Fa’atū’ati i tō tātou hina’aro ’e tōna
Nā te pe’era’a i te hina’aro o te Fatu i roto i tō tātou orara’a e fa’ati’a ia tātou ’ia ’ite i te poe faufa’a roa a’e i te ao nei—te bāsileia o te ra’i.
I te hō’ē taime; ’ua parau Iesu nō ni’a i te hō’ē ta’ata ho’o tao’a e ’imi ra i « te mau poe nehenehe roa ». I roto i te mā’imira’a a te ta’ata ho’o tao’a, ’ua ’itehia mai iāna hō’ē « poe tao’a rahi ». Terā rā, nō te fāri’i i te reira poe nehenehe rahi, tītauhia i teie ta’ata ’ia ho’o i tāna mau tao’a ato’a, tāna ïa i rave ’oi’oi ’e ma te ’oa’oa.
Nā roto i teie parabole poto ’e te feruri-maita’i-hia, ’ua ha’api’i te Fa’aora ma te nehenehe ē, ’ua fa’aauhia te bāsileia o te ra’i i te hō’ē poe faito ’ore, o te tao’a faufa’a roa a’e ïa e ti’a ’ia hina’arohia i ni’a i te tahi atu mau mea ato’a. Te mea ē, ’ua ho’o ’oi’oi te ta’ata ho’o i tāna mau tao’a ato’a nō te noa’a mai taua poe faufa’a ra, te fa’a’ite maita’i ra ïa ē, e ti’a ia tātou ’ia fa’atano i tō tātou ferurira’a ’e tō tātou mau hina’aro i te hina’aro o te Fatu ’e ma te hina’aro mau e rave i te mau mea ato’a e ti’a ia tātou ’ia rave i roto i tō tātou tere tahuti nō te fāri’i i te mau ha’amaita’ira’a mure ’ore o te bāsileia ’o te Atua.
Nō te fāri’i i teie hōro’ara’a rahi, ta’a’ē noa atu te tahi atu mau mea, e ti’a ia tātou ia hōro’a i tā tātou tauto’ora’a maita’i roa nō te tu’u i te hiti i te mau ’imira’a nō tātou iho, ’e ’ia fa’aru’e i te mau fifi ato’a o tē tāpe’a ia tātou ’ia hōro’a i te fafaura’a hope i te Fatu ’e i Tōna mau haere’a teitei a’e ’e te mo’a a’e. Te fa’aau ra te ’āpōsetolo Paulo i teie mau ’ohipa ha’amo’ara’a i te « fāri’ira’a i te ferurira’a o te Mesia ». Mai tei fa’a’itehia e Iesu Mesia, te aura’a ra ’oia ho’i, « [te ravera’a] i te mau mea e mauruuru ai [te Fatu] » i roto i tō tātou orara’a, ’e ’aore ra mai tā te tahi mau ta’ata e parau ra i teie mahana, o « te ravera’a ïa i te mea e au i te Fatu ».
I roto i te hō’ē aura’a o te ’evanelia, « te [ravera’a] i te mau mea e māuruuru ai [te Fatu] e tu’ati ïa i te tu’ura’a i tō tātou hina’aro i Tōna ra hina’aro. ’Ua ha’api’i maīte te Fa’aora i te faufa’a o teie parau tumu a ha’api’i ai ’oia i Tāna mau pĭpĭ :
« I pou mai nei ho’i au mai te ra’i mai, e ha’apa’o i tō tei tono mai iā’u nei hina’aro, eiaha tō’u iho hina’aro.
« Teie ho’i tō te Metua tei tono mai iā’u nei hina’aro, ’ia ’ore roa vau ’ia ’ere i te hō’ē i tāna i hōro’a mai ra, ’ia fa’ati’a-pā’āto’a-hia e au ’ia tae i te mahana hope’a ra.
« ’O teie ho’i tō tei tono mai iā’u nei hina’aro, ’o te ’ite i te Tamaiti ’e te fa’aro’o iāna ra, ’ei ora mure ’ore tōna ’e ’ia fa’ati’a fa’ahou vau iāna i ni’a ’ia tae i te mahana hope’a ra ».
’Ua rave te Fa’aora i te hō’ē faito maita’i roa ’e te hanahana nō te aurarora’a i te Metua nā roto i te fa’ati’ara’a i Tōna hina’aro ’ia horomi’ihia i roto i te hina’aro o te Metua. ʼUa parau ʼoia, « ’O tei tono mai iā’u nei ra, tei piha’i ato’a iho ïa iā’u : ’aore te Metua i faʼarue noa iāʼu ’o vau anaʼe ra, e ʼaore ho’i au i faʼaea i te rave i te mea e māuruuru ai ʼoia ra ». ’A ha’api’i ai ’oia i te peropheta Iosepha Semita nō ni’a i te ahoaho ’e te māuiui o te tāra’ehara, ’ua parau te Fa’aora :.
« Nō te mea inaha, ’ua fa’a’oroma’i au, ’o te Atua, i teie nei mau mea nō te ta’ata ato’a, ’ia ’ore rātou ’ia ro’ohia i te mamae mai te mea ē, e tātarahapa rātou ;
« Nā te reira mamae rahi i fa’atupu i roto iā’u, ’oia ’o te Atua, ’o tei hau a’e i te mau mea ato’a ra, i te rurutaina nō te mauiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e te vārua ato’a ho’i—’e ’ua hina’aro ho’i ’ia ’ore au ’ia inu i te ’āu’a maramara ’e ’ōriorio atu—
« ’Āre’a rā, ’ei hanahana tō te Metua, ’e ’ua inu vau ’e ’ua fa’aoti ho’i i tā’u mau fa’aineinera’a i te tamari’i a te ta’ata nei ».
I roto i tō tātou orara’a i roto i te tāhuti nei, e aro pinepine tātou i te mea tā tātou e mana’o ra ē, ’ua ’ite tātou, te mea tā tātou e mana’o ra e mea maita’i a’e, ’e te mea tā tātou e mana’o ra e tano nō tātou, i te ta’a-’ore-ra’a i te mea ta te Metua i te Aor ra i ’ite, e aha te mea maita’i a‘e e a muri noa atu, ’e e aha te mea maita’i roa nō te mau tamari’i i roto i tāna fa’anahora’a. E nehenehe teie ’arora’a rahi e riro ’ei mea fifi roa, ’ia hi’ohia iho ā rā te mau tohura’a i roto i te mau papa’ira’a mo’a nō tō tātou nei ’anotau : « E tupu te ’ati rahi i taua tau hope’a nei, ia ’ite mai ’oe e riro te ta’ata nei ’ei mi’imi’i, te hina’aro i te mau mea e navenave ai ra ’aore i hina’aro i te Atua ».
Te hō’ē tāpa’o o tē fa’a’ite ra i te tupura’a o teie parau tohu, o te huru tupura’a ïa i te rahi o te ao nei, tei fari’ihia e te mau ta’ata e rave rahi, o te ha’ape’ape’ara’a te ta’ata ia rātou iho ’e te parau-tāmau-ra’a ē, « Noa atu e aha, te ora nei au i tā’u iho parau mau e ’aore rā, te rave nei au i te mea e au iā’u ». Mai tā Paulo i parau ra, tē « ’imi nei ho’i te ta’ata i tā rātou iho ra, ’aore i tā Iesu Mesia ra ». Pinepine teie huru ferurira’a i te fa’arirohia ’ei mea « mau » nā te feiā e rave nei i te mau ’ohipa nō ni’a ia rātou iho, ’o tē rōtahi nei i ni’a ihoa i tō rātou iho mau hina’aro, ’e ’aore rā ’o tē hina’aro nei e fa’ati’a i te tahi mau huru haere’a ’o tē ’ore e tū’ati i te ’opuara’a here a te Atua e Tōna hina’aro nō rātou. Mai te mea ē,, e vaiiho tātou i tō tātou māfatu ’e tō tātou ferurira’a ’ia fāri’i i teie huru ferurira’a, e nehenehe tātou e fa’atupu i te mau fifi rahi nō tātou iho i roto i te fāri’ira’a i te poe faufa’a roa a’e tā te Atua i fa’aineine ma te here nō Tāna mau tamari’i—te ora mure ’ore.
Noa atu ē, e parau mau, tē rave nei tātou tāta’itahi i te hō’ē tere ’ei pipi i ni’a i te ’ē’a o te fafaura’a, ma te tāmata i te fa’atumu i tō tātou māfatu ’e tō tātou ferurira’a i ni’a ia Iesu Mesia, e ti’a ia tātou ’ia ha’apa’o maita’i ’e ’ia ara tamau ’ia ’ore tātou ’ia fa’ahemahia ’ia fāri’i i teie huru ferurira’a o te ao nei i roto i tō tātou orara’a. ’Ua parau ’o Elder Quentin L. Cook ē, « te rirora’a mai te Mesia mau te huru o te reira ïa te fā faufa’a rahi roa a’e ’eiaha rā te riro-noa-ra’a mai te huru ta’ata noa ».
E tō’u mau hoa here, ’ia maiti ana’e tātou i te vaiiho i te Atua ’ia riro ’ei mana pūai roa a’e i roto i tō tātou orara’a i ni’a i tā tātou mau ’ohipa tāvinira’a ia tātou iho, e nehenehe tātou e haere i mua i roto i tō tātou ti’ara’a pipi ’e e fa’arahi i tō tātou ’aravihi nō te tāhō’ē i tō tātou ferurira’a ’e tō tātou māfatu i te Fa’aora. I te tahi a’e pae, mai te mea ē, ’aita tātou e vaiiho i te haere’a ’o te Atua ’ia upo’oti’a i roto i tō tātou orara’a, e vaiihohia tātou tātou ana’e, ’e mai te mea ē, ’aita e arata’ira’a fa’auru a te Fatu, e nehenehe tātou e fa’ati’a i te mau mea ato’a tā tātou e rave ’e ’aore rā, ’aita e rave. E nehenehe ato’a tātou e fa’ati’ati’a ia tatou iho nā roto i te ravera’a i te mau mea mai tā tātou e hina’aro, ma te parau ē, « Tē rave noa nei au mai tā’u e hina’aro ».
I te hoê taime, ’ua pāto’i te tahi mau ta’ata, te mau Pharisea fa’ahua parau-ti’a ihoa rā, ’ua pāto’i i Tāna parau poro’i ’e ’ua parau ma te mata’u ’ore ē, e mau tamari’i rātou nā Aberahama, ma te feruri ē, e hōro’a tō ratou rēni tupuna ia rātou i te mau ha’amaita’ira’a ta’a’ē i mua i te ’aro ’o te Atua. ’Ua arata’i taua ferurira’a ra ia rātou ’ia ti’aturi i ni’a i tō rātou iho ’ite ’e ’ia ’ore e ti’aturi i te mau mea tā te Fa’aora e ha’api’i ra. ’Ua riro te pāhonora’a a te mau Pharisea ia Iesu ’ei ha’apāpūra’a māramarama ē, ’aita tō rātou mana’o te’ote’o i vaiiho i te mau parau a te Fa’aora ’e te haere’a o te Atua i roto i tō rātou māfatu. ’Ei pāhonora’a, ’ua parau Iesu ma te pa’ari ’e te itoito ē, mai te mea ē, e mau tamari’i nō te fafaura’a mau rātou nā Aberahama, e rave ïa ratou i te mau ’ohipa a Aberahama, i te mea ho’i ē, tē ti’a ra te Atua ’o Aberahama i mua ia rātou ’e tē ha’api’i ra ia rātou i te parau mau i taua taime mau ra.
E te mau taea’e e te mau tuahine, mai tā ’outou e ’’ite ra, te fa’a’ohipara’a i teie mau huru ferurira’a nō ni’a i te « mea e tano nō’u » ’e te « mea e māuruuruhia e te Fatu i te mau taime ato’a » e ’ere ïa i te mau mea ’api nō tō tātou nei ’anotau. ’Ua riro te reira ’ei ferurira’a tahito o tei tere nā roto i te mau senekele, ’e o tē ha’amatapo pinepine i te feiā mana’o pa’ari i roto i tō rātou iho mata ’e o tē ha’afifi ’e o tē fa’ataupupu i te mau tamari’i e rave rahi a te Atua. Te parau mau, o teie huru ferurira’a te hō’ē ha’avare tahito a te ’enemi ; o te hō’ē ïa ’ē’a ha’avare o tē arata’i maīte i te mau tamari’i a te Atua i te ātea ’ē roa i te ’ē’a parau mau e te ha’apa’o maita’i o te fafaura’a. Noa’tu ē, tē fa’auru nei te mau huru o te orara’a o te ta’ata iho, mai te mau tupuna, te huru o te fenua, ’e te mau fifi i te pae tino ’e i te pae ferurira’a, i tō tatou tere, tera râ, i roto i te mau mea faufa’a mau, te vai ra te hō’ē vāhi i roto ia tātou e ti’amāra’a tō tātou ’ia mā’iti e pe’e anei tātou ’aore ra ’aita, i te hi’ora’a tā te Fatu i fa’aineine nō tō tātou orara’a. Parau mau, « ’Ua tāpa’o ’oia i te ’ē’a ’e ’ua arata’i ’oia i te ’ē’a, ’e te mau vāhi ato’a [’ua fa’ata’ahia] ».
’Ei pipi nā te Mesia, tē hina’aro nei tātou e haere nā ni’a i te ’ē’a Tāna i tāpa’o nō tātou i roto i Tāna tāvinira’a i te tāhuti nei. ’Eiaha noa tātou e hina’aro e rave i tōna hina’aro ’e te mau mea ato’a o tē fa’a’oa’oa Iāna, e ’imi ato’a rā tātou i te pe’e Iāna. Mai te mea e tāmata tātou i te ha’apa’o i te mau fafaura’a ato’a tā tātou i rave ’e ’ia ora ’ia au i te parau ato’a nō roto mai i te vaha o te Atua,e pāruruhia ïa tātou ’ia ’ore ’ia riro i te mau hara ’e te mau hape o te ao nei—te mau hape o te philosophia ’e te ha’api’ira’a tumu o tē arata’i ia tātou i te ātea ’ē roa i taua mau poe faufa’a rahi ra.
’Ua fa’auruhia vau e mea nāhea teie huru auraro i te pae vārua i te Atua i te ohipara’a i ni’a i te orara’a o te mau pipi ha’apa’o maita’i a te Mesia, a mā’iti ai rātou i te rave i te mau mea o tē ha’amaita’i ’e o tē au i mua i te mata ’o tē Fatu. ’Ua ’ite au i te hō’ē taure’are’a ’o tei ’ore i pāpū no ni’a i te haerera’a e tāvini i te hō’ē misioni ’e ’o tei tūra’ihia ’ia haere e tāvini i te Fatu i tōna fa’aro’ora’a i te hō’ē ti’a fa’atere rahi o te ’Ēkālesia i te fa’a’itera’a i tōna iho ’itera’a pāpū ’e tōna iho ’itera’a mo’a nō te tāvinira’a ’ei misionare.
’Ua parau teie taure’are’a, i teie nei ’ei misionare tei ho’i mai : « ’Ua ’ite au i te here o te Atua iā’u a fa’aro’o ai au i te ’itera’a pāpū ’o te hō’ē ’āpōsetolo a te Fa’aora o Iesu Mesia, ’e ’ua hina’aro vau e fa’a’ite i taua here ra i te tahi atu mau ta’ata. I taua taime ra, ’ite a’era vau ē, tītauhia iā’u ’ia tāvini i te hō’ē misiōni noa’tu tō’u mata’u, te pāpū ’ore ’e te pe’ape’a. ’Ua ti’aturi hope au i te mau ha’amaita’ira’a ’e te mau pārau fafau a te Atua nō tāna mau tamari’i. I teie mahana, e ta’ata ’āpī au, e ’itera’a pāpū tō’u ē, e parau mau teie ’evanelia ’e ’ua fa’aho’i-fa’ahou-hia mai te ’Ēkālesia a Iesu Mesia i ni’a i te fenua nei ». ’Ua mā’iti teie taure’are’a i te haere’a o te Fatu ’e ’ua riro mai ’ei hi’ora’a nō te hō’ē pipi mau i roto i te mau mea ato’a.
’Ua fa’aoti te hō’ē tamāhine ha’apa’o maita’i ’eiaha e ’ōfati i tāna mau ture arata’i i te taime a anihia ai ’oia ’ia ’ahu i te ahu tano ’ore nō te ’amui atu i roto i te tuha’a ’ohipa a te taiete ’ahu tāna i rave i te ’ohipa. Nō tōna ’itera’a ē, ’ua riro tōna tino ’ei ô mo’a nō roto mai i tō tātou Metua i te Ao ra ’e ’ei vahi i reira te Vārua e nehenehe ai e pārahi, ’ua tūra’ihia ’oia ’ia ora i ni’a i te hō’ē faito teitei a’e i tō te ao nei. ’Aita ’oia i fāri’i noa i te ti’aturira’a o te feiā tei ’ite iāna i te orara’a i te parau mau o te ’evanelia a Iesu Mesia, ’ua pāruru ato’a rā ’oia i tāna ’ohipa, ’o tei ha’afifihia i te hō’ē taime. Tōna hina’aro ’ia rave i te mea e au i mua i te Fatu, ’eiaha rā i te mea e ’ohipa nō te ao nei, ’ua hōro’a te reira i te ti’aturira’a i roto i te fafaura’a i rotopu i te mau ma’itira’a fifi.
E te mau taea’e ’e te mau tuahine, tē fārerei tāmau nei tātou i te reira mau huru mā’itira’a i roto i tō tātou tere i te mahana tāta’itahi. E mea tītauhia te ’a’au itoito ’e te hina’aro mau ’ia fa’aea ’e ’ia rave i te hō’ē hi’opo’ara’a parau-ti’a ’e te marū no te fa’ari’i ē, tē vai nei te mau paruparu o te tino i roto i tō tātou orara’a o tē ha’afifi i tō tātou hina’aro ’ia auraro i te Atua, ’e i te pae hope’a, ’ia pe’e i tōna ’ē’a ’eiaha rā i tō tātou iho. Te tāmatara’a hope’a o tō tātou ti’ara’a pipi, o tō tātou ïa hina’aro ’ia fa’aru’e ’e ’ia ha’amo’e i tō tātou huru tahito, ’e ’ia hōro’a i tō tātou ’ā’au ’e tō tātou vārua tā’āto’a i te Atua ’ia riro Tōna hina’aro ei hina’aro nō tātou.
Te hō’ē o te mau taime hanahana roa a’e o te orara’a nei, e tupu ïa te reira ’ia ’ite ana’e tātou i te ’oa’oa e tupu mai ’ia rave tāmau ana’e tātou i te mau mea ’o tē « tano ’e ’o tē fa’a’oa’oa i te Fatu » ’e « te mea e tano nō tātou », hō’ē ā ïa ! Te fa’arirora’a i te hina’aro o te Fatu ’ei hina’aro nō tātou, e tītau te reira i te ti’ara’a pipi hanahana ’e te itoito ! I taua taime fa’ahiahia ra, e ha’amo’ahia tātou i te Fatu ’e e hōro’a hope roa tātou i tō tātou mau hina’aro Iāna. Teie huru hōro’ara’a pae vārua, e mea nehenehe ïa, e mea pūai ’e e fa’ataui te reira.
Te fa’a’ite pāpū nei au ia ’outou ē, nā te pe’era’a i te hina’aro o te Fatu i roto i tō tātou orara’a e fa’ati’a ia tātou ’ia ’ite i te poe faufa’a roa a’e i te ao nei—te bāsileia o te ra’i. Tē pure nei au ’ia ti’a ia tātou tāta’itahi, i tō tātou tau ’e tō tātou taime, ’ia parau, ma te ti’aturi, i tō tātou Metua i te ao ra ’e i tō tātou Fa’aora ’o Iesu Mesia ē, « Te mea e au ia ’oe, e au ato’a iā’u ». Tē parau nei au i teie nei mau mea nā roto i te i’oa o te Fa’aora, ’o Iesu Mesia, ’āmene.