ʻEletā Gary E. Stevenson
ʻO e Kau Fitungofulú
ʻOku fakamālō ʻa ʻEletā Keuli ʻĒveni Sitīvenisoni ʻi hono uiuiʻi ke ngāue ʻi he Kōlomu ʻUluaki ʻo e Kau Fitungofulú hili ia ha meʻa naʻá ne pehē naʻe fakamanavahē ʻo ʻikai mei lava ke ne tuʻu hake.
ʻOku pehē ʻe ʻEletā Sitīvenisoni, “Ko ʻeku ngaahi ʻuluaki fakakaukau pē hili ʻeku maʻu e uiuiʻí, ʻa ʻeku ongoʻi taʻefeʻunga, ka ʻi he taimi tatau pē, ne u ongoʻi ko hoku fatongia ke fai. ʻOku tau faʻa fanongo foki ki he pehē ʻe fakafeʻungaʻi ʻe he ʻEikí ʻa kinautolu ʻokú Ne uiuiʻí, pea te Ne fai ia maʻaku.”
Naʻe fāʻeleʻi ʻa ʻEletā Sitīvenisoni ʻi he ʻaho 6 ʻo ʻAokosi, 1955, ʻi ʻOkiteni ʻi ʻIutā, USA, kia ʻĒveni Sitīvenisoni mo Sini Sitīvenisoni. Naʻá ne ako ʻi he ʻUnivēsiti ʻo e Siteiki ʻIutaá, ʻo ne ʻosi ai mei he akó ʻi he tafaʻaki ki hono puleʻi ha pisinisi pea fetaulaki foki ai mo hono uaifí, ʻa Lisa Sini Hikilī. Naʻá na mali ʻi he ʻaho 20 ʻo ʻEpeleli, 1979, ʻi he Temipale ʻAitahō Foló pea ʻoku ʻi ai ʻena fānau tangata ʻe toko fā.
Kuo ngāue fakataha ʻa ʻEletā mo Sisitā Sitīvenisoni ʻo na fokotuʻu ha sīpinga ʻo e ngāue tokoní ʻi heʻena moʻuí pea ʻokú na tui mālohi ʻoku maʻu ʻa e fiefiá ʻi he tokoni ki he niʻihi kehé. ʻOku pehē ʻe ʻEletā Sitīvenisoni, “ ʻI hoʻo tauhi ki he niʻihi kehé, ʻokú ke ʻi he tauhi ai pē ki he ʻEikí. ʻOku fakafonu ʻe he foʻi fakakaukau ko iá ʻa ʻetau moʻuí pea lava ai ke tau ngaohi ke fiefia ʻa e kakai kehé mo kitautolu foki.”
Naʻá na fakatou faiako Lautohi Faka-Sāpate kimuí ni pē ʻi honau uooti ʻi Poloviteni ʻi ʻIutā, USA. Naʻe hoko foki ʻa ʻEletā Sitīvenisoni ko e palesiteni ʻo e Misiona Nakoia Siapaní, kau atu ki ai mo ʻene ngāue fakafaifekau ʻi he feituʻu faka-tonga ʻo Siapaní, hoko ko ha pīsope pea kau ki ha kau palesitenisī fakasiteiki.
ʻI he tupu hake ʻa ʻEletā Sitīvenisoni ʻi ha ʻapi naʻe uhoʻaki ʻa e ongoongoleleí, ʻokú ne fakahīkihikiʻi ʻene ongomātuʻá ko ʻena akoʻi kei siʻi ia fekauʻaki mo e ngāue mālohí. ʻI he hoko ʻa ʻEletā Sitīvenisoni ko e palesiteni ʻo ha kautaha fāʻu nāunau ki he moʻui lelei ʻa e sinó ʻa ia naʻá ne tokoni ki hono fokotuʻu ʻi heʻene ʻosi pē mei he kolisí, ʻokú ne tui ko e ngāue mālohí ko ha tefitoʻi moʻoni ia ʻoku ʻaonga ʻi he tafaʻaki kotoa pē ʻo e moʻuí.
ʻOkú ne pehē, “ ʻOku ʻaonga e ngāue mālohí ʻi heʻetau ngaahi ngāue maʻuʻanga moʻuí mo hotau ngaahi uiuiʻi faka-Siasí, pea ʻoku ʻaonga lahi foki ʻi he ngāue fakafaifekaú. Mahalo he ʻikai ke tau malava ha ngaahi meʻa ʻe makehe ange, ka ʻe lava ke ngāue mālohi ʻa e tokotaha kotoa pē ke ne lavaʻi ha ngaahi meʻa lalahi.”