“ʻOKU PEHĒ ʻE KIMOUTOLU KO HAI AU?”

Ne fai ʻe he Fakamoʻuí ʻa e fehuʻi ko ʻení ki Heʻene kau ākongá, pea tali ʻe Pita ʻo pehē, “Ko koe ko e Kalaisí, ko e ʻAlo ʻo e ʻOtua Moʻuí” (vakai, Mātiu 16:15–16). Ko e tali ʻeni ʻa ha toʻu tupu mo ha kakai lalahi ʻi māmani ki he fehuʻi tatau pē ko ʻení:

Kuo fai ʻe Sīsū Kalaisi ha meʻa lahi maʻaku. Kuó ne foaki mai hoku fāmilí mo e ongoongoleleí. Kuó Ne tokoniʻi au ʻi heʻeku akó. Kuó u maʻu ha ngaahi sikolasipi, pea ʻoku ou tui ko e ngaahi tāpuaki ʻeni meiate Ia. Kapau naʻe ʻikai te Ne hāʻele mai ke fakahā mai ʻa e founga ke tau moʻui aí, he ʻikai lava ke tau toe foki hake ki heʻetau Tamai Hēvaní.

Polaieni N., 13, Honitulasi

ʻOku ou ʻiloʻi ʻe lava ke tau toetuʻu pea ʻe lava ke huhuʻi fakalaumālie mo fakatuʻasino kitautolu tuʻunga ʻi he mamahi, pekia, mo e Fakalelei ʻa e Fakamoʻuí. Kuó u ʻilo ʻe lava ke fakamolemoleʻi ʻetau ngaahi angahalá ʻi he tui mo e fakatomala.

Sōana O., 19, Filipaini

ʻI he kuonga fuoloá, ne ʻeveʻeva ʻi he funga ʻo e māmaní ha tangata, pea kuo ʻaonga ʻEne ngaahi ngāué mo ʻEne ngaahi folofolá ki he moʻui ʻa ha lau miliona—kau ai ʻeku moʻui. Ko Sīsū Kalaisi Ia. ʻOku hokohoko atu pē hono tākiekina ʻe Heʻene feilaulau fakaleleí ʻa ʻeku moʻuí ʻi he ʻaho kotoa pē. Meʻa fakaofo ke tau ʻiloʻi ʻe lava ke fakamoʻui hotau ngaahi kafó ʻo fakafou ʻi Hono ngaahi kafó. Koeʻuhí ko ʻeku ʻiloʻi ko Sīsū ʻa e Kalaisí, ʻoku ou teuteu ai ke u ngāue fakafaifekau taimi kakato pea fakamafola ʻEne ongoongoleleí ki he kakai ʻo māmani kuo teʻeki ai ke nau ongoʻi ʻa ʻEne ʻofa taʻefakangatangatá. Ko Ia ʻa e Fakamoʻui mo e Huhuʻi ʻo hoku Laumālié.

Kalisitiane M., 24, Koloēsia

Kuo fai maʻatautolu ʻe Sīsū Kalaisi ʻa e meʻa naʻe ʻikai malava ʻe ha toe taha. Ko ha momeniti fakaʻofoʻofa kiate au ʻeku maʻu ʻa e Lakanga Taulaʻeiki Faka-ʻĒloné he ne u ʻiloʻi ko e finangalo ia ʻo e ʻEikí ke u fakahokó. Ne u muimui Heʻene faʻifaʻitakiʻangá. ʻOku ou ʻilo te Ne kei hokohoko atu ʻi hono tataki mo fakahinohino kiate au ʻa e halá.

Limihai, G., 17, Mekisikou

Hili e mālōlō ʻeku fineʻeikí, ne kamata ke taulōfuʻu ʻeku moʻuí. Ne faifai peá u kole faleʻi mei heʻeku pīsopé. Naʻe ʻikai ke u ʻamanaki ki he meʻa naʻá ne talamaí, ka naʻá ne liliu ʻeku moʻuí. Naʻá ne fakaafeʻi au ke u falala ki he Tamai Hēvaní ʻaki haʻaku lotu, lau folofola, pea falala ʻe tokoniʻi au ʻe he Fakamoʻuí—ke u falala moʻoni kiate Iá koeʻuhí ke u ongoʻi ai ʻoku maʻamaʻa ange ʻeku ngaahi kavengá. Ko e ʻosi ʻeni ha taʻu ʻe ua mo e konga mei ai, pea ʻoku ou ʻiloʻi ʻe lava ke tau maʻu ʻa e melinó ʻi he taimi kotoa pē koeʻuhí ko hotau Fakamoʻuí mo e meʻa naʻá Ne fai maʻatautolú.

Uitenī W., 19, ʻAlesona, USA

ʻOku ou ʻilo ʻoku moʻui ʻa Sīsū Kalaisi. ʻOkú Ne ʻofa ʻiate au, peá Ne foaki ʻEne moʻuí koeʻuhí ko au. Ko hoku kaumeʻá Ia. ʻOku ou ako ʻi Heʻene ngaahi akonakí ke u hoko ʻo hangē pē ko Iá. ʻOkú Ne fakamaau totonu, angaʻofa, haohaoa, mo manavaʻofa. Naʻá Ne mamahi ʻi Ketisemaní koeʻuhí ko e tokotaha kotoa pē. ʻOku ou ʻilo ko e Kalaisi Moʻuí Ia, ko hoku Fakamoʻuí, ko hoku Maká mo hoku ʻEikí.

Kalōtia R., 25, Mekisikou

ʻI heʻeku tupu hake he Siasí mo ʻalu ki he Palaimelí, kuó u ako ai kia Sīsū Kalaisi talu mei heʻeku kei siʻi. Pea talu mei ai mo e fakaʻau pē ke toe mālohi ange ʻeku fakamoʻoní. ʻOku ou lolotonga ngāue fakafaifekau he taimí ni, pea ʻoku ou fiefia he faingamālie ke u vahevahe ai e ongoongoleleí mo e niʻihi kehé pea fakamoʻoniʻi ʻa Sīsū Kalaisi ʻi he ʻaho kotoa pē.

ʻI heʻeku fakakaukau atu ki he Fakamoʻuí mo e meʻa kotoa kuó Ne fai maʻakú, ʻoku ou loto ke u toe ofi ange kiate Ia. ʻOku ou moʻuiʻaki ʻa e ngaahi meʻa ne u ako heʻeku kei siʻí. ʻOku ou fiefia he lava ke u tokoniʻi ʻa e niʻihi kehé ke nau ongoʻi ʻa e ʻofa ʻa hotau Fakamoʻui ko Sīsū Kalaisí. ʻOku ʻikai ko haʻaku leaʻaki pē ʻa e fakamoʻoni ko ʻení—ka ʻoku haʻu ia mei hoku lotó.

Sūsana V., 21, Tonga