O Se Toe Foi i le Amio Lelei
O le taimi lenei mo i tatou taitoatasi e tutulai ai ma tatala se tagavai i le lalolagi ma valaau atu mo se toe foi i le amio lelei.
O le konafesi aoao na tea nei, na valaauina ai au e Peresitene Monson e avea ma peresitene aoao fou o Tamaitai Talavou. A o ou i ai iina faatasi ma se perofeta a le Atua ma tuuina mai ai lenei tiute paia, sa ou tautino ai o le a ou auauna atu ma lou loto atoa, mafaufau atoa, manatu atoa ma le malosi atoa. E muamua atu i le valaauga lenei, sa i ai sa’u ipu laitiiti na tusia ai se anavatau na faitauina, “E mafai ona ou faia mea faigata.” O lena ipu laitiiti o loo i ai lena anavatau faatauvaa na tuuina mai ia te au le lototele. Ae o nei, a na mafai ona ou suia lena anavatau, o le a faitauina: “O le malosi o le Alii, ou te mafaia ai mea uma.”1 O le malosi lena o loo ou faalagolago i ai i le aso a o ou tulai atu i lenei tulaga mamalu.
O Aperila na tea nei, i le lua o aso talu ona maea le konafesi aoao, sa fai ai la matou uluai fonotaga o se au peresitene fou ua lagolagoina. Sa matou sopo ai i le tumutumu o le Ensign Peak, ma a o matou vaavaai ifo i le vanu, sa matou vaai ai i le malumalu ma le agelu o Moronae na iila i le la. Mo i matou taitoatasi, sa manino lava. O le manulauti mo la matou au peresitene o le malumalu. Ma na manino foi lo matou tiutetauave. E tatau ona matou “fesoasoani e saunia tamaitai talavou taitoatasi ina ia agavaa e osia ma tausia feagaiga paia ma auai i sauniga o le malumalu.”2
O le malumalu o le auga lea o mea uma tatou te faia i le Ekalesia.3 O le malumalu o le auga lea na tuua ai e o tatou tuaa paionia o latou fale mautu ma o mai i sisifo. O le mafuaaga lea na latou tigaina ai i le mativa faapea foi ma le oti. O feagaiga o le malumalu o le pogai lea, e ui lava ina sa tanumia pepe i le ala, na mafai ai ona pepese na paionia:
O nisi na aveesea mea uma ae o le mea moni na o mai i le vanu ma mea uma,—o sauniga ia o le malumalu, o feagaiga paia, ma le folafolaga o le ola faavavau faatasi o ni aiga.
E na o le lua aso talu ona taunuu le Au Paia i le Vanu o Sate Leki, ae alu le sopoaga a Polika Iaga ma ana paaga i le Ensign Peak. I luga o lena tumutumu mauga sa latou tatalaina ai se tagavai—o se ie tele faatafafa lanusamasama na nonoa i se tootoo, na faatusaina o se fu’a po o se tagavai mo atunuu.5 Na tatau i le Au Paia ona avea ma malamalama, o le tagavai. O Aperila na tea atu nei, i luga o le Ensign Peak, o i matou e toatolu na tatalaina foi se tagavai na faapea ona matou faia mai se tootoo ma se pulupulu auro nai Peru. O la matou fu’a, la matou tagavai mo atunuu—o la matou fu’a e valaau atu mo se toe foi i le amio lelei.
O le amio lelei o se tulaga manaomia lea e ulu atu ai i malumalu paia o le Alii ma le mauaina o le taitaiga a le Agaga. O le amio lelei “o se mamanu o mafaufauga ma amioga e faavae i tulaga faatonuina lelei ma maualuga.”6 E aofia ai le legavia ma le ola mama. O le amio lelei e amata atu i le loto ma le mafaufau. E faafaileleina i le aiga. O le faaopoopoga o le faitau afe o filifiliga ma amioga laiti. O le amio lelei ua seasea ona tatou faalogoina i le lalolagi i aso nei, ae o le upu autu faaLatina o le virtus o lona uiga o le malosi. O tamaitai ma alii amio lelei ua i ai se mitamitaga faatamalii ma se malosi i totonu. E to’a i latou aua ua agavaa i latou e maua ma taialaina e le Agaga Paia. Ua fautua mai Peresitene Monson, “Ia avea oe ma tagata e faasaoina tusa lava pe e te faia na o oe. Ia ia te oe le lototoa e avea ai o se malamalama mo isi e mulimuli ai. E leai se faigauo e sili atu ona taua nai lo lou lava mafaufau manino, lou lava amio mama—ma e maeu lava se lagona faamamaluina o le iloa, ua e tu i lou tulaga atofaina faatasi ai ma le mautinoa o loo e agavaa e faia.”7
Mata o loo faifaimalie lava ona leai sa tatou tali atu ona e faapea, o tulaga faatonuina lelei ma maualuluga ua le toe taulia ma e le aoga pe taua i le lalolagi i aso nei? E pei ona faamanatu mai nei lava e Elder Hales, o Le’oneti i le Tusi a Mamona sa mautu lona tulaga i luga o le mauga. O ia faapea ma i latou sa ia taitaiina sa “tumau o latou manatu faapea ma se folafolaga naunautai” latou te le o ifo mai le mauga. Sa na o le faafa lava ona taumafai le tagata faa’ole’ole o Amalekia, o ia taimi taitasi na sili atu ona iloga nai lo le muamua, ina ia ioe Le’oneti e “alu ifo i le laulata o le mauga.”8 Ma o le taliaina o folafolaga pepelo a Amalekia, na “avatu lemu ia [Le’oneti] le mea oona”9 seia oo ina oti o ia. Sa le gata i le mea oona, ae na “avatu lemu.” Mata e le o tupu lenei mea i aso nei? Mata e le o muamua ona tatou onosaia, sosoo ai ma le taliaina, ma iu ai ina opogi amioga le lelei o loo siomia ai i tatou?10 Mata e le o faaseseina i tatou i tagata autu sese ma savali faatauanau a ala o faasalalauga lea e mafua ai ona galo ia i tatou o tatou faasinomaga paia? Pe o aumai lemu le mea oona ia i tatou? O le a se mea e sili atu ona taufaasese nai lo le faatosinaina o le autalavou o lenei tupulaga tautupu ia nofonofovale pe ia pisi foi ia le malolo i le omiomi o feau i telefoni feaveai ae leai ma se malamalama i le upu moni o loo i se tusi na tusia mo outou ma o outou vaitaimi e perofeta a le Atua—O Le Tusi a Mamona? O le a se mea e sili atu ona faaseseina nai lo le faatosinaina o tamaitai talavou ma matutua, oe ma au, ina ia faaalu o tatou taimi mo i tatou lava, o tatou foliga, o tatou lavalava, o tatou tino ma o tatou fika, lea e aveesea ai la tatou vaaiga mai o tatou faasinomaga paia ma o tatou tomai e suia le lalolagi e ala i a tatou uunaiga mama? O le a se mea e sili atu ona faaseseina nai lo le faatosinaina o alii—talavou ma matutua, o loo umia le perisitua paia a le Atua—e matamata i ponokarafi faatosina ma faapea ai ona taulai atu i le tino nai lo le faatuatua, ina ia avea ma e faia agasala nai lo o ni leoleo o le amio lelei? O loo faamatalaina i le Tusi a Mamona le tala i alii talavou totoa e 2,000 o lo latou amio lelei ma le mama na latou maua ai le malolosi e puipuia ai feagaiga a o latou matua ma le faatuatuaga a o latou aiga. O lo latou amio lelei ma le tautino ina ia “faamaoni i taimi uma” na suia ai le lalolagi!11
Ou te matua talitonu o se tamaitai po o se alii amio lelei se toatasi, e taitaiina e le Agaga, e mafai ona suia le lalolagi, ae ina ia faia lena mea, e tatau ona tatou toe foi i le amio lelei. E tatau ona tatou faia ni aoaoga faamasani mautu. E pei ona fai mai le momo’e malafoni o Juma Ikangaa ina ua manumalo i le Malafoni a Niu Ioka, “O le manao ia manumalo, e leai se aoga pe a le i ai le manao ia saunia”12 O le taimi lenei e sauniuni ai e ala i le faatinoina o le tele o le loto pulea. O le taimi lenei ia “malosi atili ai mo le malo.”13 O le taimi lenei e faatulaga ai o tatou ala ma ia taulai atu i le tini. O se toe foi i le amio lelei e tatau ona amataina e le tagata lava ia i totonu o o tatou loto ma totonu o o tatou aiga.
O le a se mea e mafai e i tatou taitoatasi ona fai e amata ai ona tatou toe foi i le amio lelei? O le kosi ma le polokalama faamasani o le a tulagaese ia i tatou taitoatasi. Ua ou aumaia lau lava polokalama faamasani mai aoaoga o loo maua i tusitusiga paia: “Ia teuteuina ou manatu i le mama e le aunoa;”14 “Pipii atu i [au] feagaiga;”15 “Tutu … i mea paia;”16 “Tuuese mea [a le] lalolagi;”17 “Ina talitonu ia e ao ina outou salamo;”18 “Manatua pea o Ia ma tausi i ana poloaiga;”19 ma le, “Afai o i ai nisi mea mama, matagofie, logoleleia, ma tauleleia, … saili ia mea uma.”20 O le taimi lenei nai lo se isi lava taimi muamua, ua oo ai i le taimi e tali atu ai i le valaau a Moronae, ia “ala mai ia, ina tulai” ma le ia “fetagofi atu i mea alofa lelei uma, a e aua le papai atu i le mea alofa leaga, po o le mea ua le mama.”21
Lata mai nei, na ou auai atu ai i le faamanuiaina o se pepe fou a lo ma atalii. Sa o se vaaiga paia ia te au a o siosiomia e lou toalua ma o ma atalii, ma le toatele o isi e pele ia i matou, lenei pepe meamea. Sa matagofie o ia i ona laei papae—ma e leai se afaina o le faaigoa o ia i ona tinamatutua e toalua! Ae o le mea na sili ai ona ou lagona le ootia o le faamanuiaga na tuuina atu e lona tama, o lo ma atalii o Zach. Sa ia faamanuiaina Annabel Elaine laitiiti ina ia faapea ona malamalama o ia i lona faasinomaga o se afafine o le Atua, ina ia mulimuli o ia i faataitaiga a lona tina, tinamatutua, ma lona uso, ma ia ona maua le fiafiaga sili pe a ola i se olaga mama ma saunia e osia ma tausia feagaiga paia o le malumalu. I lena vaaiga paia, sa ou tatalo ai ia siomia, faamalolosia ma puipuia e le pule o le perisitua amiotonu ia tamaitai talavou taitoatasi e le gata i le taimi o le fanau mai ma faamanuiaina ae i le olaga atoa.
I le taimi o le potopotoga paia i le konafesi talu ai ina ua fofogaina e Peresitene Uchtdorf mo le lagolagoina o lo tatou perofeta fou ma le Au Peresitene Sili, sa ou vaaia le faapotopotoga atoa a le usoga perisitua ua tutulai. Sa ou lagonaina lo outou malosiaga ma le mana o o outou perisitua. O outou o leoleo o le amio lelei. Ona lofituina lea o au i le ootia ina ua ia saunoa, “E mafai ona tutulai mai tamaitai talavou faamolemole?” Mai lou nofoaga, na ou iloa atu ai lo outou tutulai uma ma tutu faatasi. O aso nei, atonu e leai se isi malosiaga e sili ona malosi mo le lelei i lalolagi. E le tatau ona e ta’u faatauvaaina le mana o au uunaiga amiotonu.
Ou te molimau atu e mafai ona toe foi i le amio lelei ona o le faataitaiga a le Faaola ma le “taua e le iu o Lana taulaga togiola.”22 Ou te molimau atu o le a tatou mafaia ma faamalosi e le gata ia faia mea faigata ae ia faia mea uma. O le taimi lenei mo i tatou taitoatasi e tutulai ai ma tatala se tagavai i le lalolagi ma valaau atu mo se toe foi i le amio lelei. Talosia ia tatou ola ina ia mafai ona avea i tatou ma ni tufugaaao i le sauniaina o le lalolagi mo Lona Afio Mai Faalua, “ina ia foliga i tatou ia te ia pe a faaalia mai o ia, … faamamaina e pei ona mama o ia.”23 I le suafa o Iesu Keriso, amene.