O Le Fiafia, O Lo Outou Talatuu

Peresitene Dieter F. Uchtdorf

Fesoasoani Lua i le Au Peresitene Sili

O lo tatou tofi—ma le faamoemoega o la tatou malaga tele i lenei lalolagi—o le sailia lea ma ia iloa le fiafia e faavavau.

Ata

Dieter F. Uchtdorf

Ou te faafetai lava, i lo’u uluai avanoa lenei ou te lauga atu ai i tamaitai o le Ekalesia ua faapotopoto faatasi i vaega uma o le lalolagi. Ua faapitoa lo tatou faamamaluina ona o le mafuta mai o le susuga a Peresitene Monson ma Peresitene Eyring. Ua pamai foi le aufaipese i o tatou loto. Ua musuia foi i tatou i savali a Sister Thompson, Sister Allred, ma Sister Beck.

Ina ua ou iloaina o le a tatou mafuta i le aso, sa ou mafaufau i le tele o tamaitai sa faatulagaina lo’u olaga: o lo’u toalua lalelei o Harriet; o lo’u tina; ma le tina o lo’u toalua; o lo’u tuafafine; o lo’u afafine; o lo’u afafine faaletulafono; ma le toatele o uo. O lo’u olaga atoa sa siomia e tamaitai o e sa musuia, aoao mai, ma faamalosiauina au. O le tele lava, ua avea au ma tagata ua tulai atu i le taimi nei, ona o nei tamaitai maoae. O taimi taitasi uma lava ou te feiloai ai i tuafafine o le Ekalesia, ou te lagona ai ua ou i ai i le lotolotoi o agaga ofoofogia. Ou te faafetai ina ua ou i ai iinei, faafetai atu mo a outou taleni, agaalofa, ma la outou tautua. Ae silisili i lo na mea uma, ou te faafetai mo o outou faasinomaga: o ni afafine faapelepele o lo tatou Tama Faalelagi ua i ai ni aoga e leai se tuaoi.

Ou te talitonu e le o se mea e ofo ai, ae o eseesega i le va o alii ma tamaitai e mafai ona tele taimi e fai ai lava si matilatila—faaletino ma faalemafaufau, e faapea foi i le faalelagona. O se tasi o ala aupito sili e mafai ona ou mafaufau i ai e faapupula ai lenei mea, o le ala ma te kukaina ai ma lo’u toalua sa matou meaai.

A sauni e Harriet se meaai, o le matua maoae lava. O ana kuka e fai o kuka mai atunuu eseese, ma e tele lava ina ona faia kuka mai atunuu sa ma asiasi i ai. O le taatia mai o se meaai e matua matagofie lava. O le mea moni, e tele lava ina matua manaia naua mai, e foliga ai o se solitulafono le tausamiina. O se matuai taumafataga lava i le vaai, e pei foi o le lagona o le tofo.

Ae e mautinoa foi lava, tusa lava po o le a le atoatoa o mea uma, i le vaai, ma le tofo, ae e faamalie mai lava Harriet mo se mea ua ia manatu e lei lelei. “Malie ua fai si tele o le fiu na ou tuu i ai,” o sana tala lea, po o le, “A toe fai, e sili pe a ou toe faaopoopo i ai se kale ma se isi laulola se tasi.”

Se i ou faatusatusaina ma le ala ou te fai ai se kuka. Mo le faamoemoega o lenei tautalaga, sa ou fesili ai ia Harriet e ta’u mai po o le a le meaai sili ua ou kukaina.

O lana tali: o fuamoa falai.

Na o le tasi lava le itu e falai.

Ae e le na o le pau ai lena. E i ai la’u kuka faapitoa lava e ta’u o le Knusperchen. Atonu e foliga mai le igoa o se meaai e seasea ona maua, e te ono maua i se faleaiga faapitoa. Sei ou faasoa atu le faiga. Tipi faalaiti le falaoa Farani ona faapa’u taifaalua lea.

O le faiga lena!

O lea la, i le va o fuamoa falai—tusa lava pe o la e gaoa, ma le Knusperchen—tusa lava pe ua mu—pe a ou kuka, ou te lagona lava si o’u toa.

Atonu o lea eseesega o au ma lo’u toalua o se faatelega teisi lea, ae e faapupula mai ai se mea e i luga atu o le saunia o meaai.

Ia te au lava ia, e foliga mai e i ai taimi e le faatauaina ai e tuafafine o latou tomai—latou te taulai atu i mea e le o i ai po o le le atoatoa, nai lo mea ua ausia ma pe o ai moni foi i latou.

Atonu e te vaaia lenei uiga i se tasi e te iloa lelei.

O le tala lelei o i ai, o loo faasino atu ai i se uiga auau mama tausaafia: o le faanaunauga faalenatura e faamalie le Alii i le mea sili tou te mafaia. Ae paga lea, e mafai foi ona tau atu ai i le atugalu, vaivai, ma le le fiafia.

Ia i Latou Uma O E ua Vaivai

O le aso, ou te fia tautala atu ia i latou ua manatu latou te le gafatia, ua lotovaivai, pe ua vaivai—o le mea moni, ou te fia tautala atu ia i tatou uma lava.

Ou te tatalo foi ina ia faalautele e le Agaga Paia au upu, ma faaee atu i ai ni uiga faaopoopo, o se malamalamaaga, ma musumusuga.

Ua tatou iloa e i ai nisi taimi e ono faigata ai ona fai uma ni tiutetauave. O le mea moni, i lo tatou lalolagi o suiga, luitau, ma mea e tatau ona fai, e i ai taimi e foliga e toetoe lava ina a le mafai ona alofia lagona lofituina e lagona o le mafatia ma le faanoanoaga.

Ou te le o faapea atu e mafai ona na ona tatou euina se ki, ma taofi lagona leaga ia tatou te mafatia ai. E le o se tautalaga faaosofia lenei, po o se taumafai e fautuaina i latou ua gogoto ifo i le oneone mimiti e mafaufau faapea, o la e faatalaleu i se matafaga. Ua ou iloa i o tatou olaga uma, o loo i ai ni popolega moni. Ou te iloa o loo i ai ni loto iinei i le aso, o lo o matuai loloto le faanoanoa o i ai. O isi o loo tauivi ma le fefe ua faaletonu ai le agaga. O nisi, o le tuuatoatasi o lo latou tofotofoga lilo lea.

O nei mea e le faapea e le taua.

E ui o lea, ou te fia tautala atu e uiga i ni mataupu faavae se lua e ono fesoasoani ia te outou e maua ai se ala i le filemu, faamoemoe, ma le olioli—e oo lava i taimi o tofotofoga ma le mafatiaga. Ou te fia tautala atu e uiga i le fiafia o le Atua, ma pe faapefea e i tatou taitoatasi ona tofo i ai e ui lava i avega o loo siomia ai i tatou.

O Le Fiafia o le Atua

Se i ou tuuina atu muamua se fesili: Mata o le a le ituaiga fiafia e aupito sili atu e mafai ona maua? Ia te au lava ia, o le tali i lenei fesili, o le fiafia o le Atua.

E tau atu ai foi i se isi fesili: O le a le fiafia o lo tatou Tama Faalelagi?

Atonu e le mafai ona tali lenei fesili, aua o Ona ala e le o o tatou ala ia. “Aua e sili ona maualuga o le lagi i le lalolagi, ua faapena ona sili ona maualuga o ala [o le Atua] i o [tatou] ala, ma [Ona] manatu e [sili] i o [tatou] manatu.”¹

E ui lava ina le mafai ona tatou malamalama “i le uiga o mea uma,” a ua tatou “iloa o le [Atua] e alofa i ana fanau”² aua na Ia fetalai mai, “Faauta, o lau galuega lenei ma lou mamalu—ia faataunuuina le faaofuina o le tagata i le tino ola pea ma le ola e faavavau.”³

E mafai e le Tama Faalelagi ona faataunuu nei sini maoae e lua—o le tino ola pea ma le ola e faavavau o le tagata—aua o Ia o se Atua o le foafoaga ma le agaalofa. O le foafoaina ma le agaalofa o ni faamoemoega se lua e fai saofaga i le fiafia atoatoa o lo tatou Tama Faalelagi. O le foafoaina ma le agaalofa o gaoioiga ia e lua, e mafai e i tatou o Ana fanau agaga ona faia foi.

O Le Galuega o le Foafoaga

O le manao e foafoa, o se tasi o faanaunauga loloto o le agaga o le tagata. Tusa lava po o a tatou taleni, a’oga, talaaga, po o tomai, e tofu i tatou ma se moomooga faalenatura e foafoa pe fatu se mea e lei i ai lava muamua.

E mafai e tagata uma ona foafoa. E te le tau manaomia ni tupe, tulaga, po o uunaiga ina ia foafoa ai pe fatu se mea anoa, ma le matagofie.

O le foafoaga e aumaia ai le lotomalie o’oo’o ma le fiafia ua mae’a. Tatou te atiina ae i tatou lava pe a fetagofi atu o tatou lima i mea e lei faatulagaina ma moloina e avea ma se mea matagofie—ma ou te le o tautala atu e uiga i le faagasologa o le faamamaina o potu o lau fanau talavou.

Atonu e te faapea ifo, “E le o au o se tagata fatufatu mea fou. A ou pese, e masani lava ona paulua. Ou te le mafai ona tosi sao se laina e aunoa ma se vase. Na pau foi le mea e faaaoga i ai la’u falaoa pe afai, o le fai lea ma taopepa po o se tao faitotoa.”

Afai o ou lagona na, toe mafaufau, ma manatua o outou o afafine agaga o le Atua e aupito sili ona fatufatu mea fou i le lalolagi. Pe le ofoofogia ea le mafaufau faapea, o o tatou agaga aupito silisili na faafoligaina e se Atua o fatufatuga e le mavae ma faavavau lona alofa? Mafaufau i ai—o lou tino agaga o se fatufatuga aupito silisili, na foafoaina ma se matagofie, faamoemoega, ma le mana e le oo i ai le mafaufau.

Ae na foafoaina ea i tatou i se a? Na foafoaina i tatou ma le faamoemoega ma le gafatia e iloa ai le atoaga o le olioli.⁴ O lo tatou tofi—ma le faamoemoega o la tatou malaga tele i lenei lalolagi—o le sailia lea ma ia iloa le fiafia e faavavau. O se tasi o auala tatou te maua ai lenei mea, o le fatufatuina lea o mea.

Afai o oe o se tina, e te auai faatasi ma le Atua i Lana galuega o le foafoaga—e le gata i le sauniina o tino faaletino mo lau fanau, ae o le aoaoina ma le faafaileleina o i latou. Afai e le o oe o se tina i le taimi nei, o taleni foafoa e te atiina ae, o le a saunia ai oe mo lena aso, i lenei olaga po o le isi.

Atonu e te manatu e leai ni au taleni, ae o se manatu faivavale sese lena, aua ua tofu uma i tatou ma taleni ma meaalofa, i tatou uma taitoatasi.⁵ O tuaoi o fatufatuga, e mamao i talaatu o pito o se ie e tusi ai ata suauu po o se laupepa, ma e le manaomia ai se pulumu, se peni, po o ki o se piano. O le foafoa po o le fatufatu, o lona uiga o le faatino mai lea o se mea e lei i ai muamua—o togalaau felanulanuai, o fale toafilemu, o manatua faaleaiga, o le talie faifai pea.

O le mea e te fatuina, e le faapea e tatau ona atoatoa. E a la—pe a ga’oa fuamoa pe mu foi faapa’u? Aua nei e faatagaina le fefe po o le toilalo e faalotovaivaia oe. Aua e te faatagaina leo o le au faitio e faapipili ai oe—pe o ni leo mai fafo po o totonu foi.

Afai e te manatu e te le mafai ona foafoa pe fatufatu, amata i sina mea laitiiti. Taumafai e vaai pe fia ni ataata e mafai ona fatuina, tusi se tusi faafetai, aoao se tomai fou, vaai se mea o avanoa ona teu faamatagofie lea.

Toeitiiti atoa se seneturi ma le afa talu ai, na saunoa ai Peresitene Polika Iaga i le Au Paia i na ona po. “O loo i ai se galuega tele e faia e le Au Paia,” na ia saunoa ai. “Ia agai i luma, ma faaleleia, ma faamatagofie mea uma o loo siomia ai outou. Faatoa le eleele ma faatoa o outou mafaufau. Fausia aai, teuteu faamatagofie mea tou te nonofo ai, fai ni togalaau, o laau suamalie, ma togavine, ma faia le laueleele ina ia matua nofogofie a oo ina outou vaavaai atu ia outou galuega, o le a outou fiafia, ma ia olioli foi agelu e o mai ma asiasi mai i o outou nofoaga matagofie. I le taimi nei ia saili e le aunoa e teuteu o outou mafaufau i uunaiga mama a le Agaga o Keriso.”⁶

O le tele o lo outou faatuatua ma faalagolago i le Agaga, o le tele foi lena o lo outou mana e foafoa ma fatufatu ai. O lo outou avanoa lena i lenei olaga ma lo outou taunuuga i le olaga a sau. Tuafafine, ia faatuatua ma faalagolago i le Agaga. A outou faaaogaina avanoa masani o o outou olaga i aso taitasi, ma fatufatu se mea matagofie ma mafai ona fesoasoani, e le gata ina ua outou faaleleia le lalolagi o loo siomia ai i tatou ae faapea foi le lalolagi o i totonu o outou.

O Le Agaalofa

O le agaalofa o le isi galuega maoae lea a lo tatou Tama Faalelagi ma o se uiga faavae foi lea o lo tatou faasinomaga o ni tagata. Ua poloaiina i tatou e “fesoasoani i e vaivai, ia sii ae lima o loo tautau i lalo, ma faamalolosia tulivae vaivai.”⁷ O soo o Keriso i le augatupulaga uma o le lalolagi, ua iloga lava i lo latou agaalofa. O i latou o e mulimuli i le Faaola, “e faanoanoa faatasi ma e faanoanoa … ma faamafanafana i e ua tatau i ai le faamafanafanaga.”⁸

A tatou aapa atu e faamanuia olaga o isi, o le a faamanuiaina foi o tatou olaga. O le auauna atu ma le ositaulaga e tatalaina ai faamalama o le lagi, ma mafai ai ona faaifo mai faamanuiaga i o tatou luga. E moni lava o loo sisila mai lo tatou Tama Faalelagi pele ia i latou o e tausia e aupito iti o Lana fanau.

A tatou siitia isi, ua tatou tutulai maualuga ae teisi foi i tatou lava. Na aoao mai e Peresitene Spencer W. Kimball, “O le tele o lo tatou auauna atu i tagata i ala talafeagai, o le tele foi lena o mea aano mo o tatou agaga.”⁹

E talitonu Peresitene Gordon B. Hinckley i le mana faamalolo o le auauna atu. Ina ua mavae le maliu o lona faletua, sa ia tuuina mai se faataitaiga tele i le Ekalesia, i le ala na ia faatofuina ai o ia lava i le galuega ma le auauna atu i isi. Na ta’ua faapea na tali atu Peresitene Hinckley i se tasi tamaitai na faatoa maliu lona toalua, “O le galue o le a faamaloloina ai lou faavauvau. Auauna atu i isi.”

O ni upu maoae nei upu. A tatou faagoto ifo i tatou lava i le auauna atu mo isi, ona tatou maua ai lea o o tatou lava olaga ma lo tatou lava fiafia.

Na faaalia ai e Peresitene Lorenzo Snow se manatu faapea foi: “Afai tou te feagai ma sina faanoanoa laitiiti, ia vaavaai solo ma saili se tasi e sili atu ona leaga sona mafatiaga nai lo oe lava; alu i ai ma saili po o le a le pogai, ona e taumafai lea e aveesea i le atamai lea na tuuina atu e le Alii ia te oe; ma o le mea muamua o le a e iloa, ua tea ese atu lou faanoanoaga, ua e lagonaina le malamalama, ua i ou luga le Agaga o le Alii, ma foliga mai ai ua faamalamalamaina mea uma.”¹⁰

I le taimi nei i le lalolagi o filosofia taatele, o polokalama faamaimautaimi a televise, ma tusi faatupu fiafia ua fai mai e fesoasoani ia te oe, atonu e foliga feteenai la’u fautuaga ma le fautuaga a le poto masani. O nisi taimi e ta’u mai ai ia te i tatou, o le tali i o tatou mafatiaga o le vaavaai ifo lea ia i tatou lava, ia tatou faaloloto, ia faaalu muamua ae totogi mulimuli, ma ia faamalie o tatou lava manao, tusa lava pe afaina ai i latou o loo siomia ai i tatou. E ui ina i ai taimi, e tatau ai ona tatou vaavaai muamua i mea tatou te manaomia, ae o le taunuuga e le oo atu ai i se fiafia tumau.

O Se Meafaigaluega i Aao o le Alii

Ou te talitonu o tamaitai o lenei Ekalesia, tusa lava po o le a le matutua po o tulaga faaleaiga, e malamalama ma faaaogaina upu aupito sili a James Barrie, o le tusitala o le Peter Pan: “O i latou e aumaia le lasusulu i olaga o isi, e le mafai ona latou taofia mo i latou lava.”¹¹ E tele taimi ua ou molimauina ai galuega le leoa o le agalelei ma le agaalofa e faia e tamaitai tamalii, o e ua latou tuuina atu i latou lava i le alofafua e le faatuaoia. E maena lo’u loto pe a ou faalogo i tala e uiga i tuafafine o le Ekalesia, ma lo latou faanatinati atu e fesoasoani atu ia i latou e manaomia le fesoasoani.

E i ai i latou i le Ekalesia—o alii ma tamaitai—e taumanatunatu pe mafai faapefea ona fai so latou sao i le malo. O nisi taimi o tamaitai nofofua, ua tetea ma toalua, pe ua maliliu a latou tane, e taumanatunatu pe o i ai se nofoaga mo i latou. O tuafafine uma i le Ekalesia, e matua taua lava—e le gata i lo tatou Tama Faalelagi, ae o le fausiaina foi o le malo o le Atua. O loo i ai se galuega tele e fai.

Ua tasi le tausaga talu ai i le sauniga foi lenei, na aoao mai ai e Peresitene Monson e faapea “ua siosiomia outou … i avanoa mo auaunaga… . E tele taimi o nai faatinoga iti o le auauna atu, na pau lava lena o le mea o loo manaomia e siitia ai ma faamanuia se tasi.”¹² Vaavaai solo. O loo i ai i le sauniga faamanatuga se tina talavou ma se fanau—ofo atu i ai tou te nonofo faatasi ma fesoasoani atu i ai. O loo i ai foi i lou tuaoi se alii talavou e foliga mai ua lotovaivai—ta’u i ai e te fiafia e mafuta atu i ai, ma ua e iloa lona lelei. O upu moni o le faamalosiau, e na o le loto alofa lava ma le naunau e manaomia ai, ae e mafai ona i ai se aafiaga e faavavau i le olaga o i latou o loo siomia ai oe.

E tuuina atu e outou na tuafafine ofoofogia galuega alofa i isi mo mafuaaga e sili mamao atu nai lo manaoga mo manuia faaletagata lava ia. O iina, ua outou faaaoao ai i le Faaola o lē, e ui lava o se tupu, ae na te lei sailia ni tulaga, e lei popole foi o Ia pe iloa mai o Ia e nisi. E lei fia tausinio o ia ma nisi. O Lona finagalo ia fesoasoani atu i isi. Sa faiaoga o Ia, faamalolo, talanoa, ma faafofoga atu i isi. Sa Ia silafia o le logologoa, e itiiti lava sona sao i faailoga vaaia o le manuia po o tulaga. Sa ia aoao atu ma soifua ai i lenei aoaoga faavae: “O le sili ia te outou e fai lea ma a outou auauna.”¹³

I le faaiuga, o le aofaiga o tatalo tatou te faia e mafai ona saofaga i lo tatou fiafia, peitai o le aofaiga o tatalo tatou te taliina e mafai ona sili atu lona taua. Ia pupula o tatou mata, ma vaai atu i loto mafatia, matau e ua tuulafoaiina ma atuatuvale; ia tatou lagonaina tatalo le leoa a isi o loo siomia ai i tatou, ma ia avea i tatou ma meafaigaluega i aao o le Alii e tali atu ai i na tatalo.

Faaiuga

Ou tuafafine pele, ua ia te au se faatuatua faatauvaa. Ou te talitonu, a outou faamaoni ma maelega i le tausiga o poloaiga a le Atua, a o outou faalatalata atili atu ia te Ia i le faatuatua, faamoemoe, ma le alofa, o le a galulue faatasi mea uma mo lo outou lelei.¹⁴ Ou te talitonu a outou faatofuina outou lava i le galuega a le Tama—ma a o outou agaalofa atu i isi—o le a Ia opoina outou i aao o Lona alofa.¹⁵ O le a suia le lotovaivai, lē gafatia, ma le vaivai i le ala o le ola, uiga anoa, agaalofa, ma le faataunuuina.

O le avea ai o ni afafine agaga a lo tatou Tama Faalelagi, o le fiafia o lo tatou tofi lea.

O outou o ni afafine filifilia o lo tatou Tama Faalelagi, ma e ala i mea tou te fatufatuina ma a outou galuega alofa e auauna atu ai, ua avea ai outou o se mana sili mo le lelei. O le a outou faia le lalolagi o se nofoaga e sili atu ona lelei. Ia outou lototetele; ia talitonu ma faatuatua. E alofa le Atua ia te outou. Matou te alolofa ma faamemelo ia te outou.

Ou te molimau atu ai i nei mea, ma tuuina atu a’u faamanuiaga o se Aposetolo a le Alii, i le suafa o Iesu Keriso, amene.