Mataupu 36

O le Mea Vaivai o Lenei Lalolagi

Ia Iulai 29, 1887, sa tutu Uilifoti Uitilafi faatasi ma Siaoasi Q. Cannon ma Iosefa F. Samita i le faamalama o le ofisa o le peresitene o le Ekalesia i le Aai i Sate Leki. Sa latou matamata faatasi atu a o alu lemu atu le solo faaaloalo o le maliu o Ioane Teila i le aai. Sa toatele tagata sa laina i alatetele a o faagasolo atu le sili atu nai lo le selau ituaiga o taavale solofanua eseese. Sa faailoa mai e Emeline Wells lagona o le toatele o le Au Paia ina ua ia tusia faapea o Peresitene Teila “o se tagata e mafai ona mautinoa e tagata i taimi uma o se taitai ma o se tasi e mafai ona latou mitamita moni ai.”¹

Na o le taufaamata’u o le pueina na taofia ai Uilifoti ma isi aposetolo e toalua mai le la’a atu i fafo e faaaloalo i la latou uo ma perofeta. E pei o le toatele o lana korama, sa seāseā lava aliali Uilifoti i le lautele e aloese ai mai le pueina mo autaunonofo ma le nonofo faatasi lē faatulafonoina. Ina ua maliu lona faletua o Fipe i le 1885, sa i ai Uilifoti i tafatafa o lona moega. Ae sa le i auai o ia i lona falelauasiga i le tolu aso mulimuli ane, ona o le popole i pueina o ia. O lenei la, i le avea ai ma peresitene o le Korama a le Toasefululua ma le taitai sinia o le Ekalesia, sa atili ai le avea o Uilifoti ma sē sa mata’ituina e taitai faaletulafono.

E lei naunau lava Uilifoti na te taitaia le Ekalesia. Ina ua ia maua le tala o le maliu o Ioane, sa matua mamafa i ona luga le avega o lea tiutetauave. “E ofoofogia Ou ala, le Alii le Atua Silisiliese,” sa ia tatalo ai, “auā ua E tofia lava le mea vaivai o lenei lalolagi e faia Lau galuega i le lalolagi.”²

Sa faapotopoto e Uilifoti le Toasefululua i ni nai aso talu le falelauasiga ina ia talanoaina ai le lumanai o le Ekalesia. E pei o le tulaga sa i ai i le mavae o maliu o Iosefa Samita ma Polika Iaga, sa le i faatulagaina i le taimi lava lena se Au Peresitene Sili fou. Nai lo lena, i se faamatalaga lauaitele, sa faamaonia ai e Uilifoti faapea i le le i ai o se Au Peresitene Sili, sa i ai i le Au Aposetolo e Toasefululua le pule e taitai ai le Ekalesia.³

I masina na sosoo ai, e tele ni mea sa faataunuuina e aposetolo i lalo o le taitaiga a Uilifoti. E ui lava sa toeitiiti saunia le malumalu o Manti e faapaiaina, o le malumalu o Sate Leki e tele atu ma sili atu ona faigata sa mamao lava mai le faamaeaina. O uluai fuafuaga mo le malumalu sa faapea e lua potu tele mo faapotopotoga o le a aafia ai le fale aluga ma isi fale a lalo. Ae peitai, a o i ai Ioane Teila i fale a lalo i lalo o le palapala, sa mafaufau o ia i se ata fou o le fuafuaga o le a aveesea atoa ai lava le potu tele mo faapotopotoga i fale a lalo, ae faaavanoa ai mo potu o faaeega paia. O lea, sa feutagai ai Uilifoti ma le Toasefululua ma faufale i se auala sili e faatinoina ai nei fuafuaga. Sa latou faamaonia ai foi se talosaga e faamaea ia olo e ono o le malumalu i le maa paepae nai lo laupapa, e pei ona fuafuaina muamua.⁴

Sa saunia filemu lava Uilifoti ma isi taitai o le Ekalesia e faia se isi taumafaiga i le talosaga mo le avea o Iuta o se setete. Talu ai o taumafaiga e pueina taitai o le Ekalesia sa taofia ai le Au Paia mai le faia o le konefesi aoao i le Aai o Sate Leki mo le tolu tausaga, sa feutagai foi le Au Toasefululua ma taitai faaletulafono o le lotoifale ina ia faatagaina Uilifoti ma aposetolo o e e le i moliaina i le autaunonofo po o le nonofo faatasi lē faatulafonoina e o mai mai o latou lafitaga ma faia le konefesi i le aai.⁵

A o feiloai faatasi le au aposetolo, sa maitauina e Uilifoti le alia’i o feeseeseaiga i totonu o a latou fonotaga. O ni aposetolo fou sa valaauina i le korama talu le maliu o Polika Iaga i se sefulu tausaga i luma atu, e aofia ai Mose Thatcher, Faranisisi Lyman, Hipa Grant, ma Ioane W. Teila. O lea ua foliga mai o i latou taitoatasi ua i ai ni masalosaloga e uiga ia Siaosi Q. Cannon. Sa latou talitonu sa ia faia le tele o ni filifiliga lē lelei o se tagata faipisinisi, faapolotiti, ma taitai o le Ekalesia.

O se tasi o o latou popolega o le taulimaina lata mai e Siaosi o se mataupu faaleaoaiga na aafia ai lona atalii, o se taitai iloga o le Ekalesia o lē sa agasala i le mulilua. Sa latou lē fiafia foi faapea sa faia e Siaosi ni filifiliga na o ia mo le Ekalesia i le taimi o le toe gasegase o Ioane Teila. Sa latou lē fiafia foi faapea sa fautuaina e Siaosi ia Uilifoti e uiga i pisinisi a le Ekalesia, e ui lava sa soloia le Au Peresitene Sili ma sa toe foi Siaosi i lona nofoaga i le Toasefululua. I mafaufau o le au aposetolo fou, sa faia e Siaosi nei mea ona o lona manatu ia te ia lava ma lē faaaafia ai i latou i le faagasologa o faiga filifiliga.⁶

Peitai, sa talitonu Siaosi ua sese ona faamasinoina o ia. Sa ioeina e ia lona faia o mea sese laiti mai lea taimi i lea taimi, ae o tuuaiga faasaga ia te ia e sese ma faavae i faamatalaga le atoatoa. Sa malamalama Uilifoti i faigata e tele sa feagai ma Siaosi i nai tausaga ua mavae atu, ma sa ia faaauau pea ona faailoa atu lona faatuatuaga ia te ia ma faalagolago i lona poto ma aafiaga masani.⁷

Ia Oketopa 5, i le aso i luma mai o le konefesi aoao, sa faapotopoto faatasi ai e Uilifoti le au aposetolo e saili ai se faaleleiga. “Mai tagata uma lava i lalo o le lagi,” sa ia saunoa ai, “o i tatou e tatau ona lotogatasi.” Ona ia toe faafofoga ai foi lea a o toe faalaulau mai e aposetolo fou a latou faitioga. Ina ua uma a latou faitioga, sa saunoa atu Uilifoti e uiga ia Iosefa Samita, Polika Iaga, ma Ioane Teila, o e sa ia iloa lelei ma galulue felata’i faatasi. E ui o ni tagata maoae nei alii, sa ia tagai i o latou lē atoatoa. Ae o le a latou lē tali ia te ia, sa saunoa ai Uilifoti. O le a tali i latou i le Atua, o lo latou faamasino.

“E tatau ona tatou taulimaina Uso Cannon ma le manatu ia te ia,” sa saunoa ai Uilifoti. “E i ai ona lē atoatoa. Pe ana faapea e leai, semanu e lē faatasi o ia ma i tatou.”

“Afai ua ou faamanu’alia nisi o o outou lagona,” na saunoa ai Siaosi, “ou te talosaga ma le lotomaualalo mo la outou faamagaloga.”

Sa muta le fonotaga i le te’a o le vaeluaga o le po, ma le tatalo amata o le konefesi aoao ua na o ni nai itula le mamao. E ui i le talosaga a Siaosi mo se faamagaloga, sa talitonu pea Mose Thatcher ma Hipa Grant faapea e le i talafeagai ona tali o ia mo ona sese, ma sa laua ta’u atu i le usoga la te le i lagona se faaleleiga.

I lana tusi faamaumau, sa faamatala ai e Uilifoti le afiafi lea i ni upu pupuu se tolu: “E ese le tiga.”⁸

---

E tusa o le taimi lava lea, sa taiala atu ai e Samuela Manoa lona paopao i luga o le vai lanumoana o le Uafu i Pago Pago. I ona tua, sa iloa atu ai tumutumu o atu mauga e tele feeseeseai o Tutuila o o ae i luga agai i le vateatea. I luma atu, sa taula ai se vaa folau tele i le ulufalega o le uafu, o loo faatali mo se seila o le lotoifale e fesoasoani e pailate saogalemu atu le vaa i le aau.

Sa iloa lelei e Samuela le uafu ona o ia o se tagatanuu o le motu tuaoi o Aunu’u. Ina ua oo ina taunuu lona paopao i le vaa tele o loo faatali, sa valaau Samuela i le kapeteni ma ofo atu lana fesoasoani. Sa togi ifo e le kapeteni se apefai maea i le itu o le vaa ma faafeiloai atu Samuela i luga.

Sa mulimuli Samuela i le kapeteni i lona ofisa i le fola pito i lalo. O le taeao po lava, ma sa manatu le kapeteni pe manao Samuela e kuka se ham ma fuamoa mo ia lava a o le i folau atu i le uafu. Sa faafetai Samuela i ai ma sa tuuina mai ia te ia nusipepa tuai e tutu ai lana afi.

Sa mafai ona faitau e Samuela sina Igilisi ma sa ia iloa atu o se tasi o nusipepa e mai Kalefonia. A o ia tuu le pepa i le afi, sa iloa lelei atu ai se ulutala i le tau malamalama o le afi. O se faasilasilaga o se konefesi mo tagata O le Ekalesia a Iesu Keriso o le Au Paia o Aso e Gata Ai. Sa oso le fatu o Samuela, ma ia se’i mai le pepa ma tape le afi.⁹

O le aso o le konefesi ua leva ona te’a, ae sa sili atu ona fiafia Samuela i le igoa o le ekalesia nai lo le mea na tupu. O le ekalesia lea o lana ekalesia, ma o lea, mo se taimi muamua i tausaga e tele, sa ia iloa ai o loo ola pea i le Iunaite Setete.

A o alii talavou i le vaitaimi o le 1850, sa papatiso ai Samuela e faifeautalai o le Au Paia o Aso e Gata Ai i Hawaii. Peitai, i le 1861, sa faoa ai e Walter Gibson le pule o nofoaga o le Au Paia i Lanai ma ta’u atu ia Samuela ma isi faapea o le Ekalesia i Iuta sa faaumatia e le Autau a le Iunaite Setete. Ma lona le iloa o le pepelo o Walter, sa talitonu ai Samuela ia te ia ma lagolagoina lana taitaiga. Ina ua auina atu e Walter ia ma se isi o le Au Paia Hawaii, o Kimo Belio, i se misiona i Samoa i le 1862, sa ia taliaina le valaau.¹⁰

O Samuela ma Kimo o uluai faifeautalai o le Au Paia o Aso e Gata Ai i Samoa, ma sa la papatisoina pe toalimasefulu tagata Samoa i o la tausaga muamua iina. Ae sa le faalagolagoina le auaunaga o meli feaveai , ma sa tauivi faifeautalai e tumau i fesootaiga ma le Au Paia i Hawaii.¹¹ Talu ai e le i tuuina mai e taitai o le Ekalesia se valaau e tatala se misiona i Samoa, sa leai ni faifeautalai fou sa auina atu e fesoasoani ia Samuela ma Kimo, ma sa toe faaitiitia ai le faapotopotoga o le Au Paia i Samoa.¹²

Talu mai lena taimi sa maliu Kimo, ae sa tumau pea Samuela i Samoa ma avea ai ma ona aiga. Sa faaipoipo o ia ma amata ai se pisinisi. Sa faaauau pea ona iloa o ia e ona tuaoi o le faifeautalai o le Au Paia o Aso e Gata Ai mai Hawaii, ae o nisi o i latou sa amata ona masalosalo e uiga i le i ai o le ekalesia sa ia fai mai e fai ia ma sui.¹³

Ua leva lava ona masalosalo Samuela pe sa pepelo Walter ia te ia e uiga i le faaumatiaga o le Ekalesia i le Iunaite Setete.¹⁴ O lea, talu le luasefululima tausaga talu lona oo mai i Samoa, ua iu ona i ai se mafuaaga e faamoemoe ai faapea afai e tusi o ia i ofisa autu o le Ekalesia, o le a i ai se tasi e ono tali mai.¹⁵

Sa ia uumau le nusipepa, ma televave atu e sue le kapeteni o le vaa e fesili atu i ai mo se fesoasoani i le tusiina o se tusi i taitai o le Ekalesia i Iuta. I le tusi, sa ia talosagaina ai le auina atu o ni faifeautalai i Samoa i le vave e mafai ai. Sa faatali o ia mo ni nai tausaga, sa ia tusi ai, ma sa naunau e fia vaai o toe talai atu le talalelei i tagata Samoa.¹⁶

---

I le tautoulu o le 1887, sa nonofo Ana Widtsoe ma ona atalii e toalua, o Ioane ma Osborne, i Logan le taulaga o Iuta mo le toeitiiti fasefulu tausaga. O le uso o Ana o Petroline sa auai foi i le Ekalesia i Nouei ma o mai i Iuta, ma nonofo ai i le Aai o Sate Leki, e valusefulu maila i le itu i saute.¹⁷

Sa faigaluega Ana o se su’isu’i, ma tuu i totonu itula uumi ina ia lava ai se tupe e tausi ai si ana fanau tama. Sa manao o ia e avea ona atalii ma faiaoga, e pei o lo laua tamā ua mavae atu, ma sa ia tuua se faamuamua mo aoaoga i o laua olaga. Talu ai sa galue Ioane e sefululima tausaga i se faleoloa i le lotoifale e fesoasoani e maua ni tupe mo le aiga, sa lē mafai ona auai o ia i le aoga i le aso. Nai lo lena sa ia aoaoina ia te ia lava le numera i ona taimi avanoa ma auai i ni lesona sa aoao e se tasi o le Au Paia mai Peretania mo na o ia i le Igilisi ma le faaLatina. O Osborne e iva tausaga i le taimi lena, sa auai i le aoga maualalo i le lotoifale ma sa matuā faamanuiaina o ia i ana aoaoga.¹⁸

I ni nai tausaga a o le i taunuu atu le aiga o Widtsoe, sa foai e Polika Iaga se fanua mo se aoga i le eria e taitutusa ma lea sa ia faavaeina i Provo. Sa tatalaina le Kolisi o Polika Iaga i Logan i le 1878, ma sa finafinau Ana e auina atu ona atalii i ai i le vave lava la te saunia ai, e tusa lava pe o le a tuua ai e Ioane lana galuega i le faleoloa. Sa manatu nisi tagata e sese o ia i le faamamafa o aoaoga nai lo le galue i lima, ae sa talitonu o ia o le atinaeina o le mafaufau sa taua lava e pei o le atinaeina o le tino.¹⁹

Sa faamautinoa foi e Ana le auai o tama i polokalama ma sauniga o le Ekalesia. I aso Sa sa latou auai i sauniga faamanatuga ma le Aoga Sa. Sa auai Osborne i le Peraimeri a le uarota i le aluga o le vaiaso, ma sa auai Ioane i sauniga a le Perisitua Arona i afiafi o le Aso Gafua. I le avea o se tiakono, sa ia tata fafie mo tina ua maliliu a latou tane ma fesoasoani e tausi le tapeneko o le siteki, lea sa faia ai sauniga a le uarota. O lenei, i le avea ai o se ositaulaga, sa ia feiloai ma le auepikopo ma isi ositaulaga ma asiasi ni nai aiga i masina taitasi o se “faiaoga o le uarota.” Sa auai foi Ioane i le Asosi o le Faaleleia Faatasi o Alii Talavou MIA.

Sa auai Ana i fonotaga a le Aualofa i aso Tofi. O le Au Paia i Logan e mai nofoaga eseese i le Iunaite Setete ma Europa, ae o lo latou faatuatua i le talalelei toefuataiina sa fusia faatasi i latou. O se masani i fonotaga a le Aualofa i le lotoifale le faalogo i tamatai o lauga pe faasoa molimau i la latou lava gagana a o faaliliu e isi mo i latou. Sa aoao e Ana le Igilisi i le ola ai i Logan mo se tausaga, ae ona o le toatele o le Au Paia e mai Scandanavia i le eria, sa tele ona avanoa e tautala ai i le gagana Nouei.²⁰

I ana sauniga o le Ekalesia, sa aoao ma malamalama ai Ana e uiga i le talalelei toefuataiina. Sa le i aoaoina o ia e uiga i le Upu o le Poto i Nouei, ma sa faaauau pea ona ia inuina le kofe ma le lauti i Iuta, aemaise lava pe a manaomia ona faigaluega i le leva o le po. Sa tauivi o ia mo le lua masina e tuu ia mea inu ae sa le faamanuiaina. Ae i se tasi aso sa savali vave o ia i ana kapoti, aumai i fafo ana pepa kofe ma lauti, ma togi i latou i le afi.

“E le toe faia lava,” sa fai mai ai o ia.²¹

Sa auai Ana ma ona atalii i galuega faalemalumalu. Sa molimauina e ia ma Ioane ia Peresitene Teila a o faapaiaina le malumalu i Logan i le 1884. I ni nai tausaga mulimuli ane, sa papatisoina ma faamauina Ioane mo lona tamā, o Ioane Widtsoe Sr., i le malumalu. I le aso lava e tasi, sa papatisoina foi ma faamauina o ia ma Osborne mo isi tagata o o latou aiga ua maliliu, e aofia ai tamā o o la tamā ma tamā o tamā o o la tamā. Sa o loa Ana ma lona uso o Petroline i le malumalu ma maua o la faaeega paia. Sa toe foi Ana ia papatisoina ma faamauina mo lona tina ma isi o ona aiga ua maliliu.

Sa avea le malumalu i Logan ma mea matuā taua ia te ia. Sa foliga sa tatala le lagi i le aso sa faapaiaina ai, ma tauia ai o ia mo osigataulaga uma sa ia faia e sau i Siona .²²

---

Mo le tele lava o le 1887, sa fai ifo le soifua maloloina o Eliza Snow. Lea ua valusefulutolu nei ona tausaga, sa ola umi atu le tusisolo ma le peresitene aoao o le Aualofa peleina nai lo le toatele o le Au Paia o lana tupulaga, ma sa iloa e ia o le a oo mai le oti. “E leai sa’u filifiliga pe ou te oti pe ou te ola,” sa ia faamanatu ai i ana uo. “Ua matuā atoatoa lo’u naunautaiga ou te alu pe ou te nofo, e pei ona faatonuina e lo tatou Tamā Faalelagi. Ua ou i ai i Ona aao.”

Sa faateleina le leaga o le tulaga o Eliza a o faagasolo le tausaga. Sa tausia pea lava pea o ia e Zina Young ma isi uo e latalata ia te ia. I le ta o le sefulu ia Tesema 4,1887, sa asia o ia i tafatafa o lona moega e Peteriaka Ioane Samita i le Fale Leona i le Aai o Sate Leki. Sa ia fesili i ai pe na te iloa o ia, ma sa ataata o ia. “Ioe ou te manatua,” sa tali atu ai o ia. Sa tuuina atu e Ioane ia te ia se faamanuiaga, ma sa faafetai Eliza ia te ia. I le taeao po lava, sa maliu filemu ai Eliza ma lona tuagane o Lorenzo i ona tafatafa.²³

I le avea ai o se taitai o tamaitai o le Au Paia o Aso e Gata Ai, sa faatulagaina ma auauna ai Eliza i Aualofa. I Asosi o le Faaleleia Faatasi o Tamaitai Talavou MIA, ma Peraimeri toetoe lava i nofoaga uma i le teritori. Sa pulefaamalumalu foi o ia i galuega a tamaitai i le malumalu i le Maota o Faaeega Paia i le sili atu nai lo tolusefulu tausaga. I nei faatulagaga uma, sa musuia e Eliza tamaitai e faaaoga a latou taleni e fesoasoani ai i le Atua e faasaoina le aiga o le tagata.

“O le tiute lava o i tatou taitoatasi le avea ma tamaitai paia,” sa ia aoao ai i latou i se tasi taimi. “E tatau ona tatou lagona ua valaauina i tatou e faia tiute taua. E leai se tasi e tuusaunoa mai ia i latou. E leai se tuafafine e matuā tuua toatasi, ma lana uunaiga e matuā utiuti, ae o le a mafai ona ia faia se galuega tele mo le atinaeina o le malo o le Atua i luga o le fogaeleele.”²⁴

I le kopi o Tesema 15 o le Woman’s Exponent, sa faamamaluina o ia e Emeline Wells o le “Tamaitai Filifilia” ma le “Tusi Solo a Siona.” O Tuafafine Eliza sa lototele, malosi, ma maumaututu i tulaga uma sa ia umia,” sa tusia e Emeline. “O afafine o Siona e tatau ona faataitai i ana faataitaiga poto ma mulimuli i ona tulagavae.”²⁵

---

Ia Aperila na sosoo ai, sa lagolagoina e le Au Paia ia le uo a Eliza o Zina Young e avea ma peresitene aoao fou o le Aualofa. E pei o Eliza, o Zina sa avea o se tasi o āvā e toatele a Iosefa Samita ma Polika Iaga.²⁶ Ina ua avea Eliza ma peresitene aoao o le Aualofa i le 1880, sa ia tofia Zina e avea ma ona fesoasoani. I tausaga e tele, sa galulue, femalagaai, ma matutua faatasi ia tamaitai e toalua.²⁷

Sa lauiloa Zina mo ana auaunaga alofa ma faaletagata lava ia ma ana meaalofa faaleagaga mamana. Mo le tele o tausaga sa pulefaamalumalu o ia i le Asosi Silika a Tesareta, o se tasi o polokalama felagolagomai a le Aualofa. O ia foi o se faatosaga poto masani o le sa auauna o le sui peresitene o le Maota Gasegase a Tesareta, o se falemai sa faagaoioia e le Aualofa i le Aai o Sate Leki. E ui sa taliaina e ia lona valaauga fou ma sina popolega, sa finafinau o ia e fesoasoani i le Aualofa ina ia ola e pei ona sa i ai i lalo o Eliza.²⁸

Ina faatoa maua lava lona valaauga, sa faimalaga ai Zina i matu i Kanata e asiasi i lana tama teine e toatasi, o Zina Presendia Card. A o le i maliu Ioane Teila, sa talosaga o ia i le toalua o Zina Presendia, o Sale, e faatulaga se nofoaga faato’a i Kanata mo aiga toatele āvā o le Au Paia ua faaaunuua.²⁹ O faama’i ma le tau malulu sa taofia ai Zina mai le asiasi atu i lana tama teine, seia oo mai i le taimi nei. Ae sa maitaga Zina Presendia, ma sa manao Zina e i ai i ona tafatafa.³⁰

Sa taunuu Zina i Cardston, o le nofoaga faato’a fou i Kanata, ae faatoa amata lava ona totogo mai fugalaauvao. I le siomia ai i laufanua o vao uumi o loo sisiva i le matagi, sa foliga mai o le taulaga sa matuā atoatoa lona faatulagaina mo le faamanuiaina.³¹

Sa iloa atu e Zina o lana tama teine sa faamanuiaina foi, e ui i tausaga e tele o faigata. I le tuua ai o se fafine oti lana tane i le luasefulufa o ona tausaga, sa tausia e Zina lana fanau tama laiti e toalua na o ia mo ni nai tausaga a o le i maliu le tama laititi o Tomi, i le fula i le faai i le fitu o ona tausaga. Tolu tausaga mulimuliane, sa faaipoipo o ia ia Sale o se tasi o āvā toatele.³²

E ui lava e le i masani Zina Presendia i le ola ai i tuaoi o nofoaga faato’a, ae sa faia e ia se aiga mafanafana i se tamai falelaau. Sa ia pupuniina le pito i totonu talatala o le falelaau i se ie mamoe māmā sa faia lava e ia, e eseese lanu o potu taitasi. Sa taunuu mai loa le tautotogo, sa ia taumafai foi ia i ai lava se teu fugalaau felesi i luga o le laulau i le potu ai.³³

Sa faaalu se tolu masina o Zina Young i Cardston. A o i ai iina, sa feiloai soo o ia ma le Aualofa. Ia Iuni 11, sa ia aoaoina tamatai faapea o Cardston sa faasaoina mo le Au Paia a le Atua. Sa i ai se agaga o le lotogatasi i tagata, sa fai mai ai o ia, ma sa teuina faamanuiaga maoae a le Atua mo i latou.³⁴

I le aso ina ua mavae lea fonotaga, sa faatigā loa ia Zina Presendia. Sa i ai Zina i ona tafatafa, o ia o se faatosaga o ia foi o se tina. Ina ua mavae na o le tolu itula o faatiga, sa fanau ai ia Zina Presendia se pepe teine putaputa, maloloina—o lana tama teine muamua.

O le tina o le pepe, tina o lona tina, ma le tina o le tina o lona tina sa igoa uma lava ia Zina. Ma sa foliga talafeagai foi le faaigoa o ia ia Zina.³⁵

---

E o’o lava i le taimi ae le i taunuu le tusi a Samuela Manoa i le Aai i Sate Leki, sa galue le Agaga i taitai o le Ekalesia e faalautele taumafaiga faafaifeautalai i Samoa. I le amataga o le 1887, sa valaauina e le aposetolo o Franklin Richards ia Iosefa Dean e tolusefulutasi tausaga ma lona faletua o Florence e auauna i se misiona i Hawaii. Ina ua ia vaetofiaina i laua, sa ia faatonuina i laua e ave foi le talalelei i isi motu o le Pasefika, e aafia ai ma Samoa.³⁶

Sa auina atu Iosefa i le Pasefika mo se isi itu ina ia puipuia o ia ma lona aiga mai taitai faaletulafono. Sa faataunuuina sana misiona i Hawaii ma lona faletua muamua, o Sally, i le sefulu tausaga muamua atu. Ina ua toe foi atu i Amerika, sa faaipoipo o ia ia Florence o se isi āvā faaopoopo ma mulimuliane tuli sona taimi i le falepuipui mo le nonofo faatasi lē faaletulafono. Sa faaauau pea ona tuliloaina e Loia Sili ia Iosefa seia oo na malaga ese atu i laua ma Florence mo Hawaii. I le taimi lena, sa tumau lava Sally i le Aai i Sate Leki ma le la fanau e toalima ma Iosefa.³⁷

Sa tusi Iosefa ia Samuela i ni nai masina ina ua mavae le taunuu ai i Hawaii, ma sa vave ona tali mai Samuela, ma le naunautai e fesoasoani i le galuega.³⁸ Ia Me 1888, i ni nai masina ina ua mavae le fanauina e Florence o se pepe tama sa la faaigoaina ia Jasper, sa auina atu e Iosefa se tusi ia Samuela, ma faailoa atu ia te ia faapea o ia ma lona aiga o le a malaga atu i Samoa i le masina e sosoo ai. I se taimi puupuu mulimuli ane, sa faia ai e Susa ma Iakopo Gates se pati faamavae mo le aiga o Dean, ma sa malaga ai loa Iosefa, Florence, ma le la atalii pepe mo Samoa ina ua maea.³⁹

O le vaega muamua o le latou malaga 2,000-maila sa filemu lava, ae sa leai se fuafuaga a le kapeteni o le vaaafi e malaga i le motu o Aunu‘u, lea sa nofo ai Samuela. Nai lo lena, sa taofi le vaa e latalata i Tutuila, e tusa e luasefulu maila i sisifo o Aunu’u.

Sa le iloa e Iosefa se isi i Tutuila, ae sa ia saili ma le naunautai mo se taitai i tagata o e na o mai e faafeiloai le vaa. I lona vaai atu i se tagata o lē sa foliga o ia e pule, sa sii atu le lima o Iosefa ma fai atu se tasi o ni nai upu Samoa na te silafia: “Talofa!”

I lona faateia, sa faafoi mai e le tagata le faafeiloaiga a Iosefa. Ona taumafai loa le o Iosefa e ta’u atu ia te ia le mea o loo agai i ai o ia ma lona aiga, i lona tautala i le faaHawaii ma faamamafa upu “Aunu‘u” ma “Manoa.”

Sa faafuasei ona susulu mata o le tagata lea. “O oe o le uo a Manoa?” na ia fesili ai i le faaIgilisi.

“Ioe,” sa tali ai Iosefa, ma le faafetai.

O le igoa o le tagata lea o Tanihili. Sa auina atu o ia e Samuela e su’e Iosefa ma lona aiga ma avatu ma le saogalemu i latou i Aunu’u. Sa ia taitai atu i latou i se vaa laitiiti faatasi ma se auvaa e toasefululua isi alii Samoa. Ina ua uma ona i luga o le vaa le aiga o Dean, sa amata e alii e toasefulu ona alo le vaa agai atu i le sami a o taina e le isi toalua le vai ma faafoe e Tanihili le vaa. A o tauivi faasaga atu i matagi malolosi, sa tautaia e alii alofoe le vaa agai i luga ma ova atu i galu taufaamatau seia latou aumaia le vaa i le saogalemu i le uafu i Aunu’u.

Sa faafeiloaia e Samuela Manoa ma lona faletua, o Faasopo, ia Iosefa, Florence, ma Jasper i le matafaga. O Samuela o se tagata paee, e matua mamao ia Iosefa ma vaivai lava. Sa susū i loimata ona foliga ua leaga i le tau a o ia faafeiloai i latou i le faaHawaii. “Ua ou lagona le matuā faamanuiaina i le aumaia faatasi o i tatou e le Atua ma ua mafai ona ou feiloai i Lana auauna lelei iinei i Samoa,” o lana tala lea.

Sa uu e Fasopo le lima o Florence ma taitai atu o ia i le fale e tolu potu o le a latou nonofo faatasi ai. I le aso Sa na sosoo ai, sa tala’i atu e Iosefa lana uluai lauga i Samoa i se fale e tumu i tuaoi fiailoa. Sa ia saunoa i le faaHawaii, ae faaliliu e Samuela. I le aso na sosoo ai, sa toe papatisoina ma toe faamauina e Iosefa ia Samuela, e pei ona sa faia e le Au Paia i nisi o taimi i le taimi lea e faafouina ai a latou feagaiga.

O se tamaitai e igoa ia Malaea sa i ai ma i latou sa faapotopoto e matamata i le sauniga. Sa uunaia o ia e le Agaga, ma sa talosaga o ia ia Iosefa e papatiso o ia. Sa maea ona sui ona laei susū sa faia ai papatisoga i ona laei mo le faia o faamauga, ae sa ia toe faia ona laei susū ma ulufale atu i le vai.

I vaiaso na sosoo ai, e toasefulufa i si Samoa sa papatisoina. I le faatumulia ai i le faanaunauga faamoemoeina, sa tusi atu Iosefa ia Uilifoti Uitilafi ia Iulai 7 e faasoa i ai le aafiaga a lona aiga. “Sa ou lagona ou te vavalo i le suafa o le Alii o le a talisapaia e afe ma afe o tagata le upumoni,” sa ia lipoti atu ai. “O la’u molimau lena i le asō, ma ou te talitonu o le a ou ola ou te vaai o faataunuuina.”⁴⁰

1. Uitilafi, Talafaamaumau, Iulai 28–29, 1887; Iosefa F. Samita, Talafaamaumau, Iulai 29, 1887; Siaosi Q. Cannon, Talafaamaumau, Iulai 29, 1887; “Laid to Rest,” Salt Lake Daily Herald, Iulai 30, 1887, 8; [Emmeline B. Wells], “In Memoriam,” Woman’s Exponent, Auk. 1, 1887, 16:37. Autu: Ioane Teila; Uilifoti Uitilafi

2. Siaosi Q. Cannon, Talafaamaumau, Iulai 29, 1887; Uitilafi, Talafaamaumau, Nov. 9–12, 1885, ma Iulai 25, 1887.

3. Uitilafi, Talafaamaumau, Auk. 3, 1887; “From President Woodruff,” Salt Lake Daily Herald, Auk. 6, 1887, 5. Autu: Succession of Church Leadership [Faasologa o le Taitaiga o le Ekalesia]

4. Truman O. Angell Sr. ma Truman O. Angell Jr. ia John Taylor, Ape. 28, 1885, Au Peresitene Sili (Ioane Teila) Fesootaiga, CHL; George Q. Cannon, Api Talaaga, 14 Iulai, 1885; Me 3, 13, ma le 19, 1886; Aok. 15 ma le 18, 1887; Sete. 10, 1887; Vaega o le West Towers Transverse, Sete. 1884; Vaega o Tower, Nov. 1887, Vaega o Stone Mason, Ofisa o le Tusiata, Faatufugaga o Tusigaata o le Malumalu o Sate Leki, CHL.

5. Faranisisi Marion Lyman, Talafaamaumau, Auk. 13, 1887; Franklin D. Richards, Talafaamaumau, Auk. 4, 1887; Siaosi Q. Cannon, Talafaamaumau, Auk. 15 ma le 18, 1887; Oke. 7–8, 1887; Uitilafi, Talafaamaumau, Oke. 9, 1887.

6. Grant, Talafaamaumau, kopi le faamaua, Auk. 3, 1887; Faranisisi Marion Lyman, Talafaamaumau, Auk. 3, 1887; Franklin D. Richards, Talafaamaumau, Oke. 5, 1887; Uitilafi, Talafaamaumau, Auk. 3, 1887; Siaosi Q. Cannon, Talafaamaumau, Auk. 5 ma Oke. 8, 1887; Walker, “Grant’s Watershed,” 195–96, 198–99, 202–8, 211–16. Autu: Siaosi Q. Cannon

7. Siaosi Q. Cannon, Talafaamaumau, Set. 13, 1887.

8. Franklin D. Richards, Talafaamaumau, Oke. 5, 1887; Grant, Talafaamaumau, Oke. 5, 1887; Uitilafi, Talafaamaumau, Oke. 5–6, 1887; Faranisisi Marion Lyman, Talafaamaumau, Oke. 5, 1887; tagai foi i le Walker, “Grant’s Watershed,” 214–17.

9. Gray, Amerika Samoa, 11–13; “A Brief Account of the History of the Samoan Mission,” Manuscript History of the Samoan Mission, 1–[2]; Hart, Hart, ma Harris, Expanded Samoan Mission History, 8. Autu: Samoa; Amerika Samoa

10. McBride, “Mormon Beginnings in Samoa,” 57–62; Harris, Building the Kingdom in Samoa, 3–6; Britsch, “Founding of the Samoan Mission,” 13–15; “The Great Crusade,” Deseret News, Nov. 15, 1871, [7]. Autu: Hawaii

11. Britsch, “Founding of the Samoan Mission,” 15; Harris, Building the Kingdom in Samoa, 6; Hart, Hart, and Harris, Expanded Samoan Mission History, 8–9; “Correspondence,” Deseret News, Set. 25, 1872, [10].

12. Britsch, “Founding of the Samoan Mission,” 15–17; Harris, Building the Kingdom in Samoa, 6; Iosefa H. Dean ia Uilifoti Uitilafi ma Siaosi Q. Cannon, Fep. 13, 1888, First Presidency, Mission Administration Correspondence, CHL.

13. Wood, “My Samoan Experience,” Juvenile Instructor, Ape. 1, 1893, 28:210; McBride, “Mormon Beginnings in Samoa,” 66–67.

14. “A Brief Account of the History of the Samoan Mission,” Manuscript History of the Samoan Mission, [2].

15. Britsch, “Founding of the Samoan Mission,” 14–15; McBride, “Mormon Beginnings in Samoa,” 62–63, 65–67; Iosefa H. Dean ia Uilifoti Uitilafi ma Siaosi Q. Cannon, Iulai 7, 1888, First Presidency, Mission Administration Correspondence, CHL.

16. “A Brief Account of the History of the Samoan Mission,” Manuscript History of the Samoan Mission, [2].

17. Anna Gaarden Widtsoe to Petroline Gaarden, Auk. 28, 1887; Nov. 9, 1887, Anna K. Gaarden Widtsoe Papers, Widtsoe Family Papers, CHL; Widtsoe, In the Gospel Net, 78, 84.

18. Widtsoe, In the Gospel Net, 78–80, 92–94; Widtsoe, In a Sunlit Land, 8–9, 19–20.

19. Garr, “History of Brigham Young College,” 4–9; Godfrey, Logan, Utah, 38–40; Widtsoe, In the Gospel Net, 92–94; Widtsoe, In a Sunlit Land, 19–21. Autu: Church Academies [Aoga a le Ekalesia]

20. Widtsoe, In a Sunlit Land, 10–11, 13; Widtsoe, In the Gospel Net, 81–82, 86–88; Logan First Ward, Relief Society Minutes and Records, voluma 1, Iulai 3, 1884. Autu: Faalapotopotoga a Alii Talavou

21. Widtsoe, In the Gospel Net, 81–82, 86–87. Autu: Upu o le Poto (MF&F 89)

22. Logan Temple, Baptisms for the Dead, voluma F, Ape. 12 ma le 19, 1887, 342, 347, microfilm 177,845, U.S. and Canada Record Collection, Family History Library; Widtsoe, In the Gospel Net, 88.

23. “Death of Sister E. R. Snow Smith,” Deseret News, Tes. 7, 1887, [8]; “Eliza Roxie Snow Smith,” Woman’s Exponent, Tes. 15, 1887, 16:108–10. Autu: Eliza R. Snow

24. [Emmeline B. Wells], “Pen Sketch of an Illustrious Woman,” Woman’s Exponent, Fep. 1, 1881, 9:131; Provo Second Ward, Relief Society Minutes and Records, voluma 1, Set. 1869, 14–19; Eliza R. Snow, Discourse, Auk. 14, 1873, in Derr and others, First Fifty Years of Relief Society, 384.

25. “Eliza Roxie Snow Smith,” Woman’s Exponent, Tes. 15, 1887, 16:109.

26. “Young, Zina Diantha Huntington Jacobs,” Biographical Entry, First Fifty Years of Relief Society website, churchhistorianspress.org; “General Conference,” Deseret News, Ape. 11, 1888, [13]; Derr, Cannon, and Beecher, Women of Covenant, 127.

27. “Young, Zina Diantha Huntington Jacobs,” Biographical Entry, First Fifty Years of Relief Society website, churchhistorianspress.org; “General Conference,” Deseret News, Ape. 11, 1888, [13]; Derr, Cannon, and Beecher, Women of Covenant, 127; Salt Lake Stake Relief Society, Report, Iuni 18 ma le 19, 1880; General Relief Society Meeting, Report, Iulai 17, 1880, i le Derr and others, First Fifty Years of Relief Society, 467–77; Bradley and Woodward, 4 Zinas, 316–18.

28. Derr, Cannon, and Beecher, Women of Covenant, 127–30; Wells, “Zina D. H. Young,” 43–48. Autu: Zina D. H. Jacobs Young; Pioneer Women and Medicine [Tamaitai Paionia ma Vailaau]

29. Derr, Cannon, and Beecher, Women of Covenant, 130; Siaosi Q. Cannon, Talafaamaumau, Auk. 19, 1886; Godfrey, “Canada’s Brigham Young,” 226.

30. Zina Young Card to Zina Huntington Young, Oke. 6, 1887, Zina Card Brown Family Collection, CHL.

31. Zina Huntington Young ia Susa Young Gates, Iuni 19, 1888, Susa Young Gates, Papers, CHL; “On the Canadian Frontier,” Church History website, history.ChurchofJesusChrist.org; Brown, “Biographical Sketch of the Life of Zina Young Williams Card,” 14. Autu: Canada [Kanata]

32. Zina Huntington Young ia Susa Young Gates, Iuni 19, 1888, Susa Young Gates, Papers, CHL; Bradley and Woodward, 4 Zinas, 249–67.

33. Brown, “Biographical Sketch of the Life of Zina Young Williams Card,” 1, 14–15; Bradley and Woodward, 4 Zinas, 283–84.

34. Cardston Ward, Relief Society Minutes and Records, voluma 1, Iuni 11, 1888; tagai foi i faamaumauga mo Me 24–Auk. 30, 1888.

35. Zina Huntington Young ia Susa Young Gates, Iuni 19, 1888, Susa Young Gates, Papers, CHL; Bradley and Woodward, 4 Zinas, 288–89, 322–23.

36. Iosefa H. Dean, Talafaamaumau, Me 23, 1887; Franklin D. Richards, Talafaamaumau, Me 23, 1887; Britsch, “Founding of the Samoan Mission,” 16. Autu: Growth of Missionary Work [Ola o le Galuega Faafaifeautalai]

37. Britsch, “Founding of the Samoan Mission,” 16–17; “Joseph Henry Dean,” ma le “Sarah Allen Arnold Dean,” Missionary Database, history.ChurchofJesusChrist.org/missionary; Iosefa H. Dean, Talafaamaumau, Mati 28 ma Me 16–25, 1887; “The Jos. Dean Trial,” Salt Lake Democrat, Me 14, 1887, [6]; “Not Guilty,” Salt Lake Daily Herald, Me 15, 1887, 3; “The Case of Joseph Dean,” Salt Lake Daily Tribune, Me 15, 1887, [2].

38. Iosefa H. Dean ia Uilifoti Uitilafi ma Siaosi Q. Cannon, Fep. 13, 1888, First Presidency, Mission Administration Correspondence, CHL; Hart, Hart, and Harris, Expanded Samoan Mission History, 8–9.

39. Iosefa H. Dean, Talafaamaumau, Fep. 9, 1888; Me 11, 1888; Iuni 1 ma le 10–11, 1888; Hart, Hart, and Harris, Expanded Samoan Mission History, 9.

40. Iosefa H. Dean ia Uilifogti Uitilafi ma Siaosi Q. Cannon, Iulai 7, 1888, First Presidency, Mission Administration Correspondence, CHL; Iosefa H. Dean, Talafaamaumau, Iuni 18, 20–21, ma le 24–25, 1888; Britsch, “Founding of the Samoan Mission,” 18–19.