Mataupu 25

O Le Mamalu o lo Tatou Valaauga

O le aso 30 o Oketopa, 1869, e lima aso talu le latou fonotaga faatasi ma le fono a fautua maualuga, na tusia ai e Elia Harisone ma Viliamu Atuape i le Mekasini a Iuta le teenaina o le tu’ua’iga o le liliuese e faasaga ia i la’ua. Na la tu’ua’ia taitai o le Ekalesia e saua ma faitio faapea e le o sa’oloto le Au Paia e mafaufau ma faatino mo i latou lava. I le mautinoa ai faapea ua talanoa atu agaga ia i la’ua, ua talitonu nei alii ua valaauina i la’ua e toe faatulaga le Ekalesia. Ma na mananao lava e lolomi pea le la mekasini ma ia agai ma lagolago atu le Au Paia i le la mataupu.

“Mai ia tatou vanu o mauga o le a o’o mai ai se fu’a e lolomi ai se talitonuga lautele, se Kerisiano amio sa’o, se faatuatua mama a’ia’i e le’i vaaia lava e le lalolagi,” na folafola mai e Elia.¹

Tainane lava na ia lapataiina le Au Paia i le faitau i le Mekasini a Iuta, e le’i taumafai Polika Iaga e tapunia.² I le aluga o le toeitiiti atoa le 40 tausaga o lona i ai i totonu o le Ekalesia, na ia vaaia ai le o mai ma toe o ese atu o taumafaiga tete’e e aunoa ma se faamanuiaina. A o faasagatau atu Elia ma Viliamu ia te ia, sa ia tuua le Aai o Sate Leki ma taamilo atu i ni nuu ua nofoia i totonu o vanu o Iuta ma Sanepete.

A o ia malaga atu i saute, sa vaai Polika i taulaga ua alualu i luma ia sa i ai ni olo laiti ma apitaga le tumau. O ni isi o Au Paia sa galueaiina fale faigaluega, ma fale gaosi oloa. E ui e leai se taulaga sa atoa se tutoatasi, o ni isi sa i ai ni faleoloa faasosaiete sa faavaeina ma faaaogaina.³

I taimi uma e asia ai e Polika se aai, e aumaia i ai e le Au Paia a latou mea silisili mo ia, i ni isi o taimi o le faia o ni taumafataga tetele. E na te taliaina nei taumafataga ma le loto faafetai, ae sili ia te ia meaai faigofie e le tele se galuega e alu ai mo i latou sa sauniaina. I tausaga na muamua atu, a o faia se latou taumafataga ma le Au Paia i lana misiona i Egelani, sa tausami Polika e faaaoga ai na’o se ipu faatauva’a ma se naifituutaga, ma se tipiga falaoa e avea ma se ipu mafolafola. Na o le lima minute na tapena faamama ai ina ua maea le taumafataga, ma lava ai le taimi mo le Au Paia e mafuta faatasi ai.

A o ia malaga i saute e ui atu i Iuta, e ui lava, na matauina e Polika e toatele tamaitai sa le auai i sauniga a le Ekalesia, ona sa latou pisi e saunia pe tapena faamama i le maea ai o ni taumafataga tetele.⁴ Sa ia faanoanoa foi i le toatele o alii ma tamaitai maumea i totonu o le Ekalesia ua atiina a’e ni olaga faamaimau oa, i ni isi o taimi ua faatamaia ai lo latou ola manuia faaleagaga. Sa manao Polika i Au Paia uma, e aofia ai ma ia, ina ia faasaosao, pe faafaigofieina le soifuaga e ola ai.

Na ia folafola mai, “O mausa faamaimau taimi, o le faaaoga ma le maimau e tagata, ua le talafeagai i o tatou lotoifale.”

I totonu o le Aoga a Perofeta, na fautua atu ai Polika i alii e aua le mulimuli i sitaili a le lalolagi a e ia atiina a’e a latou lava sitaili e ‘oti mai ie o loo gaosi i totonu lava o le teritori. I isi taimi, ua ia uunaia tamaitai e aloese mai le gaosia o ofu mai ie taugata mai setete i le itu i sasae, a e nai lo lena, faaaoga ie o loo gaosi i totonu o le teritori. Ia te ia lava, o le soona fai e tele ina faatupuina ai le faatautava i le va o le Au Paia ma aveese mai ai taimi mai lo latou atiinaega faaleagaga. Sa ia lagona o se faailoga lea o le faalelalolagi, e le ogatusa ma le agaga galulue faatasi o Siona.⁵

O lenei atugaluga sa i ai pea i le mafaufau o Polika ina ua taunuu atu lana aumalaga i totonu o Kanisone, o se taulaga e i le faatausiusiuga i saute o le vanu o Sanapete. O i na sa ia talanoa ai ma Malia Isapela Hoone, o se e alaala i le Aai o Sate Leki o le sa asiasi atu i lona atalii i totonu o le taulaga. Sa lauiloa Malia Isapela o se taitai tinou ma faamaoni o tamaitai o le Au Paia o Aso e Gata Ai. Faapei o Polika, sa avea o ia ma tagata o le Ekalesia talu mai le faasologa o le vaitau o le 1830 ma sa ia onosaia le olaga faigata mo le manuia o le talalelei. Na avea o ia i lena taimi, ma peresitene o le Aualofa o le Uarota Sefulufa a le Aai o Sate Leki.⁶

“Tuafafine Hoone, o le a ou tuuina atu ia te oe se misiona, e amata pe a e foi atu i lou fale--o le misiona o le aoaoina lea o le ola faafaigofie i ava ma afafine o Isaraelu,” na faapea atu ai Polika. “E le sa’o lo latou faaaluina o le tele o taimi e saunia ai a latou meaai ma le teuteuina o latou tino, a e faatuatuanai lo latou aoaoina faaleagaga.”

Sa tau musu Malia Isapela e faataunuu le tiutetauave. O le aoaoina o le ola faasaosao, o lona uiga o le uunaia lea o tamaitai ia faafaigofie a latou galuega ma le tulaga e soifua ai. A e sa tele ina maua e tamaitai faamoemoega, faamalieina ma le faatauaina i le saunia lea o taumafa lelei ma le gaosiaina o laei matagofie mo i latou lava ma o latou aiga. I le luiina o i latou e faafaigofie a latou galuega, o le a talosagaina ai i latou e Malia Isapela e sui le ala latou te vaai ai ia i latou lava ma la latou sao i lo latou lotoifale.⁷

Peitai, sa uunaia o ia e Polika e talia le valaauga aua na talitonu o le tuuina atu ai i tamaitai avanoa e tele e tuputupu a’e ai faaleagaga. “Valaau ma faapotopoto faatasi tamaitai o le Aualofa e fai atu ia i latou ia amata se toefaatulagaga i taumafa ma le tausia o fale ma aiga,” na ia faapea atu ai. “Ou te manao ia fausia se sosaiete o ona tagata e malilie ia maua se meaai mama o le taeao mo i latou lava ma a latou fanau, e aunoa ma le kukaina o ni meaai eseese e fasefulu.”

E ui lava e lei mautinoa le ala e faatinoina ai sea misiona, sa taliaina e Malia Isapela le valaauga.⁸

---

I le taimi lava lea, na malaga atu ai Iakopo Koloketi i Katelani, Ohaio, faatasi ma lona tausoga o Viliamu Hooma. O Iakopo e le o se tagata o le Au Paia o Aso e Gata Ai, a e o Viliamu faatoa maea mai lana misiona i Europa ma sa fuafua o ia e asiasi i le nofoaga sa faapotopoto muamua i ai le Au Paia a o lei toe foi atu i lona aiga i Iuta. O Katelani e itiiiti mai le selau maila mai le aiga o Iakopo, ma sa loto ona tausoga e latou te malaga faatasi.

I Katelani, na manao ai Viliamu e asiasi ia Matini Harisi, o se tasi o Molimau e Toatolu o le Tusi a Mamona, o le ua galue i lea taimi o se tagata na tofia o ia lava e avea ma tagata e vaaia le malumalu o Katelani. O le atalii o Matini na faaipoipo atu i le tuafafine o Viliamu, ma sa faamoemoe Viliamu na te tauanauina le toeaina ia toe faatasi ma lona aiga i le Teritori i Iuta.

Ae peitai, o le sootaga a Matini ma le Ekalesia sa le lelei. I le mae’a ai o le toilalo o le Sosaiete Saogalemu a Katelani i le silia ma le tolusefulu tausaga na muamua atu, na faasagatau atu ai Matini ia Iosefa Samita ma fealuai ai mai lea vaega i le isi vaega o e sa avea muamua ma tagata o le Au Paia o Aso e Gata Ai. Ina ua faimalaga atu, lona faletua o Karoline, ma le la fanau i Iuta i le gasologa o le 1850, na ia le manao e o faatasi ma i latou.

Ina ua taunuu i Katelani, na o atu Iakopo ma Viliamu i le fale o Matini. O ia o se tagata laitiiti, e faatauvaa ona laei ma foliga e pa’e’e ma malosi sa i ai le le fiafia i ona mata. Na faailoa atu e Viliamu o ia o se faifeautalai mai Iuta, ma le uso faaletulafono o le atalii o Matini.

“O oe o se tasi o na ‘Mamona’ Sapolika?” Sa alaga atu ai Matini.⁹

Sa taumafai Viliamu e ta’u atu ia Matini tala e uiga i lona aiga i Iuta, ae na foliga e lei lagonaina o ia e le toeaina. I nai lo lena, sa ia faapea mai, “E te manao e vaai i le malumalu, e te manao ai?”

“Pe ma te mafai.” na faapea atu ai Viliamu.

Na aumai e Matini le ki ma taitai atu Iakopo ma Viliamu i le malumalu. O le pito i fafo o le fale sa lelei lona tulaga mai. O le sima i puipui i fafo o le fale sa maopoopo lava, ma e fou le taualuga o le fale ma ni faamalama fou. Peita’i i totonu, na vaaia ai e Iakopo ua pa’u’u ese sima mai le taualuga ma puipui ma o ni isi o galuega laupapa ua maosiosia ma faaleagaina.

I le savavali mai lea potu i lea potu, na molimau ai Matini i le paia o mea na tutupu i totonu o le malumalu. A e sa ia lagona le vaivai i le te’a ai o sina taimi ma latou faatali ai ina ia malolo.

“O e talitonu lava e moni le Tusi a Mamona ma o Iosefa Samita o se perofeta?” Na fesili ai Viliamu ia Matini.

Na foliga mai ua toe ola malosi mai le toeaina. “Sa ou vaai i papatusi. Sa ou vaai i le agelu. Sa ou faalogoina le siufofoga o le Atua,” na ia folafola mai ai, o lona leo ua tete i le faamaoni ma le mautinoa. “Ua tutusa ia te a’u lo’u teena o lo’u ola ai pe a ou teena le moni o le Tusi a Mamona po o le valaauga paia o Iosefa Samita.”

O le molimau sa faauila ai le potu. E ui na sau o ia i Katelani o se tagata le talitonu, a e na faaosofia Iakopo i mea na ia faalogo ai. I le emo o le mata, na foliga suia ai Matini mai se toeaina ita i se tagata iloga i ona talitonuga, musuia e le Atua ma faaeeina i le malamalama.

Na fesili Viliamu ia Matini pe faapefea ona ia tuuina atu sea molimau malosi i le mavae ai ona ia tuua le Ekalesia.

“Ou te lei tuua lava le Ekalesia,” na faapea mai ai Matini. “Na tuua a’u e le Ekalesia.”

“Mata e te toe fia vaai i lou aiga?” Na fesili atu ai Viliamu. “O le a fiafia lava Polika Iaga e saunia le ala e avatu ai oe i Iuta.”

Sa faifai atu Matini. “Na te le faia lava se mea ua sa’o.”

“Avatu ia te ia se savali mai ia te a’u,” na faapea mai ai Viliamu.

Sa mafaufau Matini i le ofo. “Valaau oe ia Polika Iaga,” na ia faapea mai ai. “Ta’u atu ia te ia ou te manao e asiasi atu i Iuta, i lo’u aiga, i la’u fanau. Ou te fiafia e talia le fesoasoani mai le Ekalesia, a e ou te le manao i se tulaga o le fai mea faapito.”

Na malie Viliamu e ave le savali, ma sa faatofa atu Matini i ana malo. A o laa atu i fafo ia tausoga nei, sa tuu le lima o Iakopo i luga o le tauau o Viliamu ma pulato’a atu i ona mata.

“O loo i ai se mea i totonu ia te a’u o loo ta’u maia faapea e moni mea na ta’u mai e le toeaina,” na ia fai atu ai. “Ou te iloa e moni le Tusi a Mamona.”¹⁰

---

A o fo’i atu Viliamu Homa i le Teritori o Iuta ma le savali a Matini, sa fautuaina atu e le au faitulafono o Uosigitone, DC ni tulafono fou e faamalosia ai le tulafono o le 1862 a Morrill e Tetee ai i le Sili atu ma le Tasi le Toalua. Ia Tesema 1869, na faaofi ai e Senatoa Arona Kakigi le tulafono, faatasi ai ma isi mea, o le a teena ai le aia a le Au Paia i se faamasinoga e auai ni tagata iloilo mo moliaga e faatatau i le tele o toalua. I le vaega mulimuli o le masina lea, na fautua atu ai e le sui o Shelby Cullom se isi tulafono e sala tupe ai, faafalepuipuiina ai, ma teena ai le tagatanuu o le Au Paia o Aso e Gata Ai o e o loo faataitaia le tele o faaipoipoga.¹¹

O le aso 6 Ianuari, 1870, i le mavae ai o aso tolu talu na taunuu le kopi o le Tulafono a Cullom i le Teritori o Iuta, sa feiloai ai Sarah Kimball ma tamaitai o le Aualofa o le Uarota Sefululima o le Aai o Sate Leki i luga o le fogafale lona lua o le faletele a le Aualofa e fuafua la latou savali tetee faasaga i le tulafono taufaaofi. Sa latou talitonu, o tulafono e teena ai le tele o faaipoipoga, o loo solia ai saolotoga tautapuaiga, e aafia ai o latou lotofuatiaifo ma saili e faalumaina ai le Au Paia.

“O le a matou le agavaa mo suafa ua matou tauaveina ma le toto o loo i o matou alatoto,” na ia faapea mai ai, “e tatau ea ona tatou gugu filemu a o i ai lenei tulafono iloga i luma o le Maota.”¹²

Na tusia ni mau sauniuni e tamaitai e faaaoga lo latou aafiaga lelei ina ia taofia nei tulafono. Sa faaalia lo latou le fiafia e faasaga i alii o e o loo faailoa atua tulafono i le konakaresi ma faapea ai o le a talosagaina le Kovana o Iuta mo le aia a tamaitai e palota i totonu o le teritori. Sa tonu foi ia i latou e auina atu ni sui tamaitai se toalua i Uosigitone, DC, e tauanau e fai ma sui o le Au Paia.

I le atoa ai o le itula talu na amata le fonotaga, na taunuu ai Elisa Sinou i le fale faafiafia e tuuina atu lana lagolago. Sa ia talitonu e tatau i uso o le Aualofa ma o latou aiga ona puipui le Ekalesia ma ala o latou soifua ai. I le tele o taimi e faaaoga ai e i latou e faitioina le Ekalesia, nusipepa lauiloa, tusigaata faapolokiki, tusifaitau, ma tautalaga e faailoa atu ai o tamaitai o le Ekalesia e matitiva, o ni tagata taotaomia o faaipoipoga e sili atu ma le tasi. “E tatau ona tatou tulai i le mamalu o lo tatou valaauga ma tautala atu mo i tatou lava,” sa ia ta’u atu i tamaitai.¹³

Sa malulu ma aisa le tau i le vaiaso na sosoo ai, a e silia ma le tolu afe tamaitai na lototetele i tulaga o le tau i le aso 13 Ianuari e faapotopoto i le tapeneko tuai i le Aai o Sate Leki mo se “Fonotaga Sili na Matamataita” e tetee ai i tulafono a Kakigi ma Cullom. Sa pulefaamalumalu ia Sarah Kimball i le fonotaga. E ese mai ai i tagata tusitala, e leai ma ni alii na auai.

Ina ua ma’ea le amataga o le fonotaga, sa agai atu Sarah i le pulela’a. E ui lava sa tele ina tautatala atu tamaitai o le atunuu i nofoaga faitele e faatatau i mataupu faapolokiki, aemaise le aia tatau a tamaitai e palota ai, ma le faamutaina o pologa, sa avea lava ma se mea e ono faatupu vevesi. A e sa tinou Sarah e avatu se leo i nofoaga faitele i tamaitai o le Au Paia o Aso e Gata Ai. “Ua tatou solia ea se tulafono a le Iunaite Setete?” sa ia valaau atu ai i le faapotopotoga.

“Leai!” na tali valaau mai ai tamaitai.

“Ona aisea la ua tatou i ai iinei i le asō?” na fesili atu ai Sarah. “Ua tulia tatou mai lea nofoaga i lea nofoaga, ma pe aisea? Ona o le talitonu lava ma le faatinoina o fautuaga a le Atua e pei ona i ai i totonu o le talalelei o le lagi.”¹⁴

O se komiti o ni peresitene o le Aualofa--e aofia ai Malia Isapela Hoone, Rasela Karata, ma Makerita Simutu--sa tuuina atu se faamatalaga aloaia o le tetee faasaga i tulafono e teetee i mataupu o le sili atu ma le tasi le toalua. “Sa matou faaaogaina ma le lotogatasi le malosi atoatoa o le amiotonu ma aia tatau uma ua matou mautofi ai o ni afafine o tagatanuu Amerika,” na latou tautino atu ai, “ina ia taofia le faasologa o nei tulafono, i le iloa lea o le a tuuina atu ai se tulaga mataga e le mafai ona alofia i luga o la tatou faigamalo o le ripapelika i le aumaia o le lamatia i le saolotoga ma olaga o ona tagatanuu sili ona faatuatuaina ma filemu.”¹⁵

Sa tautatala malosi isi tamaitai i le fonotaga. Sa faamatalaina e Amanda Samita le ala na fasiotia ai lona toalua ma lona atalii ma le lavea o le isi atalii i le fasiotiga o tagata i le Falelaupapa o Hone i le tolusefulu tausaga ua tuanai atu. “Ia tatou tutulai mo le mea moni tusa lava pe tatou te feoti ai!” sa ia aioi atu ai a o patipati le toatele o le faatasiga i le tapeneko.

Sa faitioina e Fipe Uitilafi le Iunaite Setete mo le teenaina o le saolotoga e tapuai ai le Au Paia. “Afai o le a teena e taitai o lo tatou malo le agaga ma tulafono o lo tatou Faavae mamalu e pei o le aveesea mai i o tatou perofeta, aposetolo, ma toeaiina o le tagatanuu ma faafalepuipuiina i latou i le usitaia o lenei tulafono, sa ia folafola atu ai, “tuu atu ina ia latou taliaina la tatou talosaga mulimuli lenei, ia faatetele a latou falepuipui ia ofi ai a latou avā, aua o le mea latou te o i ai o le a tatou o foi i ai.”

Sa saunoa mulimuli Elisa Sinou. “O lo’u mana’o ia mafai e i tatou o tina ma uso i Isaraelu ona puipuia le mea moni ma le amiotonu ma lagolagoina i latou o e o loo talai atu,” sa ia faapea mai ai. “Sei o tatou faamalolosi e faaleleia o tatou mafaufau ma atiina a’e lena malosi o uiga patino o le amio sao lea e le mafai ona faasilia i soo se nofoaga i luga o le fogaeleele.”¹⁶

---

I aso na mulimuli ane ai, na tusia faasalalauina ai i niusipepa i le atunuu le lipoti atoa o le Fonotaga Matamata Ita Tele.¹⁷ I se taimi e lei mamao mulimuli ane, na lipotia ai e le Tala a le Tesareta ni tautalaga sa faia i isi fonotaga matamata ita i nofoaga i totonu o le teritori. Talu ai sa faauigaina e tulafono a Kalakigi ma Cullom ia faaipoipoga e sili atu i le tasi o se ituaiga pologa, e toatele tamaitai o e na saunoa i nei fonotaga e faamamafa ai le latou aia e faaipoipo atu ai i se alii o lana filifiliga.¹⁸

I totonu o fonotaga a le fono faitulafono, i le taimi lea, sa manatunatu ai Iosefa F. Samita ma isi tagata o le Maota o Sui o Iuta i le fesili e faatatau i aia tatau a tamaitai e palota ai i totonu o le teritori.¹⁹ Na faagasolo e le Iunaite Setete le tuuina atu o le aia tatau e palota ai i tagatanuu alii uma, e aofia ai ma alii o e sa avea muamua ma pologa. A e i le atunuu atoa, ua na’o le Teritori o Uaiomi ua faatagaina tamaitai e palota, e ui i le faatupulaia i le atunuu o le tuuina atu o le palota i tagatanuu uma i luga a’e o le luasefulutasi tausaga.²⁰

I nai masina muamua atu, sa fautuaina e ni isi o le aufaitulafono a le I.S le tuuina atu o aia e palota ai i tamaitai Iuta, i le mautinoa lea o le a latou palota e aveese faaletulafono le faaipoipoga faaautaunonofo. O le toatele o le Au Paia i totonu o le teritori, o alii ma tamaitai, sa lagolagoina le aia tatau mo tamaitai e palota ai, e ui lava, e moni ona e latou te mautinoa o le a faamalosia ai le mafai e le Au Paia ona faia tulafono lea e puipuia ai saolotoga tautapuaiga i totonu o lo latou lava lotoifale.²¹

O le aso 29 Ianuari, 1870, sa auai atu ai Iosefa i se fonotaga a le Aoga a Perofeta o le Aai o Sate Leki lea na faaleoina ai e Osona Palate, o lona uso a aposetolo ma se taitai maualuga o le fonofaitulafono o le teritori, lona lagolagoina o le aia tatau a tamaitai e palota ai. Na palota le fonofaitulafono e pasia le tulafono i nai aso mulimuli ane. Na auina atu e Iosefa le kopi aloaia o le tulafono i le sui kovana, o le na sainia ma avea ai ma tulafono.²²

E ui o le tulafono fou lea e tuuina atu ai i tamaitai ia aia tatau e palota ai sa o se mafuaaga e faafiafiaina ai, peitai sa itiiti se sao e faaitiitia ai le popole o le Au Paia e uiga i tulafono e tetee i faaipoipoga faaautaunonofo o loo iloiloina i Uosigitone lea e ono pasia e le Konakaresi tusa pe lagolagoina pe leai e le au palota a Iuta.²³

E faaopoopo atu i le popolega le tuputupu a’e o le tetee i le Ekalesia mai totonu lava o le teritori. O tausoga a Iosefa o Alesana ma Tavita na tuua Iuta i nai masina na muamua atu, sa itiiti le manuia o la misiona nai lo le mea sa faamoemoe i ai.²⁴ A e o Viliamu Atuapea ma Elia Harisona sa faatulagaina lata mai e na mulimuli mai ia i la’ua i totonu o le “Ekalesia a Siona” ma faalauiloa atu i la’ua o loo taulamua i le “Vaega Fou” e toefaatulaga le Ekalesia ma le perisitua.²⁵ Sa latou amatalia foi se niusipepa, o le Mormon Tribune ma lalago faatasi ma faipisinisi i totonu o le aai e faatu le “Pati a le Liberale” e faafetaiaia le malosi faapolokiki a le Au Paia i totonu o le teritori.²⁶

I totonu o lenei tauteega, sa faaauau pea e Iosefa ma isi aposetolo ona lagolagoina le taitaiga a Polika Iaga. “Afai e i ai ni faaaliga a le Atua e tuu atu i le tagata,” na molimau atu ai Uilifoti Uitilafi i le Aoga a Perofeta, “o le a ia le tuuina maia ia te a’u, e leai foi ia Pili Atuapea, a e o le a oo mai e ala mai ia Peresitene Iaga. O le a Ia fetalai mai e ala mai i Lana fofoga taumomoli.”²⁷

E i ai nai alii na faamuta lo latou auai i le aoga ae o atu i le Vaega Fou. Ma o isi, e aofia ai le faifeautalai sa malosi muamua o T.B.H. Sitenifale, ua amata ona faavaivai.²⁸

O le aso 23 Mati, na pasia ai e le Maota o Sui o le Iunaite Setete le tulafono a Cullom ma auina atu i le Senate mo le faamaoniga. Tolu aso mulimuli ane ai, i le oo atu ai o le tala faapopole i le Aai o Sate Leki, o ni isi o alii o le Aoga a Perofeta ua latou popole o le a i ai se feteenaiga ma le Iunaite Setete.

Na uunaia i latou e Siaosi Q. Kanona ina ia faaeteete. “O le agaga o le fetaua’i e foliga e faigofie lava ona aumaia i fafo pe a moomia e le siosiomaga o loo i ai,” na ia faapea mai ai. “Ia tatou tausia ia filemu o tatou laulaufaiva ma aua nei faaaafiaina i tatou i le tautala atu ma le le atamai.”

O Tanielu Uele, o se fesoasoani i le Au Peresitene Sili, sa talitonu o se tulaga atamai le sauniuni filemu mo se fetauaiga. A e sa ia manatunatu leotele pe le’i aumaia e le Au Paia lenei fili i o latou lava luga e ala i le le soifua ai i mataupu faavae o le galulue faatasi. “E to’afia e oo lava i lenei aoga i lenei aso o loo faia faafetauaiga faatasi ma latou ma lagolagoina o tatou fili i lenei aai, nai lo le lagolagoina o auauna a le Atua i a latou fautuaga?” sa ia fesili ai. “Ia tatou salamo ma faia ia sili atu.”²⁹

Sa faaleoina e Iosefa F. Samita nei upu i totonu o lana tusi i lona tuafafine o Mareta Ane. “E leai se faafitauli i lo’u mafaufau pe ana le mo le mea moni faapea ou te le talitonu i le avea ai ma tagata ua tatou ola e sili ona latalata i le Atua e pei na tatau ai ona tatou faia,” na ia tusia ai. “Atonu e i ai se mala mai le Alii ua saunia mo i tatou i lenei mea.”³⁰

---

Ina ua foi mai i le Aai o Sate Leki ia Malia Isapela Homa, sa ia faafaigaluegaina Elisa Sinou ma Makerita Simuti e fesoasoani ia te ia i lana valaauga fou o le faasaosao. Sa ia valaaulia pe a ma le sefululua Peresitene o le Aualofa i lona fale ma fesili atu ia Elisa ma Makerita e galulue ma Sarah Kimball e tuufaatasia ni taiala o mataupu faavae mo le Ladie’s Cooperative Retrenchment Society. E pei na faatonuina ai, o le a latou faavaeina se sosaiete e fesoasoani i tamaitai i totonu o le Ekalesia ina ia faafaigofie taumafa ma sitaili, lea o le a tele atu ai le taimi e taulai ai i le tuputupu a’e faaleagaga ma le faaleatamai.

Na talitonu Malia Isapela o le faasaosao o le a tuu ai tamaitai uma i se tulaga faaagafesootai tutusa i le Ekalesia atoa. O ni isi o tamaitai sa faalotolotolua e faia ni faauooga ma ni tuaoi maumea, i lo latou matamumuli ai faapea latou te lei tuuina atu ni ipu ai ma ni meaai se tele. Sa manao Malia Isapela i tamaitai ia lagona le saoloto e fesootai ma isi ma aoao mai le tasi i le isi. E talitonu o ia soo se laulau e faatumulia i meaai lelei e faaaloalogia, e tusa lava po o le a lona faatauvaa ma faigofie e foliga ai.³¹

A o maua’a le toefaatulagaga i tamaitai o le Ekalesia, na iloa ai e Susi Iaga, le afafine e sefulu fa tausaga o Polika Iaga, e faapea, ua laei sili na faigofie ma le toe tetele ni taumafa e saunia e ava autaunonofo a lona tama. A o ia ma ona uso sa fiafia lava e ofu ofu e teuteu faatasi ma vaega nei e faatau mai faleoloa e pei o ripine, o faamau, o fusi, ma ie laise.³²

I se tasi afiafi o Me 1870, i le mavae ai o le tatalo faaleaiga, na saunoa atu ai lona tama i ni isi o ona afafine i totonu o le Fale Liona e uiga i le amatalia o se faalapotopotoga o le toefaatulagaina. “Ou te manao ia te outou e amatalia e a outou lava laei o ituaigi eseese,” na faapea mai ai Polika. “ O le toe faatulaga o mea uma lava, lea e le lelei ma e leai se tau, ma faaagai ai pea i luma mea uma ia e lelei ma matagofie. Ina ia le faanoanoa, a e ina ia e soifua i se ala e te mafai ai ona e fiafia moni lava i lenei olaga ma i le olaga a sau.”³³

I aso na mulimuli ane ai, na faatonuina ai e Elisa tamaitai talavou e uiga i mataupu faavae o le faasaosao ma fai atu ia i latou e aveese mai o latou ofu mea teuteu e le manaomia. O le taunuuga ua le o toe i ai ni sitaili. I mea sa i ai lipine ma ituaiga o lipine, ua na’o vaega o le ie e lei matafi ua iloa atu. Afai o le faasaosao na tatau ona iloa ai le ese o i latou mai le lalolagi, o lona uiga ua ausia.³⁴

A e sa malamalama lava Susi ma ona uso e faapea o le faasaosao, faapei o le galulue faatasi, e tatau ona tuuina atu ai i le Au Paia se mamanu fou mo le soifuaga, e fili ese mai ai latou mai sitaili e faalavelaveina ai ina ia mafai ona latou saoloto e ola i poloaiga faatasi ma o latou loto atoa.³⁵

I nai aso mulimuli ane ai i le maea ai o la latou fonotaga ma lo latou tama, o ni isi o uso o Susi ua latou faatulagaina le Matagaluega Muamua o Tamaitai Talavou o le Ladies’ Cooperative Retrenchment Association. I le faafeiloaia o tamaitai faaipoipo laiti ma tamaitai nofofua, sa tonu ia i latou e oofu i ofu tauagafau, lagolago e le tasi le isi i galuega lelei, ma avea ma faataitaiga lelei i le lalolagi. O Ela Epi, o se tasi o uso faaipoipo o Susi, sa filifilia e avea ma peresitene, ma o Susi sa tuuina atu i le aso na sosoo ai e avea ma tusitala aoao mo le sosaiete.³⁶

“I le faatusa ai o le Ekalesia a Iesu Keriso o se aai ua tuu i luga o le mauga e avea ma se sulu o le malamalama i atunuu uma,” sa tonu ai ia i latou, “o lo latou tiute le faia o faataitaiga mo isi, nai lo le saili ia mulimuli atu ia i latou.”³⁷

1. Harrison, “Appeal to the People,” 406–8; tagai foi i le Harrison ma Godbe, “Manifeso,” 470–73. Ua faasa’oina le upusii mo le manino; “mai fafo o tatou” i le uluai tusiga ua suia i le “mai fafo o lo tatou.” Autu: Sa Atuapea

2. “I le Au Paia o Aso e Gata Ai,” Deseret Evening News, Oke. 26, 1869, [2].

3. “Polokalama o le Malaga a Peresitene B. Iaga i Nofoaga ua Nofoia i Saute o Kanisone,” 1869, Talafaamaumau, Minute, ma Faasologa o le Malaga, 1844–77, Faila a le Ofisa o Polika Iaga, CHL; Lipoti mo le Itumalo o Iuta ma le Itumalo o Sanepeta, i totonu o le Fono Faitulafono o le Teritori o Iuta, Faila a le Komiti o Talafaasolopito o le Maota, CHL.

4. “Tautalaga,” Tala a le Tesareta, Nov. 24, 1869, [8]; Gates, Tala faasolopito o le Asosi o Tamaitai Talavou o le Alualu i Luma Tutusa, 8–9, 30–31; tagai foi i le Fonotaga a Tamaitai Galulue Faatasi Faasaosao, Minute, Fep. 19, 1870, i totonu o Derr ma isi, Tausaga Muamua e Limasefulu o le Aualofa, 344–45.

5. Polika Iaga, Lauga, Mat. 27, 1868 (lauga lona lua); Polika Iaga, Lauga, Ape. 6, 1868, Matagaluega Talafaasolopito o le Ekalesia Church History Pitman Shorthand Tusiga, CHL; tagai foi, mo faataitaiga, “Tautalaga,” Tala o le Tesareta, Ape. 29, 1868, [3]; “Tautalaga,” Tala o le Tesareta, Me 13, 1868, [6]–[7]; “Lauga,” Tala o le Tesareta, Oke. 21, 1868, [2]–[3]; “Tautalaga,” Tala o le Tesareta, Oke. 13, 1869, [14]; ma “Tautalaga,” Me 6, 1870, Tala o le Tesareta, Iuni 1, 1870, [7]. Ua faasa’oina le upusii mo le manino; o le punavai autu o loo i ai le “O mausa faamaimau taimi o le soona faamaimau a tagata e le talafeagai i totonu o lo tatou lotoifale.”

6. “Tautalaga,” Tala o le Tesareta, Nov. 24, 1869, [8]; Gates, Tala Faasolopito o le Asosi o Tamaitai Talavou o le Alualu i Luma Tutusa, 30–31, 41–44; Lauga a Malia Isapela Hoone, i totonu o le Lipoti a le Aualofa Iupeli, Mat. 17, 1892, i totonu o Derr ma isi, Tausaga Muamua e Limasefulu o le Aualofa, 613–15.

7. Gates, Tala Faasolopito o le Asosi o Tamaitai Talavou o le Alualu i Luma Tutusa, 31; Webster ma Wheeler, Lolomi Fefiloi o le Gagana Igilisi, 364; Lauga a Malia Isapela Hoone, i totonu o le Lipoti a le Aualofa Iupeli, Mat. 17, 1892, i totonu o Derr ma isi, Tausaga Muamua e Limasefulu o le Au Alofa, 616; “Laulau Faasaosao,” Tala o le Tesareta, Fep. 23, 1870, [12].

8. Gates, Tala Faasolopito o le Asosi o Tamaitai Talavou o le Alualu i Luma Tutusa, 30–31; “Tautalaga,” Tala o le Tesareta, Nov. 24, 1869, [8]; Lauga a Malia Isapela Hoone, i totonu o le Lipoti a le Aualofa Iupeli, Mat. 17, 1892, i totonu o Derr ma isi, Tausaga Muamua e Limasefulu o le Au Alofa, 616. Fuaiupu mulimuli o upusii ua faasaoina mo le manino; mai le uluai tusiga “Sa ou tau atu ia te ia, ou te manao ia faatu se sosaiete o ona tagata e malilie e maua se taumafa lelei mama o le taeao, mo i latou lava ma fanau, e aunoa ma le kukaina o ni meaai eseese i lalo mai e fasefulu.“ Autu: Faasaosao

9. Homer, “Maliu o Matini Harisi,” 468–69; Matini Harisi laitiiti ia Polika Iaga, Ian. 11, 1870, Faila o le Ofisa o Polika Iaga, CHL; Black and Porter, Matini Harisi, 278–80, 284–85, 287–89, 320–41, 377–79, 385–88, 408–9; tagai foi Au Paia, voluma 1, mataupu 7 ma le 25.

10. Homer, “Maliu o Matini Harisi,” 469–71; “Katelani, Ohaio,” Tala o le Tesareta, Aok. 24, 1870, [5]. Autu: Molimau o le Tusi a Mamona; Malumalu o Katelani

11. Derr ma isi, Tausaga Muamua e Limasefulu o le Aualofa, 243, 305, 312; O se Tulafono e Sauni ai mo le Faaagaoioiga o le Tulafono e tali atu ai i le solitulafono o le sili atu ma le tasi le toalua i totonu o le Teritori o Iuta, ma mo Isi Faamoemoega, S. 286, 41st Konakaresi., Taualumaga lona lua. (1869); O se Tulafono e Fesoasoani ai le Faagaoioiga o Tulafono i totonu o le Teritori o Iuta, ma mo Isi Faamoemoega, M.S. 696, 41st Konakaresi., Taualumaga lona lua. (1869); tagai foi “O se Tulafono,” Tala o le Afiafi a le Tesareta, Ian. 4, 1870, [2]. Autu: Tulafono e Tetee ai i Faaipoipoga e Sili atu ma le Tasi

12. Matagaluega o Talafaasolopito, Talafaamaumau a le Ofisa, Ian. 3, 1870; Minute o le “Monotaga Toatele a Tamaitai,” Ian. 6, 1870, i totonu o Derr ma isi, Tausaga Muamua e Limasefulu o le Au Alofa, 305–10; tagai foi i le Sara M. Kimball, “Lauga Tuuina atu i le Faataotoina o le Maatulimanu o le Faleteuoloa,” i totonu o minute ma faamaumauga a le Aualofa o le Uarota Lona Sefululima, voluma 1, Nov. 12, 1868.

13. Minute o le “Fonotaga Tele a Tamaitai,” Ian. 6, 1870, i totonu o Derr ma isi, Tausaga Muamua e Limasefulu o le Aualofa, 307–10; Tuuina atu, Manu i luga o le Tainafi, mataupu 6 ma le 7; Bunker ma Bitton, Ata Kalafi Mamona, 16–26.

14. Minute o le “Fonotaga Tele Matamata Ita,” Ian. 13, 1870, i totonu o Derr ma isi, Tausaga Muamua e Limasefulu o le Aualofa, 311, 313, 332; Maughan, Talaaga o le Tagata Lava Ia, voluma 2, Ian. 13 ma Feb. 1, 1870; Campbell, E Le Mafai e le Tagata ona Tautala mo Ia, 4–5, 9–12; Ulrich, Fale e Tumu i Tamaitai, xi–xii; tagai foi i le “Polygamy,” Niu Ioka Herald, Ian. 23, 1870, 4.

15. Minute o le “Fonotaga Tele Matamata Ita,” Ian. 13, 1870, i totonu o Derr ma isi, Tausaga Muamua e Limasefulu o le Aualofa, 313, 318–19.

16. Minute o le “Fonotaga Tele Matamata Ita,” Ian. 13, 1870, i totonu o Derr ma isi, Tausaga Muamua e Limasefulu o le Aualofa, 313–32; tagai foi i le Au Paia, voluma 1, mataupu 30. Autu: Amana Pane Samita; Elaisa R. Sinou

17. Tagai Ulrich, Fale e Tumu i Tamaitai, xii.

18. “Fonotaga Matamata Ita i totonu o Nu’u,” Tala a le Tesareta, Fep. 2, 1870, 1; “Fonotaga Matamata Ita,” Tala o le Tesareta, Fep. 9, 1870, 12; “Tamaitai’ Fonotaga Tele,” Tala o le Tesareta, Mat. 9, 1870, 1; Maughan, Talaaga o le Tagata Lava Ia, voluma 2, Ian. 13 ma 30, 18700; tagai foi i le Phipps, “Faaipoipoga ma le Togisala,” 451–64.

19. Minute o le “Fonotaga Tele a Tamaitai,” Ian. 6, 1870, i totonu o Derr ma isi, Tausaga Muamua e Limasefulu o le Aualofa, 308; Faamaumauga o le Auai i le Maota, 1870; Minute o le Maota, Taualumaga lona sefuluiva., Ian. 27–Fep. 10, 1870, Pepa o Fono Faitulafono a le Teritori o Iuta, CHL; Talafaamaumau, a Iosefa F. Samita, Ian. 27 ma le Fep. 9, 1870; tagai foi i le Tulafono o Aia Tatau a Tamaitai e Palota ai, 1870, Pepa a le Fono Faitulafono a le Teritori a Iuta, CHL.

20. O le Mau e Fautuaina ai le Suiga o le Faavae o le Iunaite Setete [Fep. 27, 1869], Tulafono i Lona Aoao Tetele [1869], Konakaresi lona 40., Taualumaga lona tolu., Res. 14, 346; Gordon, “Saolotoga O le Faatamaia e le Tagata Lava ia,” 285; Nelesoni, Suiga Lona Sefulufa, 55–58, 87, 98–99, 136–38.

21. “Fuafuaga Fou,” ma le “Aia Tatau a Tamaitai e Palota ai i totonu o Iuta,” Tala o le Tesareta, Mat. 24, 1869, [6]; Tulafono e faaitiitia ai le Sili atu ma tasi le Toalua i totonu o Iuta, R.M. Pepa. Nu. 64, Konakaresi 41., Taualumaga muamua. (1869); Tullidge, Talafaasolopito o le Aai o Sate Leki, 435; tagai foi i le Alesana, “Faataitaiga i Tulafono alualu i luma,” 21, 24–27.

22. Faamaumauga a le Aai o Sate Leki i le Aoga a Perofeta, Ian. 29, 1870; Talafaamaumau a Iosefa F. Samita, Ian. 29 ma le Fep. 10, 1870; “Taualumaga Lona Sefuluiva o le Fono Faitulafono,” Tala a le Tesareta, Ian. 12, 1870, [8]; Folasaga i le “Aia Tatau a Tamaitai e Palota ai i totonu o Iuta,” Fep. 8, 1870; Elisa R. Sinou ma isi ia Setefano A. Mann, Fep. 19, 1870, i totonu o Derr ma isi, Tausaga Muamua e Limasefulu o le Aualofa, 333–34, 350–52. Autu: Aia Tatau a Tamaitai e Palota ai

23. Tagai i le Talafaamaumau a le Ofisa, Matagaluega o Talafaasolopito, Ian. 3, 1870; ma Tullidge, Talafaasolopito o le Aai o Sate Leki, 467.

24. “Vaega mai le Api Talaaga a Elder Tavita H. Samita,” Au Paia O Aso e Gata Ai Mao’i’ Herald, Ian. 1, 1870, 9–11; Samita, “Talatusia o Alesana Hale Samita,” 505; Avery, Mai le Misiona i le le lelei o le Mafaufau, 111–13. Autu: Sa Atuape

25. Tullidge, “Tautala atu Perofeta,” 523; “Vaega Fou,” 531; Harrison ma Godbe, “Manifeso,” 471–72; Walker, “Amataga o le Tetee a le Au Sa Atuapea,” 233–34, 243–44.

26. Atuape ma Harrison, “Prospectus,” 474–75; Baskin, Manatuaga o Iuta i ona Po Po Fou, 23–27; Walker, Au Paia Faalogogata, 221–29.

27. Talafaamaumau a Iosefa F. Samita, Ian. 1 ma le 15, 1870; Talafaamaumau a le Aai o Sate Leki i le Aoga o Perofeta, Ian. 21–22 ma le Ape. 23, 1870.

28. Talafaamaumau a Iosefa F . Samita, Ian. 16 ma le 29, 1870; Talafaamaumau a le Aai o Sate Leki i le Aoga a Perofeta, Ian. 22 ma le 29, 1870; Mat. 26, 1870.

29. Congressional Globe, Konakaresi 41., Taualumaga lona lua., Mat. 23, 1870, 2180–81; “Faatinoga a le Maota i le Tulafono a Cullom,” Tala o le Afiafi a le Tesareta, Mat. 24, 1870, [2]; Talafaamaumau a le Aai o Sate Leki i le Aoga a Perofeta, Mat. 26, 1870. Ua faasa’oina le upusii a Tanielu Uele mo le manino; “aufono” i le uluai tusiga ua suia i le “fautuaga,” ma ua faaopoopo i ai le upu “faatasi.”

30. Iosefa F. Samita ia Mareta Ana Samita Harisi, Mat. 29, 1870, Tuufaatasiga a Carole C. King, CHL.

31. Gates, Tala Faasolopito o le Asosi o Tamaitai Talavou o le Alualu i Luma Tutusa, 31; Minute o le Fonotaga a Tamaitai Galulue Faatasi i le Faasaosao, Fep. 10, 1870; Lauga a Malia Isapela Hoone, i totonu o le Lipoti a le Aualofa Iupeli, Mat. 17, 1892, i totonu o Derr ma isi, Tausaga Muamua e Limasefulu o le Aualofa, 338--42, 616. Autu: Faasaosao

32. Tagai i Gates, Tala Faasolopito o le Asosi o Tamaitai Talavou o le Alualu i Luma Tutusa, 9–11.

33. Talafaamaumau a le Ofisa, Matagaluega o Talafaasolopito, 25 Me , 1870, 71; Dougall, “Manatuaga” 594; Gates, “Faailoga o le Talafaasolopito o le Y. L. M. I. A,” 231–32.

34. Dougall, “Manatuaga,” 594–95; tagai foi i Gates, Tala Faasolopito o le Asosi o Tamaitai Talavou o le Alualu i Luma Tutusa, 10–11.

35. Asosi a Tamaitai Galulue Faatasi Faasaosao, Minute, Me. 28, 1870, Pepa a Zina D. Young, Tuufaatasiga a Aiga o Zina Card Brown, CHL; tagai foi i le Mau Pasia a le Matagaluega a Tamaitai Talavou o le Asosi a Tamaitai Galulue Faatasi Faasaosao, Me 27, 1870, i totonu o Derr ma isi, Tausaga Muamua e Limasefulu o le Aualofa, 353–57.

36. Mau Pasia a le Matagaluega a Tamaitai Talavou o le Asosi a Tamaitai Galulue Faatasi Faasaosao, Me 27, 1870, i totonu o Derr ma isi, Tausaga Muamua e Limasefulu o le Aualofa, 353–57; Asosi a Tamaitai Galulue Faatasi Faasaosao, Minute, Me. 28, 1870, Pepa a Zina D. Young, Tuufaatasiga a le Aiga o Zina Card Brown, CHL.

37. Mau Pasia a le Matagaluega a Tamaitai Talavou o le Asosi a Tamaitai Galulue Faatasi Faasaosao, Me 27, 1870, i totonu o Derr ma isi, Tausaga Muamua e Limasefulu o le Aualofa, 355. Autu: Faalapotopotoga a Tamaitai Talavou