Ke Ke Maʻa Koe
ʻOku fakaʻatā ʻe he fakatomala fakaʻahó ke tau ʻiloʻi e tataki ʻa e ʻEikí ʻo fakafou ʻi he Laumālie Māʻoniʻoní.
Fakafuofua ki hoku taʻu nimá, naʻa mau vaʻinga soka mo hoku ngaahi kaungāmeʻá ʻi mui ʻi he ʻapisiasi ʻi hoku kiʻi koló ʻi Kōtevuā. ʻOku ou manatuʻi lelei pē ʻa e ui ʻa e tangata malangá ki hono kāingalotú ke fō honau valá ke maʻa ko e teuteu ki he hāʻele mai ʻa e Fakamoʻuí. Koeʻuhí naʻá ku kei siʻi, naʻá ku fakamātoato pē ko e moʻoni. Naʻá ku lele oma ʻaupito ki ʻapi ʻo kole ki heʻeku faʻeé ke fō hoku valá koeʻuhí ke u maʻa mo mateuteu ki he hāʻele mai ʻa e Fakamoʻuí ʻi he ʻaho hono hokó. Neongo naʻe veiveiua ʻeku faʻeé ki he foki vave mai ʻa e Fakamoʻuí, ka naʻá ne kei fō pē hoku vala lelei tahá.
ʻI he pongipongi hono hokó, naʻá ku tui hoku valá naʻe kei ngaʻungaʻu pē mo tatali fiefia ki hano talaki mai e hāʻele mai ʻa e Fakamoʻuí. ʻI he fakalau e houá mo e ʻikai ke hoko ha meʻá, naʻá ku fakakaukau ke u ʻalu ki ʻapisiasi. Naʻá ku fuʻu loto-mamahi ʻaupito ʻi heʻeku ʻilo ne ʻikai ke ʻi ai ha taha ʻi he falelotú pea kuo teʻeki ke hāʻele mai e Fakamoʻuí. Te mou lava pē ʻo fakakaukauloto ki he meʻa ne u ongoʻí ʻi heʻeku luelue māmālie ʻo foki ki ʻapí.
Hili ha ngaahi taʻu mei ai, ʻi heʻeku fanongo ki he ngaahi lēsoni fakafaifekaú ko e teuteu ke kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ku lau ʻa e meʻá ni: “Pea ʻoku ʻikai faʻa hū ha meʻa taʻemaʻa ki hono puleʻangá; ko ia ʻoku ʻikai hū ki hono mālōlōʻangá ha taha ka ko kinautolu pē kuo fō honau kofú ʻi hoku totó, koeʻuhi ko ʻenau tuí, mo e fakatomala mei heʻenau ngaahi angahala kotoa pē, pea mo ʻenau tui faivelenga ʻo aʻu ki he ngataʻangá.”
Naʻe tokoni ʻa e fakamaʻalaʻala naʻá ku maʻu he taimi ko iá ke mahino kiate au ʻa hono mahuʻinga ʻo e moʻoni naʻe ʻikai ke mahino kiate au ʻi heʻeku kei siʻí. Naʻe fakatefito e pōpoaki ʻa e tangata malangá ʻi he mahuʻinga ʻo e maʻa fakalaumālié. Naʻá ne tapou ki he kāingalotú ke nau feinga ke fakatomala, fakahoko ha ngaahi liliu ki heʻenau moʻuí, pea tafoki ki he Fakamoʻuí ke maʻu e huhuʻí.
ʻOku tokaimaʻananga ʻe heʻetau Tamai Hēvaní ʻa ʻetau fononga fakamatelié pea mo e pau ko ia ke tau faiangahala ʻi heʻetau moʻuí. ʻOku hounga moʻoni kiate au ʻa ʻEne tuku mai ha Fakamoʻui ke fakalelei maʻa ʻetau ngaahi maumaufonó. Te tau lava kotoa ʻo fakatomala mo fekumi ki ha fakamolemole pea hoko ʻo maʻa mei heʻetau ngaahi angahalá, tuʻunga ʻi he feilaulau huhuʻi ʻa e Fakamoʻuí. Ko e fakatomalá ko ha tefitoʻi moʻoni fakavaʻe ia ʻo e ongoongoleleí, ʻoku mahuʻinga ia ki heʻetau tupulakí mo e ivi matuʻuaki fakalaumālié ʻi heʻetau foua e ngaahi pole ʻo e moʻuí.
ʻI he konifelenisi lahi ʻo ʻEpeleli 2022, naʻe fakaafeʻi ai ʻe Palesiteni Lāsolo M. Nalesoni ʻa e mēmipa kotoa pē ʻo e Siasí ke nau aʻusia e fiefia ʻo e fakatomala fakaʻahó. Naʻá ne pehē:
“Kātaki ʻoua naʻa manavasiʻi pe fakatoloi ʻa e fakatomalá. ʻOku fiefia ʻa Sētane ʻi hoʻo mamahí. Fakangata leva ia. Kapusi hono ivi tākiekiná ki tuʻa mei hoʻo moʻuí! Kamata ke ke aʻusia ʻi he ʻahó ni ʻa e fiefia ʻi hono siʻaki ʻa e tangata fakaekakanó. ʻOku ʻofeina maʻu pē kitautolu ʻe he Fakamoʻuí kae tautautefito ʻi he taimi ʻetau fakatomalá. …
“Kapau ʻokú ke ongoʻi kuó ke hē ʻo fuʻu mamaʻo pe fuʻu fuoloa mei he hala ʻo e fuakavá pea ʻikai ha founga ke toe foki, ʻoku ʻikai ke moʻoni ia.”
Kapau ʻoku ʻi ai ha meʻa kuo teʻeki ke ke fakatomala kakato ai, ʻoku ou poupou atu ke ke talangofua ki he ui ʻa Palesiteni Nalesoni ke ʻoua naʻa fakatoloi hoʻo fakatomalá. Mahalo naʻa fiemaʻu ha loto-toʻa ke fakahoko ʻa e ngāué ni; ka neongo ia, ʻoku ou fakapapauʻi atu ko e fiefia ʻoku malama mei he fakatomala moʻoní ʻe mahulu atu ia ʻi he meʻa kotoa ʻoku faʻa mahinó. ʻI heʻetau fakatomalá, ʻoku toʻo atu leva ʻa e mafasia ʻo e ongoʻi halaiá kae fetongi ia ʻe ha ongo ʻo e nonga mo e fiemālie. ʻI heʻetau fakatomala fakamātoató, ʻoku fakamāʻoniʻoniʻi kitautolu ʻi he taʻataʻa ʻo e Fakamoʻuí, ʻo fakalahi ai ʻetau ongoʻingofua e ngaahi ueʻi mo e ivi tākiekina ʻa e Laumālie Māʻoniʻoní.
Naʻe fanauʻi mai hoku hoa taʻengatá ʻoku palopalema ʻene fanongó pea tupu ai ʻa e pau ke ne fakaʻaongaʻi ha meʻa ke tokoni ki heʻene fanongó. ʻOku lava ke uesia ʻe he efú mo e pupuhá ʻa e fanga kiʻi meʻangāué ni, pea ʻi he pongipongi kotoa pē ʻoku ou sio ki heʻene fakamaʻa fakamātoato e fanga foʻi tiupí kimuʻa peá ne toki tui e meʻangāué ke tokoni ki heʻene fanongó. Ko e kiʻi ngāue faingofua ko ʻeni ʻoku toutou fai maʻu peé ʻokú ne toʻo ai ha faʻahinga ʻuli, hauhau, pe viviku, kae malava ke ne fanongo mo fetuʻutaki lelei. ʻI he taimi ʻoku ngalo ai ke ne fai ʻení, ʻoku uesia lahi ʻene fanongó he ʻahó kakato; pea ongo leʻosiʻi ʻaupito e leá ʻo aʻu ki ha ʻikai ke ne toe ongoʻi ha meʻa. Pea hangē pē ko ʻene fakamaʻa fakaʻaho e meʻa-fanongó kae lava ke ne fanongo leleí, ʻoku hanga ʻe he fakatomala fakaʻahó ʻo ʻai ke tau ʻiloʻi e tataki ʻa e ʻEikí ʻo fakafou ʻi he Laumāie Māʻoniʻoní.
ʻI he ofi ke ʻosi e ngāue fakafaifekau ʻa e ʻEikí ʻi he māmaní pea kimuʻa ʻi Heʻene mavahe ki he Ngoue ko Ketisemaní, naʻá Ne teuteuʻi ʻEne kau ākongá ke fehangahangai mo e ngaahi faingataʻa ʻe hoko maí. Naʻá Ne fakafiemālieʻi kinautolu, ʻo folofola ange: “Ka ko e Fakafiemālié, ko e Laumālie Māʻoniʻoní, ʻa ia ʻe fekau ʻe he Tamaí ʻi hoku huafá, te ne akoʻi ʻa kimoutolu ʻi he meʻa kotoa pē, mo fakamanatuʻi ʻa kimoutolu ʻi he meʻa kotoa pē, ʻa ia kuó u lea ʻaki kiate kimoutolú.”
Ko e taha e ngaahi fatongia mahuʻinga ʻo e Laumālie Māʻoniʻoní ke fakatokanga, tataki, mo fakahinohinoʻi e tokotaha fakafoʻituitui kotoa pē ʻoku fanongo ki he kihiʻi leʻosiʻi ʻoku vanavanaiki ki he lotó. Hangē pē ko e hanga ʻe he palopalema ʻo e fanga foʻi tiupi ki he fetuʻutakí ʻo taʻofi ʻa e ngāue lelei ʻa e meʻangāue ki he fanongó, ʻe lava foki ke palopalema mo ʻetau fetuʻutaki fakalaumālie mo ʻetau Tamai Hēvaní, ʻo hoko ai ha ngaahi maʻuhala ʻe fakatuʻutāmaki pe ko e ʻikai lava ke talangofua ki Heʻene enginakí. Kuo hoko e aʻu mai ʻa e ʻinitanetí ke maʻu ai ha fakamatala lahi ange ʻi ha toe taimi kimuʻa. ʻE lava ʻe he meʻá ni ʻo tataki kitautolu ke tau fekumi ki he ngaahi tākiekina ʻa e māmaní kae ʻikai ko e ʻOtuá. Naʻe akonaki ʻa Palesiteni Lāsolo M. Nalesoni ʻo pehē, “ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní.”
ʻOku ou houngaʻia ʻi heʻetau takitaha malava ke maʻu ʻa e meʻafoaki ʻo e Laumālie Māʻoniʻoní ʻi he taimi naʻe hilifakinima ai kitautolú. Neongo ia, ka naʻe fakatokanga mai ʻa Palesiteni Tāleni H. ʻOakesi “ʻoku makatuʻunga ʻa e malava ke maʻu e ngaahi tāpuaki ʻoku fakafou ʻi he meʻafoaki ʻo e Laumālie Māʻoniʻoní ʻi he moʻui taau [pea] ʻʻoku ʻikai ke ʻafio ʻa e Laumālie ʻo e ʻEikí ʻi [ha] ngaahi temipale ʻoku taʻe-māʻoniʻoniʼ [Hilamani 4:24].”
ʻI heʻetau fili ke muimui ʻi he fakahinohino ʻa e kau palōfitá mo e kau ʻaposetoló, ʻoku tupulaki leva ʻetau malava ke maʻu e Laumālie Māʻoniʻoní ko hotau takaua maʻu peé. ʻOku ʻomi ʻe he Laumālie Māʻoniʻoní ʻa e mahino ʻi he taimi ke fai ai ha fili, ueʻi e ngaahi fakakaukau mo e ongo ʻoku fenāpasi mo e finangalo ʻo ʻetau Tamai Hēvaní. ʻOku mahuʻinga ki heʻetau tupulaki fakalaumālié ʻa hono maʻu ʻo e Laumālie Māʻoniʻoní ko hotau takaua maʻu pē.
Naʻe toki vahe mai kimuí ni ke u tokangaʻi e konifelenisi ʻa e siteiki Sōleki Kuleinisā Hihifó ʻi ʻIutā. Lolotonga e konifelenisi ko ʻení, ne u fetaulaki ai mo ha palesiteni fakasiteiki kuó ne fakatupulaki faivelenga ʻene malava ke ʻiloʻi e ngaahi ueʻi ʻa e Laumālie Māʻoniʻoní ʻo fakafou ʻi he moʻui angatonú mo e fakatomala fakaʻahó. Naʻá ma fakafekauʻaki ke ʻaʻahi ki ha ʻapi ʻe tolu ko ha konga ʻo ʻema ngāue fakaetauhí. ʻI he fakaʻosinga ʻo ʻema ʻaʻahi fakaʻosí, naʻá ma ʻiloʻi ʻoku toe pē ha miniti nai ʻe 30 pea kamata ʻema fakataha hono hokó. ʻI heʻema foki ki he siteiki senitaá naʻe maʻu ʻe Palesiteni Sesinati ha ueʻi ke ʻaʻahi ki ha toe fāmili ʻe taha. Naʻá ma fakatou loto ke talangofua ki he ueʻi ko ʻení.
Naʻá ma ʻalu leva ʻo ʻaʻahi ki he fāmili Sōnasí, ʻa ia ne ma ʻiloʻi ai ʻoku tokoto ʻa Sisitā Sōnasi ko ʻene puke. Naʻe mahino naʻá ne fiemaʻu ha tāpuaki lakanga fakataulaʻeiki. ʻI heʻene fakangofuá, naʻá ma faingāue kiate ia. ʻI he ʻamanaki ke ma mavahé, naʻe ʻeke mai ʻe Sisitā Sōnasi pe naʻá ma ʻiloʻi fēfē ʻokú ne fuʻu fiemaʻu ha tāpuakí. Ko hono moʻoní, naʻe ʻikai, ke ma ʻiloʻi. Ka neongo iá, naʻe ʻafioʻi ʻe heʻetau Tamai Hēvaní ʻene ngaahi fiemaʻú, naʻá Ne ʻafioʻi pea ueʻi ʻa Palesiteni Sesinati ke ʻaʻahi ki hono ʻapí. ʻI he taimi ʻoku tau talangofua ai ki he fakahinohino ʻa e kihiʻi leʻosiʻí, ʻoku tau mateuteu lelei ange ai ke ngāue fakaetauhi lelei ange kiate kinautolu ʻoku faingataʻaʻiá.
ʻOku ou fakamoʻoni ʻoku ʻi ai ha Tamai Hēvani ʻofa mo angaʻofa. Ko Sīsū Kalaisi ʻa e Fakamoʻui mo e Huhuʻi ʻo e faʻahinga ʻo e tangatá. ʻOku ou fakamoʻoni ki hono moʻoni ʻo e Fakalelei ʻa Sīsū Kalaisí pea ʻi heʻetau ako ke muimui ki he fakahinohino ʻa e Laumālie Māʻoniʻoní, te Ne tataki kitautolu ke tau fakatomala mo ngāue ʻaki e mālohi ʻo e Fakalelei ʻa e Fakamoʻuí ʻi heʻetau moʻuí. Ko Palesiteni Lāsolo M. Nalesoni ʻa e palōfita moʻoni mo moʻui ʻa e ʻEikí, pea ʻokú ne maʻu ʻa e ngaahi kī kotoa pē ʻo e lakanga fakataulaʻeikí ʻi he māmaní he ʻahó ni. ʻI he huafa ʻo Sīsū Kalaisí, ʻēmeni.