ʻEletā James J. Hamula

ʻO e Kau Fitungofulú

ʻOku pehē ʻe ʻEletā Sēmisi Siosefa Hamula, “Kapau ʻe ʻi ai ha meʻa te ne fakafeʻungaʻi au ki he uiuiʻí ni, ko e fakamoʻoni ia ne u maʻu ʻi hoku taʻu 18 lolotonga ʻeku teuteu ki he ngāue fakafaifekaú. Ne u aʻusia ha meʻa fakaofo moʻoni ʻo u maʻu ai ha fakamoʻoni mālohi ki hono faka-ʻOtua ʻo e ʻEikí mo Hono Siasí.”

Naʻe fāʻeleʻi ʻa ʻEletā Hamula ʻi he ʻaho 20 ʻo Nōvema, 1957, ʻi Longo Piisi ʻi Kalefōnia, USA, kia Siosefa mo Siosi Hamula, pea ʻokú ne manatuʻi ʻene lau e fakamatala kau ki he ʻUluaki Mata-Meʻa-Hā-Maí. Naʻá ne lau kau ki he fie ʻilo ʻa e talavou ko Siosefa Sāmitá ki he meʻa naʻe totonú, peá ne ongoʻi ke ne lotu ki he ʻEikí. “Ko ia ne u tūʻulutui ʻi hoku veʻe mohengá ʻo lotu fakamātoato ki he langí. Pea ne u maʻu ha tali ʻa ia naʻe mahino pea pau ange ʻi ha toe meʻa kuó u aʻusia ʻi he moʻuí ni. Ne u tuʻu hake mo ʻeku ʻiloʻi naʻe moʻoni e Siasí.”

Hili e ngāue fakafaifekau ʻa ʻEletā Hamula ʻi he Misiona Siamane Miunikí, naʻá ne ʻosi mei he ʻUnivēsiti Pilikihami ʻIongí mo hono mataʻitohi ʻi he saienisi fakapolitikalé mo e filosofiá. Hili iá naʻe maʻu hono MA ʻi he filosofia fakapolitikalé mo hono toketā laó mei he BYU pē. ʻI he taimi ne uiuiʻi ai ia ki he Kōlomu ʻUluaki ʻo e Kau Fitungofulú, naʻá ne lolotonga ngāue ko ha fakafofonga lao ʻi Mesa ʻi ʻAlesona, USA.

Naʻe fetaulaki ʻa ʻEletā Hamula mo hono uaifi ko Siosi ʻEnitasoní ʻi ʻAlesona. Naʻá na mali ʻi he Temipale Mesa ʻAlesona ʻi he ʻaho 27 ʻo ʻEpeleli, 1984, pea ʻoku ʻi ai ʻena fānau ʻe toko ono. Naʻe fāʻeleʻi ʻena ongo māhanga tangata iiki tahá lolotonga e palesiteni ʻa ʻEletā Hamula ʻi he Misiona Uasingatoni D.C. Sauté.

Naʻe hoko foki ʻa ʻEletā Hamula ko ha pīsope, palesiteni fakasiteiki mo e Fitungofulu Fakaʻēlia. ʻOkú ne pehē, “Ko e ngaahi meʻa kotoa kuó u aʻusia ʻi he Siasí, ko hano fakaleleiʻi pē ia ʻo e meʻa ko ia ne u aʻusia ʻi heʻeku teuteu ʻi hoku taʻu 18 ki heʻeku ngāue fakafaifekaú. Naʻe makatuʻunga ai ʻa e meʻa hono kotoa.”