« ’O vau nei ho’i ïa »
’Ua tāmau noa te aroha mau o te Mesia—’o tē vai pāpū ’ia vai ’ati noa te ta’ata i te hina’aro o te Atua—’e e tāmau noa ā.
E mahana sābati teie ’e ’ua putuputu tātou nō te paraparau nō te Mesia ’e nōna tei fa’asataurohia. ’Ua ’ite au ē, tē ora nei tō’u Tāra’ehara.
E hi’o na i teie ’ohipa nō te hepetoma hope’a o te orara’a tāhuti nei o Iesu. E naho’a tei ta’iruru mai, mai te mau fa’ehau nō Roma ’e tā rātou ta’o ’e tā’aihia i tā rātou ’o’e. Arata’ihia e te mau fa’atere o te mau tahu’a rarahi ma te rama i te rima, teie nu’u pāpū, e ’ere tōna tere te harura’a i te hō’ē ’oire. I teie pō tē ’imi ra rātou i te hō’ē noa ta’ata, e ta’ata ’aita i mātauhia ē e mauha’a tama’i ’aore rā ’ua ha’api’ipi’ihia ’ei fa’ehau ’aore rā ’ua ’aroaro i te hō’ē noa atu taime o tōna orara’a tā’āto’a.
I te pirira’a mai te mau fa’ehau, nō te pāruru i tāna mau pipi, ’ua ’ūne’e atu Iesu i mua ma te parau : « ’O vai tā ’outou e ’imi na ? » Pāhono mai nei rātou : « ’O Iesu o Nazareta. » ’Ua parau atu ra Iesu : « ’O vau nei ho’i ïa […] Tei te paraura’a atu ’oia ia rātou ra ē, ’O vau nei ho’i ïa, ’ōtohe atu ra rātou i muri ’e hi’a tūfera atu ra i raro i te repo. »
Iā’u nei, ’o te hō’ē o te mau rēni ha’aputapū roa a’e o te mau pāpa’ira’a mo’a ato’a. Ta’a ’ē noa atu te tahi mau parau, tē parau ’āfaro mai nei te reira iā’u ē, te ti’a-noa-ra’a i mua i te aro o te tamaiti a te Atua—te Iehova rahi o te Faufa’a Tahito, te Tīa’i māmoe maita’i o te Faufa’a ’Āpī, ’aita roa atu e mauha’a tama’i—te fa’aro’o-noa-ra’a i te reo o teie Ha’apūra’a vero, teie Ari’i nō te hau, ’ua nava’i roa ïa nō te ha’ameho i te fa’atītīāhemo, ma te ’ōta’a ia rātou i roto i te huanane ’e te mana’ora’a ē, ’āhani iho ā rātou i fa’aea noa i te fare nō te horoi i te merēti i terā pō.
Ma’a mahana noa nā mua atu, i te tomora’a ’oia i roto i te ’oire ma te hosana, « ’āueue ihora taua ’oire ato’a ra », tē parau nei te pāpa’ira’a, i te uira’a « ’O vai teie ? » ’Ia mana’o vau i terā parau « ’O vai teie », ’o te uira’a ato’a paha ïa tā teie mau fa’ehau rapu e ui ra !
E ’ere te pāhonora’a i terā uira’a i ni’a i tōna hōho’a, i tohu ho’i Isaia ’a hitu tenetere nā mua atu ē « ’aita ’ōna huru, te nehenehe, ’ia ha’apa’o atu tātou iāna, ’aita ho’i ’ōna e hōho’a, hina’aro atu ai tātou iāna. » Pāpū roa ïa, e ’ere te reira i ni’a i tōna pu’era’a ’ahu ’ana’ana, ’aore rā i roto i tāna tao’a rahi, ’aita ho’i tāna. E’ita ato’a e nehenehe e hi’o i te ha’api’ipi’ira’a tōro’a tāna i fa’ari’i i roto i te mau sunago i reira, ’aita ho’i e fa’a’itera’a ē ’ua ha’api’i mau ’oia i reira, noa atu ā pa’i i tōna ’āpīra’a ’ua ti’a iāna ’ia ha’amāmū i te mau pāpa’i parau ’e te mau ha’api’i ture tei haere i te ha’api’ira’a ha’apa’arira’a, i māere roa ho’i rātou i tāna ha’api’ira’a tumu mai te ha’api’ira’a « ma te mana. »
Mai terā ha’api’ira’a i roto i te hiero ’e tāna tomora’a hanahana i roto ia Ierusalema ’e i teie tāpe’ara’a ti’a ’ore i te hope’a, mātarohia Iesu i te tu’uhia i roto i te mau ’ohipa fifi ’e te tītaha pinepine roa, ’e ’ua upo’oti’a noa ’oia—e mau upo’oti’ara’a ’aita tā tātou e tātarara’a maori rā te ’ĀTĪNŪ [ADN] atua.
Noa atu rā, i te roara’a o te tua’ā’ai, e rave rahi tei fa’a’ōhie, ’e tei fa’anoa i tā tātou hi’ora’a iāna ’e tāna fa’a’itera’a ’o vai ’oia. ’Ua parau poto rātou i tōna parauti’a ’ei mōteti, i tāna ha’avāra’a ’ei riri, i tōna aroha ’ei peu vaiiho noa. Tītau-roa-hia ia tātou ’eiaha e hapa i teie mau parau fa’a’ōhie nōna ’o tē fa’a’ōhie i te hi’o-’ore-ra’a i te mau ha’api’ira’a tā tātou e au ’ore. Nā reira ato’a teie « fa’aitira’a ma’au » i te ravehia nō tōna huru rahi roa ’ino : tōna here.
I roto i tāna misiōni i te tāhuti nei, ’ua ha’api’i Iesu ē e piti fa’auera’a rahi. ’Ua ha’api’ihia te reira i roto i teie ’āmuira’a ’e e ha’api’ihia ē a muri noa atu : « Hina’aro ’oe i tō Atua [’e] aroha atu ’oe i tō ta’ata tupu. » Mai te peu e pe’e tātou i te Fa’aora ma te tu’utu’u ’ore i roto i teie nā ture faufa’a ’e te tū’ati māite, e mea ti’a ia tātou ’ia tāpe’a māite i te mea tāna i parau mau. Te mea mau tāna i parau, ’oia ho’i : « ’Ua hina’aro ’outou iā’u ra, e ha’apa’o i tā’u parau. » I terā iho pō ’ua parau ’oia ē : « E aroha ’outou ia ’outou iho, mai iā’u e aroha atu ia ’outou na. »
I roto i terā mau pāpa’ira’a mo’a, e mea faufa’a roa ’ino te mau pereota ti’a e fa’ata’a nei i te here Mesia mau—tei parauhia i te tahi taime te aroha mau.
E aha te reira fa’ata’ara’a ? ’Ua nāhea Iesu i te herera’a i te ta’ata ?
’A tahi, ’ua here ’oia « ma [tōna] ’ā’au ato’a, [te] pūai, [te] mana’o ’e [te] itoito ho’i », i noa’a ai tōna ’aravihi ’ia fa’aora i te māuiui hōhonu roa ’ino ’e ’ia parau atu i te parau pāpū pa’ari roa ’ino. Nō te ha’apoto, ’o ’oia tē nehenehe e fa’atere i te hāmani maita’i rahi ’a onoono ato’a ai i ni’a i te parau mau, i te hō’ē ā taime. Mai tā Lehi i parau i roto i tāna ha’amaita’ira’a i tāna tamaiti ia Iakoba : « E tae mai te fa’aorara’a nā roto i te Mesia Mo’a ; ’ua ’ī ho’i ’oia i te maita’i ’e te parau mau. » Maoti tōna here e tauahira’a fa’aitoito ’ia tītauhia ana’e, ’e e ’āu’a ’ava’ava ’ia tītauhia te reira ’ia horomi’ihia. Nō reira e tāmata tātou i te here—ma tō tātou ’ā’au ato’a, te pūai, te mana’o ’e te itoito—nō te mea mai te reira ’oia e here nei ia tātou.
Te piti o te huru o te aroha mau hanahana o Iesu, ’o tōna ïa ha’apa’ora’a i te mau parau ato’a ’o tē parauhia mai e te vaha o te Atua, ma te fa’atū’ati noa i tōna hina’aro ’e tāna ravera’a i ni’a i terā a te Metua i te ao ra.
I te taera’a mai ’oia i te ’api fenua nō te pae tō’o’a o te rā i muri i tōna ti’afa’ahoura’a, ’ua parau te Mesia i te ’āti Nephi : « Inaha, ’o vau nei ’o Iesu Mesia […] ’Ua oti tā’u inura’a i tō roto i te ’āu’a ’ava’ava i hōro’ahia mai e te Metua iā’u ra […] nā roto i te reira ’ua rave māite au i tō te Metua hina’aro […] mai te mātāmua mai ā.
I roto i te mau rāve’a rau tāna e nehenehe e fa’a’ite ’o vai ’oia, ’ua ha’amata Iesu ma te parau i tōna ha’apa’ora’a i te hina’aro o te Metua—’aita ïa e hi’ora’a ē, ’aita i maoro a’enei, i roto i tōna hora fifi roa a’e, mai te huru ē ’ua fa’aru’e-roa-hia teie Tamaiti fānau tahi a te Atua e tōna Metua. ’Ua tāmau noa te aroha mau o te Mesia—’o te mea pāpū ’ia vai ’ati noa te ta’ata i te hina’aro o te Atua—’e e tāmau noa ā, e ’ere i te mau mahana ’ōhie noa ’e te au, i te mau mahana iho ā rā e mea pōiri roa a’e ’e te fifi roa a’e.
E « ta’ata mātaro i te ’oto » ’o Iesu, tē parau nei te mau pāpa’ira’a mo’a. ’Ua nā roto ’oia i te rumaruma, te rohirohi, te hepohepo ’e te vai-’āta’a-ra’a ri’ari’a rahi. I teie mau taime ’e i te mau taime ato’a, ’aita te here o Iesu e hape, ’aita ato’a tā tōna Metua. I terā huru here pa’ari—te huru ’o tē fa’ahi’o, ’o tē ha’afaufa’a ’e ’o tē ’ōpere—e’ita ato’a tō tātou nei e hape.
Nō reira, mai te peu i te tahi taime, rahi noa atu ’outou i te tāmata, rahi noa ato’a atu te huru fifi ’ia tāpae ; mai te peu ’a tāmata ai i te ha’a i ni’a i tō ’outou mau fifi ’e tō ’outou mau hape, ’a fā ato’a mai te hō’ē ta’ata ’aore rā te hō’ē mea tei fa’aoti roa i te ha’afifi i tō ’outou fa’aro’o ; mai te peu, ’a ha’a itoito ai tātou, ’a ha’atumu ato’a ai te mau taime mata’u i roto ia ’outou, ’a ha’amana’o ē mai te reira ato’a nō te tahi o te feiā ha’apa’o maita’i roa a’e ’e te fa’ahiahia o te mau ’anotau ato’a. ’A ha’amana’o ato’a ē, e pūai i roto i te ra’i nui ātea tei fa’aoti roa e pāto’i i te mau mea maitata’i ato’a tā ’outou e tāmata i te rave.
Nō reira, i roto i te fāna’o ’e te veve, i roto i te ha’apopoura’a ’ōmo’e ’e te fa’ahapara’a i mua i te ta’ata, i roto i te tuha’a hanahana o te Fa’aho’i-fa’ahou-ra’a mai ’e te mau peu huru ’ē a te ta’ata nei ’o tē ō mai iho ā, e tāpe’a tātou i tā tātou ’avei’a ’e te ’Ēkālesia mau a te Mesia. Nō te aha ? Nō te mea nā muri i tō tātou Tāra’ehara, ’ua tāpa’o tātou ia tātou nō te tau ha’api’ira’a tā’āto’a—’aita e fa’aea noa i te uiuira’a ’ōmuara’a poto mātāmua, e haere rā i te hi’opo’ara’a hope’a. Te mea ’oa’oa i roto i te reira, ’oia ho’i, ’ua hōro’a mai te Fa’atere ha’api’ira’a i te mau buka pāhonora’a hou te ha’api’ira’a e ha’amata ai. Hau atu, ’ua pu’e noa te feiā fa’aa’o nō te fa’aha’amana’o ia tātou i teie mau pāhonora’a i terā ’e terā tāpe’ara’a i te roara’a o te tere. Terā rā, pāpū iho ā ïa ē e’ita te hō’ē a’e mea e haere mai te peu e ma’iri noa tātou.
« ’O vai tā ’outou e ’imi na ? » Ma tō tātou ’ā’au ato’a e pāhono tātou : « ’O Iesu o Nazareta » ’Ia parau ’oia ē : « ’O vau nei ho’i ïa », e tu’u tātou i te turi i raro ma te fā’i ē ’o ’oia te Mesia ora, ’o ’oia ana’e tei ’aufau nō tā tātou mau hara, tē amo ra ’oia ia tātou, noa atu ā ’ua mana’o tātou ē, ’ua fa’aru’e ’oia ia tātou. ’Ia ti’a tātou i mua iāna ’e ’ia ’ite ho’i i te mau pēpē i tōna nā rima ’e te ’āvae, e ha’amata tātou i te māramarama e aha te aura’a nōna ’ia amo i tā tātou mau hara ’e ’ia mātau i te māuiui, ’ia ha’apa’o hope roa i te hina’aro o tōna Metua—teie mau mea ato’a, nō tōna ïa here tāfetafeta ’ore ia tātou. Te fa’a’itera’a ia vetahi ’ē i te fa’aro’o, te tātarahapara’a, te bapetizora’a, te hōro’a nō te Vārua Maita’i ’e te fa’ari’ira’a i tō tātou mau ha’amaita’ira’a i roto i te fare o te Fatu—nā teie « mau parau tumu mātāmua ’e te mau ’ōro’a mātāmua » niu i te hope’a e heheu i tō tātou here i te Atua ’e i te ta’ata tupu ’e e fa’a’ite ma te ’oa’oa i te huru o te ’Ēkālesia mau a te Mesia.
Te mau taea’e ’e te mau tuahine, tē parau pāpū nei au ē ’o Te ’Ēkālesia a Iesu Mesia i te Feiā Mo’a i te mau Mahana Hope’a nei te faura’o tā te Atua i tu’u mai nō tō tātou fa’ateiteira’a. E parau mau te ’evanelia tāna e ha’api’i ra, ’e i te autahu’ara’a e ti’ahia ai e ’ere te reira i te hāmanira’a ’ē. Tē parau pāpū nei au ē ’o Russell M. Nelson te peropheta a tō tātou Atua, mai ia rātou nā mua atu iāna ’e rātou i muri mai iāna. ’Ia tae i te hō’ē mahana, e fa’atae atu terā arata’ira’a peropheta i te hō’ē u’i ’ia ’ite i tō tātou Ve’a nō te ora ’ia pou mai, mai « te uira e ’anapa i te hiti’a o te rā », e tuō ai tātou : « Iesu nō Nazareta. » Ma te rima toro a muri noa atu, te rima nō te here ha’avare ’ore, e pāhono mai ’oia : « ’O vau nei ho’i ïa. » ’O tā’u ïa parau fafau ma te mana ’āpōsetolo ’e te ha’amanara’a i tōna i’oa mo’a, ’oia Iesu Mesia, ’āmene.