Ua Fofogaina Mai e Peresitene Monson ni Malumalu Fou

E toatele isi tagata o le Ekalesia o le a maua faamanuiaga o malumalu pe a maea ona fausia ni malumalu fou se lima, sa fofogaina i le taimi o le konafesi aoao. Na fofogaina mai e Peresitene Thomas S. Monson fuafuaga mo malumalu fou i lana tuleiga amata i le sauniga i le taeao o le Aso Toonai, aso 4 o Oketopa, 2008.

O malumalu fou o le a fausia i Calgary, Alberta, Kanata; Córdoba, Atenitina; o le eria e lata i Kansas City, Misuri, ISA; Filatelefia, Penisilevania, ISA; ma Roma, Italia. Ua uma ona maua mai nofoaga mo ia malumalu fou.

“O se aso faamamaluina mo i tatou le molimauina o le fofogaina mai o malumalu fou e lima e lo tatou perofeta pele,” o le saunoaga lea a Peresitene Dieter F. Uchtdorf, Fesoasoani Lua i le Au Peresitene Sili, i lana saunoaga i le konafesi ina ua maea le faasilasilaga. “O se aso matagofie tele mo i tatou uma.”

O le malumalu i Calgary, Alberta, Kanata, o le a fausia i le fanua o le Ekalesia e sosoo ma se falelotu o i ai nei i le itu i matusisifo o le afioaga. O le a avea ma malumalu lona valu lea i Kanata ma o le lona tolu lea o malumalu i le itumalo o Alberta. O isi malumalu i Kanata e aofia ai malumalu i Halifax, Nova Scotia; Edmonton, Alberta; Cardston, Alberta; Regina Saskatchewan; Toronto, Ontario; Montreal, Quebec; ma Vancouver, British Columbia (o le malumalu o British Columbia o loo fausiaina i le taimi nei).

O le malumalu i Córdoba, Atenitina, o le a fausiaina i le nofoaga o loo i ai le falelotu o Belgrano, e sosoo ma le maota o le peresitene o le misiona. O le a avea ma malumalu lona 34 i Amerika Latina ma le malumalu lona lua i Atenitina. O le malumalu muamua i Atenitina sa faapaiaina i le 1986 o loo i le taulaga o Buenos Aires.

O le faaauau pea o le tuputupu ae o le Ekalesia i le Iunaite Setete o loo atagia i fuafuaga ua fofogaina mo se malumalu i le eria e lata i Kansas City, Misuri, ma i Filatelefia, Penisilevania. O nei malumalu o le a faaopoopo atu i le tele o isi malumalu i le Iunaite Setete atoa. O le malumalu o le a tautuaina le eria e lata i Kansas City o le a fausia i le Itumalo o Clay, Misuri, e i totonu o tuaoi o Kansas City i fanua ainā i le atinaega o Shoal Creek. O le malumalu i Filatelefia o le a fausia i totonu o le taulaga, e talitutusa ma isi malumalu na fausia i eria i totonu o le taulaga e pei o Manhattan ma Hong Kong.

O le a matuai faamanuiaina le Au Paia i le Metiterane mai le fofogaina o fuafuaga mo se malumalu i Roma, Italia. O le malumalu o le a faaaogaina ai vaega o se fanua e 15-eka (6-ha) e umia e le Ekalesia i talaane o le auala e siomia ai le vaega i matusasae o Roma. O le malumalu na fofogaina o le a avea ma malumalu lona 12 i Europa. O le a faamanuiaina tagata o le Ekalesia i atunuu e lata ane i ai i le puupuu o le taimi e femalagaai ai ma tuuitiitia ai le totogi o femalagaaiga.

O le taimi nei ua 128 malumalu ua faapaiaina o loo faaaogaina ma le isi 17 na fofogaina mai pe o loo fausiaina, ua atoa i ai le 145 o malumalu ua fofogaina mai po o faaaogaina i le lalolagi atoa.