KO E ʻAMANAKI LELEI KI HE TOETUʻÚ
ʻI he taimi ne foki hake ai hoku uaifi ʻofeiná ki heʻetau Tamai Hēvaní, naʻe fie maʻu ke kumi ʻe homau fāmilí ha faʻitoka ʻe feʻunga mo iá. Naʻe fakafepakiʻi au heni ʻi heʻeku loto ke tuʻu ʻi hono maka faʻitoká ʻa e fakalea ko e mālōlōʻangá. Naʻe ʻikai ngofua ʻeni ʻi he ngaahi tuʻutuʻuni fekauʻaki mo e faʻitoká.
Naʻe hoko heni haʻamau fāinga faingataʻa. Naʻe faifai pea ʻeke mai ʻe he faifekau ʻo e siasi naʻe ʻanautolu ʻa e faʻitoká ʻo fekauʻaki mo e fakaleá. Naʻe lava ke u fai ange ʻeku fakamoʻoní ki heʻeku tui ko ia ki he toetuʻu moʻoni ʻa e sinó, ʻo u fakaʻaongaʻi ʻa e folofola ʻa e Fakamoʻuí: “ʻE fanongo ai ki hono leʻó ʻa kinautolu kotoa pē ʻoku ʻi he ngaahi tanuʻangá, pea te nau ʻalu atu; ko kinautolu naʻe fai leleí, ki he toetuʻu ʻo e moʻuí” (Sione 5:28–29). Ne u fakamoʻoni ange ko e faʻitoka ko ʻení ko e mālōlōʻanga toputapu ia moʻotautolu kae ʻoua kuo hokosia ʻa e Toetuʻú.
Naʻe ueʻi leva e faifekaú ke ne fai ʻa e fokotuʻu ko ʻení: “Tohiʻi ʻi he maká ʻa e fakalea ko ʻení: “ʻOku mālōlō heni ʻa e fāmili Poné mo e fāmili Leimaní ʻo talitali ki he Toetuʻú.” Naʻe fai ia. Pea naʻe pehē hono tohi tongi ʻeku fakamoʻoní ʻi he maká.