Tui mo e Fakapapau mo e Fuakava ‘o e Lakanga Fakataulaʻeikí
Laka atu ʻi he tui ʻo tauhi hoʻomou ngaahi fuakava mo e ʻOtuá pea maʻu ai ʻa e talaʻofa kuó Ne ʻoatu kiate kimoutolu ʻi ha fakapapaú.
Ko ʻeku taumuʻá he pooni ke tokoni atu ʻi hono fakatupulaki hoʻo loto falala ke ke maʻu e ngaahi tāpuaki ʻo e fakapapau mo e fuakava ʻo e lakanga fakataulaʻeikí. Mahalo ko e meʻa ʻe fie maʻú ko hono fakatupulaki hoʻo lototoʻá ʻi he mafatukituki ʻo e ngaahi ola ʻe ala maʻu mei he fakapapau mo e fuakava ko iá.
Kuo fakahā mahino mai ʻe he ʻEikí ʻa e ngaahi ola ko iá. ʻOku hanga ʻe he feinga ke taau mo e fakapapau mo e fuakava ko iá, ʻo ʻomi ʻa e meʻaʻofa maʻongoʻonga taha ʻi he ngaahi meʻaʻofa kotoa ʻa e ʻOtuá: ʻa ia ko e moʻui taʻengatá. Ko ha taumuʻa ia ʻo e Lakanga Taulaʻeiki Faka-Melekisētekí. ʻI heʻetau tauhi ʻa e ngaahi fuakavá ʻi hono maʻu ʻo e lakanga fakataulaʻeikí pea mo fakafoʻou kinautolu ʻi he ngaahi ouau fakatemipalé, ʻoku talaʻofa mai ai kiate kitautolu ʻi ha fakapapau meia ʻElohimi ko ʻetau Tamai Hēvaní, te tau maʻu ʻa e fonu ʻo Hono nāunaú ʻi heʻetau moʻui ʻo tatau mo Iá. Te tau maʻu ʻa e tāpuaki ko hono silaʻi kitautolu ʻi ha fāmili ke taʻengata pea mo e talaʻofa ʻo e tupulaki taʻengatá.
Hangē ko ia ʻoku mou ʻamanaki ki aí, ʻoku ʻi ai ha ngaahi nunuʻa fakamamahi ʻe hoko mai ʻo ka ʻikai ke tau maʻu ʻa e tāpuaki ko iá. Naʻe toe fakahā mahino mai foki ʻa e ʻEikí ʻo kau ki ai. Ko e ngaahi lea ʻeni ʻoku faʻa lau ki he kau talavoú ʻe honau kau takí he taimi ʻoku nau fakaofiofi atu ai ke maʻu ʻa e Lakanga Taulaʻeiki Faka-Melekisētekí. Te mou lava ʻo manatuʻi ʻa e ngaahi ongo ne mou maʻú ʻi hoʻomou fuofua fanongo pē ki aí. Ko e folofola ia ʻa e Fakamoʻui ko Sīsū Kalaisí naʻe fakafou mai ʻi he Palōfita ko Siosefa Sāmitá:
“Pea ko kinautolu kotoa pē foki ʻoku maʻu ʻa e lakanga fakataulaʻeiki ko ʻení ʻoku nau maʻu au, ʻoku folofola ʻe he ʻEikí;
“He ko ia ia ʻokú ne tali ʻeku kau tamaioʻeikí, ʻokú ne tali au;
“Pea ko ia ia ʻokú ne tali aú ʻokú ne tali ʻeku Tamaí;
“Pea ko ia ia ʻokú ne tali ʻeku Tamaí ʻokú ne maʻu ʻa e puleʻanga ʻo ʻeku Tamaí; ko ia ko e meʻa kotoa pē ʻoku maʻu ʻe heʻeku Tamaí, ʻe foaki ia kiate ia.
“Pea ʻoku fakatatau ʻeni ki he fakapapau mo e fuakava ʻoku kau ki he lakanga fakataulaʻeikí.
“Ko ia, ko kinautolu kotoa pē ʻoku maʻu ʻa e lakanga fakataulaʻeikí, ʻoku nau tali ʻa e fakapapau mo e fuakava ko ʻení mei heʻeku Tamaí, ʻa ia ʻoku ʻikai te ne lava ʻo maumauʻi, pea ʻoku ʻikai lava foki ke ueʻi ia.
“Kae ʻilonga ia ʻe maumauʻi ʻa e fuakavá ni hili ʻene tali iá, peá ne tafoki ʻaupito mei aí, ʻe ʻikai te ne maʻu ha fakamolemole ʻo e ngaahi angahalá ʻi he māmani ko ʻení, pe ʻi he maama ka hoko maí.
“Pea ʻe hoko ʻa e malaʻia kiate kinautolu kotoa pē ʻoku ʻikai te nau haʻu ki he lakanga fakataulaʻeikí ni kuo mou maʻú, ʻa ia ʻoku ou fakamaʻu ʻeni kiate kimoutolu ʻoku ʻi heni ʻi he ʻaho ní, ʻaki hoku leʻo pē ʻoʻokú mei he ngaahi langí; pea kuó u tuʻutuʻuni ʻe au foki ki he kakai taʻefaʻalaua ʻo e langí mo ʻeku kau ʻāngeló ke nau tokangaʻi ʻa kimoutolu.
“Pea ko ʻeni ʻoku ou fai kiate kimoutolu ha fekau ke mou vakai telia ʻa kimoutolu, ke mou tokanga faivelenga ki he ngaahi folofola ʻo e moʻui taʻengatá.”1
Ko ʻeni kapau ʻoku mou hangē ko au he fuofua taimi ne u fanongo ai ki he ngaahi leá ni ‘i heʻeku kei talavoú, naʻe hā ngali faingataʻa ʻa e tukupā ia ke tali ʻa e Lakanga Taulaʻeiki Faka-Melekisētekí. ʻOku ʻi ai ha ʻuhinga ʻe ua ke ke ongoʻi lototoʻa ai kae ʻikai lotofoʻi ʻi he ngaahi tautea ʻe hoko mai mei he tōnounou ko ia ke ke tauhi ʻa e fakapapau mo e fuakavá pe ko hoʻo fili ke ʻoua naʻá ke tali iá. Tatau ai pē pe te ke tali ʻa e fakapapaú mo e fuakavá pe te ke pehē ʻoku fuʻu faingataʻa ke fai ia, ka ʻo kapau he ʻikai ke ke feinga, ʻe kei tatau pē ʻa e tauteá ia. Ko ia ʻoku ʻikai ha toe veiveiua, ko e founga lelei taha kiate kitauá ko hono maʻu ʻo e lakanga fakataulaʻeiki māʻoniʻoní pea feinga ʻaki e kotoa hotau lotó ke tauhi ʻa hono ngaahi fuakavá. Kapau te tau fili ke ʻoua naʻa tau feinga, ko e moʻoni ʻe mole meiate kitautolu ʻa e faingamālie ki he moʻui taʻengatá. Kapau te tau feinga, ʻe tokoni mai ʻa e ʻOtuá ke tau lava ʻo maʻu ʻa e moʻui taʻengatá.
ʻOku toe ʻi ai ha ʻuhinga ʻe taha ke ke fili ai he taimí ni ʻaki ho lotó kotoa ke ke feʻunga mo e fakapapau pea mo e fuakava ko iá, peá ke loto falala te ke ikuna. ʻOku talaʻofa atu ʻe he ʻOtuá te Ne ʻoatu ha tokoni mo ha mālohi, pea kapau te ke fakaʻaongaʻi hoʻo tuí, te Ne tuku ke ke lavameʻa.
Tuku muʻa ke u fakamatalaʻi atu ha niʻihi ʻo e ngaahi tāpuaki ʻe lava ke ke maʻu ʻi hoʻo laka atu ki muʻa ʻi he tuí.
ʻUluakí, ko e foʻi moʻoni ko ia kuo ʻoatu kiate koe ʻa e fakapapaú mo e fuakavá, ko ha fakamoʻoni ia kuo fili koe ʻe he ʻOtuá neongo ʻEne ʻafioʻi ho mālohí mo e meʻa te ke lavá. Kuó Ne ʻafioʻi koe talu mei hoʻo nofo fakataha mo Ia ʻi he maama fakalaumālié. ʻI Heʻene tokaimaʻananga ki ho mālohingá, kuó Ne tuku ai ke ke ʻilo ki he Siasi moʻoni ʻo Sīsū Kalaisí pea foaki atu ʻa e lakanga fakataulaʻeikí. ʻE lava ke ke ongoʻi loto falala he ʻokú ke maʻu ha fakamoʻoni ki Heʻene falala atu kiate koé.
Uá, ʻi hoʻo feinga ke tauhi hoʻo ngaahi fuakavá, kuo talaʻofa mai ʻe he Fakamoʻuí ʻa ʻEne tokoni fakatāutahá. Kuó Ne folofola ʻi hoʻomou laka atu ki muʻa ʻo fakaʻapaʻapaʻi ʻa e lakanga fakataulaʻeikí, “Te u ʻi ai foki mo au, he te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu.”2
ʻE ʻi ai ha ngaahi taimi te ke fie maʻu ai ke toe fakapapauʻi atu, ʻo hangē ko aú, ʻokú ke maʻu ʻa e mālohi ke tauhi ho ngaahi tufakanga ʻi he lakanga fakataulaʻeiki toputapu ko ʻení. Naʻe tomuʻa ʻafioʻi pē ʻe he ʻEikí ia te ke fie maʻu ke toe fakapapauʻi atu. Naʻá Ne folofola, “He ʻilonga ʻa kinautolu ʻoku faivelenga ʻo aʻu ki hono maʻu ʻa e ongo lakanga fakataulaʻeikí ni kuó u lau ki aí, pea mo hono fakaongoongoleleiʻi ʻo honau lakangá, ʻoku fakamāʻoniʻoniʻi ʻa kinautolu ʻe he Laumālié ki hono fakafoʻou ʻo honau sinó.”3
Kuó u mātā hono fakahoko ʻo e talaʻofa ko iá ʻi heʻeku moʻuí pea mo ha niʻihi kehe. Naʻe ʻi ai haku kaumeʻa naʻe palesiteni fakamisiona. Naʻá ne fakahā mai ʻi he fakaʻosinga ʻo e ʻaho takitaha lolotonga ʻene ngāué, naʻe tātātaha ke ne lava ʻo aʻu ki ʻolunga ki hono mohengá mo ʻene fifili pē te ne maʻu nai ha ivi ke toe fehangahangai mo ha ʻaho foʻou. Ka ʻi he hoko mai ʻa e pongipongí, te ne ʻiloʻi ai kuo toe fakafoʻou hono iví mo ʻene lototoʻá. Kuó ke mātā ia ʻi he moʻui ʻa e kau palōfita toulekeleká, ʻa ia naʻe hangē naʻe fakafoʻou maʻu pē ia he taimi kotoa pē ne nau tuʻu ai ke fakamoʻoniʻi ʻa e ʻEiki ko Sīsū Kalaisí mo e ongoongolelei kuo toe fakafoki maí. Ko ha talaʻofa ia kiate kinautolu ʻoku laka atu ʻi he tuí ʻi heʻenau ngāue ʻi he lakanga fakataulaʻeikí.
ʻOku talaʻofa atu foki ʻe foaki atu ʻa e mālohi ke fai ha fakamoʻoní pea ʻe fakamaʻa ai ʻa kimoutolu ʻi he founga ko iá mo fakafeʻungaʻi ki he moʻui taʻengata kuo talaʻofa atú:
“He te u fakamolemoleʻi ʻa kimoutolu ʻi hoʻomou ngaahi angahalá ʻaki ʻa e fekaú ni—koeʻuhí ke mou tuʻu maʻu ʻi homou ʻatamaí ʻi he anga-fakamātoato mo e laumālie ʻo e lotu, ʻi hono fakamoʻoniʻi ki he māmaní kotoa pē ʻa e ngaahi meʻa ʻa ia kuo fakahā kiate kimoutolú.
“Ko ia, ke ʻalu atu ʻa kimoutolu ki he māmaní kotoa pē; pea ko e feituʻu kotoa pē ʻoku ʻikai te mou lava ʻo ʻalu ki aí ke mou fekauʻi atu, koeʻuhí ke ʻalu atu ʻa e fakamoʻoní meiate kimoutolu ki he māmaní kotoa pē ki he kakai fulipē.”4
Pea ʻi he talaʻofa ko iá, kuo fakalāngilangiʻi ai ʻa kimoutolu ʻe he ʻEikí ʻaki ʻEne folofola, “Ko kimoutolu ia ʻa e faʻahinga kuo foaki kiate au ʻe heʻeku Tamaí; ko hoku ngaahi kaumeʻa ʻa kimoutolu.”5
ʻOku ʻi ai ha tāpuaki makehe ʻe taha te ne fakalotolahiʻi koe ʻi hoʻo tauhi ʻa e ngaahi fuakava ʻo e lakanga fakataulaʻeikí. ʻE teuteuʻi koe ʻe he ngāue ʻi he lakanga fakataulaʻeikí, ki haʻo nofo ʻi ha ngaahi fāmili taʻengata. Te ne liliu ʻa e ngaahi ongo ʻokú ke maʻu ʻo fekauʻaki mo e ʻuhinga ke hoko ai ko ha husepāniti pe tamai pe foha pe tokouá. ʻE hoko mai ʻa e liliu ko iá ki ho lotó ʻi hoʻo ongoʻi e tupulaki hoʻo tuí pea mo e talaʻofa ko ia ʻo e moʻui taʻengatá ʻo fakafou ʻi he Lakanga Taulaʻeiki Faka-Melekisētekí kiate koé.
Naʻe hoko ia kia Paʻale P. Palati he taimi naʻe fuofua akoʻi ai kiate ia ʻa e tokāteline ʻo e fāmili taʻengatá, ʻe he Palōfita ko Siosefa Sāmitá. Naʻe tohi ʻa Paʻale P. Palati ʻo pehē:
“Ko e taimi ʻeni ne u maʻu ai meiate ia ʻa e fuofua fakakaukau ki he faʻunga ʻo e fāmili taʻengatá pea mo e feohi taʻengata ʻa e tangatá mo e fefiné ʻi he ngaahi fetuʻutaki ʻofa ʻoku ʻiloʻi ʻe he kau ʻatamai matalá, anga fakaʻeiʻeikí mo e kau loto maʻá, mo ʻiloʻi ʻa hono mahuʻingá ʻa ia ko e fakavaʻe tonu pē ia ʻo e meʻa taau kotoa pē ʻoku ui ko e fiefiá… .
“Ne u ako meiate ia ʻe lava ke u fakamaʻu kiate au ʻa hoku uaifi ʻofaʻangá, ʻi he moʻuí ni mo e taʻengatá kotoa; pea mapunopuna mei he matavai ʻo e ʻofa taʻengata fakalangí, ʻa e ngaahi fakalaulaunoa fakaʻeiʻeiki ne ma feʻofaʻaki aí. Ne u ako meiate ia te tau lava ʻo fakatupulaki e ngaahi ongoʻi feʻofoʻofani ko ʻení pea tau tupulaki ʻi he taʻengatá kotoa; pea hoko leva e fānaú ko e ola ʻo ʻetau feohi taʻengatá, ʻa ia te nau tokolahi ʻo hangē ko e ngaahi fetuʻu ʻo e langí pe ʻoneʻone ʻo e matātahí… .
“Ne u ʻofa ki muʻa, ka naʻe ʻikai ke u ʻilo ʻa hono ʻuhingá. Ka ʻi he taimi ní, ʻoku ou ʻofa—ʻi he haohaoa—mo e ongoʻi lāngilangiʻia… . Ne u ongoʻi moʻoni ko e ʻOtuá ʻa ʻeku Tamai fakalangí; pea ko hoku tokoua ʻa Sīsū pea ko hoku uaifi ʻofaʻangá, ko haku hoa taʻe-faʻa-mate mo taʻengata ia; ko ha ʻāngelo talafekau angaʻofa kuo ʻomi ke hoko ko ha fakafiemālie mo ha kalauni nāunauʻia kiate au ʻo taʻengata pea taʻengata.”6
ʻOku ou tuʻu atu ko ha fakamoʻoni fakafoʻituitui ko e taimi ko ia ʻoku tau fuesia ai hotau lakanga fakataulaʻeikí ʻi he tuí, ʻokú ne maʻu ai ha mālohi ke liliu hotau lotó mo e ngaahi ongo ʻoku tau maʻú. ʻE lava ke maʻu ʻe ha talavou ʻoku fanongo mai ki hoku leʻó he ʻahó ni, ha lototoʻa ʻo kapau te ne fakaʻapaʻapaʻi hono lakanga fakataulaʻeikí, ʻe maluʻi ia mei he ngaahi ʻahiʻahi ʻo e angahala fakasekisualé, ʻa ia ʻoku hulutuʻa he māmani ʻoku tau nofo aí. ʻE lava foki ʻe ha tokotaha maʻu Lakanga Taulaʻeiki Faka-ʻĒlone ʻoku fanongo mai he pooni, ʻi he tupulaki ko ia ʻene tui ki he pale pau ʻo e moʻui taʻengatá ʻo fakafou ʻi he lakanga fakataulaʻeikí, ʻo maʻu ʻa e mālohi ke ne sio ʻo ʻiloʻi ʻi he ngaahi ʻofefine ʻo e ʻOtuá ʻa honau mahuʻinga totonú pea mo e talaʻofa ke ʻi ai hano hako, ʻa ia ko ha ʻuhinga ia ke ne moʻui maʻa mo haohaoa ai.
ʻI he taimi tatau pē, ʻe tataki ʻa kitautolu ʻe he fakapapaú mo e fuakavá, ke tau fakatupulaki ʻa e ongoʻi ʻofa faka-Kalaisí, ʻa ia ʻoku mahuʻinga ʻi he fāmili taʻengatá. Ko e taha ʻo e ngaahi palōmesi ʻoku tau fai ʻi heʻetau tali ʻa e lakanga fakataulaʻeikí, ko e tokoni ki he niʻihi kehé.
Kuó u mātā ʻa e mana ʻo e tupulaki ko iá ʻi he loto ʻo e kau maʻu lakanga fakataulaʻeikí. Pea ʻoku pehē pē ha tokolahi ʻo kimoutolu. Pea mo ha tokolahi ʻi tuʻa he Siasí. Ne u ʻi he ʻōfisi ʻo Palesiteni Kōtoni B. Hingikelií, he taimi naʻe fakahā ange ai ʻoku ʻi ai ha telefoni ki ai. Naʻá ne lea nounou pē he telefoní peá ne toe foki mai ki heʻema talanoá. Ka naʻá ne toʻo ha kiʻi taimi ke fakamatalaʻi mai. Naʻá ne pehē ko e telefoní mei he palesiteni ʻo e ʻIunaiteti Siteití, ʻa ia naʻe lolotonga puna hake ʻi ʻIutā ki Uāsingatoni ʻi he Vakapuna Air Force One. Naʻe telefoni mai e palesiteni ʻo e ʻIunaiteti Siteití ke fakamālō kia Palesiteni Hingikelī ʻi he tokoni naʻe fai ʻe he kau maʻu lakanga fakataulaʻeikí hili e afaá. Naʻe pehē ʻe he palesiteni ʻo ʻAmeliká ko ha mana ia ʻa e lava ke tau maʻu vave ha kakai tokolahi ne fakataha hake ke tokoni ki he niʻihi kehé. Naʻá ne fakahikihikiʻi hotau kakaí ʻaki ʻene pehē naʻa tau ʻiloʻi e founga ke fai ʻaki e ngāué.
Mahalo naʻe ongo makehe ki he palesiteni ʻo ʻAmeliká, ʻa e meʻa ko ia naʻá ne pehē ko ha ngaahi taukei fokotuʻutuʻu mahuʻingá. Naʻe kau ia he maná. Ka ko e konga lahi ʻo e maná, ko ha kau maʻu lakanga fakataulaʻeiki ʻe laungeau pe lauafe ne nau tui lahi ki he fakapapau mo e fuakava ʻo e lakanga fakataulaʻeikí. Naʻe ʻikai hoko ʻa e liliú mei he anga honau fokotuʻutuʻú: Naʻe hanga ʻe heʻenau tui ki he fakapapau mo e fuakava ʻo e lakanga fakataulaʻeikí ʻo fakalotoa kinautolu ke nau fononga lōloa mo mamaʻo ai pea nofo fuoloa ʻo kātekina ʻa e faingataʻá, ʻo nau fakafofongaʻi ʻa e ʻEiki ko Sīsū Kalaisí ʻi he tokoni kiate kinautolu ne faingataʻaʻiá.
Ne nau lolotonga ʻoange ki he fatongia fakataulaʻeikí, ʻa e mālohi fakatupulaki pea mo e laumālie ko ia ʻo e ʻofa faka-Kalaisí, ʻa ia naʻe fie maʻu ai ke nau hoko ko ha ngaahi husepāniti, ngaahi tamai, ngaahi foha mo e ngaahi tokoua ʻi he ngaahi fāmilí he māmaní pea mo e taʻengatá. Kuo tā tuʻo lahi e hoko ʻi he funga ʻo e māmaní, ʻa e ngaahi ngāue tokoni ko ia ʻa e lakanga fakataulaʻeikí ʻi heʻetau hoko ko ha ngaahi tuofāfine mo e tokoua ʻi he fāmili ʻo e ʻOtuá.
ʻOku ou fakatauange te mou fili he ʻahó ni, pea ʻi he ʻaho kotoa pē, ke laka atu ʻi he tui ʻo tauhi hoʻomou ngaahi fuakava mo e ʻOtuá pea maʻu ai ʻa e talaʻofa kuó Ne ʻoatu kiate kmoutolu ʻi ha fakapapaú. ʻE lava ke mou fai ia he fanga kiʻi ngāue faingofuá. ʻI hoʻomou fakataha fakakōlomú, ʻe lava ke mou fili ke vakai kiate kinautolu ko ha ngaahi tokoua ʻi he fāmili ʻo e ʻOtuá. ʻE ʻi ai ha taha ʻi hoʻomou kōlomú pe kulupu ʻo e lakanga fakataulaʻeikí, ʻe fie maʻu tokoni. Mahalo he ʻikai te ne fakahaaʻi atu ke ke ʻilo. Mahalo he ʻikai te ke lava ʻo mamata ki ai. Ka ʻoku ʻafioʻi mo fakaafeʻi kimoutolu ʻe he ʻOtuá ke mou hoko ko ʻEne kau tamaioʻeiki ʻo tokoniʻi ia.
Te mou lava ʻo hangē ko ha tangata maʻu lakanga fakataulaʻeiki, ko e taimi kotoa pē ne u sio ki ai ʻi heʻemau ngāueʻofa fakataha ʻa e lakanga fakataulaʻeikí, naʻá ne fehuʻi mai, “Fēfē hake hoʻo kuí?” ʻOku ou ʻiloʻi kuo teʻeki ai ke ne fetaulaki mo ʻeku faʻē ʻi he fonó. Ka naʻá ne ʻiloʻi ʻokú ne puke mo toulekeleka. ʻOku ʻikai ke u lava ʻo fakamatalaʻi atu ʻa hono mahuʻinga kiate au ke u vakai ki he ala mai e toʻukupu ʻo e ʻOtuá kiate au mo hoku uaifí ʻi he fakafiemālie mo e fakanonga ʻo fakafou mai ʻi ha tokotaha maʻu lakanga fakataulaʻeiki. ʻE lava ke mou maʻu ʻa e mālohi tatau he taimi kotoa pē ʻoku mou fakataha ai ko e kau maʻu lakanga fakataulaʻeikí, ʻo kapau te mou fakakaukau maʻu pē ki hoʻomou fuakava ke tokoni kiate kinautolu ʻoku tautau honau umá mo fuesia ha ngaahi kavenga mafasiá. ʻI hoʻomou fai iá, te mou fakatupulaki ai ʻa e ngaahi ʻulungāanga lelei ko ia te ne fakafeʻungaʻi kimoutolu ke mou hoko ko ha mēmipa ʻo ha fāmili taʻengatá.
ʻOku ʻi ai mo ha meʻa ʻe taha ʻe lava ke mou fai. Te mou lava ʻo ako e folofola ʻa e ʻOtuá, ʻo ʻikai koeʻuhí ko kimoutolu ka ke mou hoko ko ha fakafofonga ʻo e ʻEiki ko Sīsū Kalaisí ʻi he funga ʻo e māmaní. ʻI he taimi te mou fakatupulaki ai ho mālohi ke akoʻi ʻa e ongoongoleleí, ʻokú mou fakafeʻungaʻi ai ʻa kimoutolu ke mou tokoni ki he Tamai Hēvaní ʻi hono tānaki ʻEne fānaú. ʻI hoʻomou fai iá, ʻe hoko mai ha tāpuaki ʻe taha. Kapau ʻe ʻi ai ha taimi ʻe fie maʻu ai ʻi hoʻomou moʻui fakafāmili he māmaní pe ʻi he maama ka hokó, ke mou fakafoki mai ai ha sipi hē, te mou maʻu ha mālohi lahi ange, ʻo mahulu ange he meʻa ʻoku mou ʻiloʻi he taimi ní.
ʻOku fakamatalaʻi mai ʻe he ʻEikí ʻa e tāpuaki fakaʻofoʻofa ko iá ʻi he ʻAlamā 13:6: “Pea ʻi he ui pehē ʻa kinautolu ʻi he lakanga toputapú ni mo fakanofo ki he lakanga fakataulaʻeiki māʻolunga ʻo e lakanga toputapu ʻo e ʻOtuá, ke akonaki ʻaki ʻene ngaahi fekaú ki he fānau ʻa e tangatá, koeʻuhí ke nau lava foki ʻo hū ki hono mālōlōʻangá.”
ʻE lava ke mou maʻu ha lototoʻa ʻi he talaʻofa ko ʻeni ʻo e ikuná, ʻi he taimi ʻoku mou tokoni aí:
“Ko ʻeni hili honau fakamāʻoniʻoniʻi ʻe he Laumālie Māʻoniʻoní, mo fakahinehina honau ngaahi kofú, ʻo nau maʻa mo taʻe-hano-ʻila ʻi he ʻao ʻo e ʻOtuá, naʻe ʻikai te nau lava ʻo sio ki ha angahala ka ʻi he fakaliliʻa; pea naʻe ai ha tokolahi, ʻa ia ko ha fuʻu tokolahi ʻaupito, ʻa ia naʻe fakamaʻa mo nau hū ki he mālōlōʻanga ʻo e ʻEiki ko honau ʻOtuá.
“Pea ko ʻeni, ʻe hoku kāinga, ko hoku lotó ke mou fakavaivaiʻi ʻa kimoutolu ʻi he ʻao ʻo e ʻOtuá, pea fakahā ʻa e fua ʻoku ngali mo e fakatomalá, koeʻuhí ke mou lava foki ʻo hū ki he mālōlōʻanga ko iá.”7
ʻOku ou fakamoʻoni ʻoku moʻui ʻa e ʻOtua ko e Tamaí. Kuo mou fai ha fuakava mo Ia. Kuó Ne ʻoatu ha fakapapau, ko ha talaʻofa ʻo e moʻui taʻengatá, ʻa ia he ʻikai ke Ne lava ʻo maumauʻi. ʻOku ou fakamoʻoni kiate kimoutolu ko e lakanga fakataulaʻeikí ko e mālohi ia ʻoku lava ke fakatupu ʻaki ʻe he ʻOtuá ʻa e ngaahi māmaní, ʻo fakafou ʻi Hono ʻAlo ko Sīsū Kalaisí. ʻOku ou fakamoʻoni ʻoku finangalo ʻa e ʻOtuá ke mou ikuna pea ke mou toe foki ange ki ʻapi ʻo nofo fakataha mo Ia ko e ngaahi fāmili ʻo taʻengata. ʻOku ou fakamoʻoni atu ko e Siasi moʻoni ʻeni ʻo Sīsū Kalaisí. ʻOku maʻu ai ʻa e ngaahi kī ʻo e lakanga fakataulaʻeikí. Ko e lakanga fakataulaʻeiki ia kuo fakalāngilangiʻi ʻaki kimoutolu ʻe he ʻOtuá. ʻOku ou palōmesi atu ʻokú Ne ʻafioʻi ʻa e meʻa te mou lavá pea ʻoku feʻunga ke mou maʻu ʻa e tui kakato pea ʻamanaki lelei atu ki he moʻui taʻengatá, maʻamoutolu mo homou ngaahi fāmilí. ʻI he huafa ʻo Sīsū Kalaisí, ʻemeni.