ʻEletā F. Michael Watson

ʻO e Kau Fitungofulú

Kuo hanga ʻe he taʻu ʻe tolungofulu mā valu ʻo e ngāue fakaʻaho ʻa ʻEletā Falangikē Maikolo Uatesoni ʻo e Kōlomu ʻUluaki ʻo e Kau Fitugofulú mo e kau ʻaposetoló pea mo e kau palōfitá ʻo fakamālohia ʻene fakamoʻoní.

Naʻe hoko ʻa ʻEletā Uatesoni ko e tokoni sekelitali, pea hoko ko e sekelitali, ki he Kōlomu ʻo e Kau ʻAposetolo ʻe Toko Hongofulu Mā Ua mei he 1970 ki he 1972. Naʻe kamata ʻi he 1972 ʻa ʻene hoko ko e tokoni sekelitali ki he Kau Palesitenisī ʻUluakí pea talu mei he 1986 mo ʻene hoko ko e sekelitali ki he Kau Palesitenisī ʻUluakí.

ʻOkú ne pehē, “Kuo hanga ʻe he meʻa ne u mamata tonu ai ʻi heʻeku fengāueʻaki fakaʻaho mo kinautolu ʻi he ngaahi taʻu kuo hilí ʻo ʻai ke toe lahi ange ʻeku fakamoʻoní. ʻOku ʻikai ha toe veiveiua ʻi hoku ʻatamaí ʻoku moʻui ʻa e ʻOtuá, ko Sīsū ʻa e Kalaisí pea ko hai pē kuó Ne uiuiʻí ʻoku hoko ia ko ʻEne palōfita ʻi he taimi ko iá.”

Naʻe fāʻeleʻi ʻa ʻEletā Uatesoni ʻi he ʻaho 9 ʻo Māʻasi, 1943, ʻi Sipilingi Siti ʻi ʻIutā, USA, kia Falangikē C mo Siniele Pekisitā Uatesoni. Naʻá ne ngāue fakafaifekau taimi kakato ʻi he Misiona Tokelau-Hahake ʻo Pilitāniá mei he 1962 ki he 1964, hoko ai mo ʻene ngāue fakakautau mei he 1966 ki he 1969, pea ko e taʻu ʻe taha ai naʻá ne ngāue ai ʻi he Lepupelika ʻo Vietinemi Tongá. Naʻe maʻu hono mataʻitohi BA mei he ʻUnivēsiti ʻo e Siteiti ʻo ʻIutaá.

Naʻá ne mali mo Soilini Meeni ʻi he ʻaho 3 ʻo Sepitema, 1965, ʻi he Temipale Sōlekí. ʻOku ʻi ai ʻena fānau ʻe toko 12. Naʻá ne hoko ko e palesiteni ʻo e kōlomu ʻo e kaumātuʻá, palesiteni ʻo e ngāue fakafaifekaú he siteikí, pīsope, palesiteni fakasiteiki mo e fai-sila ʻi he Temipale Paunitifulu ʻIutaá.

ʻOkú ne pehē, “Kuó u feohi mo e Kau Taki Māʻolungá ʻi he ngaahi taʻu kotoa ko ʻení, ka ko e meʻa fakatupu loto fakatōkilalo ʻa ʻete ʻi honau lotolotongá.” Hili e ngāue fakataha ʻa ʻEletā Uatesoni mo kinautolu ʻi he fuʻu taimi lōloa ko ʻení, ʻokú ne ongoʻi ʻa e faingamālie ke ne ʻi ha tuʻunga ai ke fakamālohia e fakamoʻoni ʻa e niʻihi kehé ki he kau palōfitá mo e kau ʻaposetoló pea mo e misiona ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.