E te feiā ’āpī tuha’a matahiapo ari’i ē
Tei ni’a te ti’aturi o te Atua ia ’outou, te mau tamari’i nō te fafaura’a nō te tauturu i tāna ’ohipa nō te ’āfa’ira’a i tāna mau tamari’i ato’a ma te pāruru i te fare iāna ra.
Elder Stevenson, e ’āmuira’a teie e’ita roa atu e mo’ehia.
E mea au roa nā tō māua ’utuāfare te hō’ē buka iti ’o te i’oa te Children’s Letters to God [Rata a te tamari’i i te Atua]. Teie te tahi mau hi’ora’a :
« E te Atua ē, e vaiiho ’oe i te ta’ata ’ia pohe ’e e hāmani ’oe i te mea ’āpī, nō te aha pa’i e’ita ’oe e tāpe’a noa ia rātou e vai nei ? »
« Nō te aha pa’i e ’ahuru noa ture tā ’oe, ’e tā mātou ha’api’ira’a ra e miriōni ïa ? »
« Nō te aha pa’i ’oe i tu’u i te pu’u tētati e ’īriti-fa’ahou-hia ho’i ? »
I teie mahana, ’aita e taime nō te pāhono i teie mau uira’a ato’a, e uira’a rā tā’u e fa’aro’o noa nei mai roto mai i te feiā ’āpī ’o tā’u e hina’aro e pāhono atu. Mai Ulaanbaatar i Monetōria, ē tae atu i Thomas i Idaho, hō’ē ā uira’a : « Nō te aha ? Nō te aha tītau-roa-hia i te feiā mo’a i te mau mahana hope’a ’ia ora i te orara’a ta’a ’ē i tō vetahi ? »
’Ua ta’a iā’u ē, e mea pa’ari ’ia ta’a ’ē ana’e tātou—nō te taure’are’a iho ā rā tei hina’aro roa i te ta’ata ’ia au mai ia ’outou. Te mau ta’ata ato’a tei hina’aro ’ia fa’ari’ihia rātou, e ’ua fa’arahi roa terā hina’aro i te fāito ’ino mau i teie tau nō te ao nūmeri, ma te rāve’a ha’apararera’a tōtiare ’e te hāmani ’ino nā ni’a i te natirara.
Nō reira, noa atu ā teie ’ume’umera’a, nō te aha mau te feiā mo’a e ora ai i te orara’a ta’a ’ē ? E rave rahi pāhonora’a maita’i : Nō te mea e tamari’i ’oe nā te Atua. Nō te mea ’ua fa’ahereherehia ’oe nō te mau mahana hope’a nei. Nō te mea e pipi ’oe nā Iesu Mesia.
’Aita rā terā pāhonora’a e fa’ata’a ’ē roa nei ia ’oe i te ta’ata. E tamari’i ana’e nā te Atua. Te mau ta’ata ato’a i ni’a i te fenua nei, ’ua tono-ana’e-hia i te mau mahana hope’a nei. ’Aita rā ho’i te mau ta’ata ato’a e ora nei i te Parau pa’ari ’aore rā te ture nō te vi’ivi’i ’ore mai tā ’oe e tūtava nei. E rave rahi pipi itoito nā te Mesia e ’ere i te melo nō teie ’Ēkālesia. ’Aita rā rātou e tāvini nei i te misiōni ’e ’aita rātou e rave nei i te mau ’ōro’a i roto i te fare a te Fatu nō tō rātou hui tupuna mai i ’oe na. E hau atu paha i reira—’e ’oia mau.
I teie mahana, tē hina’aro nei au e paraparau i te tahi atu ā tumu, e tumu faufa’a rahi i roto i tō’u orara’a. I te matahiti 1988, ’ua hōro’a te hō’ē ’āpōsetolo ’āpī, tōna i’oa ’o Russell M. Nelson, i te hō’ē a’ora’a i te fare ha’api’ira’a Brigham Young University, te upo’o parau « Thanks for the Covenant [Māuruuru nō te fafaura’a]. » I roto i te reira, ’ua fa’ata’a mai ’o Elder Nelson, i terā tau ē, ’ia fa’a’ohipa tātou i tō tātou ti’amāra’a mōrare nō te rave ’e nō te ha’apa’o i te mau fafaura’a ’e te Atua, e riro mai tātou ’ei fatu ’āi’a nō te fafaura’a mure ’ore tā te Atua i rave ’e tō tātou mau tupuna o te mau tau tu’ura’a ato’a. E parau-ato’a-hia ē, e riro mai tātou ’ei « tamari’i nō te fafaura’a. » Nā te reira e fa’ata’a ’ē ia tātou. Nā te reira e ha’amatara ia tātou i te hō’ē ā mau ha’amaita’ira’a tā tō tātou mau tupuna tāne ’e mau tupuna vahine i fa’ari’i, mai te tuha’a matahiapo.
Te tuha’a matahiapo ! ’Ua fa’aro’o a’ena paha ’outou i terā parau. ’Ua hīmene ato’a tātou i te hīmene nō ni’a i te reira : « E te feiā ’āpī tuha’a matahiapo ari’i ē, tāmau ā, tāmau ā, tāmau ā ! » E parau pūai te reira. E aha rā ïa te aura’a ?
I roto i te Faufa’a Tahito, ’ia fa’aru’e te metua tāne, nā tāna tamaiti tuha’a matahiapo te hōpoi’a e aupuru i tōna metua vahine ’e tōna mau tuahine. E fa’ari’i tōna nā taea’e i tā rātou tufa’a ’āi’a ’e e reva rātou nō te ha’amau i tō rātou orara’a, ’aita rā te tamaiti tuha’a matahiapo e reva atu. E fa’aipoipo ’oia ’e e fa’ati’a ’oia i tōna iho ’utuāfare, e fa’aea mai rā ’oia ē hope noa atu tōna pu’e mahana nō te fa’atere i te mau ’ohipa nō te fenua fatuhia e tōna metua tāne. Nō teie hōpoi’a hau atu, e hōro’ahia ’oia te tahi atu ā tuha’a nō te tufa’a ’āi’a. ’Ua rahi roa ānei te anira’a iāna ’ia fa’atere ’e ’ia aupuru ia vetahi ’ē ? ’Aita rā, ’ia hi’ohia te tuha’a ’āi’a hau atu tāna i fa’ari’i.
I teie mahana, ’aita tātou e paraparau nei nō te ’āna’ira’a fānaura’a i roto i te mau ’utuāfare tāhuti nei, ’aore rā i te ti’ara’a o te hete i roto i te Faufa’a Tahito. Tē paraparau nei tātou nō te tufa’a ’āi’a tā ’outou e fa’ari’i ’ei fatu ’āi’a ’e ’o te Mesia maoti te tā’amura’a fafaura’a tā ’outou i mā’iti e rave ’e ana ’e ’e tō ’outou Metua i te Ra’i. ’Ua rahi roa ānei tā te Atua tītaura’a ia ’outou ’ia ora i te orara’a ta’a ’ē i tāna mau tamari’i ’ē atu, ’ia ti’a ia ’outou ’ia arata’i maita’i a’e ’e ’ia tāvini maita’i a’e ia rātou ? ’Aita rā, ’ia hi’ohia te mau ha’amaita’ira’a—pae mātēria ’e pae vārua—tei hōro’ahia ia ’outou.
E tuha’a matahiapo tō ’outou ra, e mea maita’i a’e ïa ’outou ia vetahi ’ē ? ’Aita, terā rā tē tītauhia nei ’outou ’ia tauturu ia vetahi ’ē ’ia ha’amaita’i ia rātou. E tuha’a matahiapo tō ’outou ra, ’ua mā’itihia ïa ’outou ? ’Ē, ’eiaha rā nō te fa’atere nā ni’a ia vetahi ’ē ; ’ua mā’itihia ’outou nō te tāvini ia rātou. E tāpa’o fa’a’ite ānei tō ’outou tuha’a matahiapo nō te here o te Atua ? ’Ē, hau atu rā, e tāpa’o fa’a’ite nō tōna ti’aturi.
E mea ’ē te herera’a, e mea ’ē roa atu te ti’aturira’a. I roto i te buka iti Nō te pūai o te feiā ’āpī, tē tai’o nei tātou : « Tei ni’a te ti’aturi o te Metua i te Ra’i ia ’oe. E mau ha’amaita’ira’a rahi tāna i hōro’a ia ’oe, mai te ’īra’a o te ’evanelia ’e te mau ’ōro’a mo’a ’e te mau fafaura’a ’o tē ru’uru’u ia ’oe iāna ra, ’e ’o tē fa’atae i tōna mana i roto i tō ’oe orara’a. I te reira mau ha’amaita’ira’a tē vai ato’a ra te tahi atu hōpoi’a. ’Ua ’ite ’oia ē, e haere ia ’oe e fa’atupu i te tahi ’ohipa ta’a ’ē i roto i te ao nei, e tītauhia ïa i te rahira’a taime, ’ia ta’a ’ē tā ’oe mau peu i tā tō te ao nei. »
E nehenehe e fa’aau i tō tātou orara’a tāhuti nei i te hō’ē pahī rahi i ni’a iho te Atua i tono ai i tāna mau tamari’i ato’a nō te fano mai te hō’ē pae i te tahi atu pae. ’Ua rau te rāve’a i ni’a i te tere nō te ’apo i te ha’api’ira’a, nō te tupu i te rahi, nō te ’oa’oa ’e nō te haerera’a i mua, ’ua pu’e ato’a rā te ataatara’a. ’Ua here te Atua i tāna mau tamari’i ’e tē māna’ona’o nei ’oia i tō rātou maita’i. ’Aita ’oia i hina’aro ’ia mo’e noa atu te hō’ē o rātou, nō reira tē tītau manihini nei ’oia i te feiā tei ineine te mana’o ’ia riro mai ’ei melo nō tōna feiā horopahī—’o ’outou ïa. Nō tā ’outou mā’itira’a e rave ’e e ha’apa’o i te mau fafaura’a, tē pūpū nei ’oia i tōna ti’aturi. Tē ti’aturi nei ’oia ia ’outou ’ei mea ta’a ’ē ’e te huru ’ē ’e te fa’ata’ahia nō te ’ohipa faufa’a roa tāna i ti’aturi ia ’outou ’ia rave.
’A feruri na ! Tei ni’a te ti’aturi o te Atua ia ’outou—i roto i te mau ta’ata ato’a i ni’a i te fenua nei, ’o te mau tamari’i nō te fafaura’a, ’o tāna mau melo horopahī—nō te tauturu i tāna ’ohipa nō te ’āfa’ira’a i tāna mau tamari’i ato’a ma te pāruru i te fare iāna ra. E’ita iho ā ïa e māere i parau ai te peresideni Brigham Young : « Tē hi’o mai ra te mau melahi o te ra’i ra i teie nei pu’e ta’ata. »
’Ia hi’o ’outou ’ati a’e i ni’a i teie pahī rahi tei parauhia te fenua, e ’ite paha ’outou i te tahi mau ta’ata tē pārahi ra i ni’a i te pārahira’a tārava ’e tē inu ra, tē perē ra i roto i te mau fare perēra’a moni, tē ’ahu ra i te ’ahu hā’aro roa, tē fa’ahe’e fa’aea ’ore ra i te rima i ni’a i te niuniu ’e tē ha’amāu’a roa nei i te taime i ni’a i te mau ha’uti tāireuira. ’Eiaha e uiui ē : « Nō te aha vau e’ita e nehenehe e rave i terā mea ? », e ha’amana’o maoti ē e ’ere ’outou i te horopātete noa. E melo horopahī ’outou. E mau hōpoi’a tā ’outou ’aita tā te mau horopātete. Mai tā te tuahine Ardeth G. Kapp i parau ē : « E’ita ’outou e tano ’ei ta’ata [fa’aora] mai te mea hō’ē ā tō ’outou hi’ora’a i tō te tahi atu mau ta’ata hapu i te pae miti. »
’E hau ’outou ’a fa’atopa ai i te mōrare nō te tahi atu mau tītaura’a ato’a, e ha’amana’o na ē e fa’ari’i te mau horopahī i te hō’ē mea ’aita te tahi atu e fa’ari’i : e ho’onara’a. ’Ua parau ’o Elder Neil L. Andersen : « E mana pae vārua te ho’onara’a nō tei parauti’a », mai te « ti’aturira’a rahi a’e, te ha’apāpūra’a rahi a’e ’e te ti’aturi rahi a’e. » Mai ia Aberahama i tahito ra, ’ua fa’ari’i ’outou i te poupou ’e te hau rahi a’e, te parauti’a rahi a’e ’e te ’ite rahi a’e. E ’ere te ho’onara’a i te hō’ē noa aora’i i te ra’i ra ’e te mau purūmu hāmanihia i te ’auro. E mea ’ōhie paha nō te Metua i te ao ra ’ia hōro’a noa ia ’outou i te mea ato’a nāna ra. Tōna hia’ai, ’o te tauturura’a ïa ia ’outou ’ia riro hope mai iāna te huru. ’E nō reira, e mea tītau rahi tā ’outou mau parau fafau ia ’outou, nō te mea mai te reira te Atua e fa’arahi a’e ia ’outou.
« E anira’a rahi te reira i ni’a i te hō’ē noa atu ta’ata, e ’ere rā ’outou i te hō’ē noa atu ta’ata » ! E feiā ’āpī tuha’a matahiapo ari’i ’outou. Tō ’outou tā’amura’a fafaura’a ’e te Atua ’e ’o Iesu Mesia, e tā’amura’a ïa nō te here ’e nō te ti’aturi i reira e matara ai nō ’outou te fāito rahi a’e nō tō rāua maita’i rahi—tā rāua tauturu hanahana, te hōra’a nō te pūai ’e te mana ha’amana. E ’ere terā mana i te mana’o noa ē, maita’i ē, ’aore rā e ’ere i te tarito’a ’aore rā te parau tohu nā ’oe iho e fa’atupu. E mea pāpū te reira.
’Ia rave ’outou i tā ’outou mau hōpoi’a tuha’a matahiapo, e’ita ’outou e vai ’āta’a. E ’ohipa te Fatu o te ’ō vine nā muri ia ’outou. Tē ’ohipa piri ra ’outou ’e Iesu Mesia. Ma te fafaura’a ’āpī tāta’itahi—’e ’a hōhonu noa ai tō ’outou tā’amura’a ’e āna—e piri noa atu ā ’outou te tahi i te tahi ē tae noa atu ’ua tā’amu-pāpū-hia. E ’ite ’outou i roto i terā tāpa’o mo’a nō tōna maita’i rahi, i te hia’ai ’e te pūai nō te ora roa ’ino mai tā te Fa’aora i ora—e mea ta’a ’ē i te ao nei. E noa’a ia ’outou te reira nō te mea tei roto ’outou i te rima o Iesu Mesia !
I roto i te 2 Nephi 2:6 tē tai’o nei tātou : « Nō reira, e tae mai te fa’aorara’a nā roto i te Mesia Mo’a ; ’ua ’ī ho’i ’oia i te maita’i ’e te parau mau. » Nō te ’īra’a o te parau mau i roto iāna, tē hi’o nei ’oia ia ’outou i tō ’outou vaira’a mau—te mau hapehape, te mau paruparu, te mau tātarahapara’a ’e te tā’āto’ara’a. Nō te ’īra’a o te maita’i rahi i roto iāna, tē hi’o nei ’oia ia ’outou mai tā ’outou e nehenehe e riro mau. E haere mai ’oia i te vāhi tei reira ’outou ’e tauturu ’oia ia ’outou ’ia tātarahapa ’e ’ia ha’amaita’i ia ’outou, ’ia upo’oti’a ’e ’ia riro mai.
« E te feiā ’āpī tuha’a matahiapo ari’i ē, tāmau ā, tāmau ā, tāmau ā ! » Tē parau pāpū nei au ē, tē herehia nei ’outou—’e tē ti’aturihia nei—i teie mahana, i nā matahiti e 20 i muri nei ē a muri noa atu. ’Eiaha e ho’o i tō ’outou tuha’a matahiapo nō te hō’ē mā’a pipi. ’Eiaha e ’aitaui i te mau mea ato’a nō te aore. ’Eiaha e vaiiho i te ao nei ’ia taui ia ’outou, ’ua fānauhia ho’i ’outou nō te taui i te ao nei. I te i’oa o Iesu Mesia, ’āmene.