Ko e Falala ki Heʻetau Tamaí
ʻOku falala mai ʻa e ʻOtuá ke tau fai ha ngaahi fili mahuʻinga lahi pea ʻi he meʻa kotoa pē, ʻokú Ne kole mai ke tau falala kiate Ia.
ʻI he ʻaho 1 ʻo Sune 1843, naʻe mavahe ai ʻa ʻEtisoni Pālati mei Nāvū, ʻIlinoisi, ke malanga ʻaki ʻa e ongoongoleleí ʻi he ʻOtu Motu Hauaiʻí, kae nofo pē hono uaifi ko Luʻisa Pānesi Pālatí, ke tokangaʻi hona kiʻi fāmilí.
ʻI he fakalalahi ʻa e ngaahi fakatanga ʻi Nāvuú, ʻo fakamālohiʻi ai ʻa e Kāingalotú ke nau mavahé, pea kimui ange ʻi he Nofoʻanga Fakafaʻahitaʻu Momokó ʻi heʻenau teuteu ke hiki ki he Teleʻa Sōlekí, naʻe fehangahangai ai ʻa Luʻisa mo e fili pe te ne kau ʻi he fonongá. Naʻe mei faingofua ange ke nofo pē ʻo tatali ki he foki mai ʻa ʻEtisoní ʻi haʻane fononga toko taha.
ʻI he ongo tūkungá fakatouʻosi, naʻá ne fekumi ki ha fakahinohino mei he palōfita ko Pilikihami ʻIongí, ʻa ia naʻá ne poupouʻi ia ke ʻalu. Neongo ʻa e faingataʻa lahí mo ʻene ongoʻi momoú, ka naʻá ne lava lelei ʻo fakahoko ʻa e fonongá ʻi he taimi takitaha.
ʻI he kamataʻangá, naʻe ʻikai fuʻu fiefia ʻa Luʻisa ʻi he fonongá. Ka neongo ia, naʻe ʻikai fuoloa kuo kamata ke ne fiefia ʻi he musie lōloa lanumatá, matalaʻi ʻakau lanu fakaʻofoʻofá, mo e ʻū lauʻi kelekele ʻi he veʻe vaitafé. Naʻá ne tohi ʻo pehē, “Naʻe māmālie pē ʻa e mōlia atu ʻa e loto-mamahí mei hoku ʻatamaí, pea naʻá ku hoko ko e fefine fiefia taha ʻi he kulupú fakakātoa.”
Kuo ueʻi fakalaumālie moʻoni au ʻe he talanoa ʻo Luʻisá. ʻOku ou tanganeʻia ʻi heʻene loto-fiemālie ke tuku ʻene ngaahi fiemaʻu fakatāutahá, ʻene malava ke falala ki he ʻOtuá mo e founga naʻe tokoniʻi ai ia ʻe heʻene ngāue ʻaki ʻene tuí ke kehe ʻene vakai ki he tūkungá.
Naʻá ne fakamanatu mai ʻoku ʻi ai ʻetau Tamai Hēvani ʻofa ʻokú Ne ʻofaʻi kitautolu ʻi ha feituʻu pē ʻoku tau ʻi ai pea ʻe lava ke tau falala kiate Ia ʻo lahi ange ʻi ha toe taha pe ha toe meʻa ange.
Ko e Tupuʻanga ʻo e Moʻoní
ʻOku falala mai ʻa e ʻOtuá ke tau fai ha ngaahi fili mahuʻinga lahi pea ʻi he meʻa kotoa pē, ʻokú Ne kole mai ke tau falala kiate Ia. ʻOku mātuʻaki faingataʻa ʻeni ʻi he taimi ʻoku kehe ai ʻetau fakakaukau leleí, pe fakakaukau ʻa e kakaí, mei Hono finangalo ki Heʻene fānaú.
ʻOku fokotuʻu mai ʻe ha niʻihi ʻoku totonu ke tau toe fakapapauʻi ʻa e meʻa ʻoku totonú mo e meʻa ʻoku halá he ʻoku nau pehē ko e moʻoní ʻoku fakamakatuʻunga pē ia, ko e tūkunga moʻoní ʻoku fakatatau pē ia mo e vakai fakatāutahá, pe ʻoku foaki lahi ʻa e ʻOtuá ʻo ʻikai ke Ne tokanga moʻoni ki he meʻa ʻoku tau faí.
ʻI heʻetau feinga ke ʻiloʻi ʻa e finangalo ʻo e ʻOtuá, ʻoku tokoni ke tau manatuʻi ʻoku ʻikai ʻatautolu ke fakaʻilongaʻi ʻa e ngaahi ngataʻanga ʻo e totonú mo e halá. Kuo fokotuʻu ʻe he ʻOtuá ʻa e ngaahi ngataʻanga ko ʻení, ʻo makatuʻunga ʻi ha ngaahi moʻoni taʻengata ke ʻaonga mo tāpuekina ai kitautolu.
Kuo fuoloa fau mai ʻa e fiemaʻu ko ia ke liliu ʻa e moʻoni taʻengata ʻa e ʻOtuá. Naʻe kamata ia kimuʻa pea kamata ʻa e māmaní, ʻi he taimi naʻe angatuʻu ai ʻa Sētane ki he palani ʻa e ʻOtuá, ʻo feinga ʻi he siokita ke fakaʻauha ʻa e tauʻatāina ke fili ʻa e tangatá. ʻI he muimui ki he sīpinga ko ʻení, naʻe fakakikihi ai ʻa e kakai hangē ko Seialemi, Nēhoa, mo Koliholá ʻo pehē ʻoku fakavalevale ʻa e tuí, ʻikai ʻaonga ʻa e fakahaá, pea ko e hā pē ha meʻa ʻoku tau fie fai ʻoku totonu pē ia. Ko e meʻa fakamamahí, he ʻoku faʻa iku ʻa e ngaahi mavahe ko ʻeni mei he moʻoni ʻa e ʻOtuá ki ha mamahi lahi.
Neongo ʻe makatuʻunga ha ngaahi meʻa ʻe niʻihi ʻi he ngaahi tūkungá, ka ʻoku ʻikai pehē ʻa e meʻa kotoa pē. Kuo akoʻi maʻu pē ʻe Palesiteni Lāsolo M. Nalesoni ko e ngaahi moʻoni faifakamoʻui ʻa e ʻOtuá ʻoku kakato, tauʻatāina, mo fokotuʻutuʻu ia ʻe he ʻOtuá.
Ko ʻEtau Filí
Ko e tokotaha ʻoku tau fili ke falala ki aí ko e taha ia ʻo e ngaahi fili mahuʻinga ʻo e moʻuí. Naʻe fakahinohinoʻi ʻe he Tuʻi ko Penisimaní ʻa hono kakaí, “Tui pē ki he ʻOtuá, tui ʻokú ne ʻi ai … ; tui ʻokú ne maʻu ʻa e poto kotoa … ; tui ʻoku ʻikai ʻiloʻi ʻe he tangatá ʻa e ngaahi meʻa kotoa pē ʻoku lava ke ʻafioʻi ʻe he ʻEikí.”
Meʻamālié, ʻoku tau maʻu ʻa e folofolá mo e fakahinohino mei he kau palōfita moʻuí ke tokoni ke mahino kiate kitautolu ʻa e moʻoni ʻa e ʻOtuá. Kapau ʻoku fiemaʻu ha toe fakamahino lahi ange, ʻoku ʻomi ia ʻe he ʻOtuá ʻo fakafou ʻi Heʻene kau palōfitá. Pea te Ne tali ʻetau lotu fakamātoató ʻo fakafou ʻi he Laumālie Māʻoniʻoní ʻi heʻetau feinga ke mahino ʻa e ngaahi moʻoni ʻoku teʻeki ke tau fakahoungaʻi kakató.
Naʻe akoʻi ʻe ʻEletā Niila L. ʻEnitaseni ʻoku ʻikai totonu ke tau ofo “ʻi ha taimi he ʻikai ke ʻuluaki fenāpasi kakato ai [ʻetau] ngaahi vakai fakatāutahá mo e ngaahi akonaki ʻa e palōfita ʻa e ʻEikí. Naʻá ne pehē, “ko ha ngaahi faingamālie ʻeni ʻo e akó, mo e loto-fakatōkilaló, ʻi he taimi ʻoku tau lotu aí. ʻOku tau ʻaʻeva atu ʻi he tui, ʻo falala ki he ʻOtuá, mo tui te tau maʻu ha mahino fakalaumālie lahi ange mei heʻetau Tamai Hēvaní.”
ʻE tokoni ʻi he taimi kotoa pē ke tau manatuʻi ʻa e akonaki ʻa ʻAlamaá, ʻoku ʻomi ʻe he ʻOtuá ʻEne folofolá ʻo fakatatau ki he tokanga mo e ngāue ʻoku tau līʻoa ki aí. Kapau te tau tokanga ki he folofola ʻa e ʻOtuá, te tau maʻu ha ngaahi meʻa lahi ange; kapau te tau tukunoaʻi ʻEne faleʻí, te tau maʻu ʻo siʻisiʻi ange kae ʻoua kuo mole ʻa e meʻa kotoa. ʻOku ʻikai ʻuhinga ʻa e mole ko ʻeni ʻo e ʻiló naʻe hala ʻa e moʻoní; ka ʻoku hā mai ai kuo mole meiate kitautolu ʻetau malava ke maʻu ha mahino ki he moʻoní.
Hanga ki he Fakamoʻuí
Naʻe akonaki ʻa e Fakamoʻuí ʻi Kapaneume fekauʻaki mo Hono tuʻungá mo e misioná. Naʻe pehē ʻe ha tokolahi ʻoku faingataʻa ke nau fanongo ki Heʻene ngaahi leá, ʻo iku ai ke nau tafoki ʻo “ʻikai toe ʻalu mo ia.”
Ko e hā naʻa nau mavahe aí?
Koeʻuhí naʻe ʻikai ke nau saiʻia ʻi he meʻa naʻá Ne folofola ʻakí. Ko ia, ʻi heʻenau falala ki he fakakaukau pē ʻanautolú, naʻa nau mavahe, ʻo ʻikai maʻu ʻa e ngaahi tāpuaki naʻa nau mei maʻu kapau naʻa nau nofo ai.
ʻOku faingofua ke tuʻu vahaʻa ʻa e hīkisiá ʻiate kitautolu mo e moʻoni taʻengatá. ʻI he taimi ʻoku ʻikai mahino ai kiate kitautolú, ʻe lava ke tau kiʻi taʻofi ai, fakaʻatā ha taimi ki heʻetau ngaahi ongó ke fiemālie, pea toki fili ʻa e founga ke tali ʻakí. Naʻe naʻinaʻi mai ʻa e Fakamoʻuí ke tau “sio pē kiate [Ia] ʻi he fakakaukau kotoa pē; ʻoua ʻe tālaʻa, ʻoua ʻe manavahē.” ʻI he taimi ʻoku tau tokanga taha ai ki he Fakamoʻuí, ʻe lava ke kamata ikunaʻi ʻe heʻetau tuí ʻa e ngaahi meʻa ʻoku tau hohaʻa ki aí.
Hangē ko ia naʻe poupouʻi kitautolu ʻe Palesiteni Tieta F. ʻUkitofa ke tau fakahokó, “Kātaki ʻo tomuʻa fakafehuʻia hoʻo veiveiuá ka ke toki fakafehuʻia hoʻo tuí. Kuo pau ke ʻoua naʻa tau teitei tuku e veiveiuá ke ne haʻisia mo taʻofi kitautolu mei he ʻofa, nonga, mo e ngaahi meʻafoaki fakalangi ʻoku maʻu ʻi he tui ki he ʻEiki ko Sīsū Kalaisí.”
ʻOku Maʻu ʻa e Ngaahi Tāpuakí ʻe Kinautolu ʻOku Nofó
ʻI he mavahe ʻa e kau ākongá mei he Fakamoʻuí ʻi he ʻaho ko iá, naʻá Ne fehuʻi leva ki he Toko Hongofulu Mā Uá, “ʻE ʻalu mo kimoutolu foki?”
Naʻe tali ʻa Pita:
“ʻEiki te mau ʻalú kia hai? ʻoku ʻiate koe ʻa e ngaahi lea ʻo e moʻui taʻengatá.
Pea ʻoku mau tui pea ʻilo pau ko koe ko e Kalaisí, ko e ʻAlo ʻo e ʻOtua moʻuí.”
Sai, naʻe moʻui ʻa e kau ʻAposetoló ʻi he kuonga tatau pea naʻa nau fehangahangai mo e ngaahi teke fakasōsiale tatau mo e kau ākonga naʻe mavahe atú. Ka neongo ia, ʻi he momeniti ko ʻení, naʻa nau fili ʻenau tuí mo e falala ki he ʻOtuá, ʻo nau tauhi ai ʻa e ngaahi tāpuaki ʻoku foaki ʻe he ʻOtuá kiate kinautolu ʻoku nofó.
Mahalo ʻoku mou hangē ko aú ʻi he taimi ʻe niʻihi, ʻo fakatokangaʻi ʻokú ke ʻi he ongo tafaʻaki fakatouʻosi ʻo e fili ko ʻení. ʻI he taimi ʻoku faingataʻa ai ke mahino pe tali ʻa e finangalo ʻo e ʻOtuá, ʻoku fakafiemālie ke manatuʻi ʻokú Ne ʻofa ʻiate kitautolu ʻi hotau tūkungá, ʻi ha feituʻu pē ʻoku tau ʻi ai. Pea ʻokú Ne maʻu ha meʻa lelei ange maʻatautolu. Kapau te tau kole tokoni kiate Ia, te Ne tokoniʻi kitautolu.
Neongo ʻe lava ke faingataʻa ʻa e faifeinga kiate Iá, ʻo hangē pē ko hono fakahā ʻe he Fakamoʻuí ki he tamai naʻe fekumi ki ha fakamoʻui maʻa hono fohá “ʻOku faʻa fai ʻa e meʻa kotoa pē kiate ia ʻoku tuí.” ʻI he ngaahi taimi ʻo ʻetau faingataʻaʻiá, te tau lava foki mo kitautolu ʻo kalanga, “Tokoniʻi [kimautolu] telia [ʻemau] taʻetuí.”
Ko Hono Fakavaivaiʻi Hotau Lotó ki Hono Finangaló
Naʻe akoʻi ʻe ʻEletā Niila A. Mekisuele “ko e fakavaivaiʻi ko ia ha loto ʻo ha tahá ko e meʻa fakafoʻituitui makehe pē ia ʻe taha ʻoku tau maʻu te tau lava ʻo foaki ki he ʻOtuá.” Mahalo naʻa ko e ʻuhinga ia ʻo e vēkeveke ʻa e Tuʻi ko Penisimaní ke hoko hono kakaí ʻo hangē ko ha “tamasiʻi siʻi, angavaivai, angamalū, loto-fakatōkilalo, faʻa kātaki, fonu ʻi he ʻofa, pea loto-fiemālie ke fakavaivai ʻi he meʻa kotoa pē ʻoku ʻafioʻi ʻe he ʻEikí ʻoku lelei ke ne faí, ʻo hangē ʻoku fakavaivai ʻe ha tamasiʻi siʻi ki heʻene tamaí.”
ʻOku fokotuʻu maʻu pē ʻe he Fakamoʻuí ʻa e sīpinga haohaoá maʻatautolu. Naʻá Ne afeitaulalo ki he finangalo ʻo ʻEne Tamaí, ʻo fakahoko Hono misiona faka-Mīsaiá mo fakaʻatā ʻa e talaʻofa ʻo e taʻengatá kiate koe mo au, ʻi ha loto-mafasia, mo ʻiloʻi ʻa e ngāue fakamamahi naʻe pau ke Ne fuesiá.
Ko e fili ko ia ke fakavaivai ki he finangalo ʻo e ʻOtuá, ko ha ngāue ia ʻo e tui ʻoku ʻi he uho ʻo hotau tuʻunga fakaākongá. ʻI heʻetau fai ʻa e fili ko iá, ʻoku tau ʻilo ai ʻoku ʻikai hōloa ʻetau tauʻatāina ke filí; ka ʻoku fakalahi mo fakapaleʻi ia ʻe he takaua ʻo e Laumālie Māʻoniʻoní, ʻa ia ʻokú ne ʻomi ha taumuʻa, fiefia, nonga, mo ha ʻamanaki lelei he ʻikai ke tau lava ʻo maʻu ʻi ha toe feituʻu.
ʻI he ngaahi māhina siʻi kuo hilí, naʻá ku ʻaʻahi ai mo ha palesiteni fakasiteiki ki ha fefine ʻi hono siteikí mo hano foha lahi kei talavou. Hili ha ngaahi taʻu lahi ʻo ʻene mavahe mei he Siasí, ʻo hē holo ʻi ha ngaahi hala faingataʻa mo fakataʻelatá, naʻá ne foki mai. Lolotonga ʻema ʻaʻahí, naʻá ma fehuʻi ange pe ko e hā naʻá ne foki mai aí.
Naʻá ne pehē, “Naʻá ku fai ha ngaahi meʻa taʻeʻaonga ʻi heʻeku moʻuí, pea naʻá ku ʻiloʻi ʻa e feituʻu naʻe fiemaʻu ke u ʻi aí.”
Naʻá ku fehuʻi ange leva ki ai pe ko e hā kuó ne ako ʻi heʻene fonongá.
Naʻá ne vahevahe mai ʻi he loto-ongo moʻoni, naʻá ne ʻiloʻi naʻe fiemaʻu ke ne maʻulotu ʻo fuoloa feʻunga ke taʻofi ʻa e tōʻonga moʻui ʻo e liʻaki lotú, pea naʻe fiemaʻu ke nofo ai kae ʻoua kuo hoko ia ko e feituʻu naʻá ne fiemaʻu ke ne ʻi aí. Naʻe ʻikai faingofua ʻene foki maí, ka ʻi heʻene tui ki he palani ʻa e Tamaí, naʻá ne ongoʻi ʻa e foki mai ʻa e Laumālié.
Pea naʻe toe pehē atu [ʻe he fefiné], “Kuó u ʻiloʻi maʻaku ʻoku lelei ʻa e ʻOtuá pea ʻoku lelei ange ʻEne ngaahi foungá ʻiate au.”
ʻOku ou fakamoʻoni ki he ʻOtua ko ʻetau Tamai Taʻengatá, ʻa ia ʻokú Ne ʻofa ʻiate kitautolu; mo Hono ʻAlo ko Sīsū Kalaisí, ʻa ia naʻá Ne fakahaofi kitautolú. ʻOkú Na ʻafioʻi hotau ngaahi mamahí mo e faingataʻaʻiá. He ʻikai ke Na teitei liʻaki kitautolu pea ʻokú Na ʻafioʻi lelei ʻa e founga ke tokoniʻi ai kitautolú. Te tau lava ʻo fiefia ʻi heʻetau falala lahi ange kiate Kinauá ʻi ha toe taha pe ha toe meʻa ange. ʻI he huafa toputapu ʻo Sīsū Kalaisí, ʻēmeni.