ʻOku Mau Tui
Ko ha ngaahi tali nounou ʻeni ki ha ngaahi fehuʻi ʻe niʻihi ʻoku faʻa fai ki he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ko e hā e tui ʻa e Kāingalotú ʻo kau kia Sīsū Kalaisí? Naʻá Ne toetuʻu moʻoni nai mei he maté? ʻE toe hāʻele mai ki he māmaní ʻi he nāunau? ʻOku fie maʻu nai ʻEne ʻaloʻofá kae lava ke fakamoʻui ha taha?
Ko ha niʻihi ʻeni ʻo e ngaahi fehuʻi ʻoku faʻa fai ʻe he kakaí ʻi heʻenau fuofua fanongo pē he Siasí pe fetaulaki mo hono kāingalotú. Ko e meʻa mahuʻinga taha ki hono tali ʻo e ngaahi fehuʻí, ke mateuteu ʻa e kāingalotú ke fakaongoongo ki he fakahinohino ʻa e Laumālie Māʻoniʻoní. Ka ʻe ala ʻomi ʻe he ngaahi tali nounou ʻe hoko atu hení ʻa e ngaahi fakamatala ke tau fakakaukau ki ai ʻi heʻetau feinga ko ia ke faʻufaʻu e ngaahi talí.
ʻOku mou tui ki he Sīsū Kalaisi ko ia he hisitōliá naʻá ne moʻui pea akonaki ʻi he Fonua Tapú, ʻo hangē ko ia kuo hiki ʻi he Tohi Tapú?
ʻIo. ʻOku mau tui naʻe aloʻi ʻa Sīsū ʻe Mele, peá ne malanga he Fonua Tapú ʻi haʻane ngāue fakafaifekau he taʻu ʻe tolu nai, pekia ʻi he kolosí, pea toetuʻu mei he maté, ʻo hangē ko ia ne tomuʻa fakahā ʻe he kau palōfitá ʻi he ngaahi senituli lahi ki muʻa peá Ne hāʻele maí (ke ʻiloʻi ha fakatātā ki ai, vakai ki he Sēnesi 49:10; Saame 2:6–7; 22:16–18; 118:22; ʻĪsaia 7:14; Maika 5:2). ʻOku mau tui naʻá Ne mamahi pea fai ʻa e fakalelei maʻá e ngaahi angahala ʻa e faʻahinga ʻo e tangatá kotoa, ʻo lava ai ke fakahoko ʻa e fakatomalá mo e fakamolemolé (vakai, ʻĪsaia 53:4–6). ʻOku mau tui naʻá Ne ikunaʻi ʻa e maté pea ʻi Hono mālohí, ʻe lava ke toetuʻu ʻa e tangata mo e fefine kotoa pē ʻi he sinó (vakai, Loma 6:5; 8:11). ʻOku mau tui ʻe maʻu ʻa e fakamoʻuí ʻe he foha mo e ʻofefine kotoa pē ʻo e ʻOtuá ʻoku haʻu ki he māmaní pea foki ke nofo mo ʻetau Tamaí mo Hono ʻAló ʻi Hona puleʻanga ʻi langí tuʻunga ʻi he talangofua ki he ngaahi tefitoʻi moʻoni ʻo ʻEne ongoongoleleí (vakai, Pita 1 3:18; Ngaahi Tefito ʻo e Tuí 1:3).
ʻOku mou tui naʻe toetuʻu moʻoni ʻa e ʻEikí mei he maté?
ʻIo. Hangē ko e fakamoʻoni ʻa ʻEne Kau ʻAposetolo ʻi he Tohi Tapú, naʻe mamata ha kakai ʻe lau ngeau kia Sīsū Kalaisi ʻi Hono sino toetuʻú ʻo nau fakamoʻoni ki ai (vakai, Luke 24:39; Sione 20:20; 1 Kolinitō 15:3–8). ʻI Heʻene hoko ko e tokotaha kuo toetuʻú, naʻá Ne malanga ki he toko lauiafe ʻo ʻEne “fanga sipi kehé” (Sione 10:16) ʻi he ongo ʻAmeliká, ʻo ne fakahā kiate kinautolu ʻa e ngaahi matakafo ʻi Hono ongo nimá, ongo vaʻé, mo Hono vakavaká pea akonaki ʻi honau lotolotongá ʻi ha ngaahi ʻaho lahi (vakai, 3 Nīfai 11–28).
Naʻá Ne hā mo ʻEne Tamaí kia Siosefa Sāmita ko e Siʻí, ʻi he 1820. Naʻe fekau ʻe he ʻEikí ki he palōfita kei siʻí ni ke ne toe fokotuʻu ʻa Hono Siasí mo e ongoongoleleí koeʻuhí he kuo liliu ia ʻo filioʻi ʻaki e ngaahi fakakaukau ʻa e tangatá hili e mate ʻa e kau ʻAposetolo ʻi muʻá. Naʻe fai ʻe Siosefa Sāmita mo hono kaungāngāué ʻa e fakamoʻoni ko ʻení kau kia Sīsū Kalaisi ʻi he 1832: “ʻOkú ne moʻui! He naʻá ma mamata kiate ia, ʻio, ʻi he toʻukupu toʻomataʻu ʻo e ʻOtuá; peá ma fanongo ki he leʻo ʻoku fakamoʻoniʻi ko ia ʻa e ʻAlo pē Taha naʻe Fakatupu ʻo e Tamaí” (T&F 76:22–23).
ʻOku mou tui te Ne toe hāʻele mai ki he māmaní ʻi he nāunauʻia?
ʻIo. Hangē ko e fakamoʻoni ʻa e folofola māʻoniʻoní: “Ko e Sīsū ko ia kuo ʻave ʻiate kimoutolu ki langí, ʻe pehē pē ʻene toe haʻu ʻo hangē ko hoʻomou mamata ʻene ʻalu hake ki loto langí” (Ngāue 1:11). “He ʻoku ou ʻilo ʻoku moʻui ʻa hoku huhuʻí, pea ʻe tuʻu ia ʻi māmani ʻi he ʻaho fakamuí” (Sione 19:25). “[ʻE] hāʻele mai ʻi he ngaahi ʻao ʻo e langí ke pule ʻi māmani ki hono kakaí” (T&F 76:63).
ʻIkai ko ia pē, ka ʻoku mau tui te tau toe maʻu foki hotau ngaahi sino fakamatelié tuʻunga pē Heʻene Toetuʻú: “Pea ka ʻosi hoku kilí pea maumau hoku sinó, ka te u mamata ʻi hoku kakanó ki he ʻOtuá” (Siope 19:26). “He ʻoku hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi” (1 Kolinitō 15:22). “ʻE vete ʻe he pekia ʻa Kalaisí ʻa e ngaahi haʻi ʻo e mate fakasino ko ʻení, koeʻuhi ke fokotuʻu hake ʻa e kakai fulipē mei he mate fakasinó ni. ʻE toe fakatahaʻi ʻa e sinó pea mo e laumālié ʻi hono anga haohaoá” (ʻAlamā 11:42–43).
ʻOku mou tui ʻoku fie maʻu ʻa ʻEne ʻaloʻofá ki hotau fakamoʻuí?
ʻAupito. Ka ne taʻe ʻoua ʻa e ʻaloʻofa ʻa Sīsū Kalaisí, he ʻikai lava ke fakamoʻui ha taha pe maʻu ʻa e ngaahi tāpuaki taʻengatá (vakai, Loma 3:23–24). ʻI Heʻene ʻaloʻofá, ʻe toetuʻu ʻa e kakai kotoa pē pea ʻe lava ke maʻu ʻa e moʻui taʻengatá ʻe kinautolu kotoa pē ʻe tui pea muimui ʻiate Iá (vakai, Sione 3:15). ʻIkai ngata aí, tuʻunga ʻi Heʻene ʻaloʻofá, ʻe kei hokohoko atu ai pē ʻi he taʻengatá ʻa ʻetau ngaahi fetuʻutaki toputapu mo hotau malí mo e fānaú (vakai, Mātiu 16:19; 1 Kolinitō 11:11; T&F 132:19). Ko e ngaahi tāpuaki taʻengata ko ʻení, ko ʻEne ngaahi meʻaʻofa ia maʻatautolu; ʻoku ʻikai ha meʻa ia ʻe lava ke tau fai maʻatautolu pē ke maʻu ai ʻa e ngaahi meʻaʻofa ko iá.
Kae kehe, ʻoku fakamahinoʻi mai ʻe he folofolá ʻoku tau maʻu ʻa e ngaahi tāpuaki kakato ʻo ʻEne ʻaloʻofá ʻi heʻetau tui mo talangofua ki Heʻene ngaahi akonakí. Naʻe akonaki ʻa e ʻAposetolo ko Paulá ʻo pehē he ʻikai ke tau lava ʻo fakamoʻui pē ʻa kitautolu; ʻoku tau fie maʻu ʻa e ʻaloʻofa ʻa e ʻEikí: “He ʻoku mou moʻui ʻi he ʻofa pe ʻi he tui; pea ʻoku ʻikai meiate kimoutolu ia; ka ko e foaki ʻa e ʻOtuá: ʻoku ʻikai ʻi he ngaahi ngāue, telia naʻa polepole ai ha tangata. He ko ʻene ngāué ʻa kitautolu, kuo fakatupu ʻia Kalaisi Sīsū ki he ngaahi ngāue lelei, ʻa ia kuo tomuʻa tuʻutuʻuni ʻe he ʻOtuá ke ʻaʻeva ai ʻa kitautolu” (ʻEfesō 2:8–10).
ʻOku fakamatalaʻi ʻe Sēmisi: “ʻOku pehē foki ʻa e tuí, kapau ʻoku ʻikai ʻi ai ʻa e ngāué, ʻoku mate ia, pea ʻoku tuʻu taha pē ia… . Ko ʻeni ʻoku mou mamata ʻoku fakatonuhiaʻi ʻa e tangatá ʻe he ngaahi ngāué, kae ʻikai ʻi he tuí pē” (Sēmisi 2:17, 24). Ko ia naʻe lava ai ke tala ʻe he Fakamoʻuí ki he talavou koloaʻia naʻe talangofua mo fie maʻu ʻa e moʻui taʻengatá, naʻe kei toe lahi e ngaahi meʻa ke ne faí (vakai, Mātiu 19:16–22; Luke 18:18–23). ʻOku tui e Kāingalotu ʻo e Siasí ʻoku aʻu kakato atu ʻa e ʻaloʻofa ʻa Kalaisí kiate kinautolu ʻoku tui kia Kalaisi mo fai ʻa e ngaahi ngāue naʻá Ne akonakiʻakí. “He ʻoku mau ʻilo ʻoku ʻi he ʻaloʻofá ʻa homau fakamoʻuí, ʻo ka hili ʻemau fai ʻa e meʻa kotoa pē ʻe ala faí” (2 Nīfai 25:23; ko e toki tānaki atu hono fakamamafaʻí).
Neongo he ʻikai lava ʻe heʻetau ngaahi ngāue leleí ʻo fakamaʻa ʻetau angahalá, ka ʻoku nau fakahā ʻa ʻetau tui moʻoni kia Sīsū Kalaisí mo ʻetau tauhi totonu ki he hala naʻá Ne fouá.
ʻOku mou tui ʻoku mahuʻinga tatau pē ʻa Siosefa Sāmita mo Sīsū Kalaisi ʻi heʻena tokoni ke fakamoʻui ʻa e kakaí?
ʻIkai. Ko Siosefa Sāmitá ko ha palōfita mahuʻinga ia ki he hisitōlia ʻo e faʻahinga ʻo e tangatá. Naʻe ʻomi ʻe he ngāue naʻá ne fakahoko ʻi he fakahinohino fakalangí, ha ngaahi tāpuaki mo ha ʻilo ki māmani ʻa ia naʻe foaki ʻeni ki he kau palōfita ʻa e ʻOtuá mo honau kau muimuí ʻi he kuonga ʻo e Fuakava Motuʻá mo e Fuakava Foʻoú ka naʻe mole. Naʻe tatau pē ʻa Siosefa Sāmita mo e kau palōfita ko ia ʻo e kuonga muʻá, ʻa ia ko ha tamaioʻeiki ʻa e ʻEiki ko Sīsū Kalaisí ʻa ia naʻá ne akoʻi ʻo pehē ʻe toki lava pē ke maʻu ʻa e fakamoʻuí mo e ngaahi tāpuaki kotoa ʻo e nofo taʻengatá ʻo fakafou ʻi hotau Fakamoʻuí: “Ko e ngaahi tefitoʻi moʻoni ʻoku fakavaʻe ʻaki ʻetau tui fakalotú ko e fakamoʻoni ko ia ʻa e Kau ʻAposetoló mo e Kau Palōfitá ʻo fekauʻaki mo Sīsū Kalaisí, naʻe pekia, pea telio, pea toe tuʻu ʻi he ʻaho hono tolú, ʻo hāʻele hake ki he langí; pea ko hono toenga ʻo e ngaahi meʻa kehe kotoa pē fekauʻaki mo ʻetau tui fakalotú, ko ha ngaahi tānaki atu pē ia ki ai.” 1 ʻI ha taimi ʻe taha, naʻe akonaki ai ʻa e Palōfitá ʻo pehē, “Ko e taimi ʻoku tau fakakaukau ai ki he māʻoniʻoní pea mo e haohaoa ʻa hotau ʻEiki maʻongoʻongá, ʻa ē naʻá Ne fakaava ʻa e founga ke tau lava ai ʻo omi kiate Ia, ʻo aʻu ki Heʻene feilaulauʻi Iá, ʻoku molū leva hotau lotó ʻi Heʻene ʻaloʻofá.”2