ʻEletā Tad R. Callister

ʻO e Kau Fitungofulú

Naʻe ʻosi fakapapauʻi pē ʻe ʻEletā Teti Lisiate Kalisitā te ne ʻalu ki ha feituʻu pē ʻe fekauʻi ia ki ai ʻe he ʻEikí pea ʻokú ne fakamoʻoni ʻoku ʻomi ʻe he ngāue maʻá e ʻEikí ha ngaahi tāpuaki lahi.

ʻOku pehē ʻe ʻEletā Kalisitā, “ ʻE tokoniʻi koe ʻe he ʻEikí neongo hoʻo ongoʻi taʻefeʻungá. Ko e uiuiʻi kotoa pē ʻoku lahi ange ia ʻi he tokotaha ʻoku uiuiʻí pea ʻoku fie tokoni mai ʻa e ʻEikí. Neongo ʻoku fai fakalongolongo pē ʻene tatakí ʻi he angamalū, ka he ʻikai te Ne tuku ke ke liʻekina.”

Naʻe fāʻeleʻi ʻa ʻEletā Kalisitā kia Liti Kalisitā mo Nōlini Kalisitā ʻi he ʻaho 17 ʻo Tīsema, 1945, ʻi Keleniteila ʻi Kalefōnia, USA. Naʻá ne ngāue fakafaifekau taimi kakato ʻi he Misiona Siteiti ʻAtalanitiki Hahaké, hoko ko ha pīsope, palesiteni fakasiteiki, fakafofonga fakavahelahi, Fitungofulu Fakaʻēlia pea naʻá ne lolotonga palesiteni ʻi he Misiona Tolonitō Kānata Hahaké ʻi he taimi ne uiuiʻi ai ia ki he Kōlomu hono Ua ʻo e Kau Fitungofulú.

ʻOku fakafiefia taha pē kia ʻEletā Kalisitā ke fakataha mo hono fāmilí, pea naʻe ʻikai te ne lava ʻo mafakamatalaʻi ʻa e ngaahi meʻa naʻá ne aʻusia ʻi heʻene hoko ko e palesiteni fakamisioná.

ʻOkú ne pehē, “ ʻOkú ke ako ke ke ʻofa ʻi he kau faifekaú ʻo hangē pē ko hao ngaahi foha mo e ʻofefine kinautolú. ʻOkú nau aʻu maʻu pē ki he tuʻunga ʻokú ke ʻamanaki te nau aʻusiá pea hangē ʻoku ʻikai ha ngataʻanga ʻo e ngaahi meʻa ʻoku nau malava ke faí.”

Hili hono maʻu ʻe ʻEletā Kalisitā hono mataʻitohi ʻi he tauhitohí mei he ʻUnivēsiti Pilikihami ʻIongí, mataʻitohi he laó mei UCLA pea mo hono MA ʻi he lao ʻo e tukuhaú mei he ʻUnivēsiti ʻo Niu ʻIoké, naʻá ne ngāue fakalao ʻi ha taʻu ʻe 34 mo ha kautaha lao fakafāmili ʻi Losi ʻEnisilesi ʻi Kalefōnia.

ʻI hono fakaʻaongaʻi ʻe ʻEletā Kalisitā e ngaahi tefitoʻi moʻoni naʻá ne fakatou ako ʻi he ngaahi meʻa fakapalofesinale mo fakatāutahá, ʻokú ne pehē ai, “Ko ha meʻa lelei hono ngāueʻaki ʻo e laó ki hono mapuleʻi kitá ke te ako ai ke vakavakaiʻi fakalelei ʻa e tefito ʻo ha palopalema, ʻiloʻi ke ʻoua naʻá te fai pē ʻe kita ʻete fakaʻuhingaʻi ʻo ha meʻa pea mahino kiate koe ʻe fie maʻu ke maʻu mai kotoa e ngaahi foʻi moʻoní ki muʻa peá te fai ha fili. Ko e meʻa tatau pē, ʻoku ou tui ʻoku ʻamanaki mai ʻa e ʻEikí ke ke fai hoʻo konga ʻaʻaú ʻi hoʻo feinga ko ia ke maʻu ha fakahā fakafoʻutuituí.”

Naʻe fetaulaki ʻa ʻEletā Kalisitā mo hono uaifi ko Kefilina Luʻisa Sapolití lolotonga ʻena ako ʻi BYU peá na mali ʻi he Temipale Losi ʻEnisilesi Kalefōniá ʻi he ʻaho 20 ʻo Tīsema, 1968. ʻOku ʻi ai ʻena fānau ʻe toko ono.