’Ia mā ’oe
E fa’ati’a te tātarahapara’a i te mau mahana ato’a ia tātou ’ia ’ite i te arata’ira’a a te Fatu nā roto i te Vārua Maita’i.
I te paera’a o tō’u matahiti, tē ha’uti ra vau i te tu’e pōpō e tō’u mau hoa i muri mai i te fare purera’a i roto i tō’u ’oire iti i te Fenua ’Īvoiri. Tē ha’amana’o maita’i ra vau i te pi’ira’a a te ’orometua i tāna ’āmuira’a ’ia tāmā i tō rātou mau ’ahu nō te fa’aineine i te taera’a mai o te Fa’aora. ’Ei tamari’i, ’ua rave pāpū vau i teie pi’ira’a. ’Ua horo vitiviti au i te fare ia tō’u nā ’āvae na’ina’i ’e ’ua tāparu vau i tō’u metua vahine ’ia tāmā i tō’u mau ’ahu ’ia ti’a iā’u ’ia mā ’e ’ia ineine nō te taera’a mai o te Fa’aora i te mahana i muri mai. Noa atu te fē’a’a o tō’u metua vahine nō te ho’i-rū-ra’a mai o te Fa’aora, ’ua horoi ’oia i tō’u ’ahu nehenehe roa a’e.
’Ia po’ipo’i a’e, ’ua ’ō’omo vau i te ’ahu haumi ’e ’ua tīa’i māite i te fa’aarara’a nō te taera’a mai o te Fa’aora. ’A tere noa ai te mahana ’e nō te mea ’aita hō’ē a’e ’ohipa i tupu, ’ua fa’aoti au e haere i te fare purera’a. ’Ua oto roa vau i te ’itera’a ē, ’aita e ta’ata i roto i te fare purera’a ’e ’aita te Fa’aora i tae mai. E nehenehe ’outou e feruri i tō’u mau mana’o ’a ho’i marū noa ai au i te fare.
E rave rahi matahiti i muri mai, ’a fa’ari’i ai au i te mau ha’api’ira’a misiōnare nō te fa’aineine i te tomo i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua tai’o vau i te mau parau i muri nei : « ’E ’aita roa te hō’ē mea vi’ivi’i e ō i roto i tōna bāsileia ; nō reira ’aita roa te hō’ē mea e ō atu i roto i tōna fa’aeara’a, maori rā ’o rātou ’o tei tāmā i tō rātou mau ’ahu i roto i tō’u ra toto, ’e nō tō rātou fa’aro’o, ’e te tātarahapa i tā rātou mau hara ato’a, ’e tō rātou ha’apa’o maita’i ē tae noa atu i te hope’a. »
’Ua tauturu te ha’amāramaramara’a tā’u i fāna’o i taua taime ra ’ia ta’a te parau mau faufa’a ’o tā’u i ’ore i māramarama i tō’u ’āpīra’a. ’Ua niuhia te poroi a te ’orometua i ni’a i te faufa’ara’a o te vi’ivi’i ’ore i te pae vārua. ’Ua fa’aitoito ’oia i te ’āmuira’a ’ia ’imi i te tātarahapa, ’ia rave i te mau tauira’a i roto i tō rātou orara’a, ’e ’ia fāriu i te Fa’aora nō te fa’aorara’a.
’Ua ’ite tō tātou Metua i te Ao ra i tō tātou tere i te tāhuti nei ’e i te fifi o te hara i roto i tō tātou orara’a. E māuruuru rahi tō’u i te mea ē ’ua hōro’a mai ’oia i te hō’ē Fa’aora nā te tāra’e i tā tātou mau ’ōfatira’a ture. Nā roto i te tusia Tāra’ehara a te Fa’aora, e nehenehe tātou tāta’itahi e tātarahapa ’e e ’imi i te fa’a’orera’a hara ’e ’ia riro mai ’ei mea mā. E mea faufa’a te tātarahapa, te hō’ē parau tumu niu o te ’evanelia, nō tō tātou hotura’a pae vārua ’e tō tātou itoito ’a rātere ai tātou nā roto i te mau tāmatara’a o te orara’a.
I roto i te ’āmuira’a rahi nō ’Ēperēra 2022, ’ua ani te peresideni Russell M. Nelson i te mau melo ato’a o te ’Ēkālesia ’ia ’ite i te ’oa’oa o te tātarahapara’a i te mau mahana ato’a. ’Ua nā ’ō ’oia :
’Eiaha na e mata’u ’aore rā e fa’atāere i te tātarahapara’a. E ’oa’oa Sātane i tō ’outou ’ati. ’A ha’apoto noa. ’A ti’avaru i tāna fa’aurura’a i rāpae i tō ’outou orara’a. ’A ha’amata i teie mahana nō te ’ite i te ’oa’oa nō te ti’avarura’a i te ta’ata tino. Tē here tāmau nei te Fa’aora ia tātou, ’ia tātarahapa ana’e iho ārā tātou […]
« Mai te mea tē mana’o ra ’outou ē, ’ua ātea roa ’aore rā ’ua maoro roa ’outou i rāpae i te ’ē’a nō te fafaura’a ’e ’aita e rāve’a nō te ho’i mai, e ’ere roa atu ïa i te parau mau ».
Mai te mea ē tē vai ra hō’ē mea ’aita ’outou i tātarahapa hope roa, tē fa’aitoito atu nei au ia ’outou ’ia ha’apa’o i te pi’ira’a a te peresideni Nelson ’eiaha e fa’atāere i tō ’outou tātarahapara’a. E tītau paha te reira i te tahi itoito nō te rave i teie ’ohipa ; e nehenehe rā vau e ha’apāpū ia ’outou ē ’ua hau atu i te ’ite ta’ata nei te ’oa’oa e roa’a mai nā roto i te tātarahapara’a mau. Nā roto i te tātarahapara’a, e ha’amāmāhia tā tātou hōpoi’a nō te mana’o fa’ahapa ’e e monohia e te hō’ē mana’o hau ’e te ’aihau. ’A tātarahapa mau ai tātou, e ha’amo’ahia ïa tātou nā roto i te toto o te Fa’aora, ō tē fa’arahi i tō tātou ’itera’a i te mau muhumuhu ’e te mau fa’aururaa a te Vārua Maita’i.
’Ua fānauhia tō’u hoa mure ’ore e te hō’ē māhōhā tari’a ’e nō reira, e ti’a iāna ’ia ’ō’omo i te aumero tari’a. E nehenehe te hu’a repo ’e te hou e ha’afifi i te terera’a o teie mau mātini, ’e nō reira, i te mau po’ipo’i ato’a e hi’opo’a vau iāna ’ia tāmā maita’i i te mau uaua hou ’a ’ō’omo ai i te mau tao’a. E fa’aore teie peu ’ōhie ’e te tāmau i te repo, te haumi, ’aore rā te fa’arirora’a ’ei pape, ma te ha’amaita’i atu ā i tōna ’aravihi nō te fa’aro’o ’e nō te tāu’aparau. ’Ia ’ore ’oia e ha’apa’o i teie peu i te mau mahana ato’a, e fifi ïa tōna ’aravihi ’ia fa’aro’o i te roara’a o te mahana ; E mo’e marū noa te parau ’e i te hope’a, e riro ïa ’ei mea faufa’a ’ore. Mai te tāmāra’a tāmahana i tōna mau aumero tari’a e fa’ati’a iāna ’ia fa’aro’o pāpū, e fa’ati’a te tātarahapara’a i te mau mahana ato’a ia tātou ’ia ’ite i te arata’ira’a a te Fatu nā roto i te Vārua Maita’i.
I te hope’a o te misiōni a te Fatu i te tāhuti nei ’e hou tōna revara’a atu i te ’Ō nō Getesemane, ’ua fa’aineine ’oia i tāna mau pipi ’ia fa’aruru i te mau tāmatara’a e tae mai. ’Ua tāmarū ’oia ia rātou ma te parau e : « Nā te Fa’aa’o ra, nā te Vārua Maita’i ra, ’o tā te Metua e tono mai ma tō’u nei i’oa ra, nāna e ha’api’i mai ia ’outou i te mau mea ato’a ; ’e e fa’a’ite fa’ahou mai ho’i ia ’outou i te mau parau ato’a tā’u i parau atu ia ’outou na ».
Te hō’ē o te mau ’ohipa faufa’a roa a te Vārua Maita’i ’o te arara’a ïa, ’e te arata’ira’a i te ta’ata ato’a e fa’aro’o i te fa’aurura’a. Mai te mau uaua fifi o te aumero e nehenehe e fa’ataupupu i te tere maita’ira’a, e nehenehe ato’a tō tātou aura’a pae vārua e tō tātou Metua i te Ao ra e ha’afifihia, ’o tē arata’i atu i te mau mana’o hape ’aore rā i te ’orera’a e ha’apa’o i tāna mau a’o. Nā roto i te fāra’a mai te natirara, mea ’ōhie a’e ’ia fāna’o i te mau ha’amāramaramara’a i nā mua a’e. E nehenehe te reira e arata’i ia tātou ’ia fāriu i ni’a i te ao nei nō te ani i te arata’ira’a ’eiaha rā i te Atua. ’Ua ha’api’i mai te peresideni Russell M. Nelson, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i. »
Tē māuruuru nei au ē e nehenehe tātou tāta’itahi e fa’ari’i i te hōro’a o te Vārua Maita’i i te taime tātou i ha’amauhia ai. ’Ua fa’aara mai rā te peresideni Dallin H. Oaks ē, « te mau ha’amaita’ira’a e roa’a nā roto i te hōro’a o te Vārua Maita’i, ’ua niuhia ïa i ni’a i te parau ti’a [’e] ‘e ’ore roa te Vārua o te Fatu e pārahi i roto i te mau hiero vi’ivi’i [Helamana 4:24] ».
’Ia mā’iti pāpū tātou ’ia pe’e i te arata’ira’a a te mau peropheta ’e te mau ’āpōsetolo, e rahi atu ā tō tātou ’aravihi ’ia fa’ari’i i te Vārua Maita’i ’ei hoa tāmau. E hōro’a mai te Vārua Maita’i i te māramarama i roto i te mau fa’aotira’a, ma te fa’atupu i te mau mana’o ’e te mau ’itera’a e tū’ati i te hina’aro ’o tō tātou Metua i te Ao ra. E mea faufa’a roa te fa’ari’ira’a i te Vārua Maita’i ’ei hoa tāmau nō tō tātou tupura’a pae vārua.
’Aita i maoro, ’ua tonohia vau nō te peresideni i te hō’ē ’āmuira’a titi i te titi nō Roto Miti Granger West i Utaha. I reira, ’ua fārerei au i te hō’ē peresideni titi tei fa’ahotu māite i tōna ’aravihi nō te hāro’aro’a i te muhumuhu a te Vārua Maita’i nā roto i te orara’a parauti’a ’e te tātarahapara’a i te mau mahana ato’a. ’Ei tuha’a nō tā māua mau tūtavara’a nō te tāvinira’a, ’ua fa’anaho māua i te mau fārereira’a i roto e toru ’utuāfare. Te otira’a tā māua fārereira’a hope’a, ’ua toe ia māua fātata e 30 minuti hou tā māua ’ohipa i muri iho. I ni’a i te ’ē’a ho’ira’a i te pū o te titi, ’ua fa’ari’i te peresideni Chesnut i te hō’ē fa’aurura’a e haere e fārerei i te tahi fa’ahou ’utuāfare. ’Ua fa’ari’i māua to’opiti ’ia pe’e i teie muhumuhu.
’Ua fārerei māua i te ’utuāfare Jones, i reira māua i te ’itera’a i te tuahine Jones e tārava ra i ni’a i te ro’i nō te ma’i. E mea pāpū ē ’ua hina’aro ’oia i te hō’ē ha’amaita’ira’a a te autahu’ara’a. Nā roto i tāna parau fa’ati’a, ’ua rave māua i te reira i ni’a iāna. ’A fa’aineine ai māua i te haere, ’ua ani mai te tuahine Jones nāhea māua i te ’itera’a i tōna hina’aro rū i te hō’ē ha’amaita’ira’a. Te parau mau, ’aita māua i ’ite. Terā rā, nō tō tātou Metua i te ao ra ’ite i tōna mau hina’aro, ’ua fa’auru ’oia i te peresideni Chesnut ’ia fārerei i tōna ’utuāfare. ’Ia fa’ari’i tātou i te arata’ira’a a te reo iti ha’iha’i, e ineine maita’i a’e ïa tātou nō te utuutu maita’i atu ā i te feiā nava’i ’ore.
Tē fa’a’ite pāpū nei au nō te hō’ē Metua maita’i ’e te here i te Ao ra. ’O Iesu Mesia te Fa’aora ’e te Tāra’ehara o te ta’ata ato’a. Tē fa’a’ite pāpū nei au e parau mau te Tāra’ehara a Iesu Mesia ’e, mai te mea e ha’api’i tātou ’ia pe’e i te arata’ira’a a te Vārua Maita’i, e arata’i ’oia ia tātou ’ia tātarahapa ’e ’ia fa’a’ohipa i te mana o te Tāra’ehara o te Fa’aora i roto i tō tātou orara’a. E Peropheta mau ’e te ora te peresideni Russell M. Nelson nā te Fatu, ē te mau tāviri ato’a o te autahu’ara’a i ni’a i te fenua nei i teie mahana. Nā roto i te i’oa o Iesu Mesia, ’āmene.