ʻEletā Kevin W. Pearson

ʻO e Kau Fitungofulú

ʻOku tui ʻa ʻEletā Kēvini Ueini Piasoni kapau ʻe mahino moʻoni e tefitoʻi moʻoni ʻo e tuí kiate kitautolu, ʻe lava ke fakahoko ʻe he ʻEikí ha ngaahi meʻa fakaofo ʻi heʻetau moʻuí.

ʻOkú ne pehē, “Ne u tupu hake mo ʻeku fakakaukau kapau te u poto, mālohi, vave pea ngāue mālohi feʻunga, ʻe lava ke u mapuleʻi ha faʻahinga tūkunga pē. Ko hono moʻoní, he ʻikai ke tau lava ke mapuleʻi ʻa e ngaahi tūkunga kotoa pē ʻe ʻi ai ʻetau moʻuí. Kuo pau ke tau falala ki he ʻEikí pea tau ako ke tui kiate Ia ʻe lelei e meʻa hono kotoa. ʻI hoʻo fai iá, ʻe tuku ʻe he ʻEikí ke ke malava ʻa e meʻa kotoa pē.”

ʻI he hoko ʻa ʻEletā Piasoni ko e palesiteni fakamisioná, naʻá ne faʻa akoʻi ki heʻene kau faifekaú ʻa e ngaahi tukupā ʻe nima ʻe lava ke ne ikunaʻi pe fakavaivaiʻi ʻa e tuí ʻo kapau ʻe ʻikai hokohoko atu honau fakamālohiá. ʻOkú ne pehē, “Kuo pau ke mou siʻaki ʻa e fakaveiveiuá, taʻetokangá, talangataʻá, loto-foʻí, mo e fakatamulú kae lava ke ngāue hoʻomou tuí.”

Naʻe fāʻeleʻi ʻa ʻEletā Piasoni ʻi Sōleki Siti, ʻi ʻIutā, USA, ʻi he ʻaho 10 ʻo ʻEpeleli, 1957, kia Ueini F. Piasoni mo Veleta Leipaloma Piasoni. Naʻá ne maʻu ki mui hono mataʻitohi ʻi he meʻa fakapaʻangá mei he ʻUnivēsiti ʻo ʻIutaá mo hono MA ʻi he puleʻi ʻo e ngaahi meʻa fakapisinisí mei he ʻUnivēsiti Hāvatí. Ki muʻa pea uiuiʻi ia ke ne hoko ko e palesiteni fakamisioná, naʻá ne hoko ko e CEO ʻo ha kautaha naʻa nau tufaki e fakamatala fekauʻaki mo e moʻui leleí.

ʻI he taimi naʻe uiuiʻi ai ʻa ʻEletā Piesoni ki he Kōlomu ʻUluaki ʻo e Kau Fitungofulú, naʻá ne lolotonga hoko ko e palesiteni ʻo e Misiona Takoma Uasingatoní. Naʻe mahuʻinga ʻaupito hono ngaahi uiuiʻi faka-Siasi ki muʻá ʻi hono teuteuʻi ia ki hono uiuiʻi he ʻaho ní. Naʻá ne hoko ko ha faifekau taimi kakato ʻi Finilani, palesiteni ʻo e Kau Talavou ʻi he uōtí, palesiteni ʻo e kōlomu ʻo e kaumātuʻá, aleaʻanga māʻolunga mo ha pīsope. Naʻe mali ʻa ʻEletā Piasoni mo Sune Lenisilani ʻi he ʻaho 24 ʻo Sune, 1980, ʻi he Temipale Sōlekí. ʻOku ʻi ai ʻena fānau ʻe toko ono.