« ’O ’outou nei tō’u mau hoa »
Te parau a te Fa’aora, « ’o ’outou nei tō’u mau hoa », mai te hō’ē ïa pi’ira’a māramarama nō te patu i te mau tā’aira’a teitei a’e ’e te mo’a a’e i rotopu i te mau tamari’i ato’a a te Atua.
I roto i te hō’ē ao tei ’ī i te mārōra’a ’e te ’āmahamahara’a, i reira te mau a’oraa tīvira e monohia’i ’e te ha’avāra’a ’e te au-’ore-ra’a, ’e ’ua fa’ata’a-’ē-hia te mau auhoara’a nā roto i terā ’e terā pupu, ’ua ’ite au ē, tē vai nei te hō’ē hi’ora’a māramarama, te ’ōhie ’e te hanahana e ti’a ai ia tātou ’ia fāriua atu nō te ’ite i te hō’ēra’a, te here ’e te rirora’a ’ei melo. Taua hi’ora’a ra ’o Iesu Mesia ïa. Tē fa’a’ite pāpū nei au ē, ’o ’oia te tāhō’ē rahi.
E mau hoa tātou nōna
I te ’āva’e Tītema 1832, ’a « ’ite-maita’i-hia ai » te mau « fifi i rotopū i te mau nuna’a » hau atu i te mau huru taime ato’a mai te taime ’a ha’amauhia ai te ’Ēkālesia, ’ua putuputu mai te feiā fa’atere feiā mo’a i te mau Mahana Hope’a nei i Kēterani (Ohio) nō te hō’ē ’āmuira’a. ’Ua pure rātou ma te « fa’ata’a ’ē te tahi ’e te tahi ’e ma te reo pūai i te Fatu nō te heheu mai ia [rātou] i tōna hina’aro ». ’Ei fāri’ira’a i te mau pure a teie mau melo ha’apa’o maita’i i roto i te mau taime fifi rahi, ’ua tāmāhanahana te Fatu ia rātou, ma te parau e toru taime i te Feiā Mo’a e toru parau pūai : « tō’u mau hoa ».
E tau roa tō Iesu Mesia pi’ira’a i tōna mau pipi ha’apa’o maita’i e mau hoa nōna. ’Ahuru ma maha taime i roto i Te Ha’api’ira’a Tumu ’e te mau Fafaura’a, ’ua fa’a’ohipa te Fa’aora i te ta’o ra hoa nō te fa’ata’a i te hō’ē auta’atira’a mo’a ’e te tao’a rahi. ’Aita vau e paraparau nei nō ni’a i te ta’o hoa mai tā te ao nei e fa’ata’a ra, ’oia ho’i te fāito a te rāve’a tūreiara’a sotiare ’aore rā, te « J’aime » [Mea au nā’u]. ’E’ita te reira e nehenehe e haruhia i roto i te hō’ē hashtag ’aore rā te hō’ē nūmera i ni’a ia Instagram e ’aore rā, i ni’a ia X.
Parau mau, i tō’u ’āpīra’a, tē ha’amana’o nei au i te mau ’āparaura’a ri’ari’a i tō’u fa’aro’ora’a i taua mau parau māuiui ra « E riro paha tāua ’ei hoa noa ? » e ’aore rā, « E fa’aea noa tāua mai terā te huru, ’ei hoa ». ’Aita hō’ē a’e vahi i roto i te mau papa’ira’a mo’a a fa’aro’o ai tātou iāna i te paraura’a ē, « E hoa noa ’outou nō’u ». ’Ua ha’api’i mai rā ’oia ē, « ’Ia hōro’a te ta’ata i tōna iho ora nō tōna ra mau tau’a, ’aita roa e ta’ata aroha ’ē atu i te reira ». ’E « ’o ’outou ïa ’o tā tō’u Metua i hōro’a mai iā’u nei ; ’o ’outou nei tō’u mau hoa ».
E mea māramarama te mana’o : tē tai’o nei te Fa’aora ia tātou tāta’itahi ’e tē ara nei i ni’a ia tātou. E ’ere teie arara’a i te mea ’ha’apa’ora’a ’ore ’aore rā i te mea faufa’a ore. E mea hope’a ’ore rā, e mea fa’ateitei, ’e e mea mure ’ore. Tē hi’o ra vau i te parau a te Fa’aora « ’o ’outou nei tō’u mau hoa » mai te hō’ē pi’ira’a māramarama nō te patu i te mau tā’aira’a teitei a’e ’e te mo’a a’e i rotopū i te mau tamari’i ato’a a te Atua « ’ia riro tātou ’ei hō’ē ». E rave tātou i te reira ma te ha’aputuputu ia tātou nō te ’imi i te mau rāve’a nō te tāhō’ē ia tātou ’e te hō’ē mana’o rirora’a nō te tā’āto’ara’a.
Hō’ē tātou i roto iāna
’Ua fa’a’ite nehenehe maita’i te Fa’aora i te reira i roto i tāna pi’ira’a « ’ia haere mai, pe’e mai iā’u ». ’Ua fa’a’ohipa ’oia i te mau ō ’e te mau huru ta’ata tāta’itahi o te hō’ē pupu pipi rau nō te pi’i i tāna mau ’āpōsetolo. ’Ua pi’i ’oia i te feiā rava’ai, te mau Zelote, te mau taea’e tei ’itehia nō tō rātou pūai, ’e tae noa’tu i te hō’ē ta’ata tītau tute. Nā tō rātou ti’aturira’a i te Fa’aora ’e tō rātou hina’aro ’ia fāriu atu Iāna ra i tāhō’ē ia ratou. ’Ua hi’o rātou Iāna, ’ua ’ite i te Atua nā roto Iāna, ’e « fa’aru’e ihora rāua i tā rāua tau ’ūpe’a i reira ra ’e ’ua pe’e atura Iāna ».
’Ua ’ite ato’a vau e mea nāhea te patura’a i te mau tā’aira’a teitei ’e te mo’a a’e i te ’āmui ia tātou ’ei hō’ē. ’Ua ha’amaita’ihia tā’u vahine ’o Jennifer, ’e ’o vau nei i te ’atu’atura’a i tā māua nau tamari’i e pae i roto i te ’oire nō Niu Ioka. I roto i taua ’oire rahi ra, ’ua fa’atupu māua i te mau tā’aira’a faufa’a ’e te mo’a ’e te feiā tāpiri mai te fa’aeara’a, te mau hoa nō te fare ha’api’ira’a, te mau hoa ’ohipa, te feiā fa’atere fa’aro’o, ’e te mau hoa feiā Mo’a.
I te ’āva’e Mē 2020, i te taime a fifi ai te ao nei i te pararera’a te hō’ē ma’i pe’e nā te ao nei, ’ua putuputu te mau melo o te Tōmite nō te mau Ta’ata Fa’atere nō te ’Oire nō New York i roto i te hō’ē putuputura’a i tītau-’oi’oi-hia. ’Aita e tārena ’ohipa. ’Aita e manihini ta’a ’ē. E anira’a noa ’ia putuputu ’āmui ’e ’ia tāu’aparau nō ni’a i te mau fifi tā mātou pā’āto’a e fa’aruru ra ’ei ti’a fa’atere nō te fa’aro’o. Nō fa’a’ite noa maira te Pū nō te arata’ira’a i te mau ma’i ē, ’ua riro tō mātou ’oire ’ei pū nō te ati COVID-19 i roto i te fenua Marite. Te aura’a nō te reira, ’aita ïa e putuputura’a fa’ahou. ’Aita fa’ahou e putuputu ’āmui.
Nō teie mau ti’a fa’atere fa’aro’o, te ’īritira’a i tā rātou iho tāvinira’a, te putuputura’a a te ’āmuira’a, ’e te purera’a i te mau hepetoma ato’a, ’ua riro te reira ’ei ’ati rahi. Tā mātou pupu iti—te hō’ē cardinal, te ’orometua fa’aro’o, te rabbi, te imam, te ’orometua a’o, te MonSeigneur ’e te hō’ē peresibutero—’ua fa’aro’o, ’ua tāmāhanahana ’e ’ua turu ïa mātou i te tahi ’e te tahi. ’Aita mātou i fa’atumu i ni’a i tō matou mau ta’a-’ē-ra’a, ’ua hi’o rā mātou i te mau mea hō’ē ā tā mātou. ’Ua paraparau mātou nō ni’a i te mau mea e nehenehe e tupu ’e i muri iho nō ni’a i te mau mea pāpū. ’Ua putuputu mātou ’e ’ua pāhono i te mau uira’a nō ni’a i te fa’aro’o ’e te tau nō a muri a’e. ’E i muri iho ’ua pure mātou. ’Auē tā mātou pure.
I roto i te hō’ē ’oire huru rau tei ’ī i te mau peu tumu fifi ’e te pāto’i, ’ua ’ite mātou i tō mātou mau ta’a-’ē-ra’a i te topatopara’a ’a putuputu ai mātou ’ei mau hoa ma te hō’ē reo, te hō’ē ’opuara’a, ’e te hō’ē pure.
’Aita mātou i hi’o fa’ahou i te tahi ’e te tahi nā ni’a i te ’amura’ama’a, i ni’a rā i te ra’i te tahi ’e te tahi. ’Ua fa’aru’e mātou i te mau putuputura’a ato’a i muri mai ma te auhō’ē rahi atu ’e ma te ineine nō te rave i tā mātou mau « ope » ’e ’ia haere e rave i te ’ohipa. Te ’ohipa ’āmui i tupu mai ’e te tāvinira’a i hōro’ahia i te mau tausani ta’ata nō New York, ’ua ha’api’i mai te reira iā’u ē, i roto i te hō’ē ao o tē tītau ra i te ’āmahamaha, te fa’aātea’ē, ’e te fa’ata’a’era’a, te vai noa ra e rave rahi a’e mau mea o te tāhō’ē ia tātou i te mau mea e fa’a’amahamaha ia tātou. ’Ua ha’api’i mai te Fa’aora ē,« ’Ia tāhō’ē ; ’e mai te mea ’aita ’outou e riro ’ei hō’ē ra, e ’ere ho’i ’outou nō’u nei ».
E te mau taea’e ’e te mau tuahine, e ti’a ia tātou ’ia fa’aea i te ’imi i te mau tumu nō te fa’a’amahamaha ia tātou, ’ia ’imi rā i te mau rāve’a ’ia « hō’ē tātou ». ’Ua ha’amaita’i ’oia ia tātou i te mau hōro’a ’e te mau huru ta’a ’ē mau o tē tītau manihini ’ia ha’api’i mai mai roto mai i te tahi ’e te tahi ’e xte tupura’a o te ta’ata iho. Pinepine au i te parau i tā’u mau piahi i te fare ha’api’ira’a tuatoru ē, mai te mea ē, e rave au i tā ’outou e rave ra, ’e e rave ’outou i tā’u e rave ra, ’aita tātou e hina’aro i te tahi ’e te tahi. Nō te mea rā ē, ’aita ’outou e rave i tā’u e rave ra ’e ’aita vau e rave i tā ’outou e rave ra, e hina’aro tātou i te tahi ’e te tahi. ’E nā taua hina’aro ra e ’āmui ia tātou. Te fa’a’amahamahara’a ’e te upo’oti’ara’a, o te ’opuara’a ïa a te ’enemi nō te ha’amou i te mau auhoara’a, te mau ’utuāfare ’e te fa’aro’o. ’O te Fa’aora tē tāhō’ē nei.
Nōna tātou
Te hō’ē o te mau ha’amaita’ira’a i fafauhia o « te rirora’a ’ei hō’ē » o te hō’ē ïa mana’o pūai nō te rirora’a ’ei melo. ’Ua ha’api’i ’o Elder Quentin L. Cook ē, « te auraa nō te rirora’a ’ei melo mau, o te hō’ēra’a ïa ’e te Mesia ».
’Aita i maoro a’enei, i tō’u terera’a ’e tō’u ’utuāfare i Ghana, i te pae tō’o’a o te rā o te fenua Afirita, ’ua fa’ahiahia vau i te hō’ē peu tumu nō reira. I tō mātou taera’a i te hō’ē fare purera’a ’aore rā i te hō’ē fare, ’ua fāri’ihia mātou nā roto i te mau parau ra « mānava ia ’outou ». ’Ia hōro’ahia mai te ma’a, e parau mai tō mātou ta’ata fāri’i maita’i ē, « Tē tītau-manihini-hia ra ’outou ». ’Ua hōro’ahia teie mau aroha ’ōhie ma te ’opuara’a ’e te mana’o mau. Fāri’i-poupou-hia ’outou. Tītau-manihini-hia ’outou.
E tu’u ato’a mātou i te reira mau fa’ahitira’a parau i ni’a i te mau ’ōpani o tā mātou fare purera’a. Terā rā, e’ita e nava’i noa te tāpa’o Mānava i te mau rātere. Tē fāri’i māhanahana ra anei tātou i te mau ta’ata ato’a e tomo mai nā roto i te ’ūputa ? Te mau taea’e ’e te mau tuahine, ’eiaha e pārahi noa i ni’a i te mau pārahira’a. E ti’a ia tātou ’ia ha’apa’o i te pi’ira’a a te Fa’aora ’ia patu i te mau tā’aira’a teitei ’e te mo’a a’e e te mau tamari’i ato’a a te Atua. E ti’a ia tātou ’ia ora i tō tātou fa’aro’o ! Pinepine tō’u metua tāne i te fa’aha’amana’o mai iā’u ē, te pārahi-noa-ra’a i ni’a i te hō’ē pārahira’a i te mahana sābati, ’e’ita te reira e fa’ariro ia ’outou ’ei kerisetiano maita’i, mai te ta’otora’a i roto i te hō’ē fare vaira’a pere’o’o, ’e’ita te reira e fa’ariro ia ’outou ’ei pere’o’o.
E ti’a ia tātou ’ia ora i tō tātou orara’a ’ia ’ore tō te ao nei ’ia ’ite mai ia tātou, ’ia ’ite rā iāna nā roto ia tātou. E’ita te reira e tupu i te Sābati ana’e. E tupu te reira i roto i te fare toa, i te vāhi tītōra’a mōrī, i te putuputura’a a te fare ha’api’ira’a, te putuputura’a o te feiā hō’ē ā aroā fa’aeara’a, ’e te mau vāhi ato’a i reira te mau melo o tō tātou ’utuāfare tei bāpetizohia ’e tei ’ore i bāpetizohia e rave ai i te ’ohipa ’e e ora ai.
Tē ha’amori nei au i te Sābati ’ei ha’amana’ora’a ē, e hina’aro tātou te tahi i te tahi ’e e hina’aro ’āmui tatou Iāna. Tā tātou mau ō ’e mau tarēni ta’a ’ē o tē fa’ata’a ’ē nei ia tātou i te ao nei, e tāhō’ē te reira ia tātou i roto i te hō’ē vāhi mo’a. ’Ua pi’i mai te Fa’aora ia tātou ’ia tauturu te tahi i te tahi, ’ia fa’ateitei te tahi i te tahi, ’e ’ia ha’amaita’i te tahi i te tahi. Teie tāna i rave i tōna fa’aorara’a i te vahine e toto tahe noa tōna,tōna tāmāra’a i te lepera tei tāparu i tōna aroha,tōna a’ora’a i te ari’i ’āpī ’o tei ui e aha atu ā tāna e nehenehe e rave,tōna herera’a ia Nikodemo tei ’ite terā rā, ’ua hi’a i roto i tōna fa’aro’o,e tōna pārahira’a i pīha’i iho i te vahine i te ’āpo’o pape, ’aita ho’i te reira i au i te peu tumu o taua ’anotau ra, terā rā, ’ua fa’a’ite ’oia iāna i tāna misiōni Mesia. Nō’u nei, o te ’Ēkālesia teie—te hō’ē vāhi nō te putuputu ’e nō te fa’aora, nō te ha’amaita’i ’e nō te fa’atumu fa’ahou. Mai tā te peresideni Russell M. Nelson i ha’api’i : « Te [’ūpe’a o te] ’evanelia, ’o te ’ūpe’a rahi roa a’e ïa i te ao nei. ’Ua ani manihini te Atua i te tā’ato’ara’a ’ia haere mai iāna ra […] Tē vai ra te pārahira’a nō te tā’āto’ara’a ».
’Ua fārerei paha te tahi mau ta’ata i te mau ’ohipa o tē fa’atupu i te mana’o ē, e ’ere ’outou nō roto i te reira pupu. Hō’ē ā parau poro’i a te Fa’aora nō ’outou ’e nō’u : « E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora. » Te ’evanelia a Iesu Mesia, o te vāhi maita’i roa ïa nō tātou. Te haerera’a i te fare purera’a, tē hōro’a nei te reira i te ti’aturira’a nō te mau mahana maita’i a’e, te fafaura’a ē, e ’ere ’outou ana’e, ’e te hō’ē ’utuāfare o te hina’aro ia tātou mai ia tātou e hina’aro ia rātou. Tē parau ra ’o Elder D. Todd Christofferson ē, « Te hō’ēra’a ’e te Metua, te tamaiti ’e te Vārua Maita’i, pāpū maita’i ē, te reira te hope’a i roto i te parau nō te rirora’a ». Tē hōro’a nei au i te hō’ē parau mau ’e te hō’ē tītau-manihini-ra’a mure ’ore i te mau ta’ata ato’a ’o tei fa’aru’e ’e ’o tē ’imi nei i te rāve’a nō te ho’i mai : Nō teie pupu ta’ata iho ā ’outou. ’A ho’i mai. ’Ua tae i te taime.
I roto i te hō’ē ao ’aimārō ’e te ’āmahamaha, tē fa’a’ite pāpū nei au ē, ’o te Fa’aora ’o Iesu Mesia te ta’ata tāhō’ē rahi. Tē ani manihini nei au ia tātou tāta’itahi ’ia ha’apa’o i te tītau-manihini-ra’a a te Faaora ’ia « riro ’ei hō’ē » ’e ’ia parau ma te mata’u ’ore mai tāna i nā reira ato’a, « ’O ’outou nei tō’u mau hoa ». Nā roto i te i’oa mo’a o Iesu Mesia, ’āmene.