KO E TUI ʻA HA KIʻI TAMASIʻI
Ne u fakakaukau ke u lue lalo ki he konifelenisi fakasiteikí, ʻo ma lue mo hoku kiʻi foha taʻu valú ʻi ha miniti nai ʻe 30 pe 40. Ne ʻosi ha miniti ʻe uofulu peá u toki fakatokangaʻi ʻoku ʻikai te u toe ʻilo ʻa e feituʻu naʻe totonu ke ma ō ki aí. Ko e tamasiʻi faʻa talanoa hoku foha ko ʻElesoní, pea naʻá ne talanoa mai e ngaahi meʻa naʻe hoko ʻi ʻapiakó pe ʻi homau ʻapí. Ne u kole ange ke kiʻi fakalongolongo angé, ʻo u talaange ʻoku fie maʻu ke u fakakaukau he ne u manavasiʻi mahalo kuó ma hē.
Ko e taimi ia naʻe fakahā mai ai ʻe hoku fohá ʻa ʻene tuí. Naʻá ne fokotuʻu mai ke fai haʻama lotu. ʻI hoku fuʻu fakapotopotó mo e mahino ne u maʻu ko e tangata lahí (pea mo e kamata ke ʻosi ʻeku kātakí he kuo ofi foki e taimi kamata ʻo e konifelenisí), ne u talaange ke lotu ia kapau ʻokú ne fie lotu– ne u fie maʻu ʻe au ke u fakakaukau. Ne u pehē loto pē, “ʻOku ʻi ai e ngaahi meʻa ia ʻoku ʻikai fie maʻu ke tau fakafalala ai ki he ʻEikí; pea ko e taha ʻo e ngaahi meʻa ko iá ko hono kumi ʻo e hala ki he falelotú.”
Hangē pē ne ʻiloʻi ʻe ʻElesoni ʻeku fakakaukaú, ko ia naʻá ne akoʻi kiate au ha lēsoni ʻi he loto fakatōkilaló ʻaki ʻene pehē mai, “Ko e hā ʻokú ke vili taʻeʻunua ai ke fai e ngaahi meʻá ʻi he founga faingataʻá?” Hili iá, naʻá ne fakalongolongo, pea ʻoku ou ʻilo naʻá ne lotu ʻi hono ʻatamaí pea ʻi hono lotó. Hili pē ha ngaahi miniti siʻi mei ai kuó ma aʻu ki he falelotú, pea ne u ʻiloʻi kuó ne maʻu ha tali ki heʻene lotú.
ʻOku monūʻia ʻa kitautolu, ko e Kau Māʻoniʻoni ʻi he Ngaahi ʻAho Kimui Ní, ke tau hoko ko e kau mēmipa ʻo e Siasi ʻo Sīsū Kalaisí. Ne tupulaki ʻeku fakamoʻoni ki hono moʻoni ʻo e ongoongolelei kuo toe fakafoki maí ʻi heʻeku ʻiloʻi ko ia neongo ko e tamasiʻi siʻi pē ʻa hoku fohá, ka naʻá ne ʻiloʻi e founga ke ngāueʻaki e tefitoʻi moʻoni ʻo e tuí mo e lotú, ʻo ne hoko ai ko ha sīpinga kiate au ʻi hono moʻuiʻaki ʻo e ngaahi akonaki ʻa Sīsū Kalaisí.