TOKONIʻI E NIʻIHI KEHÉ KE HAʻU KIATE IA
Naʻe fakahā ʻe he kau palesitenisī ʻo e Palaimelí, “ʻE Sisitā Hopikini, ko e kau Sanipiimi ʻeni ʻe toko 10 te ke akoʻi he taʻu ní.” Ko e papi ului foʻou au, pea naʻá ku manavasiʻi ʻaupito he uiuiʻi ko ʻení. ʻE lava fēfē ke u akoʻi ha meʻa ne teʻeki ai ke u maʻu ha mahino feʻunga fekauʻaki mo ia?“ Te u lava fēfē ʻo mapuleʻi ha fānau longomoʻui tokolahi pehē? Ka naʻe talamai ʻe he pīsopé mo e palesiteni ʻo e Palaimelí ʻe faitāpuekina au ʻi heʻeku feinga ke fakahoko ʻa e uiuiʻi fakatupu lotosiʻi ko ʻení.
Ne u ʻiloʻi naʻe fie maʻu ke u feinga mālohi ke ako ʻa e ongoongoleleí kae lava ke u akoʻi ia, ko ia ne u lau ʻa e tohi lēsoní ʻi he uike takitaha—ko ha maʻuʻanga maama lahi ia—peá u lotu mo fakalaulauloto ki ha founga ʻe ʻaonga ai ʻa e ngaahi tefitoʻi moʻoní ki heʻeku moʻuí mo e moʻui ʻa e fānaú. ʻI heʻeku ako mo akoʻi iá, ne u maʻu ha fakamoʻoni ki heʻetau totonu faka-ʻOtua ko e fānau ʻa e ʻOtuá. Ne u ʻiloʻi ʻa e mahuʻinga mo e taʻe-hano-tatau ʻo e laumālie takitaha. ʻOku ʻikai ngata pē hono fakamaama ʻe he ngaahi lēsoni faingofua ʻa e Palaimelí ʻa e fofonga ʻo ʻEne fānau mahuʻingá ka ʻoku nau fafangaʻi ʻa e tenga, ʻa ia ko e fakamoʻoni ʻeni ne u maʻu ʻi heʻeku hifo ki he vai ʻo e papitaisó.
Naʻe ngaohi au ʻe he taʻu mahuʻinga ko ia mo e kau Sanipīmí ke u fakafetaʻi maʻu pē koeʻuhi ko ha uiuiʻi naʻá ne liliu ʻeku moʻuí. Ne liliu au, pea pehē ki he fānaú, ʻe he ngaahi akonaki ʻa Sīsū Kalaisí.