Ngaahi ʻAho ʻe ʻIkai Ngalo ʻi ha Taimi
ʻE ʻomi ʻe he ngaahi momeniti ʻoku hanganaki maí ki he kāingalotu ʻo e Siasí ʻi he feituʻu kotoa pē, ha ngaahi faingamālie lahi ange ke vahevahe ai ʻa e ongoongo fakafiefia ʻo e ongoongolelei ʻo Sīsū Kalaisí.
Talateu
Siʻoku ngaahi tokoua mo e tuofāfine ʻofeina, ʻoku fakafonu fakafiefia ʻa e hisitōlia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he kuonga ko ʻení ʻaki ha ngaahi aʻusia fakalangi ʻokú ne fakahaaʻi ʻa e founga kuo tataki ai ʻe he ʻEikí ʻa Hono Siasí. Ka, ‘oku ‘i ai ha hongofulu‘i ta‘u ‘e taha ‘i hotau hisitōliá ‘oku fakaofo makehe ange ia ‘i ha toe ta‘u kehe—ko e ngaahi ta‘u mei he 1820 ki he 1830. ʻOku kamata mei he aʻusia ʻa e Palōfita ko Siosefa Sāmitá ʻi he Vao ʻAkau Tapú ʻi he faʻahitaʻu failau ʻo e 1820, ʻi heʻene mamata ki he ʻOtua ko e Tamaí mo Hono ʻAlo ko Sīsū Kalaisí, pea hokohoko atu ʻo aʻu ki he ʻaho 6 ʻo ʻEpeleli 1830, ʻoku ʻikai hano toe tatau ʻo e taʻu ʻe hongofulu ko iá.
Fakakaukau angé ki he ngaahi me‘a fakaofo ko ení! Naʻe fetalanoaʻaki ʻa e palōfita kei talavoú mo e ʻāngelo ko Molonaí, liliu ʻa e ʻū lauʻi peleti koulá, mo pulusi ʻa e Tohi ʻa Molomoná! Ko e meʻangāue ia naʻe fakafou mai ai ʻa e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí, peá ne toki fokotuʻu leva ʻa e Siasí! Naʻe fakamatalaʻi lelei ʻe ʻŌliva Kautele ʻa e kuonga ko iá ʻo pehē: “Ko ha ngaahi ʻaho ʻeni ʻe ʻikai ngalo ʻi ha taimi.” Kuo hokohoko atu ‘a e ngaahi me‘a fakaofó ‘o a‘u mai ki he ‘ahó ni.
ʻE lava nai ke u fokotuʻu atu ʻi he loto-toʻa kuo tau kamataʻi ʻi he taʻú ni ha taʻu ʻe hongofulu ʻe lava ke mahuʻinga tatau pē mo ha toe taʻu kuo hoko mai ʻi he taʻu ʻe hongofulu taʻe-hano-tatau ko ia ʻi he meimei senituli ʻe ua kuohilí.
Ko Hotau Hongofuluʻi Taʻú
Tuku ke u fakamatalaʻi atu. ʻI he vahaʻa ʻo e taimi ní, 2024 mo e 2034, te tau aʻusia ai ha ngaahi meʻa mahuʻinga ʻe iku ki ha ngaahi faingamālie ʻoku makehe mei he angamahení ke ngāue tokoni ai, ke uouangataha mo e kāingalotú mo e ngaahi kaungāmeʻá, pea mo fakafeʻiloaki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki ha kakai tokolahi ange ʻi ha toe taimi kimuʻa.
Naʻa tau toki fakamoʻoniʻi ʻa e mālohi ʻo ha momeniti fakahisitōlia moʻoni ʻi heʻetau fakafiefiaʻi mo ha kakai ʻe hongofulu miliona tupu ʻa e fakamanatua ʻo e taʻu 100 ʻo Palesiteni Lāsolo M. Nalesoní.
‘I hono lipooti ‘o e fakamanatua ʻo e ‘aho fā‘ele‘i ‘o Palesiteni Nalesoní, na‘e tohi ai ‘e he Newsweek ha ‘ulu‘i ongoongo naʻe pehē, “Kuo Ta‘u 100 ‘a e Taki Lotu Motu‘a Taha ‘i Māmaní.” Naʻa nau lisi leva ʻa e kau taki lotu motuʻa taha ʻe toko 10 ʻi he māmaní—ʻo ʻuluaki ʻa Palesiteni Nalesoni ʻi ha lisi naʻe kau ai ʻa Tuʻitapu Falakiko mo e Tālai Lamá.
ʻOku fakafofongaʻi ʻe he fakamatala ko ʻeni mei ha tohi ʻi he New York Times ʻa e laumālie ʻo e konga lahi ʻo e ongoongo fakavahaʻapuleʻangá: “ʻI ha vahaʻataimi fili palesiteni [ʻa e ʻIunaiteti Siteití] ʻa ia kuó ne ueʻi ha fakakaukau loloto fekauʻaki mo e fakaʻau ke motuʻa angé mo e tuʻunga fakatakimuʻá, ʻoku fokotuʻu mai ʻe he makamaile ʻo Misa Nalesoní, ʻi hono siasí, ʻoku ʻikai taau ke fai ha fuʻu taʻefiemālie ʻi hano fakamanatua ha ʻaho fāʻeleʻi ʻoku aʻu ki he mataʻi fika ʻe tolú. ʻOkú ne kei hoko pē ko ha tokotaha manakoa ʻi he lotolotonga ʻo e kāingalotu ʻo e siasí, ʻa ia ʻoku ʻikai ke nau vakai pē ki honau palesitení ko ha pule ka ko ha ʻpalōfita, tangata kikite, mo ha tangata maʻu fakahā.ʼ”
ʻOku tau houngaʻia moʻoni ʻi hono ʻomi ʻe he fakaʻilongaʻi ʻo e ʻaho fāʻeleʻi ʻo Palesiteni Nalesoní ha faingamālie ke fakafeʻiloaki ai ha kau fiefanongo fakaemāmani lahi ki ha palōfita ʻa e ʻOtuá, ko ha kātoanga ʻe ʻikai ngalo ʻi ha taimi.
ʻI he konga kimuʻa ʻo e faʻahitaʻu failau ko ʻení, naʻe fakaava ai ʻa e foʻi ʻataʻatā tapafā naʻe toe fakaleleiʻi ʻi he Temipale Sikueá—ʻa ia naʻe fakaʻaliʻali ai ha ʻū fuka fakavahaʻapuleʻanga ʻoku nau fakafofongaʻi ʻa e ngaahi fonua ʻoku ʻiloʻi ai ʻa e Siasí. ʻOku fakaʻilongaʻi ʻa e hūʻanga ki he ʻataʻatā tapafaá ʻaki ha maka fakamanatu kalānite ʻoku tohi ai ʻa e ngaahi lea fakaepalōfita ko ʻení: “Pea ʻe hoko ʻi he ngaahi ʻaho ʻamuí, ʻe fokotuʻu maʻu ʻa e moʻunga ʻo e fale ʻo [e ʻEikí] ʻi he tumutumu ʻo e ngaahi moʻungá, ʻe hiki hake ia ke māʻolunga ʻi he ngaahi moʻungá pea ʻe tafe ki ai ʻa e ngaahi puleʻanga kotoa pē.”
Ko e moʻoni, ko e ngaahi meʻa mātuʻaki mahuʻinga ‘e hoko lolotonga ʻo e taʻu ‘e 10 ka hoko maí ‘e hāsino ai ʻoku fakahoko ‘a e kikite ko ‘eni ‘a ‘Īsaiá.
Fakakaukauloto ki he lahi taʻe-hano-tatau ʻo e ngaahi ʻoupeni hausi mo e ngaahi fakatapui ʻo e temipalé ʻoku palani ke hoko ʻi he taʻu ʻe hongofulu ka hokó, ʻoku aʻu ki ha ngaahi temipale ʻe 164 pea ʻe toe lahi ange ai. Fakakaukauloto ki ha toko hongofulu miliona tupu ʻo kimoutolu mo homou ngaahi kaungāmeʻá ʻoku mou hū atu ʻi ha fale ʻo e ʻEikí. Ko e fakataipe mahuʻinga ʻo e ngaahi meʻa ko ʻeni ʻe hokó ko e toe fakatapui ʻo e Temipale Sōlekí pea mo e ngaahi ʻekitivitī ʻe kau fakataha mo iá. Ko e ngaahi ‘aho ‘eni kuo pau he ʻikai ngalo ʻi ha taimi.
ʻE ʻomi ʻe he taʻu 2030 ha ngaahi faingamālie ʻi māmani lahi ke fakamanatua ʻa e taʻu uangeau ʻo hono fokotuʻu ʻo e Siasí. Neongo ʻoku fuʻu vave ke tala ʻa e founga ʻe fakaʻilongaʻi ai ʻe he Siasí ʻa e makamaile ko ʻení, ka ʻe fakaʻatā moʻoni ke tau fakaafeʻi ʻa e fāmilí, ngaahi kaungāmeʻá, kaungā ngāué, mo e kau fakaafe fakalangilangí ke nau “haʻu ʻo mamata” pea ke mahino lelei ange ʻa e tākiekina mālohi ʻa e Siasí ʻi he moʻui ʻa e Kāingalotu ʻo e Siasí.
ʻI he 2034, ʻe fakafonu ʻe ha kau fakafofonga fakapuleʻanga, kau ʻaʻahi, mo ha kau sipoti ʻe lauiafe mei he funga ʻo e māmaní ʻa e ngaahi hala ʻo Sōleki Sití, ko e feituʻu ʻe fakahoko ai e Sipoti ʻOlimipiki ʻo e Faʻahitaʻu Momokó. Mahalo pē ‘oku ‘ikai ha toe fakatātaaʻi lahi ange ‘o e uouangataha fakaemāmani lahí ka ko ia ‘oku fakafōtunga mai ‘i he Ngaahi Sipoti ‘Olimipikí. ʻE vakai mai ʻa e māmaní ki he Siasí mo hono kāingalotú, ʻo ʻoange ai ha ngaahi faingamālie lahi ke nau ngāue ʻofa, ngāue tokoni, mo vahevahe ʻa e ongoongo fakafiefiá ʻo fakafou ʻi he ngaahi ngāue angaʻofá—ko ha meʻa ʻe ʻikai ngalo ʻi ha taimi.
ʻE ʻomi ʻe he ngaahi momeniti ko ʻeni ʻoku hanganaki maí ha ngaahi faingamālie lahi ange ki he kāingalotu ʻo e Siasí ʻi he feituʻu kotoa pē ke vahevahe ai ʻa e ongoongo fakafiefia ʻo e ongoongolelei ʻo Sīsū Kalaisí ʻo fakafou ʻi he leá mo e ngāué, ko ha taʻu ʻe hongofulu he ʻikai ngalo ʻi ha taimi.
Ngaahi Ongoongo Fakafiefiá
ʻI ha fakataha ʻi ha ngaahi uike siʻi kimuʻa pea hoko ʻa e ʻaho fāʻeleʻi ʻo Palesiteni Nalesoní, naʻá ne vahevahe ai ʻa e ʻuhinga ʻokú ne mahuʻingaʻia ai ʻi he kupuʻi lea “ngaahi [ongoongo] fakafiefiá.” Naʻá ne fakamatalaʻi, ʻo ngali hangē, ʻoku ongo fakafiefia pe fakamāfana ʻa e kupuʻi leá. Ka ‘oku ‘omai ‘e he “ongoongo fakafiefiá” ha me‘a lahi ange ‘i he me‘a ko iá. Na‘á ne fakamatala ko e kupu‘i lea ko ʻení ‘oku ha‘u ia mei he mu‘aki fo‘i lea faka-Kalisi ko e euangelion, ʻa ia ‘oku ‘uhinga moʻoni ia ki he “ongoongo ʻoku leleí” pe ko e “ongoongoleleí.” ʻOku fehokotaki maʻu pē ʻa e fiefiá mo e nēkeneka ʻi he moʻuí ni mo e moʻui ka hokó mo e ongoongolelei ʻo Sīsū Kalaisí. Ko ia ‘oku maʻu kakato ‘e he kupu‘i lea “ongoongo fakafiefiá” ‘a e ‘uhinga lōua ko ení ‘i ha founga fakaʻofoʻofa.
“ʻOku ʻi ai ʻa e faʻahinga ʻo e tangatá [mo e fefiné] koeʻuhi ke nau maʻu ʻa e fiefiá.” Kuo ʻomi ʻe he Tamai Hēvaní ʻa e palani ʻo e fiefiá ʻa ia ʻokú ne fakaʻatā ʻa e fiefiá ʻo fakafou ʻi Heʻene ngaahi tāpuakí. ʻOku kau heni ʻa e nofo ʻi Hono ʻaó ʻo taʻengata ko ha ngaahi fāmilí. Ko e Fakalelei ʻa Sīsū Kalaisí ko e uho ia ʻo e palani ʻa e ʻOtuá ke huhuʻi kitautolú. Ke maʻu ʻa e moʻui taʻengatá, kuo pau ke tau haʻu kia Kalaisi. ʻI heʻetau fakahoko iá “mo tokoniʻi ʻa e niʻihi kehé ke nau fakahoko ʻa e meʻa tatau, ʻoku tau kau ai ʻi he ngāue ʻa e ʻOtuá ki he fakamoʻuí mo e hakeakiʻí.”
Ko e pōpoaki ko ʻeni ʻo e ongoongo fakafiefia ʻo e ongoongolelei ʻo Sīsū Kalaisí, ko e pōpoaki mahuʻinga taha ia ʻi he māmaní. Pea ko e meʻa ia ʻoku maʻu ai ʻe he toʻu tupú mo e kakai lalahi kei talavou ʻo e Siasí ha fatongia mahuʻingá.
Ki Hono Fakamālohia ʻo e Toʻu Tupú
Neongo ʻe fonu ʻa e hongofuluʻi taʻu ko ʻeni ʻoku hanganaki maí ʻi ha ngaahi ʻaho ʻe ʻikai ngalo ʻi ha taimi ʻi he mēmipa kotoa pē ʻo e Siasí, ka ʻe lava ke moʻoni ʻeni tautefito kiate kimoutolu ʻa e toʻu tangata kei tupu haké. ʻOkú ke ʻi heni ʻi he māmaní he naʻe fili koe ke ke ʻi heni ʻi he taimí ni. ʻOku mou maʻu ʻa e mālohi mo e malava ke mou hoko ko e kau ākonga ʻa Kalaisi ʻi ha founga taʻe-hano-tatau.
Naʻe akoʻi ʻe Palesiteni Siaosi Q. Kēnoni ʻo pehē: “Kuo fakatatali ʻe he ʻOtuá ha ngaahi laumālie ki he kuonga fakakosipeli ko ʻení ʻa ia ʻoku nau maʻu ha loto-toʻa mo ha loto-fakapapau ke fehangahangai mo e māmaní mo e ngaahi mālohi kotoa pē ʻo e tokotaha angakoví … pea ke fokotuʻu mo langa hake ʻa e Saione ʻo hotau ʻOtuá ʻo taʻe-manavahē ki ha faʻahinga meʻa ʻe hoko.”
Koeʻuhí ko ia, ʻoku ou fakaʻamu ke lea kiate kimoutolu ʻo e toʻu tangata kei tupu haké, ke fakaafeʻi kimoutolu ke mou fakakaukauloto ki he fakafiefia ʻe lava ke hoko kiate kimoutolu ʻi he taʻu ʻe hongofulu ko ʻeni ka hokó, ko ha ngaahi taʻu he ʻikai ngalo ʻi ha taimi. ʻOku ou ʻoatu foki ha ngaahi lea faingofua ʻo e faleʻí mo e fakalotolahí ʻe ala fakaivia kimoutolu lolotonga ʻa e taʻu ʻe hongofulu ko ʻeni ka hoko maí.
Hangē ko e tokolahi ʻo kimoutolú, ʻoku ʻi ai ʻeku telefoni smartphone ʻa ia, ʻoku ʻi ai ha ngaahi taimi, ʻokú ne fakatahatahaʻi ai ʻiate ia pē ha ngaahi tā ʻo fakahaaʻi ʻa e meʻa naʻá ku fai ʻi ha ʻaho pau. ʻOku fakaʻohovale maʻu pē ke sio ki he lahi ʻo e ngaahi meʻa kuo liliu kiate au mo hoku fāmilí ʻi ha ngaahi taʻu siʻi pē.
Fakakaukauloto ki he ʻū tā ʻe fakaʻaliʻali atu ʻe hoʻo telefoní ʻi he aʻu ki ha taʻu ʻe 10 mei heni! Mahalo te ke sioloto atu kuó ke ʻosi mei he akoʻanga māʻolungá pe ʻunivēsití, maʻu ho ʻenitaumení, ʻalu ʻo ngāue fakafaifekau, mali, pea pehē ki hoʻo fuofua pēpeé. Kiate koe fakafoʻituitui, ʻe hoko ʻeni ko ha taʻu ʻe hongofulu ʻe ʻikai ngalo ʻi ha taimi. Ka ʻe liunga ua ia kapau te ke feinga mālohi ke hoko ko ha maama ki māmani ʻi he founga ʻe lava ai ʻe he ongoongo fakafiefia ʻo e ongoongolelei ʻo Sīsū Kalaisí ʻo fakakoloaʻi mo fakaleleiʻi ʻo ʻikai ngata pē ʻi hoʻo moʻuí ka ko e moʻui foki ʻa hoʻo fāmilí, ngaahi kaungāmeʻá, mo e kau muimui ʻi he mītia fakasōsialé.
Mahalo pē ʻokú ke fifili pe ʻe anga fēfē hono fai ʻení.
Kuo akoʻi mai ʻe he kau palōfita ʻa e ʻOtuá ʻoku fakahoko ʻeni ʻo fakafou ʻi ha ngaahi ngāue faingofua ʻe fā, ʻoku ʻuhinga ia ko ha ngaahi fatongia kuo fokotuʻu fakalangi: ʻuluakí, moʻui ʻaki ʻa e ongoongolelei ʻo Sīsū Kalaisí; uá, ko hono tokangaʻi ʻo kinautolu ʻoku faingataʻaʻiá; tolú, ko hono fakaafeʻi ʻo e kakai kotoa pē ke nau maʻu ʻa e ongoongoleleí; pea faá, ko hono fakatahaʻi ʻo e ngaahi fāmilí ki he taʻengatá. Ko e meʻa fakaofó, ʻe lava ke takitaha fai ʻeni ʻi he ngaahi founga angamaheni mo fakanatula tahá.
Ngaahi Fatongia Kuo Fokotuʻu Fakalangi
ʻOku ou palōmesi atu ʻe hoko ʻeni ko ha taʻu ʻe hongofulu ʻe ʻikai ngalo ʻi ha taimi ʻiate kimoutolu kapau te mou tali ʻa e ngaahi fatongia ʻe fā ko ʻeni kuo fokotuʻu fakalangí. Tau fakakaukau angé ki he me‘a ‘e lava ke ‘omai ‘e he me‘á ni.
ʻUluakí, moʻui ʻaki ʻa e ongoongolelei ʻo Sīsū Kalaisí. Ako ʻa e ngaahi lea ʻa e kau palōfitá, pea ako ke ʻofa ʻi hoʻo Tamai ʻi Hēvaní. Tuku homou lotó kiate Ia, pea feinga ke ʻaʻeva ʻi Hono halá. Ke ke ongoʻi tupulaki ʻi he “loto-falala ki he fuakava” ʻa ia naʻe fakamatalaʻi ʻe ʻEletā ʻUlise Soālesí. ʻOku maʻu ʻa e loto-falala ko ʻení mei hono fakahoko ʻo e ngaahi fuakava ke muimui kia Sīsū Kalaisí, ʻi hoʻo ʻiloʻi ʻe iku fakamālohia mo poupouʻi koe ʻe he Fakamoʻuí ʻi hono fakahoko iá.
Tuku ke sio ho ngaahi kaungāmeʻá ki he fiefia ʻokú ke ongoʻi ʻi hoʻo moʻui ʻaki ʻa e ongoongoleleí, pea te ke hoko ai ko e pōpoaki lelei taha ʻo e ongoongoleleí te nau maʻú.
Uá, tokoni ʻi he manavaʻofa ke tokangaʻi ʻa kinautolu ʻoku faingataʻaʻiá. ʻOku angamaheni ʻaki ʻa homou toʻu tangatá ke fakakaukau ki he niʻihi ʻoku faingataʻaʻia angé. ʻI he taimi pē ʻoku hoko ai ha fakatamaki pea fakavave atu ʻa e kāingalotu ʻo e Siasí ke tokoni ki hono fakamaʻa e vevé mo fakafiemālieʻi ʻa e kau faingataʻaʻiá, ʻoku hangē ko e tokolahi taha ʻo kinautolu ʻoku nau tui ʻa e vesi “Helping Hands (Ngaahi Nima Fie Tokoní)” ko e toʻu tupu mo e taʻu uofulu tupú. ʻOku fakanatula pē ia kiate kimoutou ke mou “fefuaʻaki ʻa hoʻomou ngaahi kavengá” pea “fakafiemālieʻi ʻa kinautolu ʻoku ʻaonga ki ai ʻa e fakafiemālié.” ʻI heʻetau fai ʻení ʻoku tau “fakamoʻoni ai ki he fono ʻa Kalaisí.”
Naʻe fakakaukau ʻa ʻĒveni, ko ha kiʻi tamasiʻi taʻu Palaimeli, ke fakaʻaongaʻi hono taimi mālōlō mei he akó ʻi he faʻahitaʻu māfaná ki hono tānaki ha ngaahi meʻa ki hono ngaohi ʻaki ha mā pīnati pata mo e siamu ke foaki ki heʻene pangikē meʻakai fakalotofonuá. Naʻá ne maʻu ʻa e polōseki ngāue ko ʻení ʻi he uepisaiti ʻa e JustServe. Naʻe fakakau ʻe he talavou ko ʻĒvení ʻene kalasí kotoa ke nau tokoni ʻi hono tānaki ha ʻū hina siamu ʻe 700 tupu! ʻAi ke ʻilo ʻe he kakai ʻokú ke tokoniʻí ʻoku makatuʻunga hoʻo tokanga kiate kinautolú ʻi hoʻo ʻofa ki he ʻOtuá mo hoʻo loto-holi ke tauhi ho kaungāʻapí ʻo hangē pē ko koé.
Tolú, fakaafeʻi ʻa e tokotaha kotoa pē ke nau maʻu ʻa e ongoongoleleí. Naʻa tau fakaava ʻi he taʻú ni ha ngaahi misiona foʻou ʻe 36 ʻi he funga ʻo e māmaní ke tokoniʻi ai ʻa kinautolu kotoa ʻoku nau holi ke ngāue fakafaifekau taimi kakató. ʻI ha kuonga ʻoku fili ai ha tokolahi ʻo e toʻu tupú ke ʻoua te nau kau ki he ʻekitivitī fakalotu angamahení, ʻoku fakaofo ʻeni pea ʻokú ne fakahaaʻi mai ʻa e natula fakaofo ʻo hoʻomou ngaahi fakamoʻoní. Tatau ai pē pe ʻokú ke ngāue fakafaifekau taimi kakato pe ʻikai, kātaki ʻo fakatokangaʻi ho ivi lahi ke tākiekina ho toʻú ʻi hoʻo ʻofa, vahevahe, pea fakaafeʻi kinautolu ke nau fekumi ki he ongoongolelei ʻo Sīsū Kalaisí.
Faá, fakatahaʻi ʻo e ngaahi fāmilí ki he taʻengatá. ʻI heʻeku ʻaʻahi ki he ngaahi temipale ʻi he funga ʻo e māmaní, ʻoku ou ofo ʻi he fuʻu tokolahi ʻo e toʻu tupu ʻoku nau tuʻu pē ʻi he lokí ʻo tatali ʻi he faiʻanga papitaisó pea mo e fakautuutu ʻa e tokolahi ʻo e kakai lalahi kei talavou ʻoku nau hoko ko e kau ngāue ouaú. Naʻe fononga kimuí ni mai ha kulupu toʻu tupu ʻe toko 600 tupu mei Sikotilani mo ʻAilani ki he Temipale Preston England, ʻo nau fakahoko ai ha ngaahi ouau ʻe 4,000 tupu, ko e lahi taha ʻo kinautolú maʻa ʻenau ngaahi kui fakataautaha kuo pekiá! ʻOku ou naʻinaʻi atu ke mou kau atu ʻi he ngāue ki he hisitōlia fakafāmilí, fakaʻaongaʻi ha taimi ʻi he temipalé, pea teuteuʻi fakalelei kimoutolu ke mou hoko ko e faʻahinga tangata pe fefine ʻoku mateuteu ke mali mo ha hoa taau tatau ʻi he temipalé. Fakatupulaki ha sīpinga ʻi hoʻo moʻuí ʻi he taimí ni ke hoko ʻa e temipalé ko ha konga angamaheni ʻo hoʻomou moʻuí.
Aofangatukú
Siʻoku ngaahi tokoua mo e tuofāfine ʻofeina, siʻoku ngaahi kaungāmeʻa kei talavou ʻofeina, ngalingali ʻe ʻi ai ha ngaahi faingataʻa kiate kitautolu takitaha ʻi he ngaahi ʻaho ka hoko maí. Ka neongo ia, ʻi heʻetau hū atu ki he taʻu ʻe hongofulu ko ʻeni ʻo e ngaahi momeniti taʻe-hano-tataú, ʻofa ke tau vahevahe ha ngaahi ongoongo fakafiefia ʻo fakafou ʻi he ngaahi ngāue faingofua ʻo e moʻuí, tokangá, fakaafeʻí, mo e uouangatahá. ʻI heʻetau fai iá, ʻe tāpuakiʻi kitautolu ʻe he ʻEikí ʻaki ha ngaahi aʻusia he ʻikai ngalo ʻi ha taimi.
ʻOku ou fakamoʻoni ko kinautolu ʻoku nau ʻunuʻunu atu ki he ʻEikí ʻi he loto-fakamātoato mo e loto-moʻoní, ko kinautolu ʻoku loto-fiemālie ke vahevahe fekauʻaki mo e Fakamoʻuí mo maʻu ʻa e Laumālie Māʻoniʻoní ʻi honau lotó, ko kinautolu ʻoku nau kamata ʻi he fononga fakaʻeiʻeiki mo nāunauʻia ko ʻení, te mou ʻiloʻi mo aʻusia ha ngaahi tāpuaki fakasilesitiale lahi pea maʻu ha fakamoʻoni ʻoku fanongo mai ʻa e ʻOtuá kiate koe, ʻafioʻi koe, mo ʻofa ʻiate koe. Te mou aʻusia ha ngaahi ʻaho ʻe ʻikai ngalo ʻi ha taimi. ʻI he huafa ʻo Sīsū Kalaisí, ʻēmeni.