakaʻamu naʻá ku lava ʻo tangutu mo kimoutolu ʻo fehuʻi atu pe ko e hā ʻa e ngaahi tūkunga ʻokú ne ʻai ke ke ongoʻi ai ʻa e ʻofa ʻa e ʻOtuá. Ko e ngaahi veesi fē ʻi he folofolá, ko e ngāue ʻofa fē? Ko e fē feituʻu te ke ʻi aí? Ko e mūsika fē? Ko hai te mo feohí? Ko ha feituʻu lelei ʻa e konifelenisi lahí ke ako ai fekauʻaki mo e fakafehokotaki ki he ʻofa fakalangí.
Kae mahalo ʻokú ke ongoʻi mamaʻo mei he ʻofa ʻa e ʻOtuá. Mahalo ʻoku ʻi ai ha ngaahi fakakaukau fakalotosiʻi mo fakapoʻuli ʻokú ne lōmekina hoʻo fakakaukaú, ngaahi pōpoaki ʻokú ne tala atu ʻokú ke fuʻu kafo mo puputuʻu, fuʻu vaivai mo liʻekina, fuʻu makehe pe hē ke maʻu ʻa e ʻofa fakalangí ʻi ha tuʻunga moʻoni. Kapau ʻokú ke fanongoa ʻa e ngaahi fakakaukau ko iá, kātaki ʻo fanongo mai: ʻoku hala ʻa e ngaahi leʻo ko iá. Te tau lava ʻo liʻaki ʻa e kafó ʻi ha faʻahinga founga ʻokú ne taʻofi kitautolu mei he ʻofa fakalangí—ʻi he taimi kotoa pē ʻoku tau hivaʻi ai ʻa e hiva ʻokú ne fakamanatu mai kuo fili hotau Fakamoʻui haohaoá ke “fakavolu, maumauʻi, [pea] fakalaveaʻi maʻatautolú,” ʻi he taimi kotoa pē ʻoku tau toʻo ai ʻa e mā kuo pakí. Ko hono moʻoní ʻoku toʻo ʻe Sīsū ʻa e fakamāʻia kotoa pē mei he kafó. ʻI Heʻene kafó, naʻá Ne hoko ai ʻo haohaoa, pea te Ne lava foki ʻo ʻai ke tau haohaoa neongo ʻetau kafó. Naʻá Ne kafo, tuenoa, mamahi pea fakavolu—pea mahalo te tau ongoʻi pehē—ka ʻoku ʻikai ke fakamavaheʻi kitautolu mei he ʻofa ʻa e ʻOtuá. ʻO hangē ko e fakalea ʻo e hivá “[Kakai kuo kafo], ʻofa haohaoá.”
Mahalo te ke ʻiloʻi ha meʻa lilo kau kiate koe ʻokú ne ʻai ke ke ongoʻi ʻoku ʻikai ʻofaʻi koe. Neongo pe ʻoku tonu hoʻo fakakaukau fekauʻaki mo koé, ka ʻoku hala ia ke ke pehē ʻoku ʻikai lava ʻo aʻu atu ʻa e ʻofa ʻa e ʻOtuá kiate koe. ʻOku tau angakovi mo ʻikai faʻa kātaki ʻi he taimi ʻe niʻihi kiate kitautolu pē, ʻi ha ngaahi founga he ʻikai ke tau lava ʻo fai ki ha niʻihi kehe. ʻOku lahi ʻa e meʻa ke tau fai ʻi he moʻuí ni, ka ʻoku ʻikai kau ai ʻetau fehiʻa pē kiate kitautolú mo e fakahalaʻiaʻi fakaloloma pē kitá. Neongo ai pē ʻa e taʻefeʻunga ʻoku tau ongoʻi ʻoku tau ʻi aí, ʻoku ʻikai fakanounou ai Hono toʻukupú. ʻIkai. ʻOku lōloa feʻunga maʻu pē ia ke “[aʻu] mai kiate kitautolu” pea ʻōʻōfaki kitautolu takitaha.
Ko e taimi ʻoku ʻikai ke tau ongoʻi ai ʻa e māfana ʻo e ʻofa fakalangí, kuo teʻeki ai mole ia. Naʻe folofola ʻa e ʻOtuá “ʻe mole ʻa e ngaahi moʻungá pea hiki mo e ngaahi tafungofungá; ka ko [ʻEne] ʻofá ʻe ʻikai mole meiate [kitautolu].” Ko ia, ke mahino leleí, ko e fakakaukau ko ia kuo fakangata ʻa e ʻofa ʻa e ʻOtuá, ʻoku totonu ke taupotu ia ki lalo ʻi he lisi ʻo hono fakamatalaʻi ʻo e moʻuí ke ʻoua te tau aʻu ki ai kae ʻoua kuo mole atu ʻa e ngaahi moʻungá mo e tafungofungá!
ʻOku ou manako ki he fakataipe ko ‘eni ʻo e ngaahi moʻungá ki he fakamoʻoni ʻo e papau ʻo e ʻofa ʻa e ʻOtuá. ʻOku maʻu ʻa e sīpinga mālohi ko iá ʻi he ngaahi talanoa ʻo kinautolu ʻoku nau ʻalu ki he moʻungá ke maʻu ha fakahā pea mo e fakamatalaʻi ʻe ʻĪsaia ʻa e “moʻunga ʻo e fale ʻo [e ʻEikí]” ʻi he “tumutumu ʻo e ngaahi moʻungá.” ʻOku hoko ʻa e fale ʻo e ʻEikí ko e feituʻu ʻoku fai ai ʻetau ngaahi fuakava maʻongoʻonga tahá pea mo ha feituʻu ke tau kumi hūfanga ki ai pea ako lahi ange ki hono moʻoni ʻo e ʻofa ʻa ʻetau Tamaí maʻatautolú. Kuó u fiefia foki ʻi he fiemālie ʻoku maʻu ʻe hoku laumālié ʻi heʻeku tauhi faivelenga ki heʻeku fuakava ʻo e papitaisó pea mo fekumi ki ha taha ʻokú ne tengihia ʻi ha pekia pe mamahi ʻi ha siva ʻo e ʻamanakí pea ʻoku ou feinga ke tokoniʻi kinautolu ke nau ʻiloʻi ʻenau ngaahi ongó. Ko ha ngaahi founga nai ʻeni ʻe lava ke tau kau kakato ai ʻi he fuakava fakaʻofoʻofa ʻo e ʻofá ʻa e hesetí
Ko ia, kapau he ʻikai mavahe ʻa e ʻofa ʻa e ʻOtuá meiate kitautolu, ko e hā ʻa e ʻuhinga ʻoku ʻikai ai ke tau ongoʻi maʻu pē iá? Koeʻuhí pē ke ʻoua ʻe siva hoʻomou ʻamanakí: ʻoku ʻikai ke u ʻiloʻi. Ka ko e ʻofaʻí ʻoku ʻikai ʻaupito ke tatau ia mo e ongoʻi ʻo e ʻofá, pea ʻoku ʻi ai ʻeku ngaahi fakakaukau ʻe ala tokoni atu ʻi hoʻo fekumi ki he tali ʻo e fehuʻi ko iá.
Mahalo ʻokú ke fefaʻuhi mo e mamahí, loto-taʻotaʻomiá, lavakiʻí, tuenoá, siva ʻo e ʻamanakí, pe ngaahi fakafeʻātungia mālohi ki hoʻo malava ʻo ongoʻi ʻa e ʻofa ʻa e ʻOtuá maʻaú. Kapau ko ia, ʻe lava ʻe he ngaahi meʻa ko ʻení ʻo fakafeʻātungiaʻi ʻetau malava ko ia ke ongoʻi ʻa e ngaahi meʻa naʻe totonu ke tau ongoʻí. Mahalo ʻi ha kiʻi taimi, he ʻikai ke ke lava ʻo ongoʻi ʻEne ʻofá, pea ʻe feʻunga pē ʻa hoʻo ʻiló. Ka ʻoku ou fifili pe te ke lava nai ʻo ʻahiʻahi—ʻi he faʻa kātaki—ʻa e ngaahi founga kehekehe ʻo hono fakahaaʻi mo maʻu ʻo e ʻofa fakalangí. Te ke lava nai ʻo fakamamaʻo mei he meʻa ʻokú ke fehangahangai mo iá kae ʻoua kuó ke maʻu ha vakai ʻoku lelei angé ke ke lava ai ʻo “fakakaukau fakasilesitiale” koeʻuhí ʻokú ke vakai ki he ngaahi fetuʻú pea manatuʻi ha ngaahi māmani taʻe-fakangatangata pea fakafou ʻiate kinautolu hoʻo manatuʻi honau Tupuʻangá?
Ko e hiva ʻa e manupuná, ongoʻi ʻa e tau mai ʻa e laʻaá pe havilí pe ʻuhá ki hoku kilí, pea mo e ngaahi taimi naʻe fakatupu ai ʻe natula haʻaku ofo ʻi he ʻOtuá—kuo fakatupu ʻe he meʻa takitaha ha fakafehokotaki ʻiate au mo e langí. Mahalo ʻe tokoni ʻa e fakafiemālie ʻa e ngaahi kaungāmeʻa angatonú. Mahalo ko e mūsiká? Pe ngāue tokoní? Kuó ke tauhi nai ha lekooti pe tohinoa ʻo e ngaahi taimi naʻe mahino ai kiate koe hoʻo fehokotaki mo e ʻOtuá? Mahalo te ke lava ʻo fakaafeʻi ʻa kinautolu ʻokú ke falala ki aí ke vahevahe mo koe ʻenau ngaahi maʻuʻanga tokoni ʻo e fehokotaki fakalangí ʻi hoʻo fekumi ki ha tokoni mo ha mahinó.
ʻOku ou fakakaukau, kapau naʻe fiemaʻu ke fili ʻe Sīsū ha feituʻu ke ke fetaulaki ai mo Ia, ko ha feituʻu fakataautaha te ke lava ai ʻo tokanga taha kiate Ia, te Ne fili nai hoʻo feituʻu makehe ʻo e mamahi fakatāutahá, ʻa e feituʻu ʻokú ke fiemaʻu tokoni lahi taha aí, ʻa ia he ʻikai lava ke ʻalu ki ai mo ha toe tahá? Ko ha feituʻu ʻokú ke ongoʻi tuenoa moʻoni ai pea kuo pau ke ke ʻi ai toko taha ka ʻoku teʻeki ke ke aʻu ki ai, ko ha feituʻu mahalo ko Ia pē naʻe ʻosi fononga aí ka kuó Ne ʻosi mateuteu ke fetaulaki ki ai mo koe ʻi hoʻo aʻu ki aí? Kapau ʻokú ke tatali kiate Ia ke haʻu, ʻikai kuó Ne ʻosi ʻi ai pea ʻe lava ke tokoni mai?
Kapau ʻokú ke ongoʻi fonu ʻi he ʻofá ʻi he vahaʻa taimi ko ʻeni hoʻo moʻuí, kātaki ʻo feinga ke ke puke ia ʻo hangē ko e sivi ʻe he meʻasiví ʻa e vaí. Vahevahe ia ʻi he feituʻu kotoa pē ʻokú ke ʻalu aí. Ko e taha ʻo e ngaahi mana ʻo e fokotuʻutuʻu fakalangí, ʻi heʻetau feinga ke vahevahe ʻa e ʻofa ʻa Sīsuú, ʻoku fakafonu ʻaki kitautolu ha ngaahi founga kehekehe ʻo e foʻi tefitoʻi moʻoni “ko ia ʻe mole ʻene moʻuí koeʻuhí ko aú, te ne maʻu ia.”
ʻI hono fakafonu ʻetau moʻuí ʻaki ʻa e ʻofa ʻa e ʻOtuá, ʻokú ne maluʻi kitautolu ʻi he ngaahi matangi ʻo e moʻuí pea ʻokú ne ʻai foki ʻa e ngaahi taimi fiefiá ke fakafiefia ange—ʻi he taimi ʻoku ulo mai ai ʻa e laʻaá ʻi hotau ngaahi ʻaho fakafiefiá, ʻoku toe fakamaamangia ange ia ʻe he maama ʻi hotau laumālié.
Tuku muʻa ke tau “aka … mo tuʻu maʻu” ʻi hotau Sīsuú mo ʻEne ʻofá. Tau fekumi pea mataʻikoloa ʻaki ʻa e ngaahi aʻusia ʻo hono ongoʻi ʻEne ʻofá mo e mālohí ʻi heʻetau moʻuí. ʻOku ʻatā ʻa e fiefia ʻo e ongoongoleleí ki he tokotaha kotoa: ʻo ʻikai ko e kau fiefiá pē, ʻikai ko kinautolu pē ʻoku mamahí. Ko ʻetau taumuʻá ʻa e fiefiá, kae ʻikai ko e meʻaʻofa mei hotau ngaahi tūkungá. ʻOku tau maʻu ʻa e ʻuhinga lelei kotoa pē ke “fiefia pea fonu ʻi he ʻofa ki he ʻOtuá mo e kakai fulipē.” Tuku ke tau fonu. ʻI he huafa ʻo Sīsū Kalaisí, ʻēmeni.