Pikitai kia Sīsū Kalaisi: Hoko ko e Māsima ʻo Māmani
ʻI heʻetau nofomaʻu mo pikitai ki he ʻEikí, ʻe hoʻata fakanatula pē mei heʻetau moʻuí ʻa ʻEne māmá, pea te tau hoko ko e māsima ʻo e māmaní.
Naʻe akoʻi ʻe he Fakamoʻuí ko e taimi ʻoku “ui ai [ʻa kitautolu] ki [Heʻene] ongoongolelei taʻengatá, ʻo [tau] fuakava ʻaki ha fuakava taʻengatá, ʻoku lau ʻa [kitautolu] ko e māsima ʻo e māmaní.” ʻOku ngaohi ʻa e māsimá mei ha ʻelemēniti ʻe ua ʻokú na fepikitaki. He ʻikai ke tau lava ʻo hoko ko ha māsima pē ʻiate kitautolu; kapau ko e fiemaʻú ke tau hoko ko ha māsima ʻo e māmaní, kuo pau ke tau piki ki he ʻEikí, pea ko e meʻa ia ʻoku ou vakai ki ai ʻi heʻeku feohi mo e kau mēmipa ʻo e Siasí ʻi he funga ʻo e māmaní—ʻoku ou mamata ki ha kāingalotu faivelenga ʻoku pikitai ki he ʻEikí, ʻoku nau tukupā ke ngāue maʻá e niʻihi kehé pea hoko ko e māsima ʻo e māmaní.
ʻOku hoko hoʻo mateaki faitōnungá ko ha sīpinga fakaʻofoʻofa ia ke muimui ki ai ʻa e niʻihi kehé. ʻOku hounga mo fakamahuʻingaʻi hoʻo tokoní.
Kuo fakahaaʻi ʻe hotau toʻu tupú ha loto-toʻa mo ha līʻoa fakaofo. Kuo nau ngāue vēkeveke ʻi he hisitōlia fakafāmilí, pea ʻoku hoko ʻenau toutou ʻaʻahi ki he fale ʻo e ʻEikí ko ha fakamoʻoni ki heʻenau mateakí. ʻOku fakahaaʻi heʻenau loto-fiemālie ke līʻoa ha taimi mo ha ivi ke ngāue fakafaifekau ʻi he funga ʻo e māmaní ha tui mātuʻaki mālohi mo tuʻuloa. ʻOku ʻikai ke nau kau mai pē ka ʻoku nau takimuʻa ʻi he hoko ko ha kau ākonga ʻoku pikitai kia Sīsū Kalaisi. ʻOku hoʻata mei heʻenau ngāue tokoní ha maama mo ha ʻamanaki lelei, ʻo tākiekina ai ʻa e moʻui ʻa ha kakai tokolahi. ʻOku mau fakahaaʻi ki he toʻu tupu ʻo e Siasí, ʻa ʻemau fakamālō loto-houngaʻia ʻi hoʻomou ngāue tokoni fakalaumālié. ʻOku ʻikai ke ngata pē ʻi hoʻomou hoko ko e kahaʻu ʻo e Siasí ka ko hono tuʻunga lolotongá. Pea ko e māsima moʻoni kimoutolu ʻo māmani!
ʻOku ou ʻofa ʻi he ʻEiki ko Sīsū Kalaisí pea ongoʻi tāpuekina ʻi he faingamālie ke ngāue fakataha mo kimoutolu ʻi he Siasi ʻo e ʻEikí. ʻOku fakapapauʻi mai ʻe heʻetau uouangatahá mo e mālohi ʻoku fakamaʻunga ʻi heʻetau tuí, ʻoku ʻikai ke tau teitei tuenoa ʻi he fonongá ni. Te tau lava fakataha ʻo langa ʻa e puleʻanga ʻo e ʻOtuá ʻi he fakavaʻe mālohi ʻo e ngāue tokoní, ʻofá, mo e tui taʻeueʻia.
ʻI he akonaki ʻa Sīsū Kalaisi ʻi he veʻe Tahi ʻo Kālelí, naʻá Ne faʻa fakaʻaongaʻi ʻa e ngaahi meʻa fakaʻaho ʻoku maheni mo ʻEne kau fanongó ke fakahaaʻi ai ha ngaahi moʻoni fakalaumālie loloto. Ko e taha ʻo e ngaahi meʻa ko iá ko e māsimá. Naʻe folofola ʻa Sīsū, “Ko e māsima ʻo māmani ʻa kimoutolu,” ko ha fakamatala ʻoku mahu hono ʻuhingá mo e mahuʻingá, tautefito ki he kakai ʻi Hono kuongá ʻa ia naʻe mahino kiate kinautolu ʻa e ngaahi ʻaonga kehekehe ʻo e māsimá.
Ko e founga ko ia hono maʻu ʻo e māsimá ʻi ʻAlakavá, ko e feituʻu fakatonga ʻo hoku fonua tupuʻanga ko Potukalí, naʻe kamata ia ʻi ha taʻu ʻe lauiafe mei he kuonga ʻo e ʻEmipaea Lomá. Ko e meʻa ʻoku mālié, he ko e founga ko ia naʻe fakaʻaongaʻi ʻe he kau ngāue ki he māsimá, naʻe ʻiloa ko e marnotos, kuo liliu siʻisiʻi pē ia talu mei he taimi ko iá. Naʻe fakaʻaongaʻi ʻe he kau ngāue mateaki ko ʻení ha ngaahi founga tukufakaholo, ʻo ngāue ʻaki pē honau nimá, pea ʻoku kei tolonga mai pē ʻa e tukutukulaumea ko iá ʻi ha laui senituli.
ʻOku tānaki ʻe he founga fakakuongamuʻa ko ʻení ʻa e meʻa ʻoku ui ko e “matala ʻo e māsimá.” Ke fakahoungaʻi kakato ʻa e founga naʻe maʻu ai ʻa e matala ʻo e māsimá, ʻoku mahuʻinga ke ʻiloʻi ʻa e ʻātakai naʻe maʻu ia mei aí. ʻOku maʻu ʻe he matāfanga anovai māsima ʻo ʻAlakavá ʻa e ngaahi tūkunga totonu ke fakatupu ai ʻa e māsimá. ʻOku tafe mai ʻa e vai mei he tahí ki ha fanga kiʻi anovai iiki, ʻa ia ʻoku ʻiloa ko e pupuʻa māsimá, ʻo nofo ia ai ke tutu ʻe he vevela ʻo e laʻaá ke mao. ʻI he mao ko ia ʻa e vaí, ʻoku faʻu ʻe he matala ʻo e māsimá ha fanga kiʻi foʻi makamaka pelepelengesi ʻi he funga pupuʻá. Ko e fanga kiʻi foʻi makamaka ko ʻení ʻoku maʻa ʻaupito pea makehe mo petepete hono fōtungá. ʻOku hanga ʻe he marnotos ʻo sivi fakalelei ʻa e fanga kiʻi foʻi makamaká mei he funga vaí ʻaki ha ʻū meʻangāue makehe, ko ha ngāue ʻoku fiemaʻu ki ai ha taukei lahi mo tonu ʻaupito. ʻI Potukalí, ʻoku ui ʻa e faʻahinga māsima maʻa ko ʻení ko e “kilimi ʻo e māsimá” koeʻuhí he ʻe lava pē ia ʻo paeʻi fakalelei ʻo hangē ko e kilimi ko ia ʻi ʻolunga ʻi he huʻakaú. ʻOku fakamahuʻingaʻi ʻa e māsima makehe ko ʻení koeʻuhí ko ʻene maʻá mo ʻene ifo makehé, ʻo hoko ia ko e māsima mamafa taha ki he feimeʻatokoní.
Pea hangē pē ko e fuʻu ngāue lahi ʻoku fai ʻe he founga marnotos ke fakapapauʻi ʻoku nau ʻomi ʻa e māsima lelei tahá, ʻoku totonu ke pehē maʻu pē mo ʻetau fai hotau lelei tahá, ko e kakai fuakava ʻo e ʻEikí, ke hoko ʻetau ʻofá mo e sīpingá ʻi he lahi taha ʻe malavá, ko ha fakataipe haohaoa ʻo hotau Fakamoʻui ko Sīsū Kalaisí.
ʻI he kuonga muʻá, naʻe mahulu atu ʻa e meʻa naʻe fakaʻaongaʻi ki ai ʻa e māsimá mei he fakaifoifo kaí pē—naʻe hoko ia ko ha meʻa fakatolonga mahuʻinga mo ha fakataipe ʻo e maʻá mo e fuakavá. Naʻe ʻiloʻi ʻe he kakaí naʻe mahuʻinga ʻa e māsimá ki hono fakatolonga ʻo e meʻakaí mo fakalahi hono ifó. Naʻe toe mahino foki kiate kinautolu ʻa e meʻa ʻe hoko kapau ʻe mole mei he māsimá ʻa hono konokoná, pe ko hono ifó, ʻi hano ʻuliʻi pe fakavai.
Pea hangē pē ko e mole ʻa e ifo ʻo e māsimá, ʻe lava foki ke mole mo hotau mālohi fakalaumālié kapau ʻe fakavaʻivaʻinga pē ʻetau tui kia Sīsū Kalaisí. Mahalo te tau hā ngali lelei pē ʻi tuʻa, ka kapau he ʻikai ha tui mālohi ʻi he lotó, ʻe mole ʻetau malava ke fai ha lelei ʻi he māmaní mo fakalotolahiʻi ʻa e niʻihi ʻoku tau feohí ke fai honau lelei tahá.
Ko ia ai te tau lava fēfē ʻo fakaʻaongaʻi hotau iví mo e ngāué ke fai ha lelei pea fakahoko ʻa e liliu ʻoku fiemaʻu ʻe he māmaní ʻi he ʻaho ní? Te tau lava fēfē ʻo tauhi ʻa e tuʻunga fakaākongá pea hokohoko atu ko ha ivi tākiekina lelei?
ʻOku ou faʻa fakakaukau ki he ngaahi lea ʻa hotau palōfita ʻofeiná: “ʻOku fiemaʻu ʻe he ʻOtuá ke tau ngāue fakataha mo fetokoniʻaki. Ko e ʻuhinga ia naʻá ne fekauʻi mai ai kitautolu ki māmani ʻi ha ngaahi fāmilí mo vahevahe kitautolu ki ha ngaahi uooti mo ha ngaahi siteiki. Ko e ʻuhinga ia ʻokú Ne kole mai ai ke tau tokoni mo fetauhiʻakí. Ko e ʻuhinga ia ʻokú Ne kole mai ai ke tau ʻi māmani kae ʻikai ʻo māmani kitautolú.”
ʻI he taimi ʻoku fakafonu ai ʻetau moʻuí ʻaki ha taumuʻa mo ha ngāue tokoní, ʻoku tau hao ai mei he fakafiefiemālie fakalaumālié; ka ʻi he tafaʻaki ʻe tahá, ʻi he taimi ʻoku hala ai ʻetau moʻuí ʻi ha taumuʻa fakalangi, ngāue tokoni ʻuhingamālie ki he niʻihi kehé, mo ha ngaahi faingamālie toputapu ke fakalaulauloto mo fakakaukaú, ʻoku tau hoko māmālie pē ʻo femoʻuekina ʻi heʻetau ngaahi ngāué pea mo e ngaahi meʻa ʻoku ʻaonga kiate kitautolu peé, ʻo tuʻu mole ngofua ai ʻetau mālohi fakalaumālié. Ko hono faitoʻó ko e ngāue tokoni hokohoko—ʻo femoʻuekina ʻi he ngāue leleí mo hono fakaleleiʻi kitautolu mo e sosaieti ʻoku tau nofo aí.
Siʻoku kāinga ʻofeina, ko ha tāpuaki kiate kitautolu kotoa ʻi he ʻahó ni ke tau kau ki he Siasi ʻo Sīsū Kalaisí pea maʻu mo e faingamālie ke ngāue ʻi Hono Siasí. ʻE malava ke kehekehe pē hotau ngaahi tūkungá, ka te tau lava kotoa pē ʻo fai ha lelei.
Manatuʻi ʻa e marnotos, ʻa e kau ngāue ki he māsimá; ʻoku nau fakaʻaongaʻi ha ʻū meʻangāue faingofua ke tufi ʻaki ʻa e fanga kiʻi foʻi maka lelei tahá, ʻa e māsima lelei tahá! Te tau lava foki mo kitautolu ʻo fai ha fanga kiʻi meʻa faingofua, ʻaki hono fai maʻu pē ha fanga kiʻi ngāue iiki mo ʻaonga, ke lava ʻo fakaloloto ai hotau tuʻunga fakaākongá mo e līʻoa kia Sīsū Kalaisí. Ko ha fanga kiʻi founga faingofua mo maʻongoʻonga ʻeni ʻe fā te tau lava ʻo fāifeinga ai ke hoko ko e māsima ʻo e māmaní:
-
ʻAi ke hoko ʻa e fale ʻo e ʻEikí ko e konga mahuʻinga taha ia ʻo ʻetau līʻoá. Koeʻuhí ʻoku toe ofi ange ʻa e ngaahi temipalé ʻi he taimí ni ʻi ha toe taimi kimuʻa, ʻe tokoni hono fakamuʻomuʻa ʻa e moihū maʻu pē ʻi he fale ʻo e ʻEikí ke tukutaha ʻetau tokangá ki he meʻa ʻoku mahuʻinga tahá mo fakatefito ʻetau moʻuí ʻia Kalaisi. ʻOku tau maʻu ʻi he temipalé ʻa e konga mahuʻinga taha ʻo ʻetau tui kia Sīsū Kalaisí pea mo e ʻelito moʻoni ʻo ʻetau līʻoa kiate Iá.
-
Ko ʻetau ngāue fakamātoato ke fakamālohia ʻa e niʻihi kehé ʻaki hono moʻui fakataha ʻaki ʻa e ongoongoleleí. Te tau lava ʻo fakamālohia hotau ngaahi fāmilí ʻi he ngāue hokohoko mo e fakataumuʻa ke ʻomi ʻa e ngaahi tefitoʻi moʻoni ʻo e ongoongoleleí ki heʻetau moʻuí mo hotau ngaahi ʻapí.
-
Ko e loto-fiemālie ke tali ha fatongia pea ngāue ʻi he Siasí. ʻOku fakaʻatā ʻe heʻetau ngāue tokoni ʻi hotau ngaahi faiʻanga lotu fakalotofonuá ke tau fetokoniʻaki mo tupulaki fakataha. Neongo ʻoku ʻikai ke faingamālie maʻu pē ʻa e ngāue tokoní, ka ʻoku fakafiefia maʻu pē ia.
-
Pea ko hono fakaʻosí, ngāue ʻaki ʻa e ʻū meʻangāue fetuʻutaki fakaʻilekitulōniká ʻaki ha taumuʻa. ʻI he ʻaho ní, ʻoku fakaʻatā ʻe he ʻū meʻangāue fetuʻutaki fakaʻilekitulōniká ʻa ʻetau fehokotakí ʻo laka ange ʻi ha toe taimi kimuʻa. Hangē pē ko e tokolahi taha ʻo kimoutolú, ʻoku ou fakaʻaongaʻi ʻa e ʻū meʻangāue ko ʻení ke fetuʻutaki mo hoku ngaahi tokoua mo e tuofāfine ʻi he Siasí pea mo hoku fāmilí mo e ngaahi kaungāmeʻá. ʻI heʻemau fetuʻutakí, ʻoku ou ongoʻi vāofi mo kinautolu; ʻoku mau lava ʻo fetauhiʻaki ʻi he ngaahi taimi faingataʻa ʻoku ʻikai ke mau ʻi ai tonu aí. ʻOku ʻikai ha toe veiveiua ko e ʻū meʻangāué ni ko ha tāpuaki ia, ka te nau toe lava foki ʻo tohoakiʻi kitautolu mei he fetuʻutaki ʻoku ʻuhingamālié pe fakatupunga ha ngaahi tōʻonga ʻe mole noa ai hotau taimí ʻi ha ngaahi ʻekitivitī ʻoku ʻikai ke ʻaonga. Ko e fāifeinga ko ia ke hoko ko e māsima ʻo e māmaní ʻoku kau ki ai ha ngāue lahi ange mei hono siofi pē ʻo e fanga kiʻi vitiō nounou ʻi he mītia fakasōsialé ʻi ha meʻangāue fakaʻilekitulōnika ʻoku ʻinisi ʻe ono (senitimita ʻe 15) hono fālahí.
ʻI heʻetau fokotuʻu ʻa e fale ʻo e ʻEikí ko e ʻelito ʻo ʻetau moʻuí, fakataumuʻa ke fakamālohia ʻa e niʻihi kehé ʻaki hono moʻui ʻaki ʻa e ongoongoleleí, tali ʻa e ngaahi uiuiʻi ke ngāué, pea fakaʻaongaʻi ʻa e ʻū meʻangāue fakaʻilekitulōniká ʻaki ha taumuʻá, te tau lava ai ʻo tauhi hotau mālohi fakalaumālié. Hangē pē ko hono maʻu ʻe he māsimá ʻi hono tuʻunga haohaoa tahá ʻa e mālohi ke fakaifoifo mo fakatolongá, ʻoku pehē pē foki mo ʻetau tui kia Sīsū Kalaisí ʻi he taimi ʻoku tanumaki mo maluʻi ʻaki ai ʻetau līʻoa ke ngāue tokoní mo e ʻofa faka-Kalaisí.
ʻI heʻetau nofo-maʻu mo pikitai ki he ʻEikí, ʻe hoʻata fakanatula pē mei heʻetau moʻuí ʻa ʻEne māmá, pea te tau hoko leva ko e māsima ʻo e māmaní. ʻI he foungá ni, ʻoku ʻikai ke ngata pē ʻi heʻetau fakatupulaki ʻetau moʻuí, ka ʻoku tau fakamālohia ai foki mo hotau fāmilí mo hotau tūkui koló. Fakatauange te tau fāifeinga ke tauhi maʻu ʻetau pikitai ki he ʻEikí pea ʻoua naʻa teitei mole ʻa hotau ʻaongá, pea ke tau hoko ko e fanga kiʻi maka māsima iiki ʻoku finangalo ʻa e ʻEikí ke tau aʻusiá. ʻI he huafa ʻo Sīsū Kalaisí, ʻēmeni.