Toe Foi i le Aiga
Oka se aafiaga matagofie e mafai ona tatou faia i olaga o le anoanoai … pe a tatou taliaina le valaaulia a le Faaola e fafaga Ana mamoe.
E matuai malulu lava i le taimi o le taumalulu i lo’u nuu o Minasa, Iurukuei. A goto le la, e masani ona tuu e lo’u tina ni fafie i le magalafu ina ia faamafanafana ai lo matou potu’ai, ona faasolosolo taitasi mai lea, o ou matua, tuafafine, ma au e aofaga faatasi, pe a uma ona fai a matou feau e masani ai. O lena potu ua manaia i le mafanafana o le magalafu ua tuufaatasia ma le mafuta ai o le tasi ma le isi o tagata o lo’u aiga, na toto ai ni lagona i totonu ia te au, o le a ou faapelepeleina e faavavau.
Ina ua uma ona ma faavaeina ma lo’u toalua lo maua lava aiga, po o fea lava ma te nonofo ai, matou te faapotopoto soo uma ai, pe faataamilomilo i se magalafu pe na o le mafanafana foi matou te lagonaina i taimi uma matou te mafuta ai ma le ma fanau.
Oka se matagofie o lea faalogona! Oka se nofoaga ina a matagofie o lo matou fale, o lo matou aiga, o lo matou maluapapa.
I le gasologa o tausaga sa nonofo ai lo matou aiga i atunuu eseese, ae o atunuu taitasi, sa mafai ona matou maua mai i totonu o le Ekalesia lagona lava e tasi o le mafanafana mai tagata o uarota taitasi sa matou auai.
E ao i tagata taitoatasi o le Ekalesia ona maua le avanoa e lagonaina ai na lagona lelei, ma e mafai ona latou maua nei lagona ia tatou taumafaiga o le toefaatoaagaina mai ma le galuega faafaifeautalai.
Se i ou faasoaina atu se mea sa tupu i ni siteki ma itu i Peru, ma o le faia o na mea o le a ou faaaogaina ai ni igoa o aiga: o le aiga o Causo, o le aiga o Banda, o le aiga o Vargas, ma … e umi le lisi, ma e aofia ai le silia ma le 1,700 igoa o tagata ua toe toaaga mai. O i latou o tagata mai uarota eseese, paranesi, siteki, ma itu mai vaega eseese o le atunuu o Peru, o e sa valaaulia e peresitene o siteki, epikopo, ma taitai o korama ma faalapotopotoga a ausilali e toe foi mai. Sa latou taliaina le valaaulia sa tuuina atu e taitai perisitua, o faifeautalai faamisiona ma isi tagata na latou tauaveina le tiutetauave e fesoasoani ai ia te i latou e toe foi mai i le Ekalesia ma o mai ia Keriso. Ia i latou ia taitoatasi, matou te fai atu i ai, Susu mai. Maliu mai!”
O lea le mea na mafai ai e nei tagata ona toe foi mai i le ekalesia? O le taumafaiga tuufaatasi a siteki e 14 ma itu e 4 i se misiona, sa galulue mo le tausaga e tasi e faataunuu le toe faafoi mai o nei tagata e ala i le toefaatoaagaina mai ma sauniga o le papatisoga ma le faamauga.
Na musuia lenei taumafaiga i upu a le Faaola: “Pe e te alofa mai ia te au? … Fafaga i au mamoe” (Ioane 21:16) ma le aoaoga a Peresitene Tomas S. Monson o le na saunoa mai: “Ua tele tausaga o tatou tuuina atu talosaga i e ua le toaaga mai, o e ua le fiafia, o le au faitio, ma le tagata solitulafono—e foi mai. ‘Foi mai ma taumamafa faatasi i le laoai a le Alii, ma toe tofo i fua suamalie ma le faamalieloto o le faaaumea ma le Au Paia” (“Toe Tepa i Tua ma Agai i Luma,” Liahona, Me 2008, 87).
Ina ua lagona e Alema le mafatia tele mo agaga o ona uso, sa ia tatalo i le Alii ma faapea atu:
“Le Atua e, pe e te alofa mai ea ia te i matou, ina ia manuia i matou e toe faafoisia mai i latou ia te oe, ia Keriso.
“Silsila mai ia, le Atua e, ua taua o latou agaga; o matou uso nisi o i latou e toatele, o lea ia e foai mai ia te i matou le Atua e, le mana ma le poto, ina ia matou faafoisia mai ia te oe i latou nei, o matou uso” (Alema 31:34–35).
Sa faasoa mai ia te au e Peresitene Angel Alarcón mai le siteki a Puente Piedra i Lima, Perú, le aafiaga lenei: “O Aso Toonai taitasi, matou te asiasi ai ma faifeautalai, o se epikopo, o ni taitai mai faalapotopotoga a ausilali, i tagata ua le toe toaaga mai, o ni nai tagata e le auai i le ekalesia, ma ni tagata faatoa liliu mai, mai le 8:30 i le taeao seia oo i le aoauli.”
Ina ua oo mai i le vaega lea o lana tala, sa oo mai i lo’u mafaufau upu o le viiga:
“Pele i le Leoleo Mamoe
O Ana mamoe uma;
Alofa Ia ia i latou,
Sili i auro ma ario.
Ua pele ia te Ia,
Ana mamoe ua se,
Na te saili i mauga,
Ma vailoto tele”
(“Pele i le Leoleo Mamoe,” Viiga, Nu. 135)
Sa maua e Uso Vargas, o le sa tu lona fale i se vaega e tau le oo i ai nisi, se telefoni i se taeao o se Aso Toonai. O Peresitene Alarcon, na valaau mai i lana telefoni feaveai, e ta’u mai ua taunuu mai. Ona fai mai lea o Uso Vargas: “Ua ou ofo; e ese le faigata ona oo mai se tasi i lo’u fale.”
Na sau le tali: “Ia, o lea ua ou tu i le taimi nei i lou faitotoa, ma ou te fia talanoa ia te oe. Matou te manaomia oe, ma e matou te valaaulia oe e te susu atu i la tatou sauniga lotu taeao.”
Ona tali atu lea o le tagata ua tele tausaga e le o toe lotu: “O le a ou alu atu.” O iina na toe amata ai lana malaga toe foi mai.
“Aua na ou fia ai, ona outou avae ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai au ma tagata ese, ona outou talia lea o au:
Na ou le lavalava, ona outou faaofuina lea o au; na ou ma’i, ona outou asiasia mai lea o au; na ou i le falepuipui, ona outou o ane ai lea ia te au.
“Aua na faia e outou i le tasi o e aupito itiiti o o’u uso nei, o au lea na outou faia i ai.” (Mataio 25:35–36, 40)
A o ou auai i sauniga lotu o le Aso Sa i ni nai vaiaso ua mavae, sa ou maua le avanoa e feiloai ai i se uso sa faatoa toe auai mai mo le taimi muamua ina ua mavae le tele o tausaga e le o toe toaga mai. Sa o mai ma lona toalua, e le auai o ia i le Ekalesia.
Ina ua ou fesili pe aisea ua toe tonu ai e toe foi mai, sa ia tali mai, “Na valaaulia au e la’u uo o Fernando ma lenei epikopo lelei ou te sau, ma o lea na ou sau ai. Sa ou maua le Ekalesia i le tele o tausaga ua mavae, ma o loo i ai lava si afi mumu laitiiti o loo mu pea i totonu o lo’u loto.
Atonu e le o mutele, ae o loo i ai iina.” Sa ou faaiu atu, “Ia, i le avea ai ma ou uso, o le a tatou feulaina faatasi lena mumu ina ia ola pea.” Ona ma feopoai ai lea.
O le naunau, gauai, ma le manatu i o tatou uso, o ni faaaliga maoae lea o le alofa mo lo tatou Tama Faalelagi. O le mea moni, tatou te faailoa atu lo tatou alofa i le Atua pe a tatou auauna atu, ma pe a tulimatai atu lenei auaunaga i le soifua lelei o lo tatou tuaoi.
Na aoao mai le Tupu o Peniamina e uiga i lena mea: “Faauta foi, ou te fai atu nei mea ia te outou ina ia outou aoao i le poto, ina ia outou iloa lenei mea, pe a i ai outou i le galuega a o outou uso ua na ona i ai outou i le galuega a le Atua.”
Oka se aafiaga matagofie e mafai ona tatou faia i olaga o le anoanoai o aiga ua le toe toaaga mai, ma i latou e le o ni tagata o le Ekalesia pe a tatou taliaina le valaaulia a le Faaola e “fafaga Ana mamoe” ma fesoasoani i tagata uma ia “o mai ia Keriso”!
O nei aafiaga ua na o ni nai mea iti o mea o loo faia le leoa e le fia afe o uso: e talia ai le valaaulia a le Alii e fafaga Ana mamoe. Ia tatou manatua o le Alofa ma le Auauna Atu e pei o se masaga e saili e le tasi le mafutaga ma le isi.
Talosia ia tofu taliaina e i tatou taitoatasi, e avea ma faataitaiga matagofie o lo tatou alolofa mo lo tatou Tama Faalelagi, le tauaveina o le matafaioi o ni tagata o lenei Ekalesia e sailia i latou e le o faatasi ma i tatou iinei! Pe afai e ala atu i lenei auaunaga alofa o le a tatou aumaia ai tau lava o se agaga se toatasi i le ekalesia, pe afai foi o le a tatou faia lena mea ma faamoemoega i o tatou olaga, pe le tele ea le olioli o le a tatou aumaia i o tatou luga ma luga o i latou sa tatou fesoasoani i ai e toe foi mai ia Keriso!
I le toafa tele, Ua Ia valaau mai
Ma Ia ‘aioi mai:
“Ia outou saili mai,
A’u mamoe ua se?”
(Viiga nu. 135)
Ou te molimau atu o i tatou o atalii ma afafine o se Tama Faalelagi e alofa ia i tatou ma na te silafia i tatou taitoatasi i o tatou lava igoa.
Ou te tuuina atu la’u molimau i le alofa o lo tatou Tama ma le Faaola. Sa muai alofa mai o Ia ia te i tatou ma sa auina mai ai Lona Alo ina ia auala mai ia te Ia, ona mafai ona tatou toe foi atu. Ou te faaalia lo’u alofa mo Ia, o lo’u Faaola, o lo’u Alii, o lo’u Matai, ma lo’u Togiola, i le suafa o Iesu Keriso, amene.