ʻOku Mateuteu Hono Toʻukupú ke Tokoniʻi Kitautolu
ʻI heʻetau kole tokoni kia Sīsū Kalaisi ‘i he tuí, te Ne ʻi ai maʻu pē.
ʻI heʻeku kei siʻí, naʻa mau ʻalu mo hoku fāmilí ʻo ʻeveʻeva ki he matātahi ʻi he matāfanga ʻo hoku fonua tupuʻanga ko Sileí. Naʻá ku vēkeveke ke fakaʻaongaʻi ha ngaahi ʻaho ke fiefia ai mo hoku fāmilí ʻi he faʻahitaʻu māfaná. Naʻá ku toe fiefia foki he naʻá ku fakakaukau ko ʻeku toki lava ʻeni ʻo kau fakataha mo hoku ongo taʻoketé ʻo fai ʻa e meʻa naʻá na faʻa fai ke maʻu ha fiefia ʻi he tahí.
ʻI ha ʻaho ʻe taha, naʻe ʻalu hoku ongo taʻoketé ʻo vaʻinga ʻi he feituʻu naʻe fasi mei ai ʻa e peaú, pea naʻá ku pehē kuó u fuʻu lahi mo matuʻotuʻa feʻunga ke muimui ʻiate kinaua. ʻI heʻeku ofi atu ki he feituʻu ko iá, naʻá ku fakatokangaʻi hake ʻoku lalahi ange ʻa e peaú ʻi heʻene ʻasi mei he matāʻutoʻutá. Naʻe fakafokifā pē ʻa e vave ʻa e haʻu ha foʻi peau ʻo taaʻi fakaʻohovaleʻi au. Naʻá ku ongoʻi hangē kuo puleʻi au ʻe he mālohi ʻo natulá, pea toho atu au ki he lolotó. Naʻe ʻikai ke u lava ʻo sio pe ongoʻi ha faʻahinga meʻa ke u fakamaʻunga ki ai he kuo liaki holo au ʻe he peaú. ʻI he kamata pē ko ia ke u fakakaukau kuo ngata ʻeku moʻui ʻi he māmaní, naʻá ku ongoʻi ha nima ʻokú ne fusi hake au ki ʻolunga. Naʻe faifai peá u lava ʻo sio ki he laʻaá mo fakatau ʻeku mānavá.
Naʻe fakatokangaʻi ʻe hoku taʻokete ko Kolotí ʻeku fie tangata lahí peá ne haʻu ʻo fakahaofi au. Naʻe ʻikai ke u mamaʻo mei he matāʻutoʻutá. Neongo naʻe ʻikai ke loloto ʻa e vaí, ka naʻá ku puputuʻu pea ʻikai ke u ʻiloʻi naʻá ku mei lava pē ʻo fakahaofi au. Naʻe talamai ʻe Koloti ʻoku fiemaʻu ke u tokanga pea kapau te u fiemaʻu ha tokoni, te ne lava ʻo akoʻi au. Neongo ʻa e ngaahi lita maʻanga tahi naʻá ku foló, ka naʻe mālohi ange ʻeku vilitaki mo e holi ke hoko ko ha tangata lahí, peá u pehē atu leva, “ʻIo.”
Naʻe talamai ʻe Koloti ʻoku fiemaʻu ke u kakau ʻo ʻohofi ʻa e peaú. Naʻá ku pehē loto pē he ʻikai ke u teitei lavaʻi ʻa e feinga tau mo e ngaahi fuʻu peau lalahí.
ʻI he aʻu mai ha fuʻu peau lahí, naʻe lea vave mai ʻa Koloti: “Sio mai kiate au; ko e anga ʻeni hono ʻaí.” Naʻe lele atu ʻa Koloti ki he foʻi peaú ʻo ne tulihopo fakahangatonu ki ai kimuʻa pea fasí. Naʻe toʻoa au ʻe heʻene tulihopó ʻo ʻikai ai ke u fakatokangaʻi ʻa e foʻi peau hono hokó. Ko ia ai, naʻe toe ʻaveʻi au ki he lolotó ʻo liaki holo ʻe he ngaahi mālohi ʻo natulá. Hili ha lau sekoni mei ai, naʻe ala mai ha nima, ʻo toe fusi hake au ki he fukahi tahí ke u mānava. Naʻe mole atu ʻeku ongoʻi fielahí.
ʻI he taimi ko ʻení, naʻe fakaafeʻi au ʻe hoku taʻoketé ke ma tulihopo fakataha. Fakatatau ki heʻene fakahinohinó, naʻá ku muimui kiate ia ʻo ma uku fakataha. Naʻá ku ongoʻi hangē kuó u ikunaʻi ʻa e pole faingataʻa tahá. Ko e moʻoni naʻe ʻikai ko ha meʻa faingofua ia, ka naʻá ku fai ia, mālō mo e tokoni mo e tā-sīpinga ʻa hoku taʻoketé. Naʻe tuʻo ua ʻene fakahaofi aú; naʻe fakahā mai ʻe heʻene tā-sīpingá ʻa e founga ke u fehangahangai ai mo ʻeku faingataʻaʻiá pea ikuna ʻi he ʻaho ko iá.
Kuo fakaafeʻi kitautolu ʻe Palesiteni Lāsolo M. Nalesoni ke tau fakakaukau fakasilesitiale, pea ʻoku ou loto ke muimui ki heʻene faleʻí ʻo fakaʻaongaʻi ia ki heʻeku talanoa fekauʻaki mo e faʻahitaʻu māfaná.
Ko e Mālohi ʻo e Fakamoʻuí ke ikunaʻi ʻa e Filí
Kapau te tau fakakaukau fakasilesitiale, ʻe mahino kiate kitautolu te tau fehangahangai ʻi heʻetau moʻuí mo ha ngaahi faingataʻa ʻoku ngali lalahi ange ia ʻi hotau ivi malava ke ikunaʻi kinautolú. ʻI heʻetau moʻui fakamatelié, kuo pau ke tau foua ʻa e ngaahi ʻoho ʻa e filí. Hangē ko e ngaahi foʻi peau naʻá ne fakamelemoʻi au ʻi he ʻaho māfana ko iá, ʻe lava ke tau ongoʻi ʻoku ʻikai hatau mālohi pea tau loto ke tukulolo ki ha ivi ʻoku mālohi ange. ʻE lava ʻe he “ngaahi peau kovi” ʻa e filí ʻo liaki takai holo kitautolu. Kae ʻoua naʻa ngalo ʻa e tokotaha ʻoku pule ki he ngaahi peau ko iá, pea ko hono moʻoní, ki he meʻa kotoa pē. Ko hotau Fakamoʻui ia ko Sīsū Kalaisí. ʻOkú Ne maʻu ʻa e mālohi ke tokoniʻi kitautolu ʻi he meʻa fakamamahi pe tūkunga faingataʻa kotoa pē. ʻOku tatau ai pē pe ʻoku tau ongoʻi ofi kiate Ia, te Ne kei lava pē ʻo tokoniʻi kitautolu ʻi hotau tūkunga lolotongá.
ʻI heʻetau kole tokoni kiate Ia ʻi he tuí, te Ne ʻi ai maʻu pē, pea ʻi he taimi pē ʻAʻaná, te Ne mateuteu mo finangalo ke puke hotau nimá ʻo fusi hake kitautolu ki ha feituʻu ʻoku malú.
Ko e Fakamoʻuí mo ʻEne Sīpinga Ngāue Fakaetauhí
Kapau te tau fakakaukau fakasilesitiale, te tau ʻiloʻi ko Sīsū Kalaisí ko ha sīpinga haohaoa ia ʻo e ngāue fakaetauhí. ʻOku ʻi ai ha sīpinga moʻotautolu ʻi he folofolá ki he taimi ʻokú Ne tokoni ai pe ko ʻEne kau ākongá ki ha taha ʻoku fiemaʻu tokoni, fakahaofi, pe ko ha tāpuaki ʻi he mafao mai honau nimá. Pea hangē pē ko ʻeku talanoá, naʻá ku ʻiloʻi naʻe ʻi ai pē hoku taʻoketé, ka naʻe ʻikai ke feʻunga pē ʻene ʻi ai maʻakú. Naʻe ʻiloʻi ʻe Koloti naʻá ku faingataʻaʻia, pea naʻá ne haʻu ʻo tokoni ke hiki hake au mei he vaí.
ʻOku tau faʻa fakaukaukau ʻoku fiemaʻu pē ke tau ʻi ai maʻa ha taha ʻoku fiemaʻu tokoni, ka ʻi he taimi lahi, ʻoku ʻi ai ha meʻa lahi ange ʻe lava ke tau fai. ʻE lava ke tokoniʻi kitautolu ʻe hano maʻu ha fakakaukau ʻoku taʻengatá ke tau maʻu ha fakahā ke tokoni kei taimi ki he niʻihi ʻoku faingataʻaʻiá. Te tau lava ʻo fakafalala ki he tataki mo e ueʻi ʻa e Laumālie Māʻoniʻoní ke ʻiloʻi ʻa e faʻahinga tokoni ʻoku fiemaʻú, ʻo tatau ai pē pe ko ha tokoni fakatuʻasino hangē ko ha fakafiemālie fakaeloto, meʻakai, pe tokoni ʻi he ngaahi ngafa fakaʻahó, pe tataki fakalaumālie ke tokoniʻi ʻa e niʻihi kehé ʻi heʻenau fonongá ke mateuteu, fakahoko, mo tauhi ʻa e ngaahi fuakava toputapú.
ʻOku Mateuteu ʻa e Fakamoʻuí ke Fakahaofi Kitautolu
Ko e ʻAposetolo pule ko Pitá, “naʻe ʻeveʻeva ia ʻi he tahí, ke ʻalu atu kia Sīsū … naʻe manavahē ia; pea kamata ngalo hifóo,”; pea naʻe “tangi ia, ʻo pehē, ʻEiki, fakamoʻui au.” Naʻe ʻafioʻi ʻe Sīsū ʻa e tui naʻe maʻu ʻe Pita ke haʻu kiate Ia ʻi he tahí. Naʻá Ne toe ʻafioʻi foki ʻa e manavahē ʻa Pitá. Fakatatau ki he talanoá, naʻe “mafao leva ʻa e nima ʻo Sīsuú ʻo ne puke ia,” peá Ne folofola ʻaki ʻa e ngaahi leá ni: “ʻA koe ʻoku siʻi hoʻo tuí, ko e hā ʻokú ke fakataʻetaʻetui aí?” Naʻe ʻikai ko ʻEne ngaahi leá ke tafuluʻi ʻa Pita ka ke fakamanatu kiate ia ko Ia, ko e Mīsaiá, naʻe ʻi ai tonu mo ia pea mo e kau ākongá.
Kapau te tau fakakaukau fakasilesitiale, te tau maʻu ʻa e fakapapau ʻi hotau lotó ko Sīsū Kalaisi moʻoni pē ʻa hotau Haoʻangá, ʻa hotau Taukapo ki he Tamaí, pea mo hotau Huhuʻí. ʻI heʻetau fakaʻaongaʻi ʻa e tui kiate Iá, te Ne fakahaofi kitautolu mei hotau tuʻunga hingá, ʻo ope atu ia ʻi hotau ngaahi faingataʻá, ngaahi vaivaí, mo e ngaahi fiemaʻu ʻi he moʻui fakatuʻasino ko ʻení, pea ʻomi ai kiate kitautolu ʻa e meʻaʻofa maʻongoʻonga taha ʻi he ngaahi meʻaʻofa kotoa pē, ʻa ia ko e moʻui taʻengatá.
ʻOku ʻIkai Teitei Liʻaki Kitautolu ʻe he Fakamoʻuí
Naʻe ʻikai ke liʻaki au hoku taʻoketé ʻi he ʻaho ko iá ka naʻá ne vilitaki ke u lava ʻo ako ʻa e founga ke u fai ia ʻiate au peé. Naʻá ne vilitaki pē, ʻo tatau ai pē kapau naʻe fiemaʻu ke ne fakahaofi tuʻo ua au. Naʻá ne vilitaki pē neongo naʻe ʻikai mahino kiate au ʻi he ʻuluaki feingá. Naʻá ne vilitaki ke u lava ʻo ikunaʻi ʻa e pole ko iá pea lavameʻa. Kapau te tau fakakaukau fakasilesitiale, te tau ʻiloʻi ʻe ʻi ai ʻa e Fakamoʻuí ʻi he lahi taha ʻe fiemaʻú ke fai ha tokoni kapau te tau loto ke ako, liliu, ikuna, matuʻuaki, pe lavameʻa ʻi ha faʻahinga meʻa pē te ne ʻomi ʻa e fiefia moʻoni mo taʻengatá ki heʻetau moʻuí.
Ko e Ongo Toʻukupu ʻo e Fakamoʻuí
ʻOku fakamanatua mai ʻe he folofolá ʻa e fakataipe mo e mahuʻinga ʻo e toʻukupu ʻo e Fakamoʻuí. ʻI Heʻene feilaulau fakaleleí, naʻe tukiʻi ʻa e fanga foʻi faʻó ki Hono toʻukupú ke fakamaʻu Ia ki he kolosí. Hili ʻEne Toetuʻú, naʻá Ne hā ki Heʻene kau ākongá ʻi ha sino haohaoa, ka naʻe kei ʻilonga pē ʻa e ngaahi mataʻifaʻó ʻi Hono toʻukupú ko ha fakamanatu ʻo ʻEne feilaulau taʻe-fakangatangatá. ʻE ʻi ai maʻu pē Hono toʻukupú maʻatautolu, neongo kapau ʻoku ʻikai ke tau lava ʻo sio pe ongoʻi ia ʻi he ʻuluaki taimí, koeʻuhí he naʻe fili Ia ʻe heʻetau Tamai Hēvaní ke hoko ko hotau Fakamoʻui, ko e Huhuʻi ʻo e faʻahinga kotoa ʻo e tangatá.
Maʻu ʻI Hotau ʻAofinimá, tā ʻe Jay Bryant Ward
Ko e Toʻukupu ʻo e ʻOtuá, tā fakatātaaʻi ʻe Yongsung Kim.
Kapau te u fakakaukau fakasilesitiale, ʻoku ou ʻiloʻi ʻoku ʻikai liʻekina kitautolu ʻi he moʻuí ni. Neongo kuo pau ke tau fehangahangai mo e ngaahi faingataʻá mo e ʻahiʻahí, ka ʻoku ʻafioʻi ʻe heʻetau Tamai Hēvaní ʻa e meʻa ʻoku tau malavá pea ʻokú Ne ʻafioʻi te tau lava ʻo fuesia pe ikunaʻi hotau ngaahi faingataʻá. Kuo pau ke tau fai hotau fatongiá pea tafoki kiate Ia ʻi he tui. Ko Hono ʻAlo ʻOfaʻanga ko Sīsū Kalaisí, ʻa hotau haoʻangá pea te Ne ʻi ai maʻu ai pē. ʻI Hono huafá, ʻa e huafa toputapu ʻo Sisū Kalaisí, ʻēmeni.