’Aita i rahi te mau matahiti i muri iho
’Aita ana’e tātou e ha’apa’o maita’i ’e e fa’aro’o i te parau, e nehenehe tā tātou e fa’ahuru ’ē i te ha’amaita’ira’a a te Atua nō te manuiara’a ’ei ’anatema nō te te’ote’o ’o tē fa’ahahi ’ē ’e ’o tē fa’a’ōnevaneva ia tātou.
E au mau taea’e here, e au mau tuahine here, ’a pārahi noa ai i ni’a i teie mahana, ’ua hi’o vau i teie pū ’āmuira’a i te ’īra’a e toru taime, ’a tahi rā mai te tau o te COVID. E pipi pūpū mau ’outou nā Iesu Mesia, tei hia’ai ’ia ha’api’i. Tē fa’ahiahia nei au i tō ’outou ha’apa’o maita’i. ’E ’ua here au ia ’outou.
’Ua tāvini ’o Ezra Taft Benson ’ei Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei mai te ’āva’e Novema 1985 ē tae atu i te ’āva’e Mē 1994. E 33 matahiti tō’u i te rirora’a mai te peresideni Benson ’ei Peresideni nō te ’Ēkālesia, ’e e 42 matahiti i tōna pohera’a. ’E ’ua vai noa tāna mau ha’api’ira’a ’e tōna ’itera’a pāpū i roto iā’u ma te hōhonu ’e te pūai rahi.
Te hō’ē tāpa’o rahi nō te tāvinira’a a te peresideni Benson, ’o tāna ïa rōtahira’a i ni’ ai te fā ’e te faufa’a rahi o te Buka a Moromona. ’Ua nā ni’a iho noa ’oia i te tūra’i i te parau nō te Buka a Moromona « e ōfa’i tua nō tō tātou ha’apa’ora’a fa’aro’o—te ’ōfa’i tua nō tō tātou ’itera’a pāpū, te ’ōfa’i tua nō tō tātou ha’api’ira’a tumu ’e te ’ōfa’i tua nō te ’itera’a i tō tātou Fatu ’e Fa’aora. » Pinepine ato’a ’oia i te tūra’i i te parau nō te mau ha’api’ira’a ’e te mau fa’aarara’a nō ni’a i te hara nō te te’ote’o, i roto i teie ’ite nō Iesu Mesia i te mau mahana hope’a nei.
E ha’api’ira’a ta’a ’ē a te peresideni Benson tei puta maita’i i roto iā’u, ’e tē vai noa nei i rotoi tā’u ’imira’a i te Buka a Moromona. ’Ua nā ’ō ’oia :
« ’Ua pāpa‘ihia te [Buka a Moromona] nō tō tātou nei ’anotau. ’Aita te mau ’āti Nephi i fa’ari’i i te buka ; ’aita ato’a te mau ’āti Lamana i muta’a ihora. ’Ua fa’ata’ahia te reira nō tātou. ’Ua pāpa‘i ’o Moromona i te pae hope‘a o te orara’a o te ’āti Nephi. I raro a’e i te fa’aurura’a a te Atua, tei ’ite i te mau mea ato’a mai te ha’amatara’a mai ā, ’ua ha’apoto [Moromona] i te mau tenetere ’ā’amu, ma te mā’iti i te mau ’ā’amu, te mau a’ora’a ’e te mau ’ohipa tei tupu ’o tē tauturu rahi ia tātou. »
Tē parau fa’ahou nei te peresideni Benson : « ’Ua fa’a’ite pāpū te mau ta’ata pāpa’i tumu ato’a nō te Buka a Moromona ’e ’ua pāpa’i rātou nō te mau u’i nō a muri a’e […] Mai te mea ’ua ’ite rātou i tō tātou nei tau ’e ’ua mā‘iti i taua mau mea ra tei hau atu i te faufa’a nō tātou, e ’ere anei ïa te reira te tumu e ti‘a ai ia tātou ’ia tai‘o i te Buka a Moromona ? E ti’a ia tātou ’ia ui tāmau noa ia tātou iho : ‘Nō te aha te Fatu i fa’auru ai ia Moromona […] ’ia tu’u i [teie fa’ati’ara’a] i roto i tāna pāpa’a parau ? E aha ïa te ha’api’ira’a tā’u e nehenehe e ’apo mai [i roto i teie parau a’o] ’o tē tauturu iā’u ’ia ora i teie mahana ’e i teie tau ?’ »
Tē tauturu mai nei nā fa’ahitira’a a te peresideni Benson ’ia māramarama ē, e ’ere ā ïa te Buka a Moromona i te pāpa’a ’ā’amu ’o tē fāriu i muta’a ra. ’Aita, e hi’o teie ma’a pāpa’ira’a mo’a i te ananahi ’e tei roto te mau parau tumu faufa’a rahi, te mau fa’aarara’a ’e te mau ha’api’ira’a faufa’a rahi tei ferurihia nō te vaira’a ’e te mau fifi o tō tātou nei tau. Nō reira, te Buka a Moromona, e buka ïa nō ni’a i tō tātou ananahi ’e te mau mahana tā tātou e ora nei ’e ’o tā tātou e ora atu.
Tē pure nei au i te tauturu a te Vārua Maita’i ’a hi’o ai tātou i te mau ha’api’ira’a tano nō tātou nei mai roto mai i te buka a Helamana, i roto i te Buka a Moromona.
Te ’āti Nephi ’e te ’āti Lamana
Tē fa’ati’a nei te pāpa’a parau a Helamana i te parau nō te hō’ē nūna’a e tīa’i maoro ra i te fānaura’a o Iesu Mesia. I roto i teie pāpa’a pāpa’ira’a mo’a e fa’ati’a nei i te hō’ē ’āfara’a tenetere, tē tūra’ihia nei te parau nō te fa’afāriura’a ’e te parauti’a o te ’āti Lamana, ’e te ’ino ’e te tāivara’a ’e te mau ’ohipa vi’ivi’i a te ’āti Nephi.
E mea ha’amāramarama maita’i nō tātou te pu’e fa’aaura’a ’e te mau ta’a-’ē-ra’a i roto i te ’āti Nephi ’e te ’āti Lamana i roto i teie mau parau tahito.
« Riro ihora te pae rahi o te mau ’āti Lamana ’ei feiā parauti’a, ’e nō reira ho’i ’ua hau atu tō rātou parauti’a i tō te mau ’āti Nephi, nō tō rātou ha’apa’o maita’i ’e tō rātou itoito i roto i te fa’aro’o.
« [’E] e rave rahi tō te mau ’āti Nephi tei riro ’ei feiā ’eta’eta ’e te tātarahapa ’ore ’e te parauti’a ’ore, ’e nō reira ho’i ’ua pāto’i rātou i te parau a te Atua ’e te mau parau ato’a i a’ohia ’e i tohuhia ’o tei tae mai i rotopū ia rātou. »
« ’E nō reira tē ’ite nei tātou ē, ’ua ha’amata te fa’aro’o o te mau ’āti Nephi i te paruparu, ’e ’ua tupu rahi tō rātou parauti’a ’ore ’e tā rātou mau ’ohipa vi’ivi’i, ’āre’a te mau ’āti Lamana ’ua tupu rahi tō rātou ’ite i tō rātou Atua ; ’oia ïa, ’ua ha’amata rātou i te ha’apa’o maita’i i tāna mau ture ’e te mau fa’auera’a, ’e i te haere i roto i te parau mau ’e te parauti’a i mua iāna ra.
« ’E nō reira tē ’ite nei tātou ē, ’ua ha’amata te Vārua o te Fatu i te fa’aātea ’ē atu i te mau ’āti Nephi, nō te parauti’a ’ore ’e te ’eta’eta o tō rātou ’ā’au.
« ’E nō reira tē ’ite nei tātou ē, ’ua ha’amata te Fatu i te nīni’i mai i tōna Vārua i ni’a i te mau ’āti Lamana, nō tō rātou fa’aro’o ’ōhie ’e tō rātou hina’aro mau ’ia ti’aturi i tāna mau parau »
Pēnei a’e te mea māere ’e te ’oto i roto i teie topara’a i roto i te tāivara’a a te ’āti Nephi, ’o te mea ïa ē « ’aita i rahi te mau matahiti i muri iho, ’ua tae mai ra teie mau ’ohipa ’ī’ino ia rātou. »
’Ua fāriu ’ē atu te ’āti Nephi i te Atua
Nāhea pa’i te hō’ē nūna’a parauti’a e riro ai ’ei ta’ata ’eta’eta ’e te ’ino i roto i te hō’ē tau poto mai terā ? Nāhea pa’i te hō’ē nūna’a e ha’amo’e ’oi’oi ai i te Atua tei ha’amaita’i rahi roa ia rātou ?
Ma te pūai ’e te hōhonu, e mea ha’amāramarama te hi’ora’a ’ino o te ’āti Nephi nō tātou nei.
« Te te’ote’o tei ha’amata i te tae ri’i mai i roto […] i te ’ā’au o te feiā i fa’ahua melo nō te ’ēkālesia a te Atua […] nō tā rātou mau tao’a rahi roa ’e tō rātou manuia i ni’a i te fenua »
« ’Ua ha’amau [rātou] i tō [rātou] ’ā’au i ni’a i te mau tao’a ’e te mau mea faufa’a ’ore o teie nei ao » « nō taua te’ote’o ra ’o tā [rātou] i fa’ati’a ’ia ō mai i roto i tō [rātou] ’ā’au ; ’o tei fa’ateitei ia [rātou] i ni’a a’e i te mea maita’i, nō tā [rātou] mau tao’a rahi ! »
Tē tāparu nei te reo nō tahito ra mai raro mai i te repo ia tātou ’ia ’apo mai i teie ha’api’ira’a mure ’ore ē : ’ua riro te manuiara’a, te tao’a rahi ’e te fāna’ora’a ’ei ’āno’ira’a pūai ’o tē nehenehe e arata’i roa i tei parauti’a ’ia inu i te rā’au ta’ero pae vārua nō te te’ote’o.
E nehenehe te vaiihora’a i te te’ote’o e tomo i roto i tō tātou ’ā’au e ’ume ia tātou ’ia fa’ao’ō’o i te mea mo’a, ’ia ti’aturi ’ore i te vārua nō te tohura’a ’e te heheura’a, ’ia ta’ata’ahi i te mau fa’auera’a a te Atua, ’ia huna i te parau a te Atua ; ’ia tīahi ’ē atu ; ’ia vahavaha ’e ’ia fa’a’ino i te mau peropheta ; ’e ’ia ha’amo’e i te Fatu tō tātou Atua ’e ’ia ’ore e « hina’aro i te Fatu tō [tātou] Atua, ’o tei hāmani ia [tātou], ’ia fa’atere ’e ’ia ari’i i ni’a a’e ia [tātou]. »
Nō reira, ’aita ana’e tātou e ha’apa’o maita’i ’e e fa’aro’o i te parau, e nehenehe tā tātou e fa’ahuru ’ē i te ha’amaita’ira’a a te Atua nō te manuiara’a ’ei ’anatema nō te te’ote’o ’o tē fa’ahahi ’ē ’e ’o tē fa’a’ōnevaneva ia tātou i te mau parau mau mure ’ore ’e te mau mea mātāmua roa i te pae vārua e ora ai tātou. Tītau-roa-hia ’ia vai ara noa tātou i te mana’o fa’a’ū’ana a te te’ote’o i tō tātou iho faufa’a rahi, i te hi’ora’a hape i tō tātou iho rava’ira’a ’e i te ’imira’a ’ia ha’apa’o noa ia tātou iho ’eiaha rā e tāvini ia vetahi ’ē.
’Ia rōtahi tātou i ni’a iho ia tātou ma te te’ote’o, e ro’ohia ato’a tātou e te matapōra’a pae vārua ’e e ’ore tātou e ’ite e rave rahi, i te rahira’a ’e pēnei a’e i te tā’āto’ara’a o te mea e tupu ra i roto ia tātou ’e ’ati a’e ia tātou. E’ita e nehenehe tā tātou e hi’o atu ’e e rōtahi i ni’a ia Iesu Mesia ’ei « tāpa’o » mai te mea e hi’o noa tātou ia tātou iho.
E nehenehe ato’a terā huru matapōra’a pae vārua e fāriu ’ē ia tātou i te ’ē’a nō te parauti’a, ’a haere ’ē ai nā te mau ’ē’a i rāhuihia ’e mo’e roa atu. ’A « fāriu [matapō] atu [tātou] i tō [tātou] ihora mau ’ē’a » ’e ’a pe’e ai i te mau tīpu’ura’a ha’amou, e huru tūru’i tātou i ni’a i tō tātou iho māramarama, ma te fa’atietie i tō tātou iho pūai ’e ma te ti’aturi i tō tātou iho pa’ari.
’Ua parau ha’apoto ’o Samuela te ’āti Lamana i te fāriu-’ē-ra’a a te ’āti Nephi i te Atua : « ’Ua tītau noa ’outou i te tā’āto’ara’a o te mau mahana nō tō ’outou orara’a i te mau mea ’o tē ’ore e noa’a ia ’outou ; ’e ’ua tītau ’outou i te ’oa’oa nā roto i te ravera’a i te mau ’ohipa ’ī’ino, ’e ’aita ho’i te reira i au i te huru nō taua parauti’a nei i roto i tō tātou Upo’o Fa’atere mure ’ore rahi. »
Tē nā ’ō ra te peropheta Moromona : « ’Ua [vai noa] te pae rahi o te mau ta’ata i roto i tō rātou te’ote’o ’e te parauti’a ’ore, ’e te pae iti ra ’ua [haere noa] ïa ma te ha’apa’o maita’i i mua i te Atua. »
’Ua fāriu te ’āti Lamana i ni’a i te Atua
I roto i te Buka a Helamana, e mea mutu maita’i te rahira’a te parauti’a o te ’āti Lamana ’e te topara’a ’oi’oi o te ’āti Nephi i te pae vārua.
’Ua fāriu te ’āti Lamana i ni’a i te Atua ’e ’ua hōpoihia rātou i te ’ite o te parau mau nā roto i te ti’aturira’a i te mau ha’api’ira’a a te mau pāpa’ira’a mo’a ’e a te mau peropheta, i te fa’a’ohipara’a i te fa’aro’o i te Fatu Iesu Mesia, i te tātarahapara’a i tā rātou mau hara ’e i te ’itera’a i te fa’ahuru-’ē-ra’a rahi o te ’ā’au.
« Nō reira, ’o rātou ’o tei fāri’i i te reira, ’ua ’ite ïa ’outou iho ē, ’ua tāpe’a māite rātou ma te ’āueue ’ore i te fa’aro’o ’e te mau mea i fa’ati’amā ia rātou. »
« ’Ia ’ite atu ’outou […] i te pae rahi [o te ’āti Lamana] ’o tē haere ra nā ni’a i te ’ē’a au i tā rātou ’ohipa, ’e tē haere ra rātou ma te ha’apa’o maita’i i mua i te Atua, ’e tē ha’apa’o ra rātou i tāna mau fa’auera’a, ’e tāna mau ture, ’e tāna mau fa’aotira’a […]
« […] Tē tūtava nei rātou ma te tu’utu’u ’ore ’e te itoito ’ia fa’a’ite i te parau mau i te toe’a o tō rātou mau taea’e. »
’E nō reira, « ’ua hau atu [te parauti’a o te ’āti Lamana] i tō te mau ’āti Nephi, nō tō rātou ha’apa’o maita’i ’e tō rātou itoito i roto i te fa’aro’o. »
Te fa’aarara’a ’e te parau fafau
’Ua parau Moroni : « Inaha, ’ua fa’a’ite mai te Fatu iā’u i te mau mea rahi ’e te ha’amāere nō ni’a i te mau mea e tupu i muri noa iho i te mahana e tae mai ai teie mau mea i rotopū ia ’outou na.
« Inaha, tē parau nei au mai te mea ra ē, tei ’ō nei ato’a ’outou, ’aita roa rā. Inaha rā, ’ua fa’a’ite mai Iesu Mesia ia ’outou iā’u nei, ’e ’ua ’ite au i tā ’outou ra mau ’ohipa. »
E ha’amana’o na ē, tē hi’o nei te Buka a Moromona i te ananahi ’e tei roto te mau parau tumu faufa’a rahi, te mau fa’aarara’a ’e te mau ha’api’ira’a faufa’a rahi tei ferurihia nō’ū nei ’e nō ’outou, nō te vaira’a ’e te mau fifi o tō tātou nei tau.
E piti fāito e nehenehe ai te tāivara’a e tupu—te ’āvirira’a ’e te ta’ata hō’ē. I te fāito o te ’āvirira’a, e’ita roa Te ’Ēkālesia a Iesu Mesia i te Feiā Mo’a i te mau Mahana Hope’a nei e mo’e i roto i te tāivara’a ’aore rā e ravehia mai ni’a atu i te fenua.
’Ua parau pāpū te peropheta Iosepha Semita : « ’Aore roa e rima vi’ivi’i e nehenehe e tāpe’a i te ’ohipa ’ia haere i mua […] e haere noa rā te parau mau a te Atua i mua, ma te mata’u ’ore, te hanahana ’e te ti’amā, ē tae noa atu ’ua tomo te reira i roto i te mau fenua ato’a, ’ua tae i te mau tuha’a fenua ato’a, ’ua parare i roto i te mau hau ato’a, ’e ’ua fa’aro’ohia e te tari’a ato’a, ē tae noa atu ’ua hope te mau ’ōpuara’a a te Atua i te fa’atupuhia ’a parau mai ai ’o Iehova Rahi ē ’ua oti te ’ohipa. »
I te fāito o te ta’ata hō’ē, tītau-roa-hia ia tātou tāta’itahi ’ia « ara na i te te’ote’o, ’o te riro [tātou] mai te mau ’āti Nephi i tahito ra. »
Teie tō’u mana’o, mai te peu tē ti’aturi nei ’outou ’e ’o vau ē ’ua nava’i tō tātou pūai ’e te pāutuutu nō te ’ape i te ahaaha o te te’ote’o, pēnei a’e ïa ’ua ro’o-a’ena-hia tātou i teie ma’i mate pae vārua. Parau fa’a’ōhie, mai te mea ’aita ’outou ’e ’o vau nei e ti’aturi ē e nehenehe tātou e ro’ohia ’e e fa’ahepohia e te te’ote’o, e mea pāruru ’ore ïa tātou ’e te ataata i te pae vārua. ’Aita paha e rahi te mau mahana i muri iho, te mau hepetoma, te mau ’āva’e ’aore rā te mau matahiti, e ’ere ai tātou i tā tātou tuha’a matahiapo pae vārua, nō te hō’ē mea iti a’e i te mā’a pipi.
Mai te mea rā tē ti’aturi nei tātou e nehenehe tātou e ro’ohia ’e e fa’ahepohia e te te’ote’o, e rave tāmau ïa tātou i te mau mea iti ’e te ’ōhie ’o tē pāruru ’e ’o tē tauturu ia tātou ’ia riro mai « te hō’ē tamari’i ra i te auraro, te marū, te ha’eha’a, te fa’a’oroma’i, te ’ī i te aroha, te hina’aro ’ia auraro i te mau mea ato’a tā te Fatu e hina’aro ’ia tu’u mai i ni’a [ia tātou]. » « E ao ho’i tō rātou ’o tei fa’aha’eha’a noa ia rātou iho ma te tūra’i-’ore-hia ’ia fa’aha’eha’a. »
’Ia pe’e tātou i te a’o a te peresideni Benson ’ia ui ia tātou iho nō te aha te Fatu i fa’auru ai ia Moromona ’ia tu’u i roto i tāna ha’apotora’a nō te buka a Helamana i te fa’ati’ara’a, te mau parau a’o ’e te mau fa’aarara’a tāna i tu’u, tē parau fafau atu nei au ē, e hāro’aro’a tātou i te tanora’a o teie mau ha’api’ira’a i te vaira’a ta’a ’ē o tō tātou orara’a ta’ata hō’ē ’e ’utuāfare i teie mahana. ’Ia ’imi tātou ’e ’ia feruri ho’i i teie pāpa’a parau fa’auruhia, e ha’amaita’ihia tātou i te mata e hi’o ’e te tari’a e fa’aro’o ’e te ferurira’a e hāro’aro’a ’e te ’ā’au e māramarama i te mau ha’api’ira’a e mea tano ia tātou ’ia ’apo mai nō te « ara […] i te te’ote’o ’o te ō atu ho’i [tātou] i roto i te fa’ahemara’a. »
Tē fa’a’ite ’oa’oa nei au ē, ’o te Atua te Metua mure ’ore tō tātou Metua. ’O Iesu Mesia tāna Tamaiti fānau tahi ’e tāna Tamaiti here. ’O ’oia tō tātou Fa’aora. ’E tē parau pāpū nei au ē, ’ia haere tātou i roto i te marū o te Vārua o te Fatu, e ’ape atu ïa tātou ’e e upo’oti’a ho’i i te te’ote’o ma te noa’a mai te hau i roto iāna. Tē ha’apāpū nei au i te reira i te i’oa mo’a o te Fatu Iesu Mesia, ’āmene.