Talitali Lelei ki he Siasi ʻo e Fiefiá
Koeʻuhí ko e moʻui mo e misiona huhuʻi hotau Fakamoʻui ko Sīsū Kalaisí, te tau lava—pea ʻoku totonu ke tau—hoko ko e kakai fiefia taha ʻi he māmaní!
Naʻe papitaiso au ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Efiafi kimuʻa ʻi he Kilisimasi ʻo e 1987, ʻa ia ko e meimei taʻu ʻe 37 kuohilí. Ko ha ʻaho fakaʻofoʻofa moʻoni ia ʻi heʻeku moʻuí mo ʻeku fononga ki he taʻengatá, pea ʻoku ou houngaʻia lahi moʻoni ki he ngaahi kaungāmeʻa naʻa nau teuteuʻi ʻa e halá mo ʻomi au ki he vai ʻo e fanauʻi foʻou ko iá.
Tatau ai pē pe naʻá ke toki papitaiso ʻaneafi pe ʻi he ngaahi taʻu lahi kuohilí, pe naʻá ke lotu ʻi ha falelotu ʻoku lahi ai ha ngaahi uooti ʻo e Siasí pe ʻi ha kiʻi fale pola, pe naʻá ke maʻu ʻa e sākalamēnití ko hano fakamanatua ʻo e Fakamoʻuí ʻi ha faʻahinga lea fakafonua pē, ʻoku ou fie pehē atu, ʻoku talitali lelei koe ki he siasi ʻo e fiefiá! Talitali lelei ki he siasi ʻo e fiefiá!
Ko e Siasi ʻo e Fiefiá
Koeʻuhí ko e palani ʻofa ʻa ʻetau Tamai Hēvaní ki Heʻene fānaú takitaha, pea mo e moʻui mo e misiona huhuʻi ʻa hotau Fakamoʻui ko Sīsū Kalaisí, te tau lava—pea ʻoku totonu—ke tau hoko ko e kakai fiefia taha ʻi he māmaní! Neongo ʻa e ngaahi faingataʻa ʻo e moʻuí ʻi ha māmani mohu faingataʻa ʻo ne uesia lahi kitautolu, ka te tau lava ʻo tanumaki ha ongoʻi tupulaki mo tuʻuloa ʻo e fiefiá mo e nongá koeʻuhi ko ʻetau ʻamanaki lelei ʻia Kalaisí mo e mahino kiate kitautolu hotau tuʻunga ʻi he palani fakaʻofoʻofa ʻo e fiefiá.
Naʻe ʻosi lea mai ʻa e ʻAposetolo pule ʻa e ʻEikí, ʻa Palesiteni Lāsolo M. Nalesoni, fekauʻaki mo e fiefia ʻoku maʻu mei he moʻui ʻoku fakatefito ʻia Sīsū Kalaisí ʻi he meimei lea kotoa pē kuó ne fai talu ʻene hoko ko e Palesiteni ʻo e Siasí. Naʻe mahino ʻaupito ʻene fakamāʻopoʻopo mai iá [‘i he kupuʻi lea]: “Oku haʻu ʻa e fiefiá meiate Ia. … Ki he Kāingalotú, ko Sīsū Kalaisi ʻa e fiefiá!”
Ko ha kāingalotu kitautolu ʻo e Siasi ʻo Sīsū Kalaisí. Ko ha kāingalotu kitautolu ʻo e siasi ʻo e fiefiá! Pea ʻoku ʻikai ha toe feituʻu ʻoku totonu ke ʻilonga ange ai ʻetau hoko ko ha kakai fiefiá ka ko e taimi ʻoku tau fakataha ai ʻi he ʻaho Sāpaté ʻi heʻetau houalotu sākalamēnití ke moihū ki he tupuʻanga ʻo e fiefia kotoa pē! ʻOku tau fakataha mai heni mo hotau ngaahi fāmili ʻi he uōtí mo e koló ke fakamanatua ʻa e sākalamēnití ʻo e ʻOhomohe ʻa e ʻEikí, ko hotau fakahaofi mei he angahalá mo e maté, pea mo e ʻaloʻofa mālohi fakaʻaufuli ʻo e Fakamoʻuí! ʻOku tau haʻu ki hení ke aʻusia ʻa e fiefiá, hūfangá, fakamolemolé, fakafetaʻí mo e ongoʻi ʻo e kau maí ʻo fakafou ʻia Sīsū Kalaisi!
Ko e laumālie nai ʻeni ʻo e fiefia fakataha ʻia Kalaisí? Ko e laumālie tatau nai ʻeni ʻokú ke maʻú? Mahalo te ke fakakaukau ʻoku ʻikai haʻo fuʻu kaunga ki he meʻá ni, pe mahalo kuó ke anga pē ki he tūkunga kuo fakahoko ʻaki maʻu pē ʻa e ngaahi meʻá. Ka te tau lava kotoa ʻo tokoni, ʻo tatau ai pē ko e hā hotau taʻu motuʻá pe fatongiá, ki hono ʻai ʻetau houalotu sākalamēnití ke fakafiefia, nofotaha ʻia Kalaisi, mo talitali lelei ha faʻahinga taha pē ʻe lavá, pea ke longomoʻui ʻa e laumālie ʻo e ʻapasia fiefiá.
ʻApasia Fiefia
ʻApasia fiefia? Mahalo te ke fehuʻi, “ʻOku ʻi ai ha meʻa pehē?” ʻIo, ʻoku ʻi ai! ʻOku tau ʻofa moʻoni, fakalāngilangiʻi, mo fakaʻapaʻapaʻi hotau ʻOtuá, pea ʻoku makatuʻunga ʻetau ʻapasiá mei ha laumālie ʻoku fiefia ʻi he fuʻu ʻofa lahi, ʻaloʻofa, mo e fakamoʻui ʻa Kalaisí! ʻOku totonu ke hoko ʻa e ʻapasia mo e fiefia ko ʻení ko e sīpinga ia ʻo ʻetau ngaahi houalotu sākalamēniti toputapú.
Neongo iá, ka ki ha niʻihi tokolahi, ʻoku ʻuhinga ʻa e ʻapasiá ki heni: mātuʻaki kūnima, punou hotau ʻulú, kuikui hotau matá, pea fakalongolongo ʻaupito pē—ʻi ha taimi lōloa! Mahalo pē ʻe tokoni ʻa e foungá ni ki hono akoʻi ʻa e fānau longomoʻui kei īkí, ka ʻi heʻetau tupulaki mo akó, te tau sio leva ko e ʻapasiá ʻoku ope atu ia ʻi he meʻá ni. Ko e tōʻonga nai ia ʻoku totonu ke tau maʻú kapau naʻe ʻi heni ʻa e Fakamoʻuí mo kitautolu? ʻIkai, he “ʻoku fonu ʻa e fiefiá ʻi [Hono] ʻaó”!
Ko ia, ʻe fiemaʻu ʻe ha niʻihi tokolahi ʻiate kitautolu ke akoako ʻa e liliu ko ʻení ʻi he ouau sākalamēnití.
Kehekehe ʻo e Maʻulotú mo e Moihuú
ʻOku ʻikai ko ʻetau fakataha atu pē ʻi he Sāpaté ke maʻu ʻa e houalotu sākalamēnití mo fakakakato pē ha lisi ngāue. ʻOku tau fakatahataha mai ke moihū. ʻOku ʻi ai ʻa e faikehekehe lahi ʻaupito ʻi he ongo meʻá ni. ʻOku ʻuhinga ʻa e maʻulotú ke te ʻi ai fakatuʻasino. Ka ko e moihuú ko e fakafetaʻi mo e fakalāngilangiʻi fakamātoato hotau ʻOtuá ʻi ha founga te ne liliu ai kitautolu!
ʻI he Tuʻunga Malangá pea ʻi he Haʻofangá
Kapau ko ʻetau fakatahá ke fakamanatua ʻa e Fakamoʻuí mo e huhuʻi naʻá Ne fakahokó, ʻoku totonu ke hāsino mei hotau fofongá ʻa ʻetau fiefiá mo e houngaʻiá! Naʻe fai ʻe ʻEletā F. ʻEnisio Pusa ʻa e talanoa ki heʻene kei hoko ko ha palesiteni fakakoló pea naʻe sio hake ha kiʻi tamasiʻi kiate ia mei he haʻofangá ʻo ne fehuʻi leʻolahi ʻo pehē, “Ko e hā ʻa e meʻa ʻa e tangata fakafulofula ko ē ʻoku fai mei ʻolungá?” ʻOku fakafetuʻutaki ʻe kinautolu ʻoku tangutu mei he tuʻunga malangá—kau leá, kau takí, kuaeá—pea mo kinautolu ʻoku fakatahataha ʻi he haʻofangá ʻa e “talitali lelei ko ʻeni ki he siasi ʻo e fiefiá” ʻo fakafou ʻi he fakafōtunga ʻo honau fofongá!
Hivaʻi ʻo e Himí
ʻI heʻetau hivá, ʻoku tau kau fakataha nai ke fakavīkivikiʻi hotau ʻOtuá mo e Tuʻí neongo pe ʻoku fēfē hotau leʻó, pe ʻoku tau hiva leʻo siʻi pē kitautolu pe mātuʻaki fakalongolongo pē? ʻOku lekooti ʻe he folofolá “ko e hiva ʻa e kau māʻoniʻoní ko ha lotu ia [ki he ʻOtuá]” ʻa ia ʻoku fiefia ai ʻa Hono laumālié. Ko ia ai tau hiva! Pea fakavīkivikiʻi Ia!
Ngaahi Leá mo e Fakamoʻoní
ʻOku tau fakatefito ʻetau leá mo e fakamoʻoní ʻi he Tamai Hēvaní mo Sīsū Kalaisi pea mo e ngaahi fua ʻo e moʻui ʻaki ʻi he loto-fakatōkilalo ʻa ʻEna ongoongoleleí, ʻa e ngaahi fua ʻoku “melie hake ʻi he meʻa melie kotoa pē.” Pea te tau “[keinanga moʻoni …kae ʻoua kuo [tau] mākona, ʻo ʻikai ke [tau] toe fiekaia, pe toe … fieinua,” pea maʻamaʻa ange leva ʻetau ngaahi kavengá, makatuʻunga ʻi he fiefia ʻi he ʻAló.
Ko e Sākalamēnití
Ko e meʻa nāunauʻia ʻoku fakatefito ai ʻetau houalotú ko hono tāpuakiʻi mo hono maʻu ko ia ʻo e sākalamēnití, ko hono fakafofongaʻi ʻe he vaí mo e maá ʻa e meʻaʻofa ʻo e fakalelei ʻa hotau ʻEikí pea ko e taumuʻa kakato ia ʻo ʻetau fakatahá. Ko ha “taimi toputapu [ʻeni] ʻo e fakafoʻou fakalaumālié” ʻi heʻetau toe fakamoʻoni ʻoku tau loto-fiemālie ke toʻo kiate kitautolu ʻa e huafa ʻo Sīsū Kalaisí pea toe fai ʻa e fuakava ke manatu maʻu ai pē ki he Fakamoʻuí mo tauhi ʻEne ngaahi fekaú.
ʻI ha ngaahi vahaʻataimi kehekehe ʻo e moʻuí, mahalo te tau omi ki he sākalamēnití mo ha loto-mamahi lahi mo ha ngaahi fuʻu kavenga mafasia. Ko e taimi ʻe niʻihi, te tau omi tauʻatāina pea ʻikai mafasia ʻi he ngaahi faingataʻá mo e hohaʻá. ʻI heʻetau fanongo fakamātoato ki hono tāpuakiʻi ʻo e maá mo e vaí pea maʻu ʻa e ngaahi toukeni toputapu ko iá, mahalo te tau ongoʻi ke mātuʻaki fakakaukau lahi ki he feilaulau ʻa e Fakamoʻuí, ʻEne mamahi ʻi Ketisemaní, ko ʻEne mamahi ʻi he kolosí, pea mo e mamahi mo e faingataʻa naʻá Ne kātekina maʻatautolú. Ko e meʻa ia te ne fakafiemālieʻi hotau laumālié ʻi heʻetau fehokotaki mo ʻEne mamahí. ʻI ha ngaahi taimi kehe, te tau ongoʻi ofo ʻi he houngaʻia moʻoni ʻi he fuʻu fiefia “fakaʻofoʻofa mo lelei” ʻo e meʻafoaki fakaofo kuo malava ke fai ʻe Sīsū maʻa ʻetau moʻuí mo hotau ʻitānití! Te tau fiefia ʻi he meʻa ʻoku teʻeki ke hoko maí—ko ʻetau toe fakataha mahuʻinga mo ʻetau Tamai ʻofeiná mo e Fakamoʻui kuo toe tuʻú.
Mahalo naʻa tau anga ʻaki ʻa e fakakaukau ko e taumuʻa ʻo e sākalamēnití ke tau tangutu pē ʻi he seá ʻo fakakaukau ki he ngaahi fehālaaki kotoa pē kuo tau fai ʻi he uike kimuʻá. Ka tau liliu muʻa ʻa e foʻi fakakaukau ko iá. ʻI he lōngonoa [ʻo e ouaú], te tau lava ʻo fakalaulauloto ki he ngaahi founga kehekehe kuo tau siotonu ai ki he feinga taʻetūkua ʻa e ʻEikí kiate kitautolu ʻaki ʻEne ʻofa fakaofo ʻi he uike ko iá! Te tau lava ʻo fakakaukau ki he ʻuhinga ʻo hono “ʻiloʻi ʻo e fiefia ʻi he fakatomala fakaʻahó.” Te tau lava ʻo fakamālō ki he ngaahi taimi naʻe kau mai ai ʻa e Fakamoʻuí ki heʻetau ngaahi faingataʻaʻiá mo ʻetau ngaahi ikuná pea mo e ngaahi meʻa naʻa tau ongoʻi ai ʻEne ʻaloʻofá, fakamolemolé, mo e mālohí ʻo ʻomi ai ʻa e ivi ke ikunaʻi hotau ngaahi faingataʻaʻiá mo fuesia ʻetau ngaahi kavengá ʻaki ʻa e faʻa kātaki mo e fiefia lahi.
ʻIo, ʻoku tau fakalaulauloto ki he ngaahi faingataʻa mo e ngaahi meʻa taʻe-totonu naʻe fai ki hotau Huhuʻí koeʻuhí ko ʻetau angahalá, pea ʻoku fakatupunga ai ha fakalaulauloto fakamātoato. Ka ʻoku faʻa moʻunofoa ai ʻetau fakakaukaú ʻi he taimi ʻe niʻihi—ʻi he ngoué, ʻi he kolosí, ʻi loto ʻi he fonualotó. ʻOku ʻikai ke tau lava ʻo ʻunu hake ki ʻolunga ki he fiefia ʻo e ava ʻa e fonualotó, ko e ikunaʻi ʻo e maté, mo hono ikunaʻi ʻe Kalaisi ʻa e meʻa kotoa pē naʻá ne mei taʻofi ʻetau maʻu ʻa e melinó mo toe foki ki hotau ʻapi fakalangí. Tatau ai pē pe naʻa tau tangi ko e loto-mamahi pe tangi ko e houngaʻia lolotonga ʻa e sākalamēnití, ʻai ke hoko ia ko ha fuʻu ofoofo lahi ʻi he ongoongo fakafiefia ki hono meʻaʻofa ʻaki ʻe he Tamaí ʻa Hono ʻAló!
Mātuʻa mo e Fānau Kei Īkí pe ʻI Ai Haʻanau Ngaahi Fiemaʻu Makehé
Sai, ki he ngaahi mātuʻa ʻoku ʻi ai ʻenau fānau īkí pe ʻi ai ha ngaahi fiemaʻu makehé, ʻoku ʻikai ke faʻa ʻi ai maʻu pē ha taimi lōngonoa ia mo ha taimi fakalaulauloto fakalongolongo lolotonga ʻa e sākalamēnití. Ka ʻi ha fanga kiʻi momeniti ʻi he lolotonga ʻo e uiké, te ke lava ʻo akoʻi ʻi he tā sipinga ʻa e ʻofa, houngaʻia, mo e fiefia ʻokú ke maʻu ki he Fakamoʻuí, pea mei he Fakamoʻuí, ʻi hoʻo tokangaʻi maʻu pē ʻEne fānaú. ʻOku ʻikai ha feinga ʻe taʻeʻaonga ʻi he ngāue ko ʻení. ʻOku ʻafioʻi moʻoni koe ʻe he ʻOtuá.
Ngaahi Fakataha Alēlea Fakafāmili, Fakauooti, mo Fakakoló
Te tau lava ʻo kamata ke fai mo e meʻa tatau mei ʻapi ke fakatupulaki ʻetau ʻamanaki lelei mo e ngaahi fakaʻamu ki hotau taimi ʻi he lotú. Te tau lava ʻo aleaʻi ʻi he fakataha alēlea fakafāmilí ʻa e founga ʻe lava ai ʻe he taha kotoa ʻo tokoni ʻi ha ngaahi founga ʻuhingamālie ki hono talitali lelei ʻo e taha kotoa pē ki he siasi ʻo e fiefiá! Te tau lava ʻo palani mo ʻamanaki ke maʻu ha aʻusia fakafiefia ʻi he lotú.
ʻE lava ke fokotuʻu mo fakakaukauʻi ʻe he fakataha alēlea fakauōtí mo fakakoló ha ʻulungaanga ʻo e ʻapasia fiefiá ki heʻetau houa sākalamēnití, ke ʻiloʻi ha ngaahi founga mo ha ngaahi fakaʻilonga ke tokoni.
Fiefia
ʻOku kehekehe pē ʻa e founga ʻo e fiefiá ki he kakai kehekehe. Ki ha niʻihi, mahalo ko e talitali fiefia mo longomoʻui ʻi he matapaá. Ki ha niʻihi kehe, mahalo ko hono tokoniʻi fakalongolongo ʻo e kakaí ke nau ongoʻi fiemālie ʻaki ha malimali mo e tangutu ʻi honau tafaʻakí ʻi he loto-ʻofa mo tauʻatāina. ʻE mahuʻinga ʻaupito ʻa e talitali loto-māfana ko ʻení ki he niʻihi ko ia ʻoku ongoʻi ʻoku ʻikai fakakau kinautolu pe ʻikai ke tokangaʻi lelei kinautolú. Ko e taupotu tahá, te tau lava ʻo fehuʻi pē kiate kitautolu pe ko e hā ʻa e finangalo ʻo e Fakamoʻuí ki he founga ke fakahoko ʻaki ʻetau sākalamēnití. Ko e hā nai Hono finangaló ki he founga ke talitali, tokangaʻi, fafangaʻi, mo ʻofaʻi ai ʻEne fānaú? Ko e hā Hono finangaló ki he ongo ʻoku totonu ke tau maʻú ʻi heʻetau omi ke fakafoʻou ʻo fakafou ʻi he manatu mo e moihū kiate Iá?
Fakaʻosí
ʻI he kamataʻanga ʻo ʻeku fononga ʻi he tuí, ko e fiefia ʻia Sīsū Kalaisí ʻa e fuofua ʻilo maʻongoʻonga naʻá ku maʻú, pea naʻe liliu ai ʻeku moʻuí. Kapau kuo teʻeki ai ke ke maʻu ʻa e fiefia ko ʻení, kamata fekumi leva ki ai. Ko ha fakaafe eni ke maʻu ʻa e meʻaʻofa ʻa e Fakamoʻuí ʻo e melinó, māmá, mo e fiefiá—ke nēkeneka lahi ai, ke ofoofo ai, pea ke fiefia moʻoni ai ʻi he Sāpate kotoa pē.
ʻOku fakahaaʻi ʻe ʻĀmoni mei he Tohi ʻa Molomoná ʻa e meʻa ʻoku ou ongoʻí ʻi heʻene pehē:
“Ko ʻeni ʻikai ʻoku ʻi ai haʻatau ʻuhinga ke fiefia [ai]? ʻIo, ʻoku ou pehē kiate kimoutolu, kuo teʻeki ke ʻi ai ha kau tangata kuo nau maʻu ha fuʻu ʻuhinga lahi pehē ke fiefia, ʻo hangē ko kitautolú talu mei he kamataʻanga ʻo māmaní; ʻio, pea kuo hanga ʻe heʻeku fiefiá ʻo ngaohi au, ke u pōlepole ʻi hoku ʻOtuá; he ʻoku ʻiate ia ʻa e māfimafi kotoa, mo e poto kotoa, pea mo e ʻilo kotoa; ʻokú ne ʻafioʻi ʻa e meʻa kotoa pē, pea ko ha Tokotaha ʻaloʻofa ia, ʻio ki he fakamoʻuí, kiate kinautolu ʻe fakatomala mo tui ki hono huafá.
“Ko ʻeni kapau ko e pōlepolé ʻeni, te u pōlepole pē; he ko ʻeku moʻuí ʻeni mo hoku māmá, … ko ʻeku fiefiá ʻeni, pea mo ʻeku fakafetaʻi lahí.”
ʻOku talitali lelei kimoutolu ki he siasi ʻo e fiefiá! ʻI he huafa ʻo Sīsū Kalaisí, ʻēmeni.