Ona Sa Faitau e Lo’u Tama le Tusi a Mamona

Elder Marcos A. Aidukaitis

O Le Fitugafulu

Ou te valaau atu ia i latou uma o e o lagona mai lo’u leo i le aso, ia faitau i le Tusi a Mamona, ma ia faaaoga folafolaga o i ai. O i latou o le a faia, o le a latou iloa e moni lava le tusi.

Talofa uso e ma tuafafine pele. Ua ou lagonaina lava se olioli tele ma le faamamaluina e lauga atu ia te outou i le aso. Ou te tatalo ina ia tomatauina e le Atua a’u upu ma ia mafutaina foi i tatou e le Agaga ina ia mafai e “le e tala’i atu atoa ma le talia mai [ona] malamalama le tasi i le tasi, ma [mafai ai ona] faamanuiaina ma olioli faatasi i la’ua uma” (MFF 50:22).

Ou te mafaufau i le aso 2 o Iuni, 1940, o se aso taua tele i le talafaasolopito o lo’u aiga. O le aso lea na papatiso ai lo’u tama i lenei Ekalesia.

O Elder Jack McDonald, o se tasi o faifeautalai na papatisoina lo’u tama, na tusi i lona tama, ma faamatala i ai e uiga i lena aso i upu nei:

“O le Aso Sa talu ai o se aso na ese le matagofie. Na matou o o ni faifeautalai i se nofoaga maotua i le auvai o le vaitafe, i le faoa aai, ma o iina na faia ai e Elder Jones ma a’u [Elder McDonald] la maua uluai papatisoga. Na alu ifo Antony Aidukaitis i le vai malulu ma avea ai o ia ma se tagata o le Ekalesia… . Na lelei mea uma. Na matuai lanumoana le lagi, sa matuai filemu ma lanulauava laufanua maotua, sa matua manaia lava ma sa leai se tasi o i matou e lei lagonaina le i ai o se uunaiga tele.

“[A o matou savavali mai] ma lo matou uso fou, fai mai a ia, e le mafai ona ia faamatalaina le matagofie o lenei aso mo ia, ma lona lagonaina moni o ia lava o se tagata fou… . O la maua uluai papatisoga lena—e le o se faamalo mo au po o se isi lava. Na ia faaliliuina ia lava.”

O lenei mea na suia ai le talafaasolopito o lo’u olaga. Ou te le mautinoa pe na mafai ona muai silafia e lo’u tama le atamai o lana mea sa fai, ae ou te alofa ia te ia ona o le mea sa ia faia. Ua 30 tausaga talu ona maliu o ia, ae o le a ou faamamaluina ma faamanuina lona igoa e faavavau.

O lo’u tama o le atalii o Litunia, ae na fanau o ia i Sikotilani. Na siitia atu o ia i Pasila a o laitiiti lava. O lona tomai e tautala i le faaPeretania, na faafaigofie ai lona liua, talu ai e mafai ona ia faitauina le Tusi a Mamona i le faaPeretania, ma e lei i ai foi se faaliliuga faatuatuaina i le faaPotukale. O le faafitauli lea tau gagana na le mafai ai ona auai lo’u tina i le Ekalesia seia oo i ni nai tausaga mulimuli ane, peitai ina ua auai o ia, sa avea o ia ma se faataitaiga mamana o le tuuto atu i isi ma le alofa i le Atua i lo matou aiga. Ua 92 nei tausaga o lona soifua, ma o loo i ai iinei i le aso. Ua ou maua ai le olioli tele ou te faapea atu ai, ou te alofa ia te ia mo lona faamaoni maoae. O le a ou faamamaluina foi ma faamanuina lona igoa e faavavau.

Ou te saafi i le lototoa o lo’u tama na papatiso ai i le Ekalesia e ui lava i tulaga sa feagai ma ia i lena taimi. Sa le i faigofie mo ia. Sa lei papatiso lona toalua faatasi ma ia. O inugaava ma ulaulaga o ni faaosoosoga malolosi ia. Sa mativa o ia. Sa tetee foi lona tina i lona auai i le Ekalesia, ma sa faapea atu lona tina, afai e papatiso o ia, o le a le toe ta’ua o ia o sana tama. O le toalaiti o tagata o le Ekalesia i Pasila e le atoa le 300, na leai ai se faletapuai iina. Ou te matua maofa lava i le naunautai ma le lototoa o lo’u tama.

Pe na mafai faapefea ona ia faia se faaiuga faapena i le feagai ai ma le tele o tulaga e le lelei? E faigofie lava le tali: ona sa faitau e lo’u tama le Tusi a Mamona. Ina ua ia faitauina, sa oo ina ia iloaina le moni o le savali o le Toefuataiga. O le Tusi a Mamona o se faamaoniga O Le Ekalesia a Iesu Keriso o le Au Paia o Aso e Gata Ai, e moni. O loo aoao mai e le Talai La’u Talalelei e faapea “o le Tusi a Mamona faatasi ai ma le Agaga, o [le] punaoa aupito mamana lea i le liuaina” ([2004], 109).

Na tautino mai e Peresitene Gordon B. Hinckley: “O i latou ua faitauina ma le loto tatalo [le Tusi a Mamona], pe mauoa pe matitiva, pe aooga pe leai, ua tuputupu ae i lona mana …

“… E aunoa ma so’u faatuai ou te folafola atu ai afai o le a e faitauina ma le loto tatalo le Tusi a Mamona, tusa lava pe ua faafia ona e faitau i ai muamua, o le a oo mai i o outou loto … le Agaga o le Alii. O le a outou maua se faaiuga ua faamalosia, e savavali i le usiusitai i ana poloaiga, ma o le a malosi atu se molimau i le moni o loo soifua le Alo o le Atua” (“O Le Mana o le Tusi a Mamona,” Ensign, Iuni 1988, 6; tagai foi “The Book of Mormon,” Tambuli, Oke. 1988, 7).

Na moni lava nei folafolaga mo lo’u tama ma lo’u aiga. E tusa ai ma mea na aoaoina ai i matou, matou te faitauina faaleaiga ia tusitusiga paia i aso uma. Ua tele tausaga o matou faia. Ua matou faitauina le Tusi a Mamona mo le tele o tausaga, ma o le a matou faia pea lava pea. E pei lava ona folafolaina mai, na oo mai le Agaga i loto o lo matou aiga, ma ua matou lagonaina ai foi se faaiuga ua faamalosia e savavali ma le usiusitai i Ana poloaiga, ma ua i ai foi se molimau ua malosi atu e uiga i le moni o loo soifua le Alo o le Atua.

Pe a e iloa ua moni le Tusi a Mamona, e te iloa ai foi o Iosefa Samita na tofia e le Atua e toefuatai le Ekalesia a Iesu Keriso i le fogaeleele. Ua e iloa na vaai Iosefa Samita i le Tama ma le Alo. Ua e iloa e na o le tasi lava le faatuatua ma le papatisoga moni e tasi. Ua e iloa o loo soifua se perofeta a le Atua i le fogaeleele i le taimi nei, ma ua ia te ia ki uma o le perisitua ma le aia tatau e faaaoga ai na ki, e faapei ona faia e Peteru anamua. Ua e iloa o Iesu Keriso o le Alo o le Atua, ua na o le pau lena o le igoa e mafai ona e maua ai le faaolataga. Ua e iloa o loo soifua le Atua le Tama ma e alofa o Ia ia te oe. Ua e iloa e atoatoa lelei Lana ata o le faaolataga, ma ua ia te oe le naunautaiga e faatino sauniga, ola i poloaiga, ma tumau e oo i le iuga.

Ou te lagona le faanoanoa pe afai e i ai se tasi ua tuuina atu i ai le Tusi a Mamona ma ua faamatala atu i ai nei mea ia te ia ae musu lava e faitau i ai. Ou te lagona le faanoanoa ona o nisi tagata o e ua faatagaina i latou lava e uunaia e isi, e mumusu e sailiili i le tusi, ma latou faataatia ese e pei o se mea e le aoga, e le auai i le taumafataga faaleagaga e ofoina atu e le tusi. Ia te au lava ia, o lenei tulaga e faigata ona malamalama i ai. E faapei o se atalii po o se afafine ua nofo valavala ma se tama alofa, ae e musu e faitau se tusi mai ia te ia [lona tama], e aunoa ma le tatalaina o le teutusi. O i latou e faia se filifiliga faapena, ua faapei o tamaiti e faaleaga ona fai o e mumusu e tofo i se meaai na saunia ma le alofa mo i latou e lo latou tina agalelei.

E faaali mai e le Atua Ana upumoni pe mulimuli tagata i le apoapoaiga a Moronae i le Moronae 10:3–5. O le Talai La’u Talalelei o loo otootoina mai ai le aoaoga a Moronae e faapenei:

Muamua, “faitau le Tusi a Mamona ma mafaufau loloto i lona savali e faatatau ia Iesu Keriso.”
Lua “tatalo i le Atua ma le faatuatua ia Iesu Keriso ina ia maua se molimau e moni le Tusi a Mamona, ma o Iosefa Samita o le perofeta o le Toefuataiga.”
Tolu “tatalo faamaoni ma le manatu tonu i ai, o lona uiga ua latou faamoemoe e galulue e tusa ai ma le tali latou te maua mai le Atua” (117).

Ia i latou o e ono finau mai e le mafai ona tatou iloa nei mea, ou te molimau atu e mafai, pe afai e lava lo tatou lotomaualalo e fai e pei ona aoaoina ai i tatou e le Atua, e ala i Ana perofeta i lenei lalolagi. O le talitonu i se mea e ese mai o le taliaina lea o manatu faavalevalea faapea e le silafia e le Atua le mea e mafai ona maua ai le upumoni, pe le o i ai foi ia te ia le mana e faaali mai ai ia te i tatou. E le faapea ona ua le faatinoina e se tasi le folafolaga mai lenei tusi ona le faia ai foi lea e isi.

Ou te alofa i se a ma faamamalu i le igoa o lo’u tama? Aua na faitau ma faatino e lo’u tama le folafolaga a le Tusi a Mamona. Ou te alofa i se a ma faamamalu i le igoa o lo’u tama? Aua e lei liliuese o ia mai le tali na ia mauaina, e ui lava ina feagai ma luitau e tele. Ou te alofa i se a ma faamamalu i le igoa o lo’u tama? Aua na ia faamanuiaina lo’u olaga, e oo lava ae ou te lei fanau mai, i le i ai lea o lona lototoa e faia ai le mea na finagalo le Atua na te faia.

Ou te valaau atu ia i latou uma o e o lagona mai lo’u leo i le aso, ia faitau i le Tusi a Mamona, ma ia faaaoga folafolaga o i ai. O i latou o le a faia, o le a latou iloa e moni lava le tusi.

Ou te tuuina atu lau molimau o le Tusi a Mamona o le afioga a le Atua. Ona o lena, ua ou iloa ai o Iosefa Samita o se perofeta a le Atua. Ua ou iloa na te le i tusia le Tusi a Mamona, ae na ia faaliliuina e ala i le mana o le Atua. Ua ou iloa o Thomas S. Monson o se perofeta a le Atua i luga o le fogaeleele i le taimi nei, ua na o le pau lea o le tamalii i luga o le fogaeleele o loo umia ki uma o le perisitua ma i ai le aia tatau e faaaoga ai. Ua ou iloa o Iesu Keriso o lo tatou Faaola ma o loo soifua o Ia. Ua ou iloa o loo soifua le Atua ma e alofa ia i tatou. I le suafa o Iesu Keriso, amene.