Avea ma Soo
O se tasi o faamanuiaga silisili o le olaga ma le faavavau, o le faitaulia lea o se tasi o se soo faamaoni o le Alii o Iesu Keriso.
Sa mulimuli atu se motu o tagata e toatele i le Faaola a o talai atu o Ia i matafaga o le Sami o Kalilaia. Ina ia mafai e le toatele ona lagona atu o Ia, o lea sa Ia afio ifo ai i le vaa o Peteru ma fai atu i ai ina ia tuutuu teisi atu i tai mai le matafaga. Ina ua uma ona Ia fetalai, sa Ia faapea atu ia Peteru o le ua alu le po o fagota ae aunoa ma se i’a na maua, ina ia toe foi atu i le vai ma toe tuutuu ifo lona upega i le loloto. Sa usiusitai Peteru ma sa tele i’a sa ia mauaina lea na toetoe a masae ai le upega. Sa tauvalaau atu Peteru i ana uo, o Iakopo ma Ioane, e o ane e fesoasoani atu. Sa ofo uma i latou i le tele o i’a na maua. Sa fetalai atu Iesu ia Peteru, “Aua e te fefe; e amata i nei ona po ona e maua tagata.” Ona faamatala lea e Luka, “Ua tuta o latou vaa, ona latou tuua ai lea o mea uma, a e mulimuli atu ia te ia.”1 Sa avea i latou ma soo o le Alii.
O le upu soo (disciple) ma le upu puleaina e maua uma mai le upu Latina o loo faapogai mai ai o le—discipulus; o lona uiga o le a’oa’o. O loo faamamafa ai le faata’ita’i po o le faatino. O le pulea o le tagata lava ia ma le amio pulea e ogatasi, ma o ni uiga faifaipea o e mulimuli ia Iesu, e pei ona faataitai e Peteru, Iakopo, ma Ioane o e na “tuua mea uma, ae mulimuli atu ia te ia.”
O le a le uiga o le avea ma soo? O le usiusitai lea i le Faaola. O le avea ma soo e aofia ai le tele o mea. O le legavia. O le sefuluai. O afiafi faaleaiga. O le tausiga o poloaiga uma. O le lafoaia o soo se mea e le lelei mo i tatou. O mea uma lava i le olaga e i ai sona tau. I le mafaufau atu i le folafolaga sili a le Faaola mo le filemu i lenei olaga ma le olaga a sau, o le avea ma soo o se tau e aoga le totogiina. O se tau e le tatau ona tatou le totogiina. Pe a faatusatusa, o tulaga manaomia o le avea ma soo e matua itiiti naua nai lo faamanuiaga ua folafolaina mai.
O soo o Keriso e mauaina se valaauga, e le gata ia lafoaia le sailiga o mea faalelalolagi, ae ia tauaveina le satauro i aso taitasi. Ina ia tauaveina le satauro o lona uiga o le mulimuli i Ana poloaiga ma atiina ae Lana Ekalesia i le lalolagi. O lona uiga foi o le loto pulea.2 E pei ona aoaoina i tatou e Iesu le Nasareta, “A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au.”3 “O se le ave lona satauro ma ua le mulimuli mai ia te au, e le mafai ona fai o ia mo’u soo.”4
O upu o se pese matagofie a le Peraimeri e tagitagi pea ia i latou o e mulimli atu i le Matai:
O Loo Ou Taumafai e avea e pei o Iesu,
Ou te mulimuli i Ona ala
Ou te taumafai ia ou alofa e pei o Ia, i mea uma ou te fai ma tautala ai.5
Sei o tatou iloiloina nisi o mea sa faia e Iesu ia e mafai ona tatou faataitaia.
-
Sa “femaliuai [Iesu] ma agalelei.”6 E mafai e i tatou uma ona faia se mea lelei i aso taitasi—mo se tagata o le aiga, se uo, po o se tagata ese foi—pe afai o le a tatou saili mo na avanoa.
-
O Iesu o le Leoleo Mamoe Lelei, o le sa leoleo i Ana mamoe ma sa popole mo i latou na leiloloa.7 E mafai ona tatou sailia e ua tuua na o i latou po o i latou o e ua le toe toaaga mai ma faauo ia i latou.
-
Sa agaalofa Iesu i le toatele, e aofia ai se lepela mativa.8 E mafai foi e i tatou ona maua le agaalofa. O loo faamanatu mai ia i tatou i totonu o le Tusi a Mamona e ao ona tatou “faanoanoa faatasi ma e faanoanoa.”9
-
Sa molimau atu Iesu i Lana misiona paia faapea le galuega tele a Lona Tama. O la tatou vaega, e mafai ona tatou “laulaututu e avea ma molimau a le Atua i taimi uma.”10
-
Sa valaaulia e Iesu “tamaiti e o mai ia te [Ia].”11 E moomia e a tatou fanau lo tatou gauai atu i ai ma le alofa e faapea foi la tatou tausiga.
O e mulimuli moni i le Faaola e tatau ona saunia e tuuina atu o latou ola, ma e i ai nisi ua mauaina lea avanoa manaomia e faia ai. O loo fautua mai le Mataupu Faavae ma Feagaiga ia i tatou: “Aua nei fefe se tagata e tuuina atu lona ola ona o au; aua o le tuuina atu lona ola ona o au na te toe maua mai. O le foi na te le loto malie e tuuina atu lona ola ona o au e le o so’u soo o ia.”12
Tatou te faitau i le tusi o Galuega i le tala i le soo o Setefano o le sa “tumu i le faatuatua ma le mana, [ma] sa faia vavega ma faailoga tetele i luma o le nuu.”13 Sa feagai Setefano ma ni tagata le taupulea i Ierusalema o e na tuuaiseseina o ia i le upuleaga e ui ina sa liuaina o ia i o latou luma. Sa molimau atu Setefano i le paia o le Faaola ma ina ua ia valaau atu ia i latou ina ia salamo, e toatele nisi o le motu o tagata na fulitua ia te ia. “A ua tumu o ia i le Agaga Paia, ua pulatoa i le lagi, ua iloa atu le pupula o le Atua ma Iesu o loo tu i le itu taumatau o le Atua.”14 E ui lava ina sa fetogia o ia i maa ma maliu ai, ae o upu mulimuli lava sa i laugutu o Setefano o le, “Le Alii e, aua e te tuuina atu lenei agasala ia te i latou.”15
I popofou o le Ekalesia i Mekisiko, sa i ai ni taitai faamaoni se toalua sa avea ma soo o Keriso, sa faamaturoina ona o lo la’ua talitonuga. O i la’ua e toalua na fasiotia, o Rafael Monroy ma Vicente Morales.
I le taimi o le Feteenaiga i Mekisiko, sa avea ai Rafael Monroy ma peresitene o le Paranesi laitiiti o San Marcos, i Mekisiko, ae o Vicente Morales sa avea ma ona fesoasoani muamua. O le aso 17 o Iulai, 1915, sa pueina ai i la’ua e le vaega a Zapata. Sa tauina atu ia i laua o le a faasaoina i laua pe afai la te tuuina atu a la auupega ma lafoaia le la lotu fou. Sa ta’u atu e Uso Monroy i e na pueina i laua e leai ni ana auupega, ma sa tago toese mai lana taga lana Tusi Paia ma le Tusi a Mamona. Sa ia faapea atu, “Alii e, e na o le pau nei o auupega ou te feaveaia; o auupega o le upumoni e tetee atu ai i mea sese.”
Ina ua leai ni auupega na mauaina, sa matuai mataga sauaga na faia i nei uso ina ia la faailoa mai ai le mea o loo nanaina ai auupega. Ae leai ni auupega. Ona aveina lea o i laua i gauta o le nuu i le puipuiga a leoleo, lea sa faatutu ai i laua i tafatafa o se laau tele i luma o se vaega o loo faaauupegaina. Sa tuu atu e le taitai lo la saolotoga pe afai la te lafoaia lo la talitonuga faalelotu ma auai ma le vaega a Zapata, ae sa tali atu Uso Monroy, “E sili atu le pele o la’u lotu nai lo lo’u ola ma e le mafai ona ou lafoaia.”
Ona tauina atu lea ia i laua faapea o le a tafanaina i laua ma fai atu i ai pe i ai se isi a la talosaga e fia faia. Sa talosaga Uso Rafael ina ia faatagaina o ia e tatalo a o lei fasiotia o ia. O iina, i luma o ona faaoo sala, sa ia tootuli ai i lalo ma i se leo sa mafai ona lagonaina sa ia tatalo atu ai i le Atua ina ia faamanuia ma puipuia i latou e pele ia te ia ma tausia le paranesi laitiiti lea o le a tuua e aunoa ma se taitai. Ina ua uma lana tatalo, sa ia faaaogaina upu a le Faaola a o tautau o Ia i luga o le satauro, ma tatalo mo ona faaoo sala, “Le Tama e, ia e faamagalo atu ia i latou, aua ua latou le iloa le mea ua latou faia.”16 O lea sa tafanaina ai loa ia Uso Monroy ma Uso Morales e le au faaauupegaina.17
I ni nai tausaga ua mavae atu sa ou alu atu ai i Mekisiko e toe faatulaga se au peresitene o se siteki. A o o’u faamaeaina ia faatalanoaga, sa ou maua ai le avanoa e faamasani ai ma se tasi na tupuga mai ia Rafael Monroy. Sa ou faagaeetia i le loloto o le molimau a lenei alii ma lana tautinoga i le talalelei. Ina ua ou fesiligia o ia po o le a le mea na tupu i le isi vaega atoa o fanau a Uso Monroy, sa ia fai mai, o le toatele o i latou sa o atu i ni misiona ma o loo faamaoni pea i le Ekalesia.
I popofou o le Ekalesia, sa i ai foi isi soo e faaopoopo atu ia Iosefa Samita ma Ailama Samita sa tuuina atu o latou ola mo le talalelei a Iesu Keriso. O le faatuatua ma le faamaoni o Edward Partridge, le uluai epikopo o le Ekalesia, o loo matauina i le Mataupu Faavae ma Feagaiga.18 Ia Iulai 20, 1833, sa nofonofo ai Edward i le fale ma lona toalua ua vaivai, e lei leva ona fanauina sana pepe. E toatolu ni tagata leaga sa osofaia le fale ma toso atu o ia i luga o le auala ona agai atu ai lea i le nofoaga ua uma ona latou aveina atu i ai ia Charles Allen. O se vaega pe tusa ma le 300 o tagata leaga sa poloai malosi atu e ala i lo latou sooupu ina ia lafoaia e Edward ma Charles lo la faatuatua i le Tusi a Mamona po o le o ese mai le itumalo. Sa tali atu Edward Partridge: “Afai e tatau ona ou puapuagatia mo la’u lotu, e leai se mea e sili atu nai lo mea na faia e e na muamua atu ia te au. Ou te le o malamalama pe na ou faamanualia se isi i le itumalo ma o lea ou te le ioe ai ou te alu ese. E leai se mea ua ou faia e faatiga ai i soo se tasi. Afai tou te sauaina au, ua outou faatiga i se tagata e leai se sala.” Ona nini atoa lea e tagata leaga ia Edward ma Charles mai ulu e oo i vae i le valita vevela o loo i ai le lefulefu, ma se vailaau e mafoe ai le pa’u, ona latou tau’ai atu lea i ai o fulumanu ma pipii ai i le valita.19
Na faamatalaina e le Perofeta o Iosefa Samita le maliu o Edward i nai tausaga mulimuli ane i le 46 o ona tausaga i upu nei, “Na uma lona ola ona o le taunuuga o sauaga i Misuri, ma o ia o se tasi o loo faitaulia ma i latou o o latou toto o le a sueina i o latou lima.”20 Na tuua e Edward Partridge se talatuu o loo ola pea i ni fanau toatele ma le amiotonu.
Ae peitai, mo le toatele o i tatou, o le mea o loo moomia e le o le oti mo le Ekalesia, ae ia ola mo le Ekalesia. Mo le toatele, o le ola i se olaga faaKeriso i aso taitasi e mafai ona sili atu ona faigata nai lo le tuuina atu o le ola o se tasi. Sa ou aoaoina i se taimi o le taua lea e toatele ai tagata sa mafaia ia gaoioiga o le le manatu faapito, lototele, ma le lelei e aunoa ma le manatu i le ola. Ae ina ua uma le taua ma latou toe foi mai i le aiga, e le mafai ona latou tauaveina ia avega o aso taitasi o le ola ai ma faapologaina e le tapaa, ava malosi, ma fualaau faasaina, ma le amioleaga, lea e oo atu ai lava ina latou tuuina atu o latou ola.
E mafai ona fai mai nisi: “O au o se tagata faatauvaa. E leai so’u tulaga iloga. Ou te fou i le Ekalesia. E le tele ni au taleni ma ni mea ou te mafaia. E le tele foi so’u sao.” Pe mafai foi ona latou fai mai: “Ua ou matua tele, e faigata ona toe suia. O lo’u lava lea olaga. Aisea e tatau ai ona ou taumafai?” E lei tuai lava ona suia. O le avea ma soo e le oo mai i ni tofiga o le lauiloa, tamaoaiga, po o le saoasaoa o le aoaoina. O soo o Iesu e mai soo se tafa o le olaga. Ae peitai, o le avea ma soo e moomia ai le lafoaia o solitulafono leaga ma olioli i le mea na ta’ua e Peresitene Kimball “o le vavega o le faamagalo atu.”21 E faatoa mafai ona oo mai lenei mea e ala i le salamo, o lona uiga o lo tatou lafoaia lea o le agasala ma faia se faaiuga i aso taitasi ina ia avea ma e mulimuli i le upumoni ma le amiotonu. E pei ona aoao mai Iesu, “Pe faapefea la outou amio e tatau ai? E moni ou te fai atu ia te outou, e pei lava o au nei.”22
E toatele e manatu faapea o le tau o le avea ma soo e taugata naua ma e mamafatu. O nisi e manatu e aafia ai le tuueseina o ni mea se tele. Ae o le satauro e le mamafa e pei ona foliga mai ai. O le usiusitai tatou te maua ai le malosi sili atu e tauaveina ai.
“Ia outou o mai ia te au, o outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaaoao ia te au, aua o au le agamalu ma le loto maulalo; ona maua lea e outou le malologa mo outou agaga.
“Aua e avegofie la’u amo, o la’u avega foi e mama ia.”23 O la tatou aia moni e avea ai ma soo e oo mai pe a mafai ona tatou fai atu ma le mautinoa faapea o Ona ala ua avea ma o tatou ala.
O faamanuiaga o le avea ma soo o loo avanoa mo i latou o e naunau e totogi le tau. O le avea ma soo e aumaia ai le faamoemoega i o tatou olaga ina ia le tautevateva ai ma le le mautonu, ae tatou te savavali sao ai i luga o lena ala sao ma le vaapiapi lea e toe taitai atu ai i tatou i lo tatou Tama Faalelagi. O le avea ma soo e aumaia ai ia i tatou le mafanafana i taimi o le faanoanoa, o le filemu o le mafaufau, ma le olioli i le auauna atu—o mea uma ia e fesoasoani ia i tatou ina ia avea atili ai faapei o Iesu.
E auala mai le avea ma soo o le Faaola tatou te iloa ai ma talitonu ai i o tatou loto ma mafaufau, mataupu faavae ma sauniga faaola O Le Ekalesia a Iesu Keriso o le Au Paia o Aso e Gata Ai. O le avea o i tatou ma soo, tatou te talisapaiaina ai le misiona taua a le Perofeta o Iosefa Samita i le toefuataiina mai o nei mataupu faavae faaola i o tatou taimi. Tatou te olioli ona o ki o le perisitua ma ona pule ua tuufaasolo mai i Peresitene o le Ekalesia mai le Perofeta o Iosefa Samita e oo mai i lo tatou perofeta o i ai nei, o Peresitene Gordon B. Hinckley.
Tatou te faafetaia ona o lo tatou avea ma soo o le Faaola ua tatou olioli ai i Lana folafolaga o le “filemu i lenei lalolagi,”24 i le faamalieina, fiafia, ma le faataunuuina. O lo tatou avea ma soo ua mafai ai ona tatou mauaina le malosi faaleagaga lea tatou te moomia e taulimaina ai luitau o le olaga.
O se tasi o faamanuiaga silisili o le olaga ma le faavavau, o le faitaulia lea o se tasi o se soo faamaoni o le Alii o Iesu Keriso. E i ai sau molimau loloto i lenei upumoni, lea ou te molimau atu ai, i le suafa o Iesu Keriso, amene.