ʻEletā L. Whitney Clayton
ʻO e Kau Palesitenisī ʻo e Kau Fitungofulú
ʻOku pehē ʻe ʻEletā Linitoni Uitenī Keleitoni naʻe ʻi ai ha ongo meʻa mahuʻinga ʻe ua ʻi heʻene moʻuí, fakataha mo ʻene tupu hake ʻi ha ʻapi naʻe ʻi ai e ʻofá, naʻe tokoni lahi ki heʻene moʻuí. Ko e tahá ʻa ʻene ngāue fakafaifekau ʻi Peluú. Ko hono uá ko ʻene mali mo hono uaifi ko Kefi ʻAna Kipí ʻi he ʻaho 3 ʻo ʻAokosi 1973, ʻi he Temipale Sōlekí. ʻOku ʻi ai ʻena fānau ʻe toko fitu.
ʻOku pehē ʻe ʻEletā Keleitoni, “ ʻOku fakakataʻaki ʻe heʻema fānaú ʻenau pehē ʻoku faʻa hoko e taimi ʻoku nau ʻi ʻapi ai mo e Tangataʻeikí pea mo e Fineʻeikí ko ha faeasaiti fakafāmili. Pea ʻoku meimei tonu pē fakamatala ia ko iá.” ʻOku manako e fāmili Keleitoní ke nau nofo hifo ʻo talanoa ki ha ngaahi kaveinga kehekehe, pea ʻoku nau manako foki he hiva fakatahá.
Naʻe fāʻeleʻi ʻa ʻEletā Keleitoni ʻi Sōleki Siti, ʻi ʻIutā, USA, ʻi he ʻaho 24 ʻo Fēpueli, 1950, kia L. Uitení Keleitoni ko e Siʻí mo ʻIlisapesi Tatisitouni Keleitoni. Naʻá ne tupu hake ʻi Uitiā ʻi Kalefōnia, USA, maʻu hono mataʻitohi BA ʻi he meʻa fakapaʻanga mei he ʻUnivēsiti ʻo ʻIutaá mo e mataʻitohi ʻi he laó mei he ʻUnivēsiti ʻo e Pasifikí ʻi Kalefōnia.
Naʻe uiuiʻi ia ʻi he 1970 ke ngāue ʻi he Misiona ʻEnitesí ʻi Pelū. Ko e feituʻu ʻeni naʻá ne ako ai ke ne manako ʻi hono ako ʻo e folofolá. ʻOkú ne pehē, “Ko e taha ʻo e ngaahi meʻa fakafiefia taha ʻi heʻeku moʻuí ko e houa fakalongolongo ko ia ʻe taha ʻoku ou ako ai e folofola ʻi he ʻaho takitaha. ʻOku ou maʻu ai ha fiemālie mo ha melino ʻoku lahi pea mo ha fakahinohino foki.”
Kuo hoko ʻa ʻEletā Keleitoni ko ha palesiteni fakakolo, pīsope, tokoni ki ha palesiteni fakamisiona, mo ha Fitungofulu Fakaʻēlia. ʻOkú ne pehē “ko ha tāpuaki lahi ia” ʻene hoko ko ha pīsope ʻi ha uooti lea faka-Sipeini ʻi Sanitā ʻAna ʻi Kalefōniá. “Naʻe lahi ange ai ʻeku malava ke mamata ki he fiefia ʻoku maʻu ʻe kinautolu ko ia ʻoku tauhi e ngaahi fekaú.”
Naʻá ne ʻiloʻi ʻa e moʻoni ko ia ʻoku tatau pē ʻeni ʻi heʻene ngaahi fononga holo ko e mēmipa ʻo e ʻUluaki Kōlomu ʻo e Kau Fitungofulú. ʻOkú ne pehē, “Tatau ai pē pe ko e fē feituʻu ʻoku nofo ai e kakaí ʻi he māmaní, ʻe tāpuakiʻi kinautolu ʻe he ʻEikí ʻo kapau te nau tauhi e ngaahi fekaú. ʻE ʻiloʻi ʻe kinautolu ʻoku falala kiate Iá te Ne fakakoloaʻi ʻenau moʻuí ʻi he tafaʻaki kotoa pē.”