Mary N. Cook

Tokoni ʻUluaki ʻi he Kau Palesitenisī Lahi ʻo e Kau Finemuí

ʻI hono lau fakataha ʻe Mele Nilasoni Kuki, ko e tokoni ʻuluaki ʻi he kau palesitenisī ʻuluaki ʻo e Kau Finemuí, mo e kau finemui ʻi māmani kātoá e kaveinga ʻa e Kau Finemuí, ʻokú ne houngaʻia ʻi heʻene ʻiloʻi ko ha ʻofefine ia ʻo e ʻOtuá.

ʻOku pehē ʻe Sisitā Kuki, “Naʻe mālōlō ʻeku tangataʻeikí ʻi Nōvema ʻo e 2007, pea ʻoku ou tui naʻe fiemālie pē ʻa e ʻEikí ke Ne tokoniʻi au lolotonga e taimi faingataʻa ko ʻení. ʻOku tau akoʻi ki heʻetau kau finemuí ko ha ngaahi ʻofefine kotoa kitautolu ʻo e ʻOtuá; naʻe fakamoʻoniʻi ʻe he meʻa toputapu ko ʻeni naʻe hokó ʻokú Ne ʻafioʻi peá Ne ʻofa ʻiate au fakafoʻituitui.”

Naʻe fāʻeleʻi ʻa Sisitā Kuki ʻi he ʻaho 8 ʻo Sune, 1951, kia Keneti Nilasoni mo Feeni Suoni Nilasoni, peá ne tupu hake ʻi Mitiveili ʻi ʻIutā, USA, pea ʻokú ne ʻoatu e ngaahi meʻa kuó ne aʻusiá ko ha faʻifaʻitakiʻanga ki he kau finemui ʻoku nau fehangahangai mo ha ngaahi taimi taʻepau ʻi heʻenau moʻuí.

ʻOku pehē ʻe Sisitā Kuki, “Ne u toki mali pē ʻi hoku taʻu 37, pea ʻoku ou ʻiloʻi e ngaahi hohaʻa mo e ngaahi tailiili lahi ʻoku fehangahangai mo e kakai fefiné. Kuo pau ke ke maʻu ʻa e tuí mo e lototoʻa ke ke kei laka atu ki muʻa neongo ʻa e ongoʻi taʻepauʻiá.”

Naʻá ne mali mo Lisiate E. Kuki ʻi he ʻaho 16 ʻo Siulai, 1988, ʻi he Temipale Sōlekí pea ʻokú ne hoko he taimí ni ko ha faʻē tauhi ki ha fānau ʻe toko 4 pea ko ha kui tauhi ki ha makapuna ʻe toko 17.

Naʻe maʻu ʻe Sisitā Kuki hono BA mo e MA ʻi he ako ki he leá mo e fanongó (speech pathology mo e audiology) mo e mataʻitohi ko e Eds (ako makehé) mei he ʻUnivēsiti Pilikihami ʻIongí. ʻOkú ne pehē, “Kuo teuteuʻi lelei ai au keu hoko ko ha faʻē pea ke u ngāue ʻi he Siasí.”

Naʻe ngāue fakafaifekau taimi kakato ʻa Sisitā Kuki ʻi Mongikōlia mo hono husepāntí, ʻa ia ʻokú ne ui ko hono kaungāmeʻa lelei tahá. Naʻá ne hoko ki muʻa ko e tokoni ua ʻi he kau palesitenisī lahi ʻo e Kau Finemuí pea ngāue ʻi he poate lahi ʻo e Kau Finemuí.

ʻOku tui ʻa Sisitā Kuki ʻoku mahuʻinga ke fai ha tokanga ki he fakafoʻituituí. ʻOku pehē ʻe Sisitā Kuki, “ ʻOku mau loto ke hoko ʻa e finemui takitaha ko ha fakamoʻoni ʻo Kalaisi. ʻOku ʻikai ko ha lea ʻataʻatā pē ia. ʻOku fie maʻu ke tau tokoni ke ne maʻu ʻa e loto mo e falala ke ne hoko ko ha ʻofefine angatonu ʻo e ʻOtuá.”