ʻEletā Gérald Caussé

ʻO e Kau Fitungofulú

ʻOku ʻofa ʻa ʻEletā Siale Kosei ʻi he kakaí. ʻOkú ne pehē, “Ne u feʻiloaki mo ha kakai tokolahi mei he ngaahi tapa kotoa ʻo māmani ʻi he taimi ne u hoko ai ko e palesiteni fakasiteiki ʻi Pālesi, ʻi Falaniseé. ʻI heʻeku ngāue maʻanautolú, ne u ʻiloʻi ai ʻoku tau loto taha pē pea tau taha ʻi he fakamoʻoni, ʻi he ongoongoleleí.”

ʻI he taimi naʻe uiuiʻi ai ʻa ʻEletā Kosei ki he ʻUluaki Kōlomu ʻo e Kau Fitungofulú, naʻá ne lolotonga hoko ko e Fitungofulu Fakaʻēlia ʻi he ʻĒlia ʻIulope Hihifó, pea naʻá ne hoko foki ko e mēmipa ʻo ha kau pīsopeliki, ko e kulupu lita ʻo e kau taulaʻeiki lahí, mo e tokoni ʻi ha kau palesitenisī fakasiteiki.

Naʻe fāʻeleʻi ia ʻi Pōtou ʻi Falanisē ʻi he ʻaho 20 ʻo Mē, 1963, kia Soni Kosei mo Malie-Palani Pōneti Kosei, pea naʻá ne hiki ki Pālesi ʻi hono taʻu 19. Naʻá ne ngāue fakakautau ai ʻi ha taʻu ʻe taha ʻi ha Kautaha Fakafofonga ʻo e NATÓ. Naʻá na kamata kaungāmeʻa mo Valelī Papini ʻi heʻena ʻi he uooti tatau ʻi Pālesí. Naʻá na fakatou haʻu mei ha ongo fāmili Siasi faivelenga, peá na maheni talu ʻena tupu hake. Naʻe silaʻi kinaua ʻi he ʻaho 5 ʻo ʻAokosi, 1986, ʻi he Temipale Peeni Suisalaní, pea ʻoku ʻi ai ʻena fānau ʻe toko nima.

Kuo fuoloa e ngāue ʻa ʻEletā Kosei ʻi he ngaahi tafaʻaki fekauʻaki mo e meʻakaí, maʻu hono MA ʻi he 1987 mei he ESSEC, ko ha ʻapiako fakapisinisi ʻeni ʻi Pālesi. ʻI he taimi ne fai ai e uiuiʻi ko ʻení kiate iá, naʻá ne hoko ko e talēkita pule pea kau ʻi he poate ʻo ha kautaha naʻa ngāue ki hono tufaki ʻo e meʻatokoní ki he ngaahi kautaha mo e ngaahi falekoloa kehe.

Naʻe kamata e manako ʻa ʻEletā Kosei ʻi he mūsiká ʻi he taimi naʻá ne kamata ako tā piano ai ʻi hono taʻu fitú. ʻI he ʻaho ní, ʻoku ongona e leʻo ʻo e ngaahi meʻalea ʻi he ʻapi ʻo e fāmili Koseí, pea ʻoku tā e pianó, vaiolingí, pe seló ʻe he mēmipa kotoa ʻo e fāmilí.

ʻOku pehē ʻe ʻEletā Kosei, “ʻI he taimi naʻe fili ai ʻe Sīsū ʻEne kau ʻAposetoló, ko honau tokolahi ko ha kau tangata toutai, pea naʻa nau tuku honau kupenga he taimi pē ko ia ka nau muimui ʻiate Ia. ʻOku ou mamata ki he ngāue ʻa e Siasí ʻi he founga tatau pē he ʻahó ni. ʻOku ou ongoʻi ko hoku uiuiʻí ʻoku mei he ʻEikí ia ʻo fakafou mai ʻi Heʻene palōfitá, ʻa Palesiteni Tōmasi S. Monisoni. Te u muimui foki mo au ʻi he Fakamoʻuí.”