Fekumi Kiate Ia ʻAki Ho Lotó Kotoa
Kapau naʻe fekumi ʻa Sīsū Kalaisi ki ha taimi fakalongolongo ke fetuʻutaki ai mo e ʻOtuá pea ke maʻu ha fakamālohia meiate Ia, ʻe fakapotopoto ke tau fai ʻa e meʻa tatau.
ʻI he ngaahi taʻu lahi kuohilí, naʻá ku hoko mo hoku uaifí ko ha ongo taki fakamisiona ʻi Tokiō, Siapani. Lolotonga ha ʻaʻahi mai ʻi he taimi ko iá ʻa ʻEletā Lāsolo M. Nalesoni ki homau misioná, naʻe ʻeke ange ʻe ha taha ʻo e kau faifekaú pe ko e hā e founga lelei taha ke tali ki ha taha ʻokú ne talaange ʻoku fuʻu femoʻuekina ke fanongo kiate kinautolu. Ne kiʻi momou ʻa ʻEletā Nalesoni mo ne pehē, “Te u ʻeke ange pe ʻoku nau fuʻu femoʻuekina ke kai hoʻatā he ʻaho ko iá pea akoʻi leva kiate kinautolu ʻoku nau maʻu fakatouʻosi ha sino mo ha laumālie, pea hangē ko e mate honau sinó kapau he ʻikai fafangaʻí, ʻe pehē pē mo honau laumālié kapau he ʻikai fafangaʻi ʻaki ʻa e folofola lelei ʻa e ʻOtuá.”
ʻOku mālie ke fakatokangaʻi ko e foʻi lea faka-Siapani ki he “femoʻuekiná,” isogashii, ʻoku faʻu ʻaki ia ha ongo fakaʻilonga ʻe ua (忙). ʻOku ʻuhinga ʻa e fakaʻilonga he tafaʻaki toʻohemá ko e “mafu” pe “laumālie,” pea ʻoku ʻuhinga ʻa e toʻomataʻú ki he “pekia”—ʻoku fokotuʻu mai ai hangē ko hono akoʻi ʻe Palesiteni Nalesoní, ʻe lava ke iku ʻetau fuʻu femoʻuekina ke fafanga hotau laumālié ki he mate fakalaumālié.
Naʻe ʻafioʻi ʻe he ʻEikí—ʻi he māmani feliliuaki vave ko ʻení, fonu ʻi he ngaahi meʻa fakahohaʻá mo e moveuveú—ko hono fakaʻatā ko ia ha taimi lelei Maʻaná ʻe hoko ia ko e taha ʻo e ngaahi pole lalahi ʻo hotau kuongá. ʻI Heʻene folofola ʻo fakafou ʻi he palōfita ko ʻĪsaiá, naʻá Ne ʻomi ha faleʻi mo ha fakatokanga, ʻa ia ʻe lava ke fakatatau ki he ngaahi ʻaho moveuveu ʻoku tau moʻui aí:
“ʻI he tafoki mo e nofo pē, te mou moʻui ai; ʻi he angavaivai mo e tui, ʻe [ʻi] ai homou mālohí: ka naʻe ʻikai te mou loto ki ai.
“Ka naʻa mou pehē, ʻE ʻikai; ka te mau hola ʻi he fanga hōsí; ko ia te mou hola: pea, Te mau heka ʻi he veʻe vave; ko ia ʻe veʻe vave foki mo kinautolu ʻoku tuli ʻa kimoutolú.”
ʻI hono fakalea ʻe tahá, neongo ʻoku makatuʻunga hotau fakamoʻuí ʻi heʻetau faʻa foki kiate Ia mo mālōlō mei he ngaahi hohaʻa ʻo e māmaní, ka ʻoku ʻikai ke tau pehē. Pea neongo ʻe maʻu ʻetau loto-falalá mei ha mālohi ʻoku fakatupulaki ʻi he ngaahi taimi fakalongolongó ʻi he nofo hifo mo e ʻEikí ʻo fakalaulauloto mo fakakaukaú, ka ʻoku ʻikai ke tau fai ia. Ko e hā hono ʻuhingá? Koe‘uhí he ‘oku tau pehē, “ʻIkai, ‘oku mau femo‘uekina ‘i he ngaahi me‘a kehé”—‘o hola ‘i he‘etau fanga hōsí, hangē ko e laú. Ko ia ai, te tau toe mamaʻo ange mei he ‘Otuá; te tau vilitaki ke ʻalu ʻo toe vave ange; pea ko e vave ange ʻetau ʻalú, ko e vave ange ia ʻa e tulimui mai ʻa Sētané.
Mahalo ko e ʻuhinga ʻeni kuo toutou kōlenga mai ai ʻa Palesiteni Nalesoni ke tuku ha taimi moʻoe ʻEikí ʻi heʻetau moʻuí—“he ʻaho kotoa pē.” ʻOkú ne fakamanatu mai kiate kitautolu ko e “taimi fakalongolongó ko ha taimi toputapu—ko ha taimi te ne ʻomi ʻa e fakahā fakafoʻituituí mo ʻomi ha nonga.” Ka koeʻuhí ke lava ʻo ongoʻi ʻa e kihiʻi leʻo siʻi ʻa e ʻEikí, naʻá ne faleʻi ʻo pehē, “kuo pau ke mou fakalongolongo.”
Ka neongo ia, ʻoku fiemaʻu ʻe he nofo fakalongolongó ha meʻa lahi ange ʻi hono vaheʻi pē ha taimi maʻá e ʻEikí—ʻoku fiemaʻu ke tukuange ʻetau ngaahi fakakaukau veiveiua mo ilifiá kae tukutaha hotau lotó mo hotau ʻatamaí kiate Ia. Naʻe akonaki ʻa ʻEletā Tēvita A. Petinaá, “Ko e naʻinaʻi ko ia ʻa e ʻEikí ke ʻmou fakalongolongóʼ ʻoku mahulu hake ia ʻi he ʻikai ke leá pe ʻikai ke ngaué.” Naʻá ne fokotuʻu mai, “ʻe lava ke hoko ʻa e ʻke mou fakalongolongóʼ ko ha founga ia ʻo hono fakamanatu mai ke tukutaha ʻetau tokangá ki he Fakamoʻuí.”
Ko e fakalongolongó ko ha ngāue ia ʻo e tuí pea ʻoku fiemaʻu ki ai ha feinga. ʻOku pehē ʻi he Lectures on Faith, “ʻI he taimi ʻoku ngāue ai ha tangata ʻi he tuí ʻokú ne fakaʻaongaʻi ha mālohi fakaʻatamai lahi.” Naʻe fakahā ʻe Palesiteni Nalesoni: “Kuo pau ke fakamaʻu ʻetau tokangá ʻi he Fakamoʻuí mo ʻEne ongoongoleleí. ʻOku mafatukituki fakaʻatamai ke hanga kiate Ia ʻi he fakakaukau kotoa pē. Ka ʻi heʻetau fai iá, ʻoku mole atu ʻetau veiveiuá mo e manavasiʻí.” ʻI he lea ʻa Palesiteni Tēvita O. Makei fekauʻaki mo e fiemaʻu ko ʻeni ke tukutaha ʻetau fakakaukaú, naʻá ne pehē: “ʻOku ou tui ʻoku ʻikai ke tau fuʻu tokanga fēfē ki hono mahuʻinga ʻo e fakalaulaulotó, ko ha tefitoʻi moʻoni ʻo e līʻoa. … Ko e fakalaulaulotó ko e taha ia ʻo e ngaahi matapā … toputapu taha ʻoku tau hū atu ai ki he ʻao ʻo e ʻEikí.”
ʻOku ʻi ai ha foʻi lea faka-Siapani, ko hono ʻuhinga ʻi he lea faka-Tongá ko e ʻikai fakahoko (mui), ʻa ia kiate au, ʻokú ne kātoi e ʻuhinga ʻo e fakalongolongo, faʻa fakakaukau mo fonu ʻi he tuí. ʻOku faʻu ʻaki ia ha fakaʻilonga fakamataʻitohi ʻe ua (無為). ʻOku ʻuhinga ʻa e tafaʻaki toʻohemá ki he “ʻikai ha meʻa” pe “hala ha meʻa,” pea ko e tafaʻaki toʻomataʻú ʻoku ʻuhinga ia “ke fakahoko.” ʻI hono fakatahaʻí, ʻokú na ʻuhinga ki he “ʻikai fakahoko.” ʻI hono liliu fakahangatonú, ʻe lava ke fakaʻuhingaʻi hala ʻa e foʻi leá ke ʻuhinga ki he “ʻikai ke fakahoko ha meʻa” ʻi he founga tatau ʻe lava ke fakaʻuhingaʻi hala ʻa e “ke mou fakalongolongó” ko e “ʻikai ke lea pe ngaue.” Ka neongo ia, hangē ko e kupuʻi lea “ke mou fakalongolongó,” ʻoku ʻi ai hono ʻuhinga māʻolunga ange; kiate au ko ha fakamanatu ia ke u māmālie hifo pea moʻui ʻaki ha ʻilo fakalaumālie lahi ange.
Lolotonga ʻeku ngāue ʻi he Kau Palesitenisī ʻo e ʻĒlia ʻĒsia Hahaké mo ʻEletā Takasi Uatá, ne u ʻilo ai ko hono uaifí, ʻa Sisitā Nāomi Uata, ko ha tokotaha taukei ʻi he ʻaati fakamataʻitohi ʻo e lea faka-Siapaní. Naʻá ku kole kia Sisitā Uata pe te ne tā maʻaku ʻa e ongo fakaʻilonga fakamataʻitohi faka-Siapani ki he lea ʻikai fakahokó. Naʻá ku fie tautau ʻa e ʻaati fakamataʻitohí ʻi hoku holisí ko ha fakamanatu ke u fakalongolongo pea mo tokanga taha ki he Fakamoʻuí. Naʻá ku ʻohovale ʻi he ʻikai ke ne loto-fiemālie leva ki he kole ngali faingofua ko ʻení.
ʻI he ʻaho hono hokó, ʻi he ʻiloʻi ʻe ʻEletā Uata ngalingali pē naʻe ʻikai mahino kiate au e kiʻi momou ʻa Sisitā Uatá, naʻe fakamatalaʻi mai ʻe ʻEletā Uata ʻe fiemaʻu ha ngāue lahi ia ki hono tohi ʻo e ongo fakaʻilonga fakamataʻitohi ko iá. Te ne fiemaʻu ke fakakaukau mo fakalaulauloto ki he tefitoʻi fakakaukaú mo e fakaʻilonga fakamataʻitohí kae ʻoua kuo mahino moʻoni kiate ia ʻa e ʻuhingá ʻi hono lotó pea lava leva ke ne fakahaaʻi ʻa e ngaahi ongo loto-moʻoni ko ʻení ʻi he tohoʻi kotoa pē ʻo ʻene polosí. Naʻá ku ongoʻi mā ʻi heʻeku kole fāinoa ange ke ne fai ha meʻa naʻe fiemaʻu ki ai ha fuʻu ngāue lahí. Naʻá ku kole ange ke ne fakahoko atu ʻeku kole fakamolemole ki hono hoá ʻi heʻeku taʻeʻiló pea ke ne ʻiloʻi ʻoku ou fakafoki ʻeku kolé.
Te mou lava ʻo fakakaukauloto ki heʻeku ʻohovale mo e houngaʻiá ʻi heʻeku mavahe mei Siapaní, naʻe meʻaʻofa mai ʻe Sisitā Uata, ʻo ʻikai ke u kole ange, ʻa e ʻaati fakamataʻitohi fakaʻofoʻofa ko ʻení ʻoku ʻasi ai ʻa e ongo fakaʻilonga fakamataʻitohi faka-Siapani ki he lea ʻikai fakahokó. ʻOku tautau lelei ia he taimí ni ʻi he holisi ʻo hoku ʻōfisí, ʻo fakamanatu mai ke u tuʻumaʻu pea fekumi ʻi he ʻaho kotoa pē ki he ʻEikí ʻaki hoku lotó, iví, ʻatamaí, mo e mālohí kotoa. Kuo fakamatalaʻi kānokato ʻe Sisitā Uata, ʻi he ngāue taʻesiokita ko ʻení, ʻa e ʻuhinga ʻo e ʻikai fakahokó, pe fakalongolongó, ʻo lelei ange ia ʻi ha toe faʻahinga lea. Naʻá ne fakahoko ʻene tohi fakasanisaní ʻaki ʻa e loto-fakamātoato mo ha taumuʻa moʻoni, kae ʻikai ke ne tā taʻe-fakakaukauʻi mo fatongia ʻaki pē ʻa e ngaahi fakaʻilonga fakamataʻitohí.
‘Oku pehē pē mo e faka‘amu ‘a e ‘Otuá ke tau fakaʻaongaʻi hotau taimi mo Iá ‘aki ‘a e fa‘ahinga mateaki loto-mo‘oni tatau. ʻI heʻetau fai iá, ʻoku hoko leva ʻetau moihuú ko hano fakahaaʻi ʻo ʻetau ʻofa kiate Iá.
ʻOkú Ne fakaʻamu ke tau fetuʻutaki mo Ia. ʻI ha taimi ʻe taha, hili haʻaku fua lotu ʻi ha fakataha mo e Kau Palesitenisī ʻUluakí, naʻe tafoki mai ʻa Palesiteni Nalesoni kiate au ʻo pehē mai, “Lolotonga hoʻo lotú, ne u fakakaukau ki he lahi ʻo e houngaʻia ʻa e ʻOtuá ʻi heʻetau fakaʻatā ha taimi mei heʻetau taimi-tēpile femoʻuekiná ke fakamoʻoniʻi Iá.” Ko ha fakamanatu faingofua mo mālohi ia ʻo e lahi e mahuʻingaʻia ʻa e Tamai Hēvaní ʻi heʻetau kiʻi taimi hifo ke fetuʻutaki mo Iá.
Neongo ʻEne fakaʻamua ʻetau tokangá, ka he ʻikai te Ne fakamālohiʻi kitautolu ke tau haʻu kiate Ia. Naʻe folofola ʻa e ʻEiki kuo toetuʻú ki he kakai Nīfaí, “Hono ʻikai ke tuʻo lahi ʻa ʻeku fie tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí, ka naʻe ʻikai te mou loto ki ai.” Na‘á ne hoko atu ‘aki ‘a e fakaafe fakatu‘amelie ko ʻení ‘a ia ‘oku toe ʻaonga pē foki kiate kitautolu ‘i he ‘ahó ni: “Ko e hā hano tuʻo lahi ʻo haʻaku tānaki fakataha ʻa kimoutolu ʻo hangē ko e tānaki fakataha ʻe he motuʻa moá ʻa hono ʻuhikí ki hono lalo kapakaú, ʻo kapau te mou fakatomala pea tafoki kiate au ʻi he loto-fakamātoato.”
ʻOku ʻomi ʻe he ongoongolelei ʻo Sīsū Kalaisí ha ngaahi faingamālie ke tau toutou foki ai kiate Ia. ʻOku kau ʻi he ngaahi faingamālie ko ʻení ʻa e lotu fakaʻahó, ako folofolá, ko e ouau sākalamēnití, ko e ʻaho Sāpaté, mo e moihū ʻi he temipalé. Fēfē kapau te tau toʻo ʻa e ngaahi faingamālie toputapu ko ʻení mei heʻetau ngaahi lisi ngāue ke fakahokó pea fokotuʻu kinautolu ʻi heʻetau ngaahi lisi “ʻikai ke fakahokó”—ʻo ʻuhingá ke fakahoko kinautolu ʻaki ʻa e fakakaukau kakato mo e tokanga taha tatau ʻoku fakahoko ʻaki ʻe Sisitā Uata ki heʻene ʻaati fakamataʻitohí?
Mahalo pē ʻokú ke fakakaukau, “ʻOku ʻikai haʻaku taimi ki he meʻa ko iá.” Kuó u faʻa ongoʻi ʻa e meʻa tatau. Kae tuku muʻa ke u fokotuʻu atu ko e meʻa ʻe ala fiemaʻú ʻoku ʻikai ko ha taimi lahi ange ka ko ha ʻiloʻi mo ha tokanga lahi ange ki he ʻOtuá lolotonga e ngaahi taimi ʻoku tau ʻosi vaheʻi Maʻaná.
Hangē ko ʻení, ʻi he taimi ʻoku tau lotu aí, fēfē kapau ʻe siʻisiʻi ange ʻetau taimi leá kae lahi ange ʻetau taimi nofo pē mo e ʻOtuá; pea ‘i he taimi te tau lea aí, ke tau fakahaaʻi pau mo loto-moʻoni lahi ange ‘a e hounga‘iá mo e ‘ofá?
Kuo faleʻi mai ʻe Palesiteni Nalesoni ke ʻoua naʻa tau lau pē ʻa e folofolá ka ke tau fakalaulauloto kiate kinautolu. Ko e hā hano faikehekehe kapau ʻe siʻisiʻi ange ʻetau laukonga ʻataʻatā peé kae lahi ange ʻetau fakalaulaulotó?
Fēfē kapau te tau fai ha meʻa lahi ange ke teuteuʻi hotau ʻatamaí ke maʻu e sākalamēnití mo fakalaulauloto fiefia ki he ngaahi tāpuaki ʻo e Fakalelei ʻa Sīsū Kalaisí lolotonga e ouau toputapu ko ʻení?
ʻI he Sāpaté, ʻa ia ʻoku ʻuhinga ʻi he lea faka-Hepeluú ko e “mālōlō,” fēfē kapau te tau mālōlō mei he ngaahi tokanga kehé pea tuku ha taimi ke tau tangutu fakalongolongo ai mo e ʻEikí ke fai ʻetau ngaahi hū kiate Iá?
Lolotonga ʻetau lotu ʻi he temipalé, fēfē kapau te tau mapuleʻi ʻetau ngaahi feingá ke tokanga kakato pe kiʻi nofo fuoloa ange ʻi he loki silesitialé ʻo fakakaukau fakalongolongo?
ʻI he taimi ʻoku siʻisiʻi ange ai ʻetau tokangá ʻi he meʻa ke faí kae lahi ange ʻi hono fakamālohia ʻetau fehokotaki fakafuakava mo e Tamai Hēvaní mo Sīsū Kalaisí, ʻoku ou fakamoʻoni ʻe fakakoloaʻi ʻa e ngaahi momeniti toputapu takitaha ko ʻení, pea te tau maʻu ʻa e fakahinohino ʻoku fiemaʻu ʻi heʻetau moʻui fakatāutahá. ʻOku tau faʻa hangē ko Mā‘atá ‘i he talanoa ‘i he tohi ʻa Luké, ‘o fa‘a “femoʻuekina mo fetokangaʻaki ʻi he ngaahi meʻa lahi.” Ka neongo ia, ʻi heʻetau fetuʻutaki mo e ʻEikí ʻi he ʻaho takitaha, te Ne tokoniʻi kitautolu ke tau ʻiloʻi ʻa e meʻa ʻoku fuʻu fiemaʻu lahi tahá.
Naʻa mo e Fakamoʻuí naʻá Ne fakaʻatā ha taimi mei Heʻene ngāue fakafaifekaú ke fakalongolongo. ʻOku fonu ʻa e folofolá ʻi he ngaahi sīpinga ʻo e mālōlō ʻa e ʻEikí ki ha feituʻu maomaongoa—ko ha moʻunga, ko e toafá pe hāʻele ʻo “kiʻi mamaʻo siʻi atu”—ke lotu ki he Tamaí. Kapau naʻe fekumi ʻa Sīsū Kalaisi ki ha taimi fakalongolongo ke fetuʻutaki ai mo e ʻOtuá pea ke maʻu ha fakamālohia meiate Ia, ʻe fakapotopoto ke tau fai ʻa e meʻa tatau.
ʻI he tukutaha hotau lotó mo e fakakaukaú ʻi he Tamai Hēvaní mo Sīsū Kalaisí pea fakafanongo ki he kihiʻi leʻo siʻi ʻo e Laumālie Māʻoniʻoní, te tau maʻu ha mahino lahi ange fekauʻaki mo e meʻa ʻoku fiemaʻu lahi tahá, fakatupulaki ha manavaʻofa loloto ange, pea maʻu ha mālōlō mo ha mālohi ʻiate Ia. Ko ha meʻa ngali fehangahangai eni, ka ʻi he tokoni ki he ʻOtuá ke fakavaveʻi ʻEne ngāue ʻo e fakamoʻuí mo e hakeakiʻí, ʻe ala fiemaʻu ke tau kiʻi māmālie hifo. ʻE ala tānaki atu ʻa e ngaungaue maʻu peé ki he moveuveu ʻi heʻetau moʻuí pea kaihaʻasi meiate kitautolu ʻa e nonga ʻoku tau fekumi ki aí.
ʻOku ou fakamoʻoni ʻi heʻetau faʻa foki ki he ʻEikí mo e loto-fakamātoato moʻoní, te tau ʻiloʻi Ia ʻi he fakalongolongo mo e loto-falala pea ongoʻi ʻEne ʻofa fakafuakava taʻe-fakangatangata kiate kitautolú.
Ne talaʻofa mai ʻe he ʻEikí:
“ʻUnuʻunu mai kiate au pea te u ʻunuʻunu atu kiate kimoutolu; fekumi faivelenga kiate au pea te mou ʻiloʻi au.”
“Pea te mou kumi mo ʻiloʻi au, ʻo ka moú ka kumi kiate au ʻaki homou lotó kotoa.”
ʻOku ou fakamoʻoni ʻoku moʻoni ʻa e talaʻofa ko ʻení. ʻI he huafa ʻo Sīsū Kalaisí, ʻēmeni.