ʻEletā Lawrence E. Corbridge

ʻO e Kau Fitungofulú

ʻOku fakahā ʻe ʻEletā Louleni ʻEtuate Kopilisi ʻa ʻene fakafalala ki he ʻEikí.

ʻOkú ne pehē, “Ko Kalaisi pē ʻa hotau ʻamanaki leleiʻangá pea mo ʻetau ʻamanaki lelei hono kotoa pē pea mo e founga ʻe taha pē ʻe lava ke tau fakahoko ai kotoa ʻa ia kuó Ne kole mai ke tau faí. ʻE lava ke tau falala kakato te Ne tokoniʻi kitautolu ke tau lavaʻi ia.”

Kuo maʻu ʻe ʻEletā Kopilisi ʻa e fakamoʻoni ko ʻení mei he ngaahi taʻu lahi ʻo ʻene ngāue ʻi he Siasí, kau ai ʻene hoko ko ha pīsope, aleaʻanga māʻolunga, palesiteni fakasiteiki mo e palesiteni ʻo e Misiona Sile Sanitiako Noaté mei he 2002 ki he 2005.

Naʻe fāʻeleʻi ʻa ʻEletā Kopilisi ʻi he ʻaho 6 ʻo ʻEpeleli 1949, kia ʻAiveni Kopilisi mo ʻAkanesi Hau Kopilisi, pea naʻá ne tupu hake ʻi Polovo ʻi ʻIutā, USA. Naʻá ne ngāue fakafaifekau taimi kakato ʻi he Misiona ʻĀsenitina Noaté mei he 1968 ki he 1970.

Hili ha taʻu ʻe fā naʻe maʻu hono mataʻitohi ʻi he pisinisí mo hono mataʻitohi toketā lao mei he ʻUnivēsiti Pilikihami ʻIongí. ʻI heʻene ʻosi mei he akó, naʻá ne kamata ngāue fakalao, pea ʻi he taimi naʻe maʻu ai hono uiuiʻi ki he Kōlomu ʻUluaki ʻo e Kau Fitugofulú, ko ha tokotaha maʻu ʻinasi ia pea mo ha fakafofonga lao ʻi ha kautaha lao ʻi Sōleki Siti.

Naʻá ne mali mo Sekilini Samo ʻi he Temipale Polovo ʻIutaá ʻi he ʻaho 21 ʻo Tīsema, 1974. ʻI he kei talavou ʻa ʻEletā Kopilisí, naʻá ne ngāue ai ʻi he ngaahi faama pulu ʻi ʻAitahō mo ʻIutā he taimi tutuku ʻa e akó, ʻo ne ako ai ke ne manako he moʻui ʻi tuʻá, ʻa ia naʻá na fakatou tatau ai mo hono uaifí mo ʻena fānau tangata ʻe toko nimá ʻi heʻenau fai e ngaahi ʻekitivitī kehekehe, kau ai ʻa e kaka he ʻū pāmaká, heka vaka ʻi he vaitafé, sikií, mo e fakapaheke he sinoú.

ʻOkú ne pehē, “ ʻOku kau ʻi he ngaahi meʻa ʻoku mahuʻinga moʻoni ʻi he moʻuí ʻa e ʻiló, tōʻonga moʻuí mo e ngaahi fetuʻutakí, kae tautautefito ʻi he fāmilí.” Ko e meʻa ʻe taha “ke manatuʻi maʻu pē ʻa Kalaisi.”

ʻOku hoko atu e fakamatala ʻa ʻEletā Kopilisí: “ ʻOku tau fuakava ke fai ʻeni ʻi he uike kotoa pē ʻi he taimi ʻoku tau toʻo ai e sākalamēnití. ʻOku ʻikai ke lava ʻo fai ʻeni he taimi ʻe niʻihi. Ka ʻoku folofola mai e ʻEikí ke tau hanga kiate Ia ʻi he fakakaukau kotoa pē. Ko ia, tatau ai pē pe ʻoku tau ngāue ke tauhi ha fāmili, pe ko ha faʻē mo ha tokotaha tauhiʻapi kita, pe ʻokú te tokoto ʻi falemahaki pea toe ʻa e māhina pē ʻe ono ke te moʻui ai, ʻoku kei hoko pē ʻeni ko ha tukupā mahuʻinga—ke tau manatuʻi Ia pea fai e meʻa naʻá Ne mei faí.”