’A ora mai te au i tō ’outou mau ha’amaita’ira’a
’A ha’api’i mai nāhea te mau ’ōro’a o te autahu’ara’a ’e te mau parau fafau o te fafaura’a e fa’ati’a i te mana o te Atua ’ia tahe mai i roto i tō ’outou orara’a.
’Aita i maoro a’enei, ’ua fāri’i tā’u tāne o Greg i te hō’ē parau fa’a’ite ’o tē tītauhia te hō’ē tāpūra’a taiaha ’e e rave rahi ’āva’e te rapa’aura’a tāhīmio. Mai ia ’outou e rave rahi o tei fa’aruru i te hō’ē ā huru tupura’a, ’ua ha’amata ’oi’oi mātou i te pure nō te ani i te tauturu a te ra’i ’e te mana o te Atua. I te sābati i muri mai i te tāpūra’a o Greg, ’ua ’āfa’ihia mai te ’ōro’a mo’a i roto i tō mātou piha fare ma’i.
I taua taime ra, ’o vau ana’e tei rave i te ’ōro’a mo’a. Hō’ē pēha’a faraoa. Hō’ē hāpaina pape. I te fare purera’a, pinepine tō’u ferurira’a i te rōtahi i ni’a i te fa’anahora’a nō te ’ōperera’a i te ’ōro’a mo’a—te fa’aineinera’a, te ha’amaita’ira’a ’e te ’ōperera’a. I te reira rā avatea, ’ua feruri au i te hōro’a o te mana o te Atua ’o tei roa’a iā’u nā roto i te ’ōro’a mo’a iho ’e te parau fafau o te fafaura’a ’o tā’u e rave nei, ma te ravera’a i teie pēha’a faraoa ’e teie hāpaina pape. ’O te hō’ē taime teie ’ua hina’aro mau vau i te mana nō te ra’i. I rōpū i te hō’ē ’oto rahi, te rohirohi ’e te pāpū ’ore, ’ua uiui au iā’u iho nō ni’a i teie hōro’a ’o te fa’ati’a iā’u ’ia tāipu i roto i te mana nō ’ō mai iāna ra ’o tā’u e hina’aro ’ono’ono nei. Te ravera’a i te ’ōro’a mo’a ’ua fa’arahi i tō’u auhoara’a ’e te Vārua o te Fatu, ’o tei fa’ati’a iā’u ’ia tāipu i roto i te hōro’a o te mana o te Atua, ’oia ato’a te utuutura’a a te mau melahi ’e te pūai fa’ati’a a te Fa’aora nō te upo’oti’a.
’Aita vau i mana’o, ’ua ’ite a’ena vau ma teie māramarama rahi nā mua a’enei ē, e ’ere noa te ta’ata e fa’atere ra i te ’ōro’a i te mea faufa’a—’o te mea rā tā te ’ōro’a ’e tā tātou parau fafau o te fafaura’a e heheu mai, e ti’a ato’a ia tātou ’ia ha’apa’o maita’i. E fa’ati’a te mau ’ōro’a o te autahu’ara’a ’e te mau parau fafau o te fafaura’a i te Atua ’ia ha’amo’a ia tātou ’e ’ia fa’atupu i te mau ’ohipa māere i roto i tō tātou orara’a. Nāhea rā te reira ’ia tupu mai ?
’A tahi, e ti’a i te hō’ē ’ōro’a ’ia ravehia nā roto i te mana nō ’ō mai i te Tamaiti a te Atua, nō te fa’atupu mai i te mana o te Atua i roto i tō tātou orara’a. E mea faufa’a roa te fa’anahora’a nō te hōro’ara’a mai. ’Ua hōro’a te Metua i te mau tāviri ’e te ha’amanara’a ia Iesu Mesia nō te hi’o haere i te hōro’ara’a o tāna mau ’ōro’a o te autahu’ara’a. I raro a’e i tāna arata’ira’a, ’ia au i te fa’anahora’a o tāna autahu’ara’a, ’ua fa’atōro’ahia te mau tamaiti a te Atua nō te ti’a ’ei mono nō te Tamaiti a te Atua.
’A piti, ’aita tātou e rave noa i te mau parau fafau o te fafaura’a—e ti’a ia tātou ’ia ha’apa’o i te reira. I roto i te mau ’ōro’a e rave rahi o te ’evanelia, e rave tātou i te mau fafaura’a mo’a ’e te Atua ; ’ua parau fafau mai ’oia e ha’amaita’i ia tātou mai te mea e ha’apa’o tātou i te reira mau fafaura’a. ’Ua ta’a ānei ia tātou ē, nā te ’āmuira’a i te mau ’ōro’a o te autahu’ara’a ’e te ha’apa’ora’a i te mau parau fafau o te fafaura’a e fa’ati’a ia tātou ’ia tāipu i roto i te mana o te Atua ?
I taua avatea ra, ’ua uiui tō’u mana’o ē, ’ua ta’a maita’i ānei iā’u, te hō’ē tamāhine nō te fafaura’a a te Atua, nāhea ’ia tāpae i te hōro’a o te mana o te Atua nā roto i te mau ’ōro’a o te autahu’ara’a ’e ’ua ’ite mau ānei au nāhea te mana o te Atua e ’ohipa ai i roto iā’u.
I te matahiti 2019 ’ua hōro’ahia te hō’ē anira’a manihini a te peropheta i te mau vahine o te ’Ēkālēsia, ma te ha’api’ira’a ia tātou nāhea ’ia huti mai i te mana o te Fa’aora i roto i tō tātou orara’a. ’Ua ani mai te peresideni Russell M. Nelson ia tātou ’ia ’imi māite i Te Ha’api’ira’a Tumu ’e te mau Fafaura’a 25, hō’ē heheura’a i hōro’ahia ia Emma Smith i Harmony, Pennsylvania. Te fāri’ira’a i teie anira’a ’ua taui tō’u orara’a.
I te ’āva’e i ma’iri nei, ’ua fāri’i au i te hō’ē taime mana’o-’ore-hia e haere e māta’ita’i ia Harmony. I reira, i raro a’e i te mau tumu rā’au ’ērapa, i fa’aho’i-fa’ahou-hia mai ai te autahu’ara’a ia Iosepha Semita ’e ia Oliver Cowdery. I pīha’i iho noa mai i taua mau tumu rā’au ra, tē vai ra te ’ōpani tomora’a nō te fare o Iosepha ’e o Emma. I mua i te vāhi tahura’a auahi i roto i taua fare ra tē vai ra te hō’ē ha’amāramarama. ’Ua ti’a atu vau i mua i taua ha’amāramarama ra ’e ’ua uiui noa vau e aha rā ïa te mana’o o Emma, ’a hi’o noa ai ’oia i te mau tumu rā’au i rāpae.
I te ’āva’e Tiurai 1830, e 26 matahiti tō Emma ; e mea ’āpī roa ’oia. E toru matahiti ’e te ’āfa tōna fa’aipoipora’ahia. ’Ua pohe tāna ’aiū tamāroa–tāna tamari’i mātāmua. Tei raro noa mai tōna menema iti i te ’ē’a haerera’a, i pīha’i iho i tōna fare. ’A ti’a noa ai au i mua i taua ha’amāramarama ra, e ’ere i te mea fifi roa nō’u ’ia feruri e aha te mea i fa’a’ī i tōna mau mana’o. Pāpū maita’i tē ha’ape’ape’a nei ’oia nō tā rāua faufa’a moni, nō te hāmani-’ino-ra’a rahi ’o tē ha’amāta’u nei i tō rāua vai-pāruru-ra’a, tō rāua ananahi. ’E teie rā, tei te mau vāhi ato’a te ’ohipa a te Atua. ’Ua uiui ato’a ānei ’oia nō ni’a i tōna pārahira’a i roto i te fa’anahora’a, tāna ’ōpuara’a i roto i tōna [te Atua] bāsileia, ’e tōna fāito pūai i mua i te aro o te Atua ?
Tē mana’o nei au ’ua nā reira ’oia.
I te tahi noa a’e pae o te purūmu, ’ua fa’aho’ihia mai te hōro’a o te ha’amanara’a ’e te mau tāviri o te autahu’ara’a a te Atua i ni’a i te fenua nei. ’O te tau teie ’ua hina’aro mau Emma i te mana o te ra’i. I roto i te hō’ē ’oto rahi, te rohirohi ’e te pāpū ’ore, tē feruri nei au ē ’ua uiui Emma iāna iho nō ni’a i teie hōro’a o te autahu’ara’a a te Atua ’o tē nehenehe e ’īriti i te mana nō ’ō mai iāna [te Atua] ra ’o tāna i hina’aro ’ono’ono nei.
’Aita rā o Emma i ti’a noa i mua i taua ha’amāramarama ra ’e i te uiura’a.
’A ha’api’ihia ai te peropheta Iosepha nō ni’a i te huru o te mau tāviri, te mau tōro’a, te mau ’ōro’a, ’e e nāhea ’ia tauturu i roto i te tāvinira’a o te autahu’ara’a, ’ua hōro’a mai te Fatu iho, nā roto i tāna peropheta, i te hō’ē heheura’a ia Emma. ’Eiaha ia Emma te peresideni nō te Sōtaiete Tauturu nō Nauvoo—’ua hōro’ahia teie heheura’a ia Emma e 26 matahiti te pa’ari i Harmony. Nā roto i te heheura’a, e ha’api’i mai Emma nō ni’a i te ha’amo’ara’a o te ’ā’au ’e te tū’atira’a o te fafaura’a o tē fa’arahi i te ’aravihi o teie mau ’ōro’a o te autahu’ara’a, ’ia ’ohipa i roto i tōna orara’a.
’A tahi, ’ua fa’aha’amana’o te Fatu ia Emma i tōna ti’ara’a i roto i tāna (te Fatu] fa’anahora’a, ’oia ato’a ’o vai ’oia ’e nō vai mai ’oia—hō’ē tamāhine i roto i tōna [te Atua] bāsileia. ’Ua ani-manihini-hia ’oia ’ia « haere nā ni’a i te mau ’ē’a nō te parauti’a », hō’ē ’ē’a tē vai ra te mau ’ōro’a ’o tē ’īriti i te mana o te Atua mai te mea e ha’apa’o Emma i tāna mau fafaura’a.
’A piti, i roto i tō Emma tau ’oto rahi, ’ua hōro’a te Fatu i tāna [Emma] ’ōpuara’a. ’Aita Emma i riro noa ’ei ta’ata māta’ita’i i te Fa’aho’i-fa’ahou-ra’a mai ; ’ua riro ’oia ’ei tuha’a faufa’a roa i roto i te ’ohipa e tupu ra. E fa’ata’ahia ’oia « nō te ha’amāramarama atu i te mau pāpa’ira’a mo’a ’e nō te fa’aitoito i te ’ēkālēsia ». Tōna taime « e hōro’a[hia] nō te pāpa’ira’a, ’e nō te ha’api’ira’a mai ». ’Ua hōro’ahia ia Emma te hō’ē ti’ara’a mo’a nō te tauturu i te fa’aineine i te Feiā Mo’a ’ia ha’amori ; e fāri’ihia tā rātou mau hīmene i te Fatu mai te mau pure ’e e « pāhonohia te reira nā roto i te ha’amaita’ira’a i ni’a iho i tō rātou ra mau up’oo ».
Te hope’a, ’ua fa’ata’a mai te Fatu i te hō’ē fa’anahora’a nō te ha’amo’ara’a i roto i te ’ā’au ’o tē fa’aineine ia Emma nō te fa’ateiteira’a. « ’Ia ’ore ’oe ’ia rave i taua mau mea ra », ’ua fa’ata’a te Fatu iāna, « ’aita roa ïa ’oe e tae mai i te vāhi tā’u e pārahi nei ».
Mai te mea e tai’o māite tātou i te tuha’a 25, e ’ite tātou i te hō’ē haerera’a i mua faufa’a roa e tupu ra. E haere atu Emma mai tōna ti’ara’a ’ei hō’ē tamāhine i roto i te bāsileia ’ei « vahine mā’itihia » ’e i muri iho ’ei ari’i vahine. ’Ia tū’atihia te mau ’ōro’a o te autahu’ara’a a Aarona ’e a Melehizedeka ’e te ha’ap’ora’a i te mau parau fafau o tāna (Emma) mau fafaura’a, e fa’arahi atu ā tōna auhoara’a ’e te Vārua ’e te mau melahi, ma te fa’ati’a iāna ’ia tere tai nā roto i tōna orara’a ’e te arata’ira’a hanahana. Nā roto i tōna mana hanahana, e fa’aora te Atua i tōna (Emma) ā’au, e fa’arahi i tōna ’aravihi ’e e fa’ataui iāna ’ei huru ta’ata tāna i ’ite ’e e nehenehe ’oia e riro mai. ’E nā roto i te mau ’ōro’a o te autahu’ara’a a Melehizedeka, « te mana nō te huru Atua e fa’a’itehia mai ai » i roto i tōna orara’a, ’e e ’īriti te Fatu i te pāruru ’ia ti’a iāna (Emma) ’ia fāri’i i te māramarama nō ’ō mai iāna ra. Teie ïa te huru mai te aha te mana o te Atua ’ia ’ohipa ana’e i roto ia tātou.
’Ua ha’api’i te peresideni Russell M. Nelson :
« Te mau mea ato’a i tupu i [Harmony] e mau hope’a rahi ïa i roto i tō ’outou orara’a. E nehenehe te fa’aho’i-fa’ahou-ra’a mai o te autahu’ara’a, nā reira ato’a te parau a’o a te Fatu ia Emma, e arata’i ’e e ha’amaita’i ia ’outou tāta’itahi […]
« Te roa’ara’a te mana o te Atua i roto i tō ’outou orara’a, e tītauhia hō’ē ā mau mea tā te Fatu i fa’aue ia Emma ’e ia [tātou] tāta’itahi ’ia rave ».
’Ua tupu te mau mea faufa’a rahi i nā pae e piti o taua ha’amāramarama ra i Harmony, tae noa atu te heheura’a tei hōro’ahia i te vahine i mā’itihia ’o tā te Fatu i pi’i—hō’ē heheura’a ’o tē ha’apūai, ’o tē fa’aitoito ’e ’o tē ha’api’i ia Emma Smith, te tamāhine a te Atua.
I te hōro’ara’ahia i tā māua mo’otua tamāhine ’o Isabelle te hō’ē i’oa ’e te hō’ē ha’amaita’ira’a, ’ua ha’amaita’i tōna metua tāne iāna ma te hōro’ara’a i te hō’ē hāro’aro’ara’a o te autahu’ara’a ; ’a tāmau noa ’oia i te tupu i te rahi ’e ’ia ha’api’i mai i te ha’amaita’ira’a ’o tāna e amo i roto i tōna orara’a ; ’e ’ia tupu tōna fa’aro’o i roto i te autahu’ara’a ’a tāmau noa ai ’oia i te tupu rahi i roto i te māramarama.
E ’ere i te mea pinepine te hō’ē tamāhine iti ’ia ha’amaita’ihia nō te hāro’aro’a i te autahu’ara’a ’e ’ia ha’api’i mai nāhea teie mau ’ōro’a o te autahu’ara’a ’e te mau parau fafau o te fafaura’a i te tauturu iāna ’ia roa’a te mana o te Atua. ’Ua ha’amana’o rā vau ia Emma ’e ’ua feruri vau iho, nō te aha ē ’aita ? E fāito pūai tō teie tamāhine iti nō te riro mai ’ei vahine mā’itihia i roto i tōna [te Atua] bāsileia ’e i te hope’a ’ei ari’i vahine. Nā roto i tāna [te Atua] mau ’ōro’a o te autahu’ara’a ’e te ha’apa’ora’a i tāna mau parau fafau o te fafaura’a, e ’ohipa ai te mana o te Atua i roto ’e nā roto iāna nō te tauturu iāna ’ia upo’oti’a i ni’a i te mau mea ato’a tā te orara’a i fa’aherehere nōna ’e ’ia riro mai ’ei vahine tā te Atua i ’ite e nehenehe ’oia e riro mai. Teie te tahi mea ’o tā’u e hina’aro ’ia māramarama te tamāhine tāta’itahi i roto i te bāsileia.
« ’A ora mai te au i tō ’outou mau ha’amaita’ira’a ».
’A ha’api’i mai nāhea te mau ’ōro’a o te autahu’ara’a ’e te mau parau fafau o te fafaura’a ’ia fa’ati’a i te mana o te Atua ’ia tahe mai i roto i tō ’outou orara’a ma te pūai rahi maita’i a’e, ma te ’ohipara’a i roto ’e nā roto ia ’outou, ma te hōro’ara’a i te mau rāve’a ’e ma te fa’amauiha’ara’a ia ’outou nō te tāpae i tā ’outou fā ’e tō ’outou fāito pūai hope.
’A ’imi māite ’e ’a feruri hōhonu i te mau ’ōro’a o te autahu’ara’a a Aarona ’e a Melehizedeka, te mau parau fafau o te fafaura’a ’o tā tātou e rave nei ’e rātou tāta’itahi, ’e te mana o te Atua e roa’a ia tātou nā roto i te reira mau ’ōro’a.
’A ha’amana’o, e ’ere noa ’o te ta’ata e fa’atere ra i te ’ōro’a i te mea faufa’a ; ’o te mea rā tā te ’ōro’a ’e tā tā ’outou parau fafau o te fafaura’a e ’īriti mai, e tītau-ato’a-hia tō ’outou ha’apa’o maita’i.
’Ua riro te ravera’a i te pāne ’e te pape ’ei fa’aha’amana’ora’a tāhepetoma nō tōna [te Atua] mana ’ia ’ohipa i roto ia ’outou, nō te tauturu ia ’outou ’ia upo’oti’a. ’Ua riro te ’ahura’a i te ’ahu o te autahu’ara’a mo’a ’ei fa’aha’amana’ora’a tāmahana nō te hōro’a o tōna [te Atua] mana e ’ohipa ra i roto ia ’outou nō te tauturu ia ’outou ’ia riro mai.
E roa’a ia tātou pā’āto’a te hōro’a o te mana o te Atua.
I te mau taime ato’a ’a rave ai tātou i te ’ōro’a mo’a.
I te mau taime ato’a ’a tomo ai tātou nā te ’ūputa o te hiero.
’O teie te ’ohipa fa’ahiahia roa a’e nō tā’u sābati. Nō reira vau e fa’aherehere maita’i ai i tā’u parau fa’ati’a nō te hiero.
« Nō reira i roto i te mau ’ōro’a, te mana nō te huru Atua e fa’a’itehia mai ai ».
Tē fa’a’ite pāpū nei au nō teie hōro’a i te i’oa o Iesu Mesia, ’āmene.