Fakamatala Fakavitiō

Ko ha filimi vitiō naʻe huluʻi lolotonga e fakataha lahi ʻa e Kau Finemuí, ko ha naʻinaʻi meia Palesiteni Tōmasi S. Monisoni —pea mo ha fakamatala mei he kau finemui mo honau takí, ʻo kau ki ha meʻa ne hoko, ʻi heʻenau ako ke fekumi mo maʻu e fakahinohino ʻa e ʻEikí.

Sisitā Keleitoni

Naʻe ʻi ai ha fehuʻi mahuʻinga ne fai ʻe heʻemau kau finemuí he faʻahitaʻu māfana ne toki ʻosí. Ne nau fie ʻilo ki he tuʻunga ʻoku taukaveʻi ʻe he Siasí ʻi he teunga kaukautahí. Naʻe ʻikai ke mau fie ʻoange e tali ne mau fakakaukau ki aí, ko ia ne mau pehē ai te mau kiʻi poto ange ʻi heʻemau hoko ko honau kau takí, ʻo fakatafoki kinautolu ki he Maʻuʻanga ʻo e talí. Te nau lava ʻo fehuʻi; te nau lava ʻo fekumi ke nau ʻiloʻi pea nau ʻiloʻi e foungá mo maʻu ha mahino ki he faʻahinga ongo ʻe maʻu aí pea mo e founga ke fekumi ʻo maʻu fakatāutaha mai ha fakahinohino mei he langí ke nau lava ʻo faʻifaʻitaki ki ai ʻamuiange heʻenau moʻuí.

Finemui ʻUluakí

ʻI heʻemau kamatá, ne u fakakaukau, “Sai pē ia. Ko ha ngāue pē ʻeni ia ʻe taha ke ako fakahoko mei ʻapi.”

Finemui Hono Uá

Naʻe tokoni e meʻá ni ke u toe ofi ange ai ki he Tamai Hēvaní.

Finemui ʻUluakí

ʻE tokoni foki ia kiate au mo ʻeku fānau fefiné ʻi haʻaku fuʻu lahi.

Finemui Hono Tolú

ʻI heʻeku kamata fekumi pē ki he talí, naʻe vave ʻaupito ʻene hoko maí.

Sisitā Keleitoni

ʻI heʻemau vakai ki heni mei ha tafaʻaki fakatokāteliné, naʻe ʻikai ha maʻuʻanga tokoni mahuʻinga ange ka ko e folofolá.

Finemui Hono Tolú

Ne u feinga mālohi ʻaupito ke maʻu e talí ʻi he folofolá ka ne hangē naʻe ʻikaí.

Finemui ʻUluakí

Ka ʻi heʻeku toe fekumi ke loloto ange ki he kaveingá, ne u ongoʻi hangē ne toe fakalalahi ange ʻeku fie akó mo e fekumí.

Finemui Hono Tolú

Ne u feinga pē ke maʻu kotoa e ngaahi potu folofola fekauʻaki mo e teunga tāú, hangē ko e fefine anga māʻoniʻoní ʻe teunga taau pea naʻe ʻikai fuʻu mahino ia kiate au he fuofua taimí. Ka ne u lotua—he ne u ʻamanaki atu ki ha ngaahi tali pau ʻo fakafou ʻi he lotú, ka naʻe ʻikai pē. Pea ne u toki fakatokangaʻi hake he hili ʻeku maʻu e talí, naʻe ʻomi pē ʻe he lotú ʻa e Laumālié ka naʻe ʻi he folofolá pē ʻa e talí ia, ʻo hangē nai ko hoku lotó pē ʻoʻoku naʻe taʻe fie tokanga ki he [teunga tāú].

Finemui Hono Uá

Kuó u maʻu ha ngaahi tali, ka naʻe ʻikai fuʻu fakamahino mai he kuo pau ke u fai maʻu pē ʻeku tafaʻakí ʻo ako ʻiate au pē.

Finemui Hono Tolú

Pea hangē ne u ʻamanaki atu ke toki talamaí, ʻo pehē: “Ko e meʻa ʻeni te ke tuí. He ʻikai lava ke ke tui ʻeni.” Naʻe ʻikai ke u loto ke pehē he ʻe tuku leva ke u fai ʻeku filí. Pea naʻe ʻikai foki ha tuʻutuʻuni pau. Ka ʻoku ou fakafetaʻi moʻoni ko e tali ia ne u maʻú he ʻoku ou tui ʻoku kaungatonu ange ia ki he kau finemui he funga ʻo e māmaní.

Finemui ʻUluakí

Ne u ongoʻi ofi ange ki heʻeku Tamai Hēvaní pea naʻe tupulaki hoku lotó, tautautefito he ngāue fakataha mo e kau finemui ko ʻení ke fekumi mo ʻiloʻi ʻa e meʻa kotoa pē ne mau foua ke maʻu ʻa e talí, pea ʻoku ou ongoʻi ai ha ʻofa lahi kiate kinautolu kotoa.

Sisitā Keleitoni

ʻI heʻemau fakahoko fakataha e foungá ni mo felīngiaki e meʻa ne ʻi homau lotó pea maʻu mo ha tataki fakalaumālie pea ongoʻi e tākiekina ʻa e Laumālié, ne mau aʻusia ai ha tuʻunga makehe. Ne nau ʻilo ai ʻoku tokanga mai e Tamai Hēvaní ki he meʻa ʻoku nau tokanga ki aí. Ne nau ʻilo ai ʻokú Ne ʻofa ʻiate kinautolu. Ne nau ʻiloʻi ai te Ne fakafanongo mo tali mai ha faʻahinga meʻa pē te nau fehuʻi ange.

Finemui Hono Tolú

ʻOku ou tui ʻoku fakafou ʻi he foungá ni, ne u fakatokangaʻi ai ko hono maʻu ko ia ʻo e talí ʻoku ʻikai ko ha meʻa ʻoku hoko tuʻo taha pē ia he moʻuí, ka ko ha meʻa ia ʻe lava ke u fakaʻaongaʻi maʻu pē. Pea ke maʻu e ngaahi tali ko iá, kuo pau ke u tuʻu maʻu ʻi hono fai ʻeku ngaah lotú, lau ʻeku folofolá pea maʻu hokohoko ai pē ʻa e Laumālie ko iá.

Finemui ʻUluakí

ʻE lava ke u lotu kiate Ia ʻi ha faʻahinga taimi pē te u fie maʻu pea ʻokú Ne ʻi ai maʻaku, neongo pe ko e hā e tūkungá. ʻOkú Ne feʻao maʻu pē mo au pea ʻo Ne tokoniʻi maʻu pē au ʻi he tūkunga kotoa pē.

Finemui Hono Uá

Ko e taimi kotoa pē ʻoku ou ongoʻi loto mamahi ai pe fie maʻu tokoni, ʻe lava ke u kole maʻu pē kiate Ia.

Finemui ʻUluakí

ʻOku ou ʻiloʻi ko hai au pea ʻoku ou ʻiloʻi e meʻa ʻoku ou taukaveʻí pea mo e ongo ʻoku ou maʻu he taimi ʻoku ou tui ai ʻa e teunga ʻoku tāú. Pea ʻoku ou ʻiloʻi kapau te u teunga taau, ʻe lava ke u toe ofi ange ai ki he Tamai Hēvaní pea mo e Laumālié.

Finemui Hono Tolú

Ko ha meʻa fakaofo ia ke ʻiloʻi ko e taimi ʻokú ke toe foki ai ʻo lau mai mei muʻa hoʻo tohinoá, ne u ʻiloʻi ai naʻe meimei tali mai he ʻaho kotoa pē ʻeku ngaahi lotú mo ʻeku ngaahi fehuʻí ʻo fakafou ʻi he ʻEikí.

Palesiteni Tōmasi S. Monisoni

Te tau lava ʻo ʻiloʻi ʻa e moʻoní mei he folofolá, ngaahi akonaki ʻa e kau palōfitá, fakahinohino ʻa ʻetau mātuʻá pea mo e ngaahi ueʻi fakalaumālie ʻoku tau maʻu he taimi ʻoku tau tūʻulutui ai ʻo kumi ha tokoni mei he ʻOtuá.

ʻI he taimi ʻe niʻihi ko e tali lelei taha ʻe lava ke maʻu ʻe he toʻu tupú ki he ngaahi fehuʻi ʻo e moʻuí, ʻoku maʻu ia he taimi ʻoku nau tūʻulutui ai ʻo kole ki heʻetau Tamai Hēvaní.

Pea ʻoku ou fakamoʻoni kapau te nau manatuʻi maʻu pē ʻoku tokaimaʻananga mai ʻa e ʻEikí kiate kinautolu mo Ne tali mai ʻenau ngaahi lotú, te nau lava ʻo feau ʻa e faingataʻa kotoa pē te nau fetaulaki mo iá.