ʻEletā Rafael E. Pino
ʻO e Kau Fitungofulú
Kia ʻEletā Lafaele ʻEtuato Pinó, ko e mālohinga ʻo ʻene fakamoʻoní pea mo e mālohi ʻo ʻene tui pau ko Sīsū ʻa e Kalaisí, ko e ola ia ʻo ha ongo meʻa naʻe hoko. Ko e taha ʻo e ongo meʻá ni ʻa e fuofua taimi naʻá ne lau ai e Tohi ʻa Molomoná ʻi hono taʻu 17.
ʻOkú ne pehē, “Naʻe kole mai e ongo faifekaú ke u lau pē ha fanga kiʻi vahe, ka naʻe ʻikai te u lava ʻo taʻofi ʻeku lau iá. Ne u toʻo holo ia he feituʻu kotoa pē ne u ʻalu aí. ʻI he taimi kotoa pē ne u lau ai ia, ne u maʻu ʻa e ngaahi ongo tatau ʻo e fiefia mo e nonga. ʻOku ou fakamoʻoni ʻoku ʻaonga e founga ko ia ne fokotuʻu ʻe he ʻOtuá ke fakamoʻoniʻi ʻaki ʻa hono moʻoni ʻo e Tohi ʻa Molomoná, ʻo hangē ko hono talamai ʻi he Molonai vahe 10. Naʻá ku maʻu ha fakamoʻoni ki hono moʻoni ʻo e Tohi ʻa Molomona ʻi he mālohi ʻo e Laumālie Māʻoniʻoní.”
Ko e meʻa mahuʻinga hono ua kia ʻEletā Pinó ko ʻene ngāue fakafaifekau taimi kakato ʻi he Misiona Malakaipo Venesuelá. Neongo ne ngāue ʻa ʻEletā Pino ʻi ha ngaahi uiuiʻi faka-Siasi kehekehe ki muʻa pea toki hikinimaʻi ia ki he Kōlomu ʻUluaki ʻo e Kau Fitungofulú, kau ai ʻene hoko ko ha pīsope, aleaʻanga māʻolunga, palesiteni fakasiteiki, palesiteni fakamisiona, mo e Fitungofulu Fakaʻēliá, ka ʻokú ne fai vave ke fakamamafaʻi ʻa hono mahuʻinga ʻo ʻene ngāue fakafaifekaú. ʻOkú ne pehē, “ʻOku tokoni ʻa e uiuiʻi takitaha ki hono teuteuʻi koe ki hoʻo ngāue ʻi he kahaʻú, ka ko e ngaahi meʻa ʻoku mahuʻinga taha kiate aú naʻe kamata ia ʻi he malaʻe ʻo e ngāue fakafaifekaú. ʻOku ou kei maʻu pē ʻa e ngaahi tāpuaki ʻo ʻeku ngāue fakafaifekau taimi kakató.”
Naʻe fāʻeleʻi ʻa ʻEletā Pino ʻi Valenisia, ʻi Venesuela, ʻi he ʻaho 27 ʻo ʻOkatopa, 1955, kia ʻAtulo Pino mo Sosefina Kimenesi ti Pino. Naʻá ne maʻu ha tohi fakamoʻoni ki he ngāue fakapulé ʻi Kalakasa, ʻi Venesuela. Kuo ngāue ʻa ʻEletā Pino ki he Siasí ʻi ha ngaahi fatongia kehekehe talu mei he 1980. Naʻá na sila mo hono uaifi ko Petulisa Mōnika Vila Tesilaá ʻi he Temipale Uasingatoni D.C. ʻi he ʻaho 31 ʻo Māʻasi, 1981. ʻOku ʻi ai ʻena fānau ʻe toko tolu.